Ahinime 12–18 ‘Ɔgyefoɔ No Bɛba Sion’: Yesaia 58–66,” Bra, Di M’akyi—De ma Efie ne Asɔre: Apam Dada 2026 (2026)
“Ahinime 12–18 ‘Ɔgyefoɔ No Bɛba Sion,’” Bra, Di M’akyi Me: Apam Dada 2026
Yesu wɔ Nasaret Hyiadan mu, ɛfiri Greg Olsen hɔ
Ahinime 12–18: “Ɔgyefoɔ No Bɛba Sion”
Yɛsaia 58–66
Wɔ Ne som adwuma no mfitiaseɛ no, Yesu Kristo kɔɔ hyiadan bi mu wɔ Nasaret, baabi a wɔtetee no no. Ɔgyinaa hɔ kenkan firii twerɛnsɛm no mu, ɔbuee Yesaia nwoma no, na ɔkenkanee deɛ seesei yɛfrɛ no Yesaia 61:1–2no. Afei Ɔkaa sɛ, “Saa da yi na twerɛsɛm yi aba mu wɔ mo aso mu.” Na yei yɛ Agyenkwa no mpaemuka a akyinnyeɛ nni ho no mu baako sɛ Ɔno ne Deɛ Wɔasra no ngo, a “ɔbɛsa wɔn a wɔn akoma abubuo yareɛ” na “ɔbɛka ɔgyeɛ ho asɛm akyerɛ nnommumfoɔ no” (hwɛ Luka 4:16–21). Nokorɛ, saa twerɛsɛm yi baa mu saa da no. Na, te sɛ Yesaia nkɔnhyɛ afoforɔ pii no, ɛno nso reba mu wɔ yɛn mmerɛ yi mu. Agyenkwa no kɔ so sa wɔn a wɔn akoma abubuo a wɔba Ne nkyɛn no yareɛ. Nnɔmumfoɔ dodoɔ no ara da so wɔ hɔ a wɔhia ɔgyeɛ. Na animuonyam daakye bi wɔ hɔ a ɛsɛ sɛ yɛsiesie yɛn ho ma—berɛ a Awurade “bɛbɔ ɔsoro ne asase foforɔ” (Yesaia 65:17) na “ɔma teneneeyɛ ne ayɛyie fifiri amanaman nyinaa anim” (Yesaia 61:11). Yesaia akenkan bue yɛn ani ma yɛhunu deɛ Awurade ayɛ dada, deɛ Ɔreyɛ, ne deɛ Ɔbɛkɔ so ara ayɛ ama Ne nkorɔfoɔ.
Nsusuiɛ de ma Adesua wɔ Efie ne Asɔre
Yesaia 58:3–12
Akɔnkyene ma honhom mu tumi nyini na ɛhyira nnipa a wɔhia mmoa.
Deɛn nti na obi bɛfiri ne pɛ mu akyene kɔm berɛ a aduane wɔ hɔ? Berɛ a wosua Yesaia 58:3–12no, wobɛtumi adwene deɛ nti a wokyene kɔm—ne Awurade botaeɛ a enti ɔde saa mmara yi ma ho. Nsɛmmisa afoforɔ a wobɛtumi adwene ho bi nie:
-
Adɛn nti na ɛtɔ da a wɔsusu sɛ akɔnkyene yɛ adesoa sene nhyira? (hwɛ Yesaia 58:3–5). Sɛn na Awurade nkyerɛkyerɛ a ɛwɔ saa ti yi mu sesa saa adwene no ma wo?
-
Deɛn na ɛbɛtumi akyerɛ sɛ ‘wobɛsane amumuyɛ nkɔnsɔnkɔnsɔn’ na ‘woabubu kɔnnua biara’? (Yesaia 58:6). Sɛn na akɔnkyene bɛtumi ahyira afoforɔ? (hwɛ nkyekyɛmu 7).
-
Sɛn na akɔnkyene abrɛ wo nhyira a wɔka ho asɛm wɔ Yesaia 58:8–12?
Wɔ ne nkrasɛm “Is Not This the Fast That I Have Chosen?” (Liahona, Kɔtɔnima 2015, 22–25),Titenani Henry B. Eyring kyɛɛ nhwɛsoɔ pii fa sɛdeɛ akɔnkyene ne akɔnkyene-afɔrebɔ ahyira nkorɔfoɔ ho. Sɛn na woahunu nhyira a ɛte saa wɔ w’abrabɔ mu?
San hwɛ “Bless Our Fast, We Pray,” Hymns, no. 138; Tinsɛm ne Nsɛmmisa, “Fasting and Fast Offerings,” Asɛmpa Akoraeɛ.
