Isaia 50–57

Noa atu ē, e rave rahi matahiti tō te ’āti ’Īserā’ela orara’a i roto i te fa’atītīra’a—’e noa atu ē, e hope’ara’a taua fa’atītīra’a ra nō tā rātou iho mau mā’itira’a ti’a ’ore—’ua hina’aro te Fatu ’ia hi’o rātou i te ananahi ma te tīa’ira’a. E aha tei ’itehia ia ’oe i roto i tā Isaia poro’i o te hōro’a nei i te tīa’ira’a ? E nehenehe te hō’ē tāpura mai teie te huru e tauturu ia ’oe ’ia tuatāpapa :

Hi’o ato’a Mosia 12:20–24; 15:13–18; 3 Nephi 20:29–46; Te Ha’api’ira’a Tumu ’e te mau Fafaura’a 113:7–10; Russell M. Nelson, «’A fa’ari’i i te ’ananahi ma te fa’aro’o», Liahona, Novema 2020, 73–76.

E mea iti roa te mau pene i roto i te pāpa’ira’a mo’a e fa’a’ite nei i te misioni fa’a’ora a Iesu Mesia ma te nehenehe maita’i mai ia Isaia 53. ’A feruri na i te mau ’ātivite mai teie te huru ’ia māramarama maita’i a’e ’e ’ia fa’a’ohipa i teie mau ha’api’ira’a pūai :

• ’A feruri ’aore rā ’a ’āparau nāhea te mau ’ā’amu ’e te mau hōho’a teata e fa’a’ite pinepine ai i te mau ’aito o te fa’aora i te ta’ata. ’A fa’atuea i te reira mau fa’a’itera’a e te mau fa’a’itera’a a te Fa’aora i roto ia Isaia 53.

• I muri a’e i te tai’ora’a i te ’īrava tāta’itahi, ’a fa’aea ri’i nō te hi’o e aha tā te Fa’aora i māuiui— te « pe’ape’a », « te ’oto », ’e « te mau hara », tāna i amo—nō te mau ta’ata ato’a ’e nō ’oe iho ā rā. E nehenehe ’oe e mono i te mau ta’o « tātou » ’e « mātou » i te mau ta’o « vau » ’e « tā’u », ’a tai’o ai ’oe. E aha te mau mana’o ’aore rā, te mau ferurira’a tā teie mau ’īrava e fa’auru mai ia ’oe ?

• E nehenehe e māta’ita’i i te vidéo « E ’ere tō’u bāsileia i tō teie nei ao » (Vaira’a buka ’evanelia), ’e e feruri e mea nāhea te mau parau tohu i roto ia Isaia 53 i te tupura’a. E aha te tahi o te mau pe’ape’a ’e te ’oto tā te Fa’aora e amo nei nō tātou ?

  

  5:25

• ’A ’imi i te mau hōho’a nō te mau ’ohipa ē hā’ati rā i te tāra’ehara a Iesu Mesia (hi’o Buka hōho’a nō te ’evanelia, N° 56–60). I muri iho e nehenehe ’outou e ’imi i te mau pereota i roto ia Isaia 53 ’o te fa’ata’a nei i te mau ’ohipa i tupu i roto i te mau hōho’a. E aha tā teie mau ha’api’ira’a e fa’auru nei ia ’outou ’ia rave ?

Hi’o ato’a «Pohe atu te Fa’aora», Te mau Hīmene, N° 108.

Nō tātou pā’āto’a, e mau taime e tae mai te mana’o ē, ’ua ātea tātou i te Fatu nō tā tātou mau hara ’e tō tātou mau paruparu. ’Ua fa’aru’e roa ato’a vetahi i te tīa’ira’a ē, e fa’a’ore ’oia i tā rātou hapa. ’Ua riroIsaia 54 ’e te 57 ’ei mau pene maita’i roa ’ia tai’o, ’ia tāmarūhia ’e ’ia fa’aitoitohia tātou i roto i taua huru taime ra. I roto iho ā rā ia Isaia 54:4–10; 57:15–19, e aha te mau ta’o e ha’api’i nei ia ’oe e aha te mana’o o te Fa’aora nō ni’a ia ’oe ? E aha te ta’a-’ē-ra’a i tupu i roto i tō ’oe orara’a i te ’itera’a i teie mau mea nō ni’a iāna ?

