“19–25 octubre. “Naq toj maji’ nakatsiyaak chaq rik’in laa na’, laa’in ak xinsik’ chaq aawu”: Jeremias 1–3; 7; 16–18; 20,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)

“19–25 octubre. “Naq toj maji’ nakatsiyaak chaq rik’in laa na’, laa’in ak xinsik’ chaq aawu,”” Kim, Taaqehin: Li Najter Chaq’rab’ 2026

Jeremiah [Laj Jeremias], xb’aan laj Walter Rane

19–25 octubre: “Naq toj maji’ nakatsiyaak chaq rik’in laa na’, laa’in ak xinsik’ chaq aawu”

Jeremias 1–3; 7; 16–18; 20

Sa’ xtiklajik, laj Jeremias ink’a’ kixpaab’ naq truuq taawanq jo’ profeet. “Ink’a’ ninnaw aatinak,” chan (Jeremias 1:6). A’b’an li Qaawa’ kixk’ojob’ xch’ool, “Xink’e li waatin sa’ xtz’uumal aawe” (raqal 9). Laj Jeremias kireek’a naq “toj saaj chi us” (raqal 6), a’b’an li Qaawa’ kixch’olob’ naq ak xkawresiman us ta ink’a’ najultiko’ re—kik’ojob’aak sa’ xb’oqb’al naq maji’ yo’lajenaq (chi’ilmanq li raqal 5). Kikawu xch’ool laj Jeremias ut kixk’ulub’a xb’oqb’al. Kixtijeb’ li rey ut laj tij aran Jerusalen ut kixye reheb’ naq ink’a’ te’kole’q xb’aan lix pak’b’il santilaleb’. Li winq li “toj saaj chi us” ut ink’a’ naxnaw aatinak ki’ok chireek’ankil li raatin li Dios “chanchan jun li xam lochlo sa’ lix ch’ool” ut ink’a’ kiru chi ch’anab’aak (Jeremias 20:9).

Li resilal laj Jeremias, a’an ajwi’ laa wesilal laa’at. Kixnaw ajwi’ aawu li Dios rub’elaj naq katyo’la ut katxkawresi choq’ re laa k’anjel sa’ laa yu’am. Sa’ xyanqeb’ xkomon chik li na’leb’, laj Jeremias kiril chi rub’elaj jun xraqalil li k’anjel a’in: xch’utub’ankil lix tenamit li Dios, chi junjunqil, re “xk’amb’aleb’ chaq sa’ li tenamit Sion” (Jeremias 3:14). Ut us ta ink’a’ nakanaw k’a’ru tz’aqal taaye ut taab’aanu, “matxuwak … ; xb’aan naq wanqin aawochb’een, chan li Qaawa’” (Jeremias 1:8, 19).

Re xtzolb’al k’a’ru wan sa’ li hu Jeremias, chi’ilmanq “Jeremias sa’ li K’utul Raqal reheb’ li Loq’laj Hu.

Li na’leb’ re tzolok sa’ li ochoch ut sa’ li iglees

Jeremias 1:4–19; 7:1–7; 20:8–9

Neke’b’oqe’ li profeet chixyeeb’al li raatin li Dios.

K’oxla naq yookat chi aatinak rik’in junaq aawamiiw li maajun wa rab’ihom resileb’ li profeet ut nakach’olob’ chiru k’a’ru a’an rik’in roksinkil lix b’oqb’al laj Jeremias chi wank choq’ profeet sa’ Jeremias 1:4–19. K’a’ru nakataw sa’eb’ li raqal a’in li naxk’ut junaq na’leb’ chirixeb’ lix profeet li Dios? Naru ajwi’ nakawil Jeremias 7:1–7; 20:8–9.

Maare ajwi’ nakawaj raatinankil laa wamiiw chirix li yo’yookil profeet sa’ li kutankil a’in. Ma wankeb’ na’leb’ sa’eb’ li raqal a’in li naru neke’tenq’an? Qayehaq, k’a’ru “neke’xmich’” malaj “neke’xjuk’” li profeet sa’ li qakutankil? K’a’ru “neke’xwaklesi” ut “neke’xxaqab’”? (Jeremias 1:10). Chan ru nakanaw naq li yo’yookil profeet b’oqb’il xb’aan li Dios?

