حجَّی 1–2؛ زکریاہ 1–4؛ 7–14

یروشلیم کی از سر نو تعمیر کے لیے بُہت سے اہم کام ہونے تھے۔ لیکن اِسرائیلیوں کی واپسی کے تقریبا 15 سال گزرنے کے بعد، خُداوند خائف تھا کہ ہَیکل کی تعمیر نو کو اَوّلین ترجیح نہیں دی گئی تھی (دیکھیے حجَّی 1:‏2–5؛ مزید دیکھیے عزرا 4:‏24)۔ جب آپ حجَّی 1؛ 2:‏1–9 پڑھیں، تو اِن سوالات پر غَور کریں:

• اِسرائیلیوں کو کن نتائج کا سامنا کرنا پڑا کیوں کہ اُنھوں نے ہَیکل کو مکمل نہیں کیا تھا؟

• خُداوند نے اُن سے کن برکات کا وعدہ کِیا اگر وہ اُس کے گھر کی تعمیر مکمل کر لیں؟

• حجَّی 1:‏5–7 میں آپ کے لیے خُداوند کا پیغام کیا ہے؟ آپ اپنی ترجیحات کو خُداوند کے ساتھ کیسے ہم آہنگ کر سکتے ہیں؟ آپ کو اپنی زِندگی میں خُدا کو اَوّلیت دینے کے لیے کب برکت ملی ہے؟

آخِری ایّام کے اَوّلین مُقدّسِین کو اِسی طرح کی صُورتِ حال کا سامنا کرنا پڑا جو بنی اِسرائیل کی حجَّی کے زمانہ میں تھی (دیکھیے عقائد اور عہُود 95)۔ ہَیکلوں کی بابت خُداوند کے احساسات کے بارے میں آپ اِن دو مثالوں سے کیا سِیکھتے ہیں؟

مزید دیکھیں ڈیل جی رینلنڈ، ”یسوع مسِیح ہی خزانہ ہے،“ لیحونا، نومبر 2023، 96–99؛ ٹیرینس ایم ونسن، ”نجات دہندہ کے سچّے شاگرد،“ لیحونا، نومبر 2019، 9–11؛ ”اے خُدا، ہم تیرے گھر سے محبّت رکھتے ہیں،“ گِیت، نمبر 247؛ ”پرووہ سٹی سنٹر ہَیکل مکمل ہُوئی“ (ویڈیو)، ChurchofJesusChrist.org۔

7:17

آپ کی رائے میں، روز مرہ کی چِیزوں پر ”خُداوند کے لیے مُقدّس“ مرقُوم کرنے کی کیا اَہمیت ہے جیسے زکریاہ 14:‏20 میں ذِکر کِیا گیا ہے؟ (مزید دیکھیں خرُوج 28:‏36–38)۔ آج ہَیکلوں پر کندہ کرنے کی کیا اہمیت ہے؟ اِس جملے کا آپ کے لیے کیا مطلب ہے؟ آپ مُقدّس کو اپنی روزمرہ کی زِندگی کا حِصّہ کیسے بنا سکتے ہیں؟ اِن سوالوں پر غَور کریں جب آپ زکریاہ 1:‏1–6؛ 3:‏1–7؛ 7:‏8–10؛ 8:‏16–17 میں خُداوند کی طرف سے اُس کی اُمّت کو مزید مُقدّس بننے کی دعوتیں پڑھتے ہیں۔

یہ جاننے کے لیے کہ آنے والے زمانہ میں زِندگی کیسی ہو گی جب ہم سب خُداوند کے ساتھ مُقدّس حالت میں رہیں گے، آپ زکریاہ 2:‏10–11؛ 8:‏1–8؛ 14:‏9–11، 20–21 بھی پڑھ سکتے ہیں۔ زکریاہ کی یروشلِیم کے مُستقبل کی رویا کے بارے میں آپ کو کیا بات مُتاثر کرتی ہے؟ آپ کو یہاں کیا مِلتا ہے جسے آپ اپنی کمیونٹی میں دیکھنا چاہیں گے؟ آپ اِن حالات میں رہنے کے لیے کیسے تیاری کر سکتے ہیں جو زکریاہ نے بیان کیے ہیں؟

زکریاہ کے کئی نوِشتے یِسُوع مسِیح کی زمِینی خِدمت اور اُس کی آمدِ ثانی کی طرف اشارہ کرتے ہیں۔ ذیل میں زکریاہ کی چند نبوتوں کے ساتھ ساتھ اُن کی تکمیل کے بارے میں صحائف بھی درج ہیں۔ جب آپ اِن حوالہ جات کو پڑھتے ہیں تو اپنے آپ سے پُوچھیں: کہ یہ مُجھے نجات دہندہ کی بابت کیا سِکھاتے ہیں؟

• زکریاہ 9:‏9–11 (دیکھیے متّی 21:‏1–11؛ 1 پطرس 3:‏18–19)

• زکریاہ 11:‏12–13 (دیکھیے متّی 26:‏14–16؛ 27:‏1–7)

• زکریاہ 12:‏10 (دیکھیے یُوحنّا 19:‏37؛ مُکاشفہ 1:‏7)

• زکریاہ 13:‏6–7؛ 14:1–9 (دیکھیے متّی 26:‏31؛ عقائد اور عہُود 45:‏47–53)

آپ کے خیال میں یِسُوع کا یروشلیم میں اِستقبال کرنے والے لوگوں میں شامِل ہونا کیسا ہوگا جَیسا زکریاہ 9:‏9–11 میں بیان کِیا گیا ہے؟ آپ اپنی زِندگی، اپنے گھروں، اور اپنی کمیونٹی میں اِس کا کیسے خیر مقدم کر سکتے ہیں؟

