« ថ្ងៃទី១២–១៨ ខែតុលា ។ ‹ អ្នកដ៏ជួយប្រោសលោះមកឯក្រុងស៊ីយ៉ូន › ៖ អេសាយ ៥៨–៦៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី១២–១៨ ខែតុលា ។ ‹ អ្នកដ៏ជួយប្រោសលោះមកឯក្រុងស៊ីយ៉ូន › » ចូរមកតាមខ្ញុំ៖ ព្រះគម្ពីរសញ្ញាចាស់ ឆ្នាំ២០២៦
ព្រះយេស៊ូវនៅក្នុងសាលាប្រជុំនៅឯណាសារ៉ែត ដោយ ហ្គ្រេក ខេ អូសិន
ថ្ងៃទី១២–១៨ ខែតុលា ៖ « អ្នកដ៏ជួយប្រោសលោះមកឯក្រុងស៊ីយ៉ូន »
អេសាយ ៥៨–៦៦
នៅពេលចាប់ផ្តើមការងារបម្រើរបស់ទ្រង់ ព្រះយេស៊ូវគ្រីស្ទបានយាងទៅសាលាប្រជុំនៅក្នុងភូមិណាសារ៉ែត ដែលជាកន្លែងទ្រង់បានចម្រើនព្រះជន្មឡើង ។ ទ្រង់បានឈរអានព្រះគម្ពីរនៅទីនោះ បានបើកទៅគម្ពីរអេសាយ ហើយបានអានពីអ្វីដែលយើងហៅឥឡូវនេះថាជា អេសាយ ៦១:១–២ ។ បន្ទាប់មក ទ្រង់បានប្រកាសថា « នៅថ្ងៃនេះ បទគម្ពីរនេះបានសម្រេចនៅត្រចៀកអ្នករាល់គ្នាហើយ » ។ វាជាការប្រកាសដ៏ត្រង់បំផុតមួយរបស់ព្រះអង្គសង្រ្គោះថា ទ្រង់ជាអង្គចាក់ប្រេងតាំង ដែលនឹង « ប្រោសមនុស្សដែលមានចិត្តសង្រេង » និង « ប្រកាសប្រាប់ពីសេចក្តីប្រោសលោះដល់ពួកឈ្លើយ » ( សូមមើល លូកា ៤:១៦–២១ ) ។ ជាការពិត បទគម្ពីរនេះត្រូវបានបំពេញនៅសម័យនោះមែន ។ ហើយដូចជាការព្យាករជាច្រើនទៀតរបស់អេសាយដែរ វាបន្តបំពេញនៅក្នុងសម័យរបស់យើង ។ ព្រះអង្គសង្គ្រោះបន្តប្រោសមនុស្សដែលមានចិត្តសង្រេងដែលមកឯទ្រង់ ។ ក៏នៅតែមានអ្នកជាប់ឃុំឃាំងជាច្រើនដែលត្រូវការការជួយសង្រ្គោះដែរ ។ ហើយមានអនាគតដ៏រុងរឿងមួយដែលយើងត្រូវរៀបចំខ្លួនរង់ចាំ—ជាគ្រាដែលព្រះអម្ចាស់នឹង « បង្កើតផ្ទៃមេឃថ្មី ហើយនិងផែនដីថ្មី » ( អេសាយ ៦៥:១៧ ) និង « ធ្វើឲ្យសេចក្តីសុចរិត និងសេចក្តីសរសើរបានលេចឡើង នៅចំពោះអស់ទាំងសាសន៍យ៉ាងនោះដែរ » ( អេសាយ ៦១:១១ ) ។ ការអានគម្ពីរអេសាយ បើកភ្នែករបស់យើងឲ្យឃើញអ្វីដែលព្រះអម្ចាស់បានធ្វើរួចទៅហើយ អ្វីដែលទ្រង់កំពុងធ្វើ និងអ្វីដែលទ្រង់មិនទាន់បានធ្វើសម្រាប់រាស្រ្តរបស់ទ្រង់នៅឡើយ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
អេសាយ ៥៨:៣–១២
ការតមអាហារស្ថាបនាអំណាចខាងវិញ្ញាណ និងផ្ដល់ពរជ័យដល់អ្នកខ្វះខាត ។
ហេតុអ្វីបានជាមានមនុស្សសុខចិត្តអត់អាហារ នៅពេលដែលមានអាហារបរិភោគ ? នៅពេលដែលបងប្អូនសិក្សា អេសាយ ៥៨:៣–១២ បងប្អូនប្រហែលជាគិតអំពីហេតុផលរបស់បងប្អូនសម្រាប់ការតមអាហារ—ព្រមទាំងហេតុផលរបស់ព្រះអម្ចាស់ក្នុងការប្រទាននូវក្រឹត្យវិន័យនេះ ។ នេះគឺជាសំណួរមួយចំនួនសម្រាប់ជញ្ជឹងគិត ៖
-
ហេតុអ្វីបានជាពេលខ្លះការតមអាហារអាចត្រូវបានយល់ឃើញថាជាបន្ទុកច្រើនជាងពរជ័យទៅវិញ ? ( សូមមើល អេសាយ ៥៨:៣–៥ ) ។ តើការបង្រៀនរបស់ព្រះអម្ចាស់នៅក្នុងជំពូកនេះផ្លាស់ប្តូរការយល់ឃើញនោះសម្រាប់បងប្អូនដោយរបៀបណា ?