Chi’ilmanq ajwi’ Eb’ lix Raqalil li Paab’aal 1:6, 9; “¿Por qué necesitamos profetas?” (video), ChurchofJesusChrist.org.

Jeremias 1:5

Li Dios kixnaw wu naq maji’ ninyo’la.

K’a’ru kixtzol laj Jeremias chirix tz’aqal a’an sa’ Jeremias 1:5? Jo’ profeet li toj ak’ xb’oqb’al, k’a’ut naq aajel raj ru naq tixnaw li na’leb’ a’an?

Naab’al re li na’leb’ kixtzol laj Jeremias chirix tz’aqal a’an sa’ Jeremias 1:5 yaal ajwi’ choq’ aawe laa’at. Li Dios kixnaw ajwi’ chaq aawu rub’elaj naq katyo’la ut katxkawresi choq’ re laa teneb’ankil. Re xtawb’al xkomon aana’leb’ chirix laa yu’am rub’elaj naq katyo’la, il Alma 13:1–4; Tzol’leb’ ut Sumwank 138:53–56; ut Abraham 3:22–23. Naru nakatz’iib’aheb’ li yaal taataw. K’a’ut naq aajel ru naq taanaw a’in?

Re xnawb’al chan ru naq eb’ li yaal a’in kixjal xyu’am li Elder Ahmad S. Corbitt, tzolon sa’ li raatin, “Laa’at naru taach’utub’ Israel!” (Jolomil ch’utub’aj-ib’ re abril 2021). Chan ru najala laa wanjik sa’ laa yu’am naq nakanaw naq kiwan aayu’am naq maji’ nakatyo’la?

A’in kixye li Awa’b’ej Russell M. Nelson chirix li yu’am rub’elaj naq nokoyo’la:

“Laa Choxahil Yuwa’ naxnaw aawu chalen chaq. Laa’at jo’ ralal xk’ajol, kisik’man aawu xb’aan a’an re tatchalq sa’ ruchich’och’ chiru tz’aqal li hoonal a’in, jo’ aj k’amol b’e sa’ lix k’anjel sa’ xb’een li ruchich’och’. Kisik’man aawu, ink’a’ xb’aan laa junxaqalil, kisik’man b’an aawu xb’aan laa musiq’ejil, jo’ laa seeb’al, lix chaab’ilal laa waam, laa wajom re xsik’b’al li yaal ut li chaab’il na’leb’, ut laa wajom re xtenq’ankileb’ laa was aawiitz’in.

“Xayu’ami chaq naab’al reheb’ li na’leb’ a’in naq toj maji’ nakatyo’la. Naru nakayu’ami xkomon chik arin sa’ ruchich’och’ wi nakayal aaq’e chixsik’b’al” (“Decisiones para la eternidad,” Liahona, noviembre 2013, 107).

K’oxlaheb’ junjunq hoonal naru nakanumsiheb’ b’ar wi’ aajelaq raj ru xjultikankileb’ li yaal a’an chirix laa yu’am rub’elaj naq katyo’la. K’a’ru naru nakab’aanu re xjultikankileb’ li yaal a’an?

Chi’ilmanq ajwi’ Russell M. Nelson, “ Decisiones para la eternidad,” Liahona, noviembre 2013, 106–109; Temas y preguntas, “Preordenación,” “Vida Premortal,” Biblioteca del Evangelio.

sa’ li tz’e, jun kristiaan xaqxo sa’ xb’een jun xna’aj li ha’ yamyo xsa’; sa’ li seeb’al, wan jun li roq ha’ chiru pek — Sa’ Jeremias 2:13, li Qaawa’ kixjuntaq’eeta lix wanjik li tenamit sa’ musiq’ej rik’in jun “it’il kumb’” ut kixjuntaq’eeta rib’ a’an rikin li “yu’amha’.”

Jeremias 2; 7

“Xine’xtz’eqtaana laa’in, li yu’am ha’.”