مزید دیکھیے راہ نمائے صحائف، ”ممسُوح،“ گاسپل لائبریری؛ ”یروشلیم میں خُداوند کا فاتحانہ داخلہ“ (ویڈیو)، گاسپل لائبریری؛ رونلڈ اے ریس بینڈ ”خُدا تعالیٰ کی ہوشعنا،“ لیحونا، مئی 2023، 108–12۔

1:22

• جب آپ حجَّی 1:‏2–5 کے بعض حِصّوں کو اپنے بچّوں کے ساتھ پڑھتے ہیں، تو اُن کی یہ جاننے میں مدد کریں کہ خُداوند لوگوں سے خُوش کیوں نہیں تھا۔ ہو سکتا ہے کہ آپ کے بچّے آیت 6 سے کوئی فقرہ چُنیں اور اِس کی تصویر بنا سکیں۔ وہ اِسے ایک دُوسرے کو دکھا سکتے ہیں اور اندازہ لگا سکتے ہیں کہ ہر ڈرائنگ کس فقرے کی عکاسی کرتی ہے۔ جب ہم خُداوند کی مرضی کے علاوہ دیگر چیزوں پر وقت گُزارتے ہیں، تو یہ کیسا ہے کہ کھانا کھاتے ہیں لیکن پیٹ نہیں بھرتے؟ آپ ایک دُوسرے سے بات کر سکتے ہیں کہ آپ اُن چیزوں کے لیے وقت کیسے نِکال سکتے ہیں جو خُداوند کے لیے اہم ہیں۔

• آپ اپنے بچّوں کے لِیے آیت 8 بھی پڑھ سکتے ہیں اور اُنھیں دعوت دے سکتے ہیں کہ وہ ”پہاڑ پر جائیں،“ ”لکڑیاں لائیں،“ اور ”[خُداوند کے] گھر کی تعمیر کریں۔“ آپ کے بچّے اُن چِیزوں کی فہرست بنا سکتے ہیں جو وہ روزانہ کرتے ہیں، بشمول اُن کاموں کی جو خُداوند نے اُنھیں کرنے کو کہا ہے۔ اپنے بچّوں سے کہیں کہ ”[اپنی] راہوں پر غَور کریں“ اور فہرست میں جِن چِیزوں کو خُداوند سب سے زیادہ اہم کہہ سکتا ہے اُن پر دائرہ لگائیں۔

• رویا میں، زکریاہ نے سردار کاہن کو دیکھا جو ”مَیلے کپڑے پہنے ہُوئے تھا“ (زکریاہ 3:‏3)۔ فرِشتہ نے اُسے صاف سُتھرا لِباس دِیا۔ آپ زکریاہ 3:‏1–7 کو ایک ساتھ پڑھ کر اپنے بچّوں کو اہم سچّائیاں دریافت کرنے میں مدد دے سکتے ہیں اور بات چِیت کر سکتے ہیں کہ گندے کپڑے اور صاف ستھرے لِباس کس بات کی عکاسی کرتے ہیں۔ بپتِسما لینے کے بعد بھی، ہم اپنے گُناہوں سے کیسے پاک صاف ہو سکتے ہیں؟ ہمارے بپتِسمے کا عہد کیسے ہمیں ”[خُداوند کی] راہوں پر چلنے“ میں مدد کرتا ہے؟

• آپ اور آپ کے بچّے بپتِسما کی تصویر دیکھ سکتے ہیں، جیسا کہ اِس خاکہ میں ہے۔ ہم اپنے بپتِسما پر سفید لِباس کیوں پہنتے ہیں؟ آپ بپتِسما کے بارے میں گیت بھی گا سکتے ہیں، مثلاً ”جب مَیں بپتسما پاؤں گا“ (بچّوں کے گِیتوں کی کِتاب، 103)؛ یہ گیت اِس کی بابت کیا سِکھاتا ہے کہ خُداوند کیوں چاہتا ہے کہ ہم بپتِسما پائیں؟

• ہو سکتا ہے کہ آپ کے بچّے زکریاہ 9:‏9 میں پیشین گوئی کے واقعہ کو دیکھنا پسند کریں، جب یِسُوع اپنی فانی زِندگی کے آخِری ہفتہ کے دوران میں یروشلِیم میں آیا۔ اِس میں مدد کرنے کے لیے، اِنھیں اِس واقعہ کی تصویر دِکھائیں، جَیسا کہ اِس خاکہ میں ہے۔ آپ اُن کے ساتھ ”نجات دہندہ یروشلیم جاتا ہے“ (نئے عہد نامہ کی کہانیوں میں، 110–12) کا بھی تذکرہ کر سکتے ہیں۔ آپ کے بچّے تصُّویروں میں موجُود لوگوں کی طرف اِشارہ کر سکتے ہیں جو ”نہایت شادمان ہیں۔“ زکریاہ 9:‏9 میں بادِشاہ کون ہے؟ ہم اُس کے شُکر گُزار کیوں ہیں؟

  

  1:35

• اپنے بچّوں کی مدد کرنے پر غَور کریں کہ وہ زکریا کی پیشین گوئیوں کا نیے عہد نامہ کی آیات سے موازنہ کریں جو اُن کی تکمیل کو بیان کرتی ہیں۔ یہاں چند مثالیں دی گئی ہیں: زکریاہ 9:‏9 اور متّی 21:‏5–9؛ زکریاہ 9:‏11 اور 1 پطرس 3:‏18–19؛ زکریاہ 11:‏12 اور متّی 26:‏14–16؛ زکریاہ 13:‏7 اور متّی 26:‏31۔ ہم اِن آیات سے مُنّجی کی بابت کیا سِیکھتے ہیں؟