’Ua ha’api’i mai te peresideni Dieter F. Uchtdorf :

« Noa atu te huru ’ino o tō tātou orara’a. Noa atu te ’ute’ute o tā tātou mau hara, te hōhonu o tō tātou ’ino’ino, te vai-’ōtahi-ra’a o tō tātou ’ā’au, ’ua fa’aru’ehia mai ’aore rā ’ua pēpē te māfatu. Noa atu te feiā ’aita e tīa’ira’a, te feiā e ora nei i roto i te mana’o paruparu, te feiā tei ha’avarehia i roto i tō rātou ti’aturira’a, tei fa’aru’e i tō rātou parauti’a, ’e ’aore rā, tei huritua i te Atua, e nehenehe rātou e patu-fa’ahou-hia […]

« Teie te parau ’āpī ’oa’oa o te ’evanelia : Nā roto i te rāve’a rahi ’oa’oa mure ’ore tei hōro’ahia mai e tō tātou Metua here i te ao ra, ’e nā roto i te Tāra’ehara hope ’ore a Iesu Mesia, e fa’aorahia tātou ’eiaha i tō tātou noa huru hi’a, ’e ’ia fa’aho’ihia i roto i te vi’ivi’i ’ore, e nehenehe ato’a rā tātou e haere i mua i ’ō atu i tā te ta’ata tāhuti nei e nehenehe e feruri, ’e ’ia riro mai ’ei feiā ’āi’a i te ora mure ’ore ’e ’ia fa’ari’i i te hanahana fāito ’ore o te Atua » (« E tu’u ’oia ia ’oe i ni’a i tōna tapono ’e e fa’aho’i ’oia ia ’oe i te fare», Liahona, Mē 2016,102).

Hi’o ato’a Patrick Kearon, «Te hina’aro o te Atua ’o te fa’aho’ira’a ïa ia ’outou i te fare», Liahona, Mē 2024, 87–89.

I te roara’a o te mau u’i, ’ua hi’ohia ’Īserā’ela ’ei nūna’a fafauhia a te Atua. Terā rā, i roto i te fa’anahonahora’a a te Atua, i te mau taime ato’a, tē vai rā hau atu i te hō’ē nūna’a, inaha « te feiā ato’a i hia’ai ra » tē anihia rā rātou ’ia « haere mai […] i te pape nei » (Isaia 55:1). ’A tāpe’a noa i te reira i roto i te ferurira’a ’a tai’o ai ’oe ia Isaia 55 ’e 56, ’e ’a feruri māite i te aura’a nō te rirora’a ’ei ta’ata nō te Atua. E aha te parau poro’i a te Atua i te feiā e mana’o ra ē, ’ua « fa’ata’a-’ē-roa-hia » rātou iāna ? (Isaia 56:3). ’A feruri ’ia tāpa’o i te mau ’īrava e fa’ata’a rā i te mau peu ’e te mau ’ohipa a te feiā e « ha’apa’o māite i te faufa’a nā’u ra » (hi’o Isaia 56:4–7).

• E mea ’ārearea paha nō tā ’outou mau tamari’i ’ia ’ite mai i te mau pereota mai te « ara », « ’ia ti’a i ni’a », ’e « ’a ’ahu na i tō pūai » i roto ia Isaia 51:9, 17; 52:1–2, 9 ’e i muri iho, e ha’uti mai i taua mau pereota ra. I muri a’e i te reira, e nehenehe ’outou e paraparau nō ni’a i te aura’a ’ia ara, ’ia ti’a i ni’a ’e ’ia ’ō’omo i te pūai pae vārua. E aha tā te Fatu e ani mai nei ia tātou ’ia rave ?