Sa’ li chaqi ch’och’ ke’wan wi’ laj Israelita, li kristiaan ke’xk’uula li ha’ rub’el li ch’och’ sa’eb’ li kumb’. K’a’ru neke’reetali li kumb’ li “x’it’e’k chiruheb’” sa’ Jeremias 2:13? K’a’ut naq jun yo’leb’aal ha’ chaab’il wi’chik chiru jun li kumb’? K’a’ru naraj naxye xtz’eqtaanankil lix yo’leb’aal “li yu’am ha’”? Naq taawil Jeremias 2 ut 7, k’e reetal chan ru naq li tenamit ke’ok chixtz’eqtaanankil lix yu’amha’ li Qaawa’ (chi’ilmanq Jeremias 2:26–28; 7:2–11). K’a’ut naq li “yo’yookil ha’” a’an jun chaab’il eetalil choq’ re li k’a’ru naxk’e aawe li Kolonel? K’oxla chan ru naq yookat chixk’ulb’al li yu’amha’.

Jeremias 7 tz’iib’anb’il choq’ reheb’ li kristiaan neke’ok sa’ “li rochoch li Qaawa’ … re xloq’oninkil li Qaawa’,” a’b’an lix b’aanuhomeb’ moko naxk’am ta rib’ rik’in lix loq’onihomeb’ li na’ilman (che’ilmanq li raqal 2–11). K’a’ru nakak’oxla naq li Qaawa’ naraj xk’utb’al chawu sa’eb’ li raqal 21–23?

Oksiheb’ li k’anjeleb’aal sa’ li k’utuk. Eb’ lix profeet li Qaawa’ chi kok’ aj xsa’ neke’xjuntaq’eeta li musiq’ejil yaal rikin’eb’ k’a’aq re ru wankeb’ qe. Naru ajwi’ nakab’aanu a’an naq yooqat chixtzolb’al ut chixk’utb’al li evangelio. Re rilb’al Jeremias 2:13 sa’ laa k’a’uxl, naru nakak’e b’ayaq li ha’ sa’ jun sek’ jorol malaj tat-uk’aq sa’ jun uk’leb’aal. Chan ru naq li Jesus chanchan chik li “yu’amha’”? (Jeremias 2:13). Chan ru naq naquk’ lix yo’yookil ha’ a’an?

Jeremias 3:14–18; 16:14–21

Li Qaawa’ tixch’utub’ lix tenamit.

Sa’ Jeremias 16:14–15, laj Jeremias naxjuntaq’eeta xch’utub’ankil Israel sa’ roso’jikeb’ li kutan rik’in li relikeb’ chaq laj Israel aran Egipto. Sa’ laa waatin, k’a’ut naq li ch’utam jwal aajel raj wi’chik ru choq’ re lix tenamit li Dios chiru li Exodo?

K’a’ru naxye Jeremias 3:14–18; 16:14–21 chirix chan ru naq nak’ulman li ch’utub’ank?

Sa’ li raatin, “Juventud de Israel,” li Awa’b’ej Russell M. Nelson, jo’ laj Jeremias, kixk’ut naq lix ch’utub’ankil Israel “a’an li k’a’ru jwal aajel ru na’uxman sa’ li ruchich’och’ anajwan” (ch’utam choq’ reheb’ li saj sa’ chixjunil li ruchich’och’, 3 junio, 2018, Biblioteca del Evangelio). Il malaj ab’i li raatin ut k’e reetal ma tatruuq chixtawb’al (a) chan ru naq li Awa’b’ej Nelson nach’olob’an chirix lix ch’utub’ankil Israel, (b) chan ru naq naxch’olob’ xyaalal a’an, ut (c) chan ru nakat-oken laa’at sa’ li ch’utub’ank.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Jeremias 1:5

Lin Choxahil Yuwa’ naxnaw chaq wu naq maji’ ninyo’la.

Re aatinak chirix li yaal aajel ru nak’utman sa’ Jeremias 1:5, naru nakak’ut chiruheb’ laa kok’al xjalam-uuch jun k’uula’al (malaj, wi naru, naru nakawil xjalam-uucheb’ laa kok’al naq toj kok’eb’). Patz’ reheb’ laa kok’al ma neke’xnaw b’ar wankeb’ chaq rub’elaj naq ke’yo’la. Naru ajwi’ nekeb’icha jun li b’ich li nak’utuk chirix li qayu’am rub’elaj naq kooyo’la, jo’ “Saʼ li choxa chaq kinwan” (B’ichleb’aal choq’ reheb’ li Kok’al, 139).
Wi eb’ laa kok’al neke’raj xtawb’al xkomon xna’leb’, naru nakatenq’aheb’ chixtawb’al “Yu’am naq maji’ nokoyo’la” sa’ li K’utul Raqal reheb’ li Loq’laj Hu. Naru neke’xsik’ xsumenkileb’ li patz’om chirix “ani,” “jo’q’e,” ut “k’a’ru” chirix li yu’am naq maji’ nokoyo’la.

