Isaias 58–66

K’a’ut naq ink’a’ raj taawa’aq junaq kristiaan us ta wan li tzakemq? Naq taatzol Isaias 58:3–12, naru nakak’oxla k’a’ut naq nakakuy aasa’, jo’ ajwi’ k’a’ut naq li Qaawa’ kixk’e li chaq’rab’ a’in. Wahe’ junjunqeb’ chik li patz’om naru taak’oxla:

• K’a’ut naq li kuyuk sa’ naru na’ilman jo’ jun li iiq ut ink’a’ jo’ jun osob’tesihom? (chi’ilmanq Isaias 58:3–5). Chan ru naq lix k’utum li Qaawa’ sa’ li ch’ol a’in naxjal li na’leb’ a’an aawik’in laa’at?

• K’a’ raj ru naraj naxye “xk’ixb’al lix k’aamal li rahob’tesiik” ut “risinkil chixjunil li kawil taqlank”? (Isaias 58:6). Chan ru naq li kuyuk sa’ naru narosob’tesiheb’ li qas qiitz’in? (chi’ilmanq li raqal 7).

• Chan ru naq li kuyuk sa’ nakatrosob’tesi jo’ ch’olob’anb’il sa’ Isaias 58:8–12?

Sa’ li aatin, “Ma ink’a’ ta a’in li kuyuk sa’ sik’b’il ru inb’aan?” (Jolomil ch’utub’aj-ib’ re abril 2015), li Awa’b’ej Henry B. Eyring kixwotz chi k’iila paay ru chan ru naq eb’ li kristiaan neke’osob’tesiik xb’aan li kuyuk sa’ ut lix tuminal li kuyuk sa’. Chan ru naq xawil li osobʼtesiik aʼan saʼ laa yuʼam?

Chi’ilmanq ajwi’ Temas y preguntas, “El ayuno y las ofrendas de ayuno,” Biblioteca del Evangelio.

Ma nawan li hilob’aal kutan choq’ “sahil kutan” choq’ aawe? Naq taatzol Isaias 58:13–14, k’oxla chan ru taasaho’q wi’chik aach’ool sa’ lix kutan li Qaawa’. K’a’ru naraj naxye xkanab’ankil “xb’aanunkil li nakawaj aajunes aawib’ sa’ lix santil kutan a’an”? K’a’ru xjalanil “taasaho’q aach’ool rik’in li Qaawa’” ut “matxik chik b’araq”?

Chi’ilmanq ajwi’ Russell M. Nelson, “Li hilob’aal a’an sahil kutan,” Jolomil ch’utub’aj-ib’ re abril 2015.

Sa’ Isaias 58–66 taataw naab’al na’leb’ chirix lix k’anjel li Jesukristo re xtojb’al qix. Sik’eb’ a’an naq tattzoloq. K’eheb’ reetal li k’ab’a’ej ut li aatin neke’oksiman choq’ re li Kolonel. Jo’ jun eetalil:

• K’a’ru naxsach aach’ool sa’ li na’leb’ naxye chirix li “ani na’okenk chirixeb’” sa’ Isaias 59:16–21? Chan ru naq li Kolonel chaab’il wi’chik li naxb’aanu chiru li naxye sa’eb’ li raqal 9–15?

• Naq li Jesukristo kixye reheb’ li tenamit naq a’an li Mesias, kiroksi Isaias 61:1–3 (chi’ilmanq Lukas 4:16–21; chi’ilmanq ajwi’ li video “Jesús declara que Él es el Mesías,” Biblioteca del Evangelio). Chan ru naq li Jesukristo xatrosob’tesi laa’at ut jalan chik kristiaan jo’ ch’olob’anb’il sa’eb’ li raqal a’in? Chan ru naq xk’e li ch’ina-us aawe ruuchil li cha?

  

  3:24

• K’a’ru li “ruxtaan li Qaawa’” naru “nakat-aatinak wi’”? (chi’ilmanq Isaias 63:7–9).

• K’a’ chik ru nakataw chirix li Kolonel sa’ Isaias 58–66?

Chi’ilmanq ajwi’ Mosiah 3:7; Tzol’leb’ ut Sumwank 133:46–53.

Isaias 60 ut 62 neke’aatinak chirix li saqen ut li q’ojyin, li uhej ut li ilok, re xk’utb’al chan ru naq lix evangelio li Jesukristo taarosob’tesi chixjunil li ruchich’och’ sa’ roso’jikeb’ li kutan. Sik’eb’ li na’leb’ a’in sa’ Isaias 60:1–5, 19–2062:1–2. Naq nakawileb’ li ch’ol a’in, k’oxla chan ru naq li Dios yoo chixch’utub’ankileb’ li ralal xk’ajol chalen li q’ojyin toj sa’ lix saqen. K’a’ru laa k’anjel sa’ lix k’anjel a’an?