• E ani i te mau tamari’i ’ia tai’o i te Isaia 51:1, 4, 7 ’e ’ia hi’o ’o vai tā te Fatu e parau nei ’e te mea tāna e hina’aro ia rātou ’ia rave. E aha te aura’a, ’ia « fa’aro’o mai » i te Fatu ? Nāhea e ti’a ai ia tātou ’ia fa’a’ite i te Fatu ē, tē « fa’aro’o nei » tātou iāna ?

• ’A pia i te mau hōho’a e rave rahi o te māuiui ’e te pohe ’o Iesu Mesia (hi’o, ’ei hi’ora’a, Buka hōho’a nō te ’evanelia, N° 56, 57, 58). I muri iho e nehenehe ’outou e tai’o ’āmui ia Isaia 53:3–6, 9 ’e e ’imi i te mau ta’o e fa’ata’a rā i te mea e tupu rā i roto i te mau hōho’a. ’A tauturu i tā ’outou mau tamari’i ’ia hāro’aro’a ē, ’ua fa’a’ite mai Isaia i teie mau parau mau e rave rahi hānere matahiti hou ’a tupu ai te reira. Nō te aha e mea faufa’a rahi te reira nō te mau ta’ata ’ia ’ite i teie mau mea e rave rahi mau matahiti nā mua roa ? (hi’o Alama 39:15–19

• I muri a’e i te tai’ora’a ia Isaia 53:4, « ’ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto », e nehenehe tā ’outou mau tamari’i e tāmata ’ia amo i te hō’ē tao’a teiaha (’aore rā e fa’ahua amo i te taiha’a). ’A ’āparau ē, e nehenehe te « ha’ape’ape’a » ’e te « ’oto » ’aore rā te ’oto rahi, e riro e nīno’a mana’o teiaha ’e te fifi ’ia amo. Nō te aha ’oia i amo ai i tō tātou « paruparu », te « ’oto », ’e « te mau ’ino » ’aore rā i te mau hara ? (hi’o ato’a Alama 7:11–12).

• Nō te ha’api’i i tā ’outou mau tamari’i nō ni’a ia Isaia 55:6, e nehenehe ’outou e huna i te hō’ē hōho’a nō Iesu i te hō’ē vāhi i roto i te piha. E nehenehe ’outou e ani i tā ’outou mau tamari’i ’ia ’imi i taua hōho’a ra ’e e fa’a’ite mai i te hō’ē rāve’a e nehenehe ai e « ’imi […] ia Iehova oi ’itea e ’oia ». E ’itehia ia rātou te tahi mau rāve’a i roto i te hīmene ra «Sans tarder, je recherche mon Sauveur» (Chants pour les enfants, 67) . I muri iho e nehenehe ’outou e vaiiho i te hō’ē o te mau tamari’i ’ia huna i te hōho’a ’e ’ia hau’ti fa’ahou.

• I muri a’e i te tai’ora’a ia Isaia 55:9, e mea ’ārearea paha nō tā ’outou mau tamari’i ’ia ti’a i ni’a i te hō’ē pārahira’a ’e ’ia paraparau nō ni’a i te ta’a-’ē-ra’a o te mau mea « teitei a’e ». ’Aore rā e nehenehe rātou e pāpa’i i te hō’ē hōho’a nō te aura’a a Isaia 55:9 nō rātou. ’A ’āparau ’e te mau tamari’i i te tahi o te mau rāve’a a te Fatu ’o tei teitei a’e i tō tātou. ’Ei hi’ora’a, e aha te huru o tāna ravera’a i te mau ta’ata hara ? (hi’o Mareko 2:15–17). E aha te huru o tāna arata’ira’a ia vetahi ’ē ? (hi’o Mataio 20:25–28). ’A parau i te mau tamari’i ē e mea nāhea tā ’outou ha’api’ira’a mai i te ti’aturi i te mau rāve’a teitei ’e te mau mana’o a te Fatu.