-
តើវាអាចមានន័យដូចម្តេចដើម្បី « ដោះច្រវាក់ដែលឯងដាក់គេដោយអំពើអាក្រក់ » និង « បំបាក់គ្រប់ទាំងនឹម » ? ( អេសាយ ៥៨:៦ ) ។ តើការតមអាហារអាចផ្តល់ពរជ័យដល់អ្នកដទៃបានយ៉ាងដូចម្តេច ? ( សូមមើល ខទី ៧ ) ។
-
តើការតមអាហារនាំមកនូវពរជ័យដែលបានពិពណ៌នានៅក្នុង អេសាយ ៥៨:៨–១២ ដល់បងប្អូនយ៉ាងដូចម្តេច ?
នៅក្នុងសារលិខិតរបស់លោក « Is Not This the Fast That I Have Chosen? » ( Liahona ខែឧសភា ឆ្នាំ២០១៥ ទំព័រ ២២–២៥ ) ប្រធាន ហែនរី ប៊ី អាវរិង បានចែកចាយគំរូជាច្រើន អំពីរបៀបដែលប្រជាជនបានទទួលពរជ័យតាមរយៈការតមអាហារ និងដង្វាយតមអាហារ ។ តើបងប្អូនបានឃើញពរជ័យស្រដៀងគ្នានេះកើតឡើងនៅក្នុងជីវិតរបស់បងប្អូនយ៉ាងដូចម្តេច ?
សូមមើលផងដែរ « Bless Our Fast, We Pray » Hymns ល.រ. ១៣៨; Topics and Questions « Fasting and Fast Offerings » បណ្ណាល័យដំណឹងល្អ ។
រៀនស្គាល់អស់មនុស្សទាំងឡាយដែលបងប្អូនបង្រៀន ។ « ការធ្វើជាគ្រូបង្រៀនដូចជាព្រះគ្រីស្ទរួមមានការស្គាល់មនុស្សដែលអ្នកបង្រៀន និងការព្យាយាមស្វែងយល់ពីអ្វីដែលមាននៅក្នុងចិត្តរបស់ពួកគេ ។ … អ្នកអាចឈ្វេងយល់ពីរបៀបដែលពួកគេរៀនបានល្អបំផុត ។ អ្នកអាចសួរសំណួរ ស្តាប់ដោយយកចិត្តទុកដាក់ និងអង្កេត ។ សំខាន់ជាងអ្វីៗទាំងអស់គឺអ្នកអាចអធិស្ឋានសូមការយល់ដឹងដែល មានតែព្រះវិញ្ញាណប៉ុណ្ណោះដែលអាចប្រទានការណ៍នេះបាន ។ កាលណាអ្នកស្គាល់មនុស្សម្នាក់បានច្បាស់ នោះអ្នកអាចជួយពួកគាត់ឲ្យរកឃើញអត្ថន័យ និងអំណាចផ្ទាល់ខ្លួននៅក្នុងដំណឹងល្អរបស់ព្រះយេស៊ូវគ្រីស្ទកាន់តែប្រសើរឡើង ។ នៅពេលអ្នកយល់ពីការស្រេកឃ្លានរបស់មនុស្សម្នាក់ នោះព្រះវិញ្ញាណអាចបង្រៀនអ្នកនូវរបៀបជួយបំបាត់ការស្រេកឃ្លាននោះ ជាមួយនឹងទឹករស់របស់ព្រះអង្គសង្គ្រោះ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៣ ) ។
អេសាយ ៥៨:១៣–១៤
ការគោរពព្រះអម្ចាស់នៅថ្ងៃឈប់សម្រាកនាំមកនូវអំណរ ។
តើថ្ងៃឈប់សម្រាកពិតជាថ្ងៃមួយ « ដ៏រីករាយ » សម្រាប់បងប្អូនដែរទេ ? នៅពេលបងប្អូនសិក្សា អេសាយ ៥៨:១៣–១៤ សូមពិចារណាពីរបៀបដែលបងប្អូនអាចរកឃើញភាពរីករាយបន្ថែមទៀតនៅថ្ងៃរបស់ព្រះអម្ចាស់ ។ ឧទាហរណ៍ តើវាអាចមានអត្ថន័យដូចម្តេចដើម្បីងាក « បែរចេញ … មិនឲ្យធ្វើតាមអំពើចិត្តនៅថ្ងៃបរិសុទ្ធ [ របស់ទ្រង់ ] » ? តើមានភាពខុសគ្នាអ្វីខ្លះរវាង « ឯងនឹង [ ធ្វើឲ្យចិត្តរីករាយ ] ក្នុងព្រះយេហូវ៉ា » និង « ធ្វើតាមអំពើចិត្តរបស់ខ្លួន » ?
