Исаиа 58–66

Хоол хүнс байхад яагаад хүн сайн дураараа хоолгүй явах вэ? Та Исаиа 58:3–12-ыг судлахдаа мацаг барих шалтгаанаа мөн энэ хуулийг өгөх Их Эзэний шалтгаануудын талаар бодоорой. Тунгаан бодох зарим асуултыг доор өгөв:

• Яагаад заримдаа мацаг барихыг адислал гэхээс илүү ачаа дарамт мэт ойлгодог вэ? (Исаиа 58:3–5-ыг үзнэ үү). Энэ бүлэг дэх Их Эзэний сургаалууд таны энэ ойлголтыг хэрхэн өөрчилсөн бэ?

• “Гэм буруугийн хүлгийг мултлан,” “буулгыг эвдэх” гэдэг нь юу гэсэн утгатай байж болох вэ? (Исаиа 58:6). Мацаг барих нь бусдыг хэрхэн адисалж болох вэ? (7-р шүлгийг үзнэ үү).

• Мацаг барих нь хэрхэн танд Исаиа 58:8–12-т дурдсан адислалыг авчирсан бэ?

Ерөнхийлөгч Хэнри Б.Айринг “Үүний тулд мацаг барилтыг Би сонгосон бус уу?” хэмээх үгэндээ (2015 оны 4-р сарын Ерөнхий чуулган, 3–7) мацаг барих, мацгийн өргөлөөр дамжуулан хүмүүс хэрхэн адислагдсан тухай хэдэн жишээ хуваалцсан. Та амьдралдаа үүнтэй ижил адислалыг хүлээн авч байсан уу?

Мөн “Bless Our Fast, We Pray,” Hymns, д.138; Gospel Library, Topics and Questions, “Fasting and Fast Offerings”-ыг үзнэ үү.

Хүндэтгэлийн өдөр таны хувьд “баясгалант” өдөр мөн үү? Исаиа 58:13–14-ийг судалж байхдаа Их Эзэний өдөр хэрхэн илүү баяр баясгаланг олж болохоо бодож үз. Жишээлбэл: “[Түүний] ариун өдөр өөрийн таашаалыг үйлдэх”-ээс татгалзах гэдэг нь юу гэсэн утгатай байж болох вэ? “Их Эзэн дотор өөрийгөө [баясгаж]”, “өөрийн замуудыг үйлдэх” хоёрын хооронд ямар ялгаа байна вэ?

Рассэлл М.Нэлсон, “Хүндэтгэлийн өдөр нь баясгалант өдөр билээ,” 2015 оны 4-р сарын Ерөнхий чуулган, 122.

Исаиа 58–66-д Есүс Христийн цагаатгагч үйл хэргийг олонтоо дурджээ. Судлахдаа тэдгээрийг олж мэд. Аврагчийг дүрслэхэд ашигласан нэр цол, үгсийг онцгойлон анхаар. Жишээлбэл:

• Исаиа 59:16–21 дэх “зуучлах” нэгнийг дүрсэлсэн хэсгийг юу нь танд гүн сэтгэгдэл төрүүлсэн бэ? 9–15-р шүлэгт дүрслэсэн нөхцөлүүдийг Аврагч хэрхэн даван туулсан бэ?

• Есүс Христ Назарын хүмүүст Мессиа гэдгээ зарлахдаа Исаиа 61:1–3-аас эш татсан (Лук 4:16–21; мөн ChurchofJesusChrist.org-оос “Jesus Declares He Is the Messiah” видеог үзнэ үү). Есүс Христ эдгээр шүлэгт дурдсан ямар арга замаар таныг адисалсан бэ? Тэр танд хэрхэн үнсний оронд гоёл чимгийг өгсөн бэ?

  

  3:24

• Та нар “ЭЗЭНий [ямар ямар] энэрэл хайрыг” “дурдаж” чадах вэ? (Исаиа 63:7–9-ийг үзнэ үү).

• Та Исаиа 58–66-аас Аврагчийн талаар дурдсан өөр ямар зүйлийг олж мэдсэн бэ?

Мөн Мозая 3:7; Сургаал ба Гэрээнүүд 133:46–53-ыг үзнэ үү.

Исаиа 60, 62-т гэрэл ба харанхуй, нүд ба харах талаар өгүүлсэн нь Есүс Христийн сайн мэдээ хэрхэн хожмын өдрүүдэд дэлхий ертөнцийг адислах талаар заадаг. Эдгээр ойлголтыг Исаиа 60:1–5, 19–20; 62:1–2-оос олж харна уу. Та эдгээр бүлгийг уншихдаа, Бурхан хэрхэн хүүхдүүдээ харанхуйгаас Өөрийн гэрэл рүү цуглуулж байгааг тунгаан бод. Энэ ажилд та ямар үүрэг гүйцэтгэдэг вэ?

