Isaia 58-66

Nō te aha te ta’ata e tāmā’a ’ore ai i te tau tē vai rā te mā’a ? ’A tuatāpapa ai ’outou ia Isaia 58:3–12, e nehenehe ’outou e feruri i te mau tumu ’outou e ha’apae ai i te mā’a—ē tae noa atu i te mau tumu te Fatu e hōro’a ai i teie ture. Teie te tahi mau uira’a e feruri :

• Nō te aha te ha’apaera’a mā’a, i te tahi taime, e nehenehe ai e ’itehia i te hō’ē hōpoi’a hau atu i te hō’ē ha’amaita’ira’a ? (hi’o Isaia 58:3–5). Nāhea te mau ha’api’ira’a a te Fatu i roto i teie pene e taui ai i te reira mana’o nō ’outou ?

• E aha te aura’a ’ia « tātara i te ruru ra o te ’ino » ’e « ’ia ’ōfati i te mau zugo ato’a ra » ? (Isaia 58:6). Nāhea te ha’apaera’a mā’a e ha’amaita’i ai ia vetahi ’ē ? (hi’o ’īrava 7).

• Mea nāhea te ha’apaera’a mā’a i te hōpoira’a mai i te mau ha’amaita’ira’a i parauhia i roto ia Isaia 58:8–12 ?

I roto i tāna parau poro’i «E ’ere ānei teie i te ha’apaera’a mā’a hina’aro nā’u ra ?» (Liahona, Mē 2015, 22–25), ’ua fa’a’ite mai te peresideni Henry B. Eyring e rave rahi mau hi’ora’a e mea nāhea te mau ta’ata i te ha’amaita’ira’ahia nā roto i te ha’apaera’a mā’a ’e te mau ō ha’apaera’a mā’a. E mea nāhea ’oe i te ’itera’a i te reira ato’a mau ha’amaita’ira’a i roto i tō ’oe orara’a ?

Hi’o ato’a «Bless Our Fast, We Pray», Hymns, N° 138 ; Te mau tumu parau ’e te mau uira’a, «Ha’apaera’a mā’a ’e te mau ō ha’apaera’a mā’a» Vaira’a buka ’evanelia.

’Ua riro ānei te mahana Sābati ’ei « mahana hina’arohia » e ’oe ? ’A tuatāpapa ai ’oe ia Isaia 58:13–14, ’a feruri nāhea ’oe e fa’ari’i rahi ae i te ’oa’oa i te mahana o te Fatu. ’Ei hi’ora’a, e aha te aura’a ’ia tāpe’a ia ’oe iho « i te ravera’a-’ore-ra’a i tō ’oe ra hina’aro i [tōna] tau mahana mo’a » ? E aha te ta’a-’ē-ra’a i rotopū i « e ’oa’oa ’oe ia Iehova i reira » ’e « te rave ’ore i tā ’oe ra mau peu » ?

Hi’o ato’a Russell M. Nelson, «Te Sābati e mahana hina’arohia», Liahona, Mē 2015, 129-32.

I roto iaIsaia 58–66 e ’itehia e rave rahi fa’ahorora’a nō ni’a i te misiōni tāra’ehara a Iesu Mesia. ’A ’imi i te reira ’a tuatāpapa ai ’outou. Ta’a ’ē noa atu i te reira, e tāpa’o i te mau ti’ara’a ’e te mau parau i fa’a’ohipahia nō te fa’ata’a i te Fa’aora. ’Ei hi’ora’a :

• E aha tā ’oe e fa’ahiahia nei nō ni’a i te fa’ata’ara’a o te parau « ārai » i roto ia Isaia 59:16–21 ? Nāhea te Fa’aora i te upo’oti’ara’a i ni’a i te mau tītaura’a i fa’a’itehia i roto i te mau ’īrava 9–15 ?

• I tō Iesu Mesia fa’a’itera’a i te mau ta’ata nō Nazareta ē o ’oia te Mesia, ’ua fa’ahiti ’oia i roto ia Isaia 61:1–3 (hi’o Luka 4:16–21; hi’o ato’a i te vidéo « Jesus Declares He Is the Messiah [Tē parau rā Iesu ē o ’oia te Mesia] », Vaira’a buka ’evanelia). E mea nāhea tō Iesu Mesia ha’amaita’ira’a ia ’oe ’e ia vetahi ’ē ’ia au i te mau rāve’a i fa’ata’ahia i roto i teie mau ’īrava ? Mea nāhea ’oia i te hōro’ara’a i te ’una’una ’ei mono i te rehu auahi ?

  

  3:24

• E aha « te hāmani maita’i nō [Iehova] » tā ’oe e nehenehe e « fa’ahiti » ? (hi’o Isaia 63:7–9).

• E aha te tahi atu mau fa’ahitira’a nō te Fa’aora tā ’oe ē ’ite nei i roto ia Isaia 58–66 ?

’A hi’o ato’a ia Mosia 3:7; Te Ha’api’ira’a Tumu ’e te mau Fafaura’a 133:46–53.

Tē parau nei teIsaia 60 ’e te 62 i te parau nō te māramarama ’e te pōiri, te mata ’e te hi’ora’a nō te ha’api’i e nāhea te ’evanelia a Iesu Mesia ’ia ha’amaita’i i te ao nei i te mau mahana hope’a nei. ’A ’imi i teie mau ha’api’ira’a i roto ia Isaia 60:1–5, 19–20; 62:1–2. ’Ia tai’o ana’e ’oe i teie mau pene, ’a feruri e mea nāhea te Atua ē ha’aputuputu nei i tāna mau tamari’i mai roto i te pōiri i tōna ra māramarama. E aha tō ’oe ti’ara’a i roto i teie ’ohipa ?