jun ch’ina ixqa’al naxq’alu jun k’uula’al

Jeremias 1:4–19

Neke’b’oqe’ li profeet re naq te’xyaab’asi li raatin li Qaawa’.

Naru nakak’ut xjalam-uuch li yo’yookil profeet malaj eb’ li profeet sa’ li loq’laj hu (naru nakataw junjunq sa’eb’ li hu re li Iglees, li Hu reheb’ li Jalam-uuch re li Evangelio, ut Kim, Taaqehin). Patz’ reheb’ laa kok’al k’a’ru neke’xnaw chirixeb’ li profeet a’an.
Re xk’utb’al k’a’ru neke’xb’aanu li profeet, naru nakasik’ ru junjunq li raqal sa’ Jeremias 1, jo’eb’ li raqal 5, 7, 10, ut 19. Eb’ laa kok’al naru neke’xsik’ ru jun reheb’ li raqal, te’ril ut te’xwotz junaq na’leb’ te’xtzol chirixeb’ li profeet.

Jeremias 16:14–16

Naru nintenq’aheb’ li ralal xk’ajol li qaChoxahil Yuwa’ chi sutq’iik rik’in a’an.

Naq taawil Jeremias 16:16, eb’ laa kok’al naru neke’xpak’ “karab’k” malaj “yohob’k” sa’ li tzoleb’aal. Li Awa’b’ej Russell M. Nelson kixjuntaq’eetaheb’ laj kar rik’ineb’ laj yo li wankeb’ resil sa’ li raqal a’in rik’ineb’ li misioneer (chi’ilmanq “El recogimiento del Israel disperso,” Liahona, noviembre 2006, 81). K’a’ru neke’xb’aanu li misioneer? Chan ru naru nokotenq’an “chixkarinkil” ut “chixyoob’al” li Israel jek’inb’il? (chi’ilmanq “Un mensaje del presidente Russell M. Nelson” [video], ChurchofJesusChrist.org).

3:30
Video: A Message for Children from President Russell M. Nelson

Jeremias 18:1–6

Naru ninkanab’ li Qaawa’ chixb’eresinkil lin yu’am, jo’ jun aj pak’onel melb’.

Re rilb’aleb’ li raqal a’in, naru neketz’il rix malaj nekek’ut chan ru neke’yiib’aman li sek’ rik’in melb’ (chi’ilmanq li jalam-uuch sa’ xraqik li tusleb’ aatin a’in). K’a’ru naxye li Qaawa’ qe sa’ Jeremias 18:1–6? K’a’ru naraj naxye wank jo’ melb’ sa’ ruq’ li Qaawa’? (chi’ilmanq ajwi’ Isaias 64:8). Re xtzolb’al jun chik li seraq’ li nokoxjuntaq’eeta rik’in li melb’ napak’ok wi’ jun aj pak’onel, il li raatin li Elder Richard J. Maynes, “Li sahil ch’oolejil naq li Jesukristo wan xb’een wa sa’ qayu’am” (Jolomil ch’utub’aj-ib’ re octubre 2015).

Re xtawb’al xkomon chik li na’leb’, chi’ilmanq li hu Amigos re li po a’in.

uq’ej neke’pak’ok rik’in melb’ — “Ex aj Israel … sa’ wuq’ laa’in jo’kex li seb’ li nayoq’leek sa’ ruq’ laj pak’onel” (Jeremias 18:6).

Perel re kok’ k’anjel reheb’ li kok’al: Naru nintenq’aheb’ li ralal xk’ajol li qaChoxahil Yuwa’ chi sutq’iik rik’in a’an — “Ex aj Israel … sa’ wuq’ laa’in jo’kex li seb’ li nayoq’leek sa’ ruq’ laj pak’onel” (Jeremias 18:6).