Мөн 1 Нифай 22:3–12; 3 Нифай 18:24; Сургаал ба Гэрээнүүд 14:9; Бонни Х.Кордон, “Тэд харж болохын тулд,” 2020 оны 4-р сарын Ерөнхий чуулган, 95–98-ыг үзнэ үү.

Исаиа “урьдын зовлон шаналангууд мартагдах” (Исаиа 65:16) өдрийн талаар ярьсан. Энэ бошиглол зарим талаараа биелсэн ч бүрэн утгаараа биелэх, Есүс Христ эргэн ирэх тэр өдөр хараахан болоогүй байна. Исаиа ирээдүйд тохиох энэ өдрийн талаар Исаиа 64:1–5; 65:17–25; 66-д дүрсэлсэн. Тэр “баярлан баясах” болон “баяр баясал” зэрэг үгсийг хэр их ашигласныг ажигла. Яагаад Аврагчийн эргэж ирэх өдөр таны хувьд хэрхэн баяр баясгалант өдөр байх вэ? Би Түүнийг ирэхэд бэлдэхийн тулд юу хийж болох вэ?

Мөн Итгэлийн тунхаг 1:10; Рассэлл М.Нэлсон, “Сүмийн ирээдүй: Аврагчийн Хоёр дахь ирэлтэд зориулан дэлхийг бэлтгэх нь,” Лиахона, 2020 оны 4-р сар.

• Хүүхдүүдээ мацаг барихад бэлэн болсон үед нь дэмжин тусалж болох хамгийн сайн арга бол энэ хуулийг өгөх болсон Их Эзэний зорилгыг ойлгоход нь тэдэнд туслах явдал юм. Исаиа 58:6–11-ийг хамтдаа уншаад, дараах асуултуудын хариултыг ол: “Бид яагаад мацаг барьдаг вэ?” “Бид хэрхэн мацаг барьдаг вэ?” Та мөн Судруудын удирдамж дахь “Мацаг, мацаг барих”-аас харж болно.

• Хэрэв танд мацаг барих талаар утга учир бүхий туршлага байвал үүнийгээ хүүхдүүдтэйгээ хуваалц. Их Эзэн яагаад энэ хуулийг бидэнд өгснийг найздаа хэрхэн тайлбарлахыг нь тэднээс асууж болно.

• Исаиа 58:13–14-ийг уншсаныхаа дараа долоо хоногийн өдрүүдийг цаглавар дээр заагаад, өдрүүдийг тантай хамт хэлэхийг хүүхдүүдээсээ хүс. Хүндэтгэлийн өдөрт болоход тэднээс тэр өдрийг “баясгалантай” гэж хэлэхийг хүс. Хүндэтгэлийн өдөр яагаад танд баясгалантай болохоо хэл.

• Хүндэтгэлийн өдөр “Их Эзэний дотор баяр хөөрийг олох” арга замуудыг бие биетэйгээ хуваалц. Хүүхдүүд тань бодол санаагаа зурж, “Хүндэтгэлийн өдрийн баяр хөөрийн хайрцагт” хийж болох юм. Дараа нь Хүндэтгэлийн өдөр хийх зүйлсийн талаар санаа авах хэрэгтэй үед тэд нэг санааг хайрцгаасаа авч болно.

• Та Исаиа 60:1–3-ыг уншихдаа нүдээ анихад хүүхдүүдийг урь. Гэрэл” гэсэн үгийг сонсмогцоо нүдээ нээж, “харанхуй” гэсэн үгийг сонсмогцоо нүдээ анихыг тэднээс хүс. Есүс Христ ба Түүний сайн мэдээ нь Тэнгэрлэг Эцэг рүү буцах замаа олж харахад бидэнд тусалдаг гэрэлтэй адил болохыг тайлбарла.

• Исаиа 65:17–25-д Аврагчийг дахин ирэхэд дэлхий ямар байхыг дүрсэлдэг. Та эдгээр шүлгийг хүүхдүүдтэйгээ хамт уншихдаа Исаиагийн дүрсэлснээр “шинэ газар нутагт” амьдрал хэр өөр байхыг олж мэдэхэд тэдэнд тусал. Яагаад энэ нь “үүрд баярлан баясах” (18-р шүлэг) цаг үе байх вэ?

• “Түүнийг дэлхийд дахин ирэхэд” (Gospel Library) гэх зэрэг Хоёр дахь ирэлтийн талаарх дууг хамтдаа дуулж болно. Аврагчийн эргэж ирэх талаар юу хүсэн хүлээж байгаагаа нэг нэгэнтэйгээ хуваалц. Энэ өдөрт бэлдэхийн тулд бид юу хийж болох вэ?