Hi’o ato’a 1 Nephi 22:3–12; 3 Nephi 18:24; Te Ha’api’ira’a Tumu ’e te mau Fafaura’a 14:9; Bonnie H. Cordon, «’Ia hi’o rātou», Liahona, Mē 2020, 78–80.

’Ua parau ’o Isaia nō ni’a i te hō’ē mahana « ’ua mo’e te mau parau fa’ao’ō’o i mūta’a ihora » (Isaia 65:16). Noa atu ē, e rave rahi tupura’a tō teie parau tohu, i roto i tōna aura’a hope roa a’e, ē tae mai ā taua mahana ra—i te taime e ho’i mai ai Iesu Mesia. ’Ua fa’ata’a mai Isaia i te reira mahana nō a muri a’e i roto ia Isaia 64:1–5; 65:17–25; 66. ’A hi’o e mea nāhea ’oia i te fa’a’ohipa-pinepine-ra’a i te mau ta’o mai te « ’oa’oa » ’e te « pōpou ». Nō te aha te ho’i-fa’ahou-ra’a mai o te Fa’aora e riro ai ’ei mahana pōpou nō ’oe ? E aha tā ’oe e nehenehe e rave nō te fa’aineine nō tōna ho’ira’a mai ?

Hi’o ato’a Hīro’a Fa’aro’o 1:10; Russell M. Nelson, «Te ananahi o te ’Ēkālesia : Fa’aineinera’a i te ao nei nō te tae-piti-ra’a mai o te Fa’aora», Liahona, ’Ēperēra 2020, 13–17.

• Penei a’e te rāve’a maita’i a’e nō te fa’aitoito i tā ’outou mau tamari’i ’ia ha’apae i te mā’a—’ia ineine ana’e rātou—’o te tauturura’a ïa ia rātou ’ia māramarama i te mau ’ōpuara’a a te Fatu nō teie ture. E nehenehe e tai’o ’āmui ia Isaia 58:6–11 nō te ’imi i te mau pāhonora’a i teie mau uira’a : Nō te aha tātou e ha’apae ai i te mā’a ? Nāhea tātou ’ia ha’apae i te mā’a ? E nehenehe ato’a ’outou e hi’o i roto «Ha’apaera’a mā’a» i roto i te Arata’i nō te mau pāpa’ira’a mo’a.

• Mai te mea ’ua fa’ari’i ’outou i te hō’ē ’itera’a faufa’a rahi nō te ha’apaera’a mā’a, ’a fa’a’ite i te reira i tā ’outou mau tamari’i. E nehenehe ato’a ’outou e ani ia rātou nāhea rātou ’ia fa’ata’a i te hō’ē hoa nō te aha te Fatu i hōro’a mai ai ia tātou i teie ture.

• I muri a’e i te tai’ora’a ia Isaia 58:13–14, e nehenehe ’outou e fa’atoro i ni’a i te mau mahana o te hepetoma i ni’a i te hō’ē tārena ’e e ani i tā ’outou mau tamari’i ’ia parau mai i te mahana nā muri ia ’outou. ’Ia tae ana’e ’outou i te Sābati, ’a ani ia rātou ’ia parau i taua mahana ra « e mahana hina’arohia ». ’A parau i te mau tamari’i ē, nō te aha te Sābati i riro ai ’ei mahana hina’arohia nō ’outou.

• ’A fa’a’ite i te tahi e te tahi i te mau rāve’a e ti’a ai ia ’outou ’ia « ’oa’oa ia ’oe iho ia Iehova » i te Sābati. Penei a’e e nehenehe tā ’outou mau tamari’i e pāpa’i hōho’a i tō rātou mau mana’o ’e e tu’u i te reira i roto i te hō’ē « ’āfata Sābati e auhia ». I muri iho, ’ia hina’aro ana’e rātou i te mau mana’o nō ni’a i te mau mea e rave i te Sābati, e nehenehe rātou e huti mai i te hō’ē mana’o i roto i te ’āfata.

• E ani i te mau tamari’i ’ia tāpiri i tō rātou mata ’a tai’o ai ’outou ia Isaia 60:1–3. E ani ia rātou ’ia ’ara’ara i tō rātou mata i te taime ’a fa’aro’o ai rātou i te parau « māramarama » ’e e tāpiri ’ia fa’aro’o ana’e rātou i te parau « pouri ». ’A fa’ata’a atu ē, ’ua riro Iesu Mesia ’e tāna ’evanelia mai te hō’ē māramarama ’o tē tauturu ia tātou ’ia hi’o i tō tātou ’ē’a ho’ira’a i te Metua i te ao ra.

• Tē fa’ata’a nei teIsaia 65:17–25 i te huru o te fenua ’ia ho’i fa’ahou mai te Fa’aora. ’A tai’o ai ’oe i teie mau ’īrava ’e tā ’outou mau tamari’i, ’a tauturu ia rātou ’ia ’imi e aha te ta’a-’ē-ra’a o te orara’a i roto i te « fenua ’āpī » tā Isaia i fa’a’ite mai. Nō te aha e taime teie nō te « ’oa’oa rā […] e ’ōu’au’a i te ’oa’oa e a muri noa atu » ? (’īrava 18).

• E nehenehe ato’a ’outou e hīmene ʼāmui i te hōʼē hīmene nō niʼa i te Tae-Piti-Raʼa mai, mai te hīmene «Quand Jésus reviendra» (Vaira’a buka ’evanelia). ’A fa’a’ite i te tahi e te tahi i te mea tā ’outou e tīa’i nei i te ho’ira’a mai o te Fa’aora. E aha tē nehenehe ia tātou ’ia rave nō te fa’aineine i teienei nō taua mahana ra ?