Hunu nkorɔfoɔ a wokyerɛ wɔn adeɛ. “Woreyɛ ɔkyerɛkyerɛfoɔ a ɔte sɛ Kristo bi ne sɛ wobɛhunu nnipa a wokyerɛkyerɛ wɔn no na woabɔ mmɔden sɛ wobɛte deɛ ɛwɔ wɔn akoma mu no ase. Wobɛtumi ahwehwɛ sɛdeɛ wɔsua adeɛ yie. Wobɛtumi abisa nsɛm, atie no yie, na woahwɛ. Ne nyinaa akyi no, wobɛtumi abɔ mpaeɛ apɛ nteaseɛ a Honhom no nko ara na ɔbɛtumi de ama. Dodoɔ a wonim obi yie no, dodoɔ no ara na wotumi boa no ma ɔnya n’ankasa nteaseɛ ne tumi wɔ Yesu Kristo asɛmpa no mu. Sɛ wote obi sukɔm ase a, Honhom no bɛtumi akyerɛ wo sɛdeɛ wobɛboa ama wode Agyenkwa no nkwa nsuo adum no” (Teaching in the Savior’s Way, 13).
Yesaia 58:13–14
Sɛ yɛdi Awurade Homeda no nni a, ɛde anigyeɛ ba.
So Homeda no yɛ “anigyeɛ” ma wo? Berɛ a wosua Yesaia 58:13–14no, dwene sɛdeɛ wobɛtumi anya anigyeɛ pii wɔ Awurade da no mu. Nhwɛsoɔ, deɛn na ɛbɛtumi akyerɛ sɛ wobɛdane “afiri w’anigyedeɛ ho wɔ [Ne] da kronkron no mu”? Nsonsonoeɛ bɛn na ɛwɔ “[w’anigyeɛ] wɔ Awurade mu” ne “woreyɛ w’ankasa w’akwan” ntam?
San hwɛ Russell M. Nelson, “The Sabbath Is a Delight,” Liahona, Kɔtɔnima 2015, 129–32.
Yesaia 59:9–21; 61:1–3; 63:7–9
Yesu Kristo yɛ m’Agyenkwa ne me Dimafoɔ.
Yesaia 58–66 wɔ ntotoho pii a ɛfa Yesu Kristo mpata adwuma no ho. Hwehwɛ wɔ berɛ a wosua no. Titire no, hyɛ abodin ne nsɛmfua a wɔde kyerɛkyerɛɛ Agyenkwa no mu no nso. Nhwɛsoɔ:
-
Deɛn na ɛma w’ani gye wɔ nkyerɛkyerɛmu a wɔde ma wɔ “ntamgyinafoɔ” no ho wɔ Yesaia 59:16–21? Sɛn na Agyenkwa no di tebea ahoroɔ a wɔakyerɛkyerɛ mu wɔ nkyekyɛmu 9–15no so?
-
Berɛ a Yesu Kristo bɔɔ amanneɛ kyerɛɛ Nasaretfoɔ sɛ Ɔno ne Mesia no, Ɔfaa asɛm no firii Yesaia 61:1–3 (hwɛ Luka 4:16–21; san hwɛ sini “Jesus Declares He Is the Messiah,” Asɛmpa Akoraeɛ). Sɛn na Agyenkwa no ahyira wo ne afoforɔ wɔ akwan a wɔakyerɛkyerɛ mu wɔ saa nkyekyɛmu yi mu no? Sɛn na Wama ahoɔfɛ asi nso ananmu?
3:24Jesus Declares He Is the Messiah
-
“Awurade ayamyɛ adɔeɛ” bɛn na wobɛtumi ‘aka’? Yesaia 63:7–9).
-
Agyenkwa no ho nsɛm foforɔ bɛn na wohunu wɔ Yesaia 58–66?
San hwɛ Mosiah 3:7; Nkyerɛkyerɛ ne Apam 133:46–53.
A Gift of Light, ɛfiri Eva Timothy hɔ
Yesaia 60; 62
“Awurade bɛyɛ hann a ɛnniawieeɛ ama wo.”
Yesaia 60 ne 62 kasa fa hann ne sum, aniwa ne adehunu ho de kyerɛkyerɛ sɛdeɛ Yesu Kristo asɛmpa no bɛhyira wiase wɔ nna a ɛdi akyire no mu. Hwehwɛ saa nsusuiɛ ahoroɔ yi wɔ Yesaia 60:1–5, 19–20; 62:1–2. Berɛ a wokenkan ti ahodoɔ yi no, dwene sɛdeɛ Onyankopɔn reboaboa ne mma ano afiri sum mu aba Ne hann mu ho. W’asɛdeɛ wɔ saa dwumadie yi mu ne sɛn?
San hwɛ 1 Nephi 22:3–12; 3 Nephi 18:24; Nkyerɛkyerɛ ne Apam 14:9; Bonnie H. Cordon, “That They May See,” Liahona, Kɔtɔnima 2020, 78–80.
Yesaia 64:1–5; 65:17–25; 66
Kristo bɛdi asase so Millenium berɛ no mu.