Chi’ilmanq ajwi’ 1 Nefi 22:3–12; 3 Nefi 18:24; Tzol’leb’ ut Sumwank 14:9; Bonnie H. Cordon, “De modo que vean,” Liahona, mayo 2020, 78–80.

Laj Isaias ki’aatinak chirix jun kutan naq “li rahilal li kik’ulman junxil taasachq sa’ inch’ool” (Isaias 65:16). Us ta li profeetil aatin a’in k’iila paay naq natz’aqlok ru, sa’ tz’aqal lix yaalalil, li kutan a’an toj taachalq—a’an li kutan naq taak’ulunq wi’chik li Jesukristo. Laj Isaias ki’aatinak chirix li kutan a’an sa’ Isaias 64:1–5; 65:17–25; 66. K’e reetal jarub’ sut naroksiheb’ li aatin jo’ “sahil ch’oolej.” K’a’ut naq lix sutq’ijik li Qaawa’, a’anaq sahil kutan choq’ eere laa’ex? K’a’ru naru taab’aanu re xkawresinkil aawib’ choq’ re lix sutq’ijik?

Chi’ilmanq ajwi’ Eb’ lix raqalil li Paab’aal 1:10; Russell M. Nelson, “El futuro de la Iglesia: Preparar al mundo para la segunda venida del Salvador,” Liahona, abril 2020, 13–17.

• Jun na’leb’ li naru nakawaklesi wi’ xch’ooleb’ laa kok’al chixkuyb’aleb’ xsa’—naq te’reek’a naq te’ruuq—a’an xtenq’ankileb’ chixtawb’al ru li rajom li Qaawa’ rik’in li chaq’rab’ a’in. Naru nekeril Isaias 58:6–11 re xtawb’al xsumenkileb’ li patz’om a’in: K’a’ut naq naqakuy qasa’? Chan ru naq nokokuyuk sa’? Naru ajwi’ nakasik’ “Kuyuk sa’” sa’ li K’utul Raqal reheb’ li Loq’laj Hu.

• Wi wan junaq aachaab’il numsihom rik’in li kuyuk sa’, wotz rik’ineb’ laa kok’al. Nawu ajwi’ nakapatz’ reheb’ chan raj ru te’xch’olob’ chiru jun ramiiweb’ k’a’ut naq li Qaawa’ kixk’e li chaq’rab’ a’in.

• Chirix rilb’al Isaias 58:13–14, naru nakak’uteb’ li kutan sa’ jun tusleb’ kutan ut taapatz’ reheb’ laa kok’al naq te’xye xk’ab’a’eb’ li kutan aawochb’een. Naq texwulaq sa’ li domingo, patz’ reheb’ naq te’xye naq “sahil kutan” a’an. Ye reheb’ k’a’ut naq li hilob’aal kutan a’an jun sahil kutan choq’ aawe.

• Wotzomaq cherib’il eerib’ chan ru naru “nasaho’ eech’ool rik’in li Qaawa’” sa’ li hilob’aal kutan. Eb’ laa kok’al maare te’raj xyiib’ankil xjalam-uuch lix na’leb’eb’ ut te’xk’e sa’ “jun li kaax re sahil hilob’aal kutan.” Chirix a’an, naq te’raj xna’leb’eb’ chirix li naru neke’xb’aanu sa’ li hilob’aal kutan, naru neke’xtaw junaq xna’leb’eb’ sa’ li kaax.

• Patz’ reheb’ laa kok’al naq te’xmutz’ li ru naq taayaab’asi Isaias 60:1–3. Patz’ reheb’ naq te’xte li ru naq te’rab’i li aatin “saqenk” ut te’xmutz’ wi’chik naq te’rab’i li aatin “q’ojyin” malaj “aak’ab’.” Ch’olob’ naq li Jesukristo ut lix evangelio a’aneb’ li saqen li nokohe’xtenq’a chirilb’al li b’e re sutq’iik rik’in li qaChoxahil Yuwa’.

• Sa’ Isaias 65:17–25 nach’olob’aman chankaq ru li ruchich’och’ naq taak’ulunq wi’chik li Kolonel. Naq taawileb’ li raqal a’in rik’ineb’ laa kok’al, tenq’aheb’ chixk’eeb’al reetal chan ru naq taajalaaq li yu’am sa’ li “ak’ ch’och’” ki’aatinak wi’ laj Isaias. K’a’ut naq a’anaq jun kutankil re “toosaho’q ut taawanq qanimla sahilal chi junelik”? (raqal 18).

• Naru ajwi’ nekeb’icha jun li b’ich chirix li xkab’ xk’ulunik li Qaawa’, jo’ “Cuando vuelva el Salvador” (Biblioteca del Evangelio). Wotzomaq cherib’il eerib’ k’a’ru nekeroyb’eni chirix li xkab’ xk’ulunik li Kolonel. K’a’ru naru naqab’aanu re xkawresinkil qib’ anajwan choq’ re li kutan a’an?