Yesaia kasa faa ɛda bi ho berɛ a “ɔhaw dada no bɛtwam” (Yesaia 65:16). Berɛ a nkɔnhyɛ yi anya mmamu pii no, wɔ ne nteaseɛ nyinaa mu no, saa da no mmaeɛ—berɛ a Yesu Kristo bɛsan aba. Yesaia kyerɛkyerɛ daakye da yi mu wɔ Yesaia 64:1–5; 65:17–25; 66. Hyɛ mpɛn dodoɔ a ɔde nsɛm te sɛ.“anigyeɛ” ne “ahurusie” yɛɛ adwuma nso. Adɛn nti na Agyenkwa mmaeɛ no bɛyɛ anigyeɛ ne ahurusie da ama wo? Deɛn ahosiesie na yɛbɛtumi ayɛ de atwɛn Ne mmaeɛ no?
San hwɛ Gyidika Nsɛm 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Oforisuo 2020, 13–17.
Sɛ wopɛ bebree a, hwɛ saa bosome yi Liahona ne De ma Mmabunu Ahoɔden nsɛmma nwoma mu.
Nkwadaa Adekyerɛ ho Adwenekyerɛ
Yesaia 58:6–11
akɔnkyene hyira me ne afoforɔ a wɔwɔ ahohia mu.
-
Ebia kwan pa a wobɛfa so ahyɛ wo nkwadaa nkuran ama wɔakyene kɔm—berɛ a wɔayɛ krado—ne sɛ wobɛboa wɔn ama wɔate Awurade botaeɛ ahoroɔ ma mmara yi ase. Dwene ho sɛ mobɛbom akenkan Yesaia 58:6–11 ahwehwɛ mmuaeɛ ama saa nsɛmmisa yi: Adɛn nti na yɛkyene kɔm? Sɛn na yɛkyene kɔm? Wobɛtumi nso ahwehwɛ “Fast, Fasting” mu wɔ Guide to the Scriptures.
-
Sɛ woanya akɔnkyene mu suahunu papa bi a, wobɛtumi ne wo nkwadaa akyɛ. Wobɛtumi nso abisa wɔn sɛdeɛ wɔbɛkyerɛkyerɛ mu akyerɛ wɔn nnamfonom deɛ nti a Awurade maa yɛn saa mmara yi.
Yesaia 58:13–14
Homeda no bɛtumi ayɛ anigyeɛ ama me.
-
Moakenkan Yesaia 58:13–14awie no, wobɛtumi akyerɛ nnawɔtwe no mu nna wɔ asranna so na woama wo nkwadaa ne wo aka nna no. Sɛ woduru Homeda no so a, ma wɔmfrɛ saa da no “anigyeɛ.” Ka deɛ nti a Homeda yɛ anigyeɛ ma wo kyerɛ wɔn.
-
Mo ne mo ho mo ho nkyɛ akwan afoforɔ a mobɛtumi ama “mo ani agye wɔ Awurade mu” wɔ Homeda. Ebia wo nkwadaa bɛtumi ayɛ nsusuiɛ ahoroɔ na wɔde agu “Homeda anigyeɛ adaka mu.” Afei, sɛ wɔhia nsusuiɛ fa nneɛma a wɔbɛyɛ no wɔ Homeda mu ho a, wɔbɛtumi atwe nsusuiɛ bi afiri adaka no mu.
Our Light, ɛfiri Dan Wilson hɔ
Yesaia 60:1–3
Agyenkwa no te sɛ hann ma me.
-
Wobɛtumi ama wo nkwadaa akata wɔn ani berɛ a wokenkan Yesaia 60:1–3. Ma wɔmmue wɔn ani berɛ a wɔte asɛm “hann” na wɔnkata bio berɛ a wɔte asɛm “esum.” Kyerɛkyerɛ mu sɛ Yesu Kristo ne N’asɛmpa no te sɛ hann a ɛboa yɛn ma yɛhunu kwan san kɔ Ɔsoro Agya hɔ.
Yesaia 65:17–25
Sɛ Yesu ba bio a, Ɔde asomdwoeɛ ne anigyeɛ bɛba.
-
Ysaia 65:17–25 kyerɛkyerɛ sɛdeɛ asase bɛyɛ sɛ Agyenkwa no ba bio a. Berɛ a wo ne wo nkwadaa kenkan nkyekyɛmu ahoroɔ yi no, boa wɔn ma wɔnhwehwɛ sɛdeɛ asetena bɛyɛ soronko wɔ “asase foforɔ” a Yesaia kaa ho asɛm no so. Adɛn nti na saa berɛ yi bɛyɛ “anigyeɛ ne ahurusie berɛ afebɔɔ”? (nkyekyɛmu 18).
-
Mobɛtumi nso abom ato dwom afa Agyenkwa no Mmaeɛ a ɛtɔ so Mmienu no ho, te sɛ “When the Savior Comes Again” (Asɛmpa Akoraeɛ). Mo ne mo ho nkyɛ deɛ morehwɛ animu fa Agyenkwa mmaeɛ mmienu no ho. Deɛn ahosiesie na yɛbɛtumi ayɛ de atwɛn saa da no?
Sɛ wopɛ bebree a hwɛ bosome yi Adamfoɔ nsɛmma nwoma mu.