សូមមើលផងដែរ រ័សុល អិម ណិលសុន « The Sabbath Is a Delight » Liahona ខែឧសភា ឆ្នាំ២០១៥ ទំព័រ ១២៩–១៣២ ។
អេសាយ ៥៩:៩–២១; ៦១:១–៣; ៦៣:៧–៩
ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់ខ្ញុំ ។
អេសាយ ៥៨–៦៦ មានសេចក្តីយោងជាច្រើនស្តីពីបេសកកម្មដ៏ធួនរបស់ព្រះយេស៊ូវគ្រីស្ទ ។ សូមរកមើលការណ៍នោះនៅពេលដែលបងប្អូនសិក្សា ។ ជាពិសេស សូមកត់ចំណាំចំណងជើង និងពាក្យពេចន៍ដែលប្រើដើម្បីពិពណ៌នាអំពីព្រះអង្គសង្គ្រោះ ។ ឧទាហរណ៍ ៖
-
តើមានអ្វីដែលលេចធ្លោចំពោះបងប្អូនអំពីការពិពណ៌នានៃ « ជួយអង្វរជំនួសគេ » នៅក្នុង អេសាយ ៥៩:១៦–២១ ? តើព្រះអង្គសង្រ្គោះយកឈ្នះលើស្ថានភាពដែលបានពិពណ៌នានៅក្នុង ខទី ៩–១៥ ដោយរបៀបណា ?
-
នៅពេលព្រះយេស៊ូវគ្រីស្ទបានប្រកាសដល់ប្រជាជននៅណាសារ៉ែតថា ទ្រង់គឺជាព្រះមែស៊ី នោះទ្រង់បានដកស្រង់ចេញពី អេសាយ ៦១:១–៣ ( សូមមើល លូកា ៤:១៦–២១; សូមមើលផងដែរ វីដេអូ « Jesus Declares He Is the Messiah » នៅលើបណ្ណាល័យដំណឹងល្អ ) ។ តើព្រះយេស៊ូវគ្រីស្ទបានប្រទានពរដល់បងប្អូន និងអ្នកដទៃតាមរបៀបដែលបានពិពណ៌នានៅក្នុងខគម្ពីរទាំងនេះយ៉ាងដូចម្តេច ? តើទ្រង់បានប្រទានឲ្យនូវភួងលម្អជំនួសឲ្យផេះយ៉ាងដូចម្តេច ?
3:23ព្រះយេស៊ូវប្រកាសថា ទ្រង់គឺជាព្រះមែស៊ី
-
តើ « សេចក្តីសប្បុរសរបស់ព្រះយេហូវ៉ា » អ្វីខ្លះដែលបងប្អូនអាច« រៀបរាប់ »បាន ? ( សូមមើល អេសាយ ៦៣:៧–៩ ) ។
-
តើសេចក្តីយោងស្តីពីព្រះអង្គសង្រ្គោះអ្វីខ្លះទៀត ដែលបងប្អូនរកឃើញនៅក្នុង អេសាយ ៥៨–៦៦ ?
សូមមើលផងដែរ ម៉ូសាយ ៣:៧; គោលលទ្ធិ និងសេចក្តីសញ្ញា ១៣៣:៤៦–៥៣ ។
A Gift of Light [ អំណោយទាននៃពន្លឺ ] ដោយ អ៊ីវ៉ា ធីម៉ូធី
អេសាយ ៦០; ៦២
« ព្រះយេហូវ៉ា ទ្រង់នឹងជាពន្លឺដ៏នៅអស់កល្បជានិច្ចដល់ឯងវិញ » ។
អេសាយ ៦០ និង ៦២ និយាយពីពន្លឺ និងសេចក្តីងងឹត ពីភ្នែក និងការមើលឃើញ ដើម្បីបង្រៀនអំពីរបៀបដែលដំណឹងល្អនៃព្រះយេស៊ូវគ្រីស្ទនឹងប្រទានពរដល់ពិភពលោកនៅថ្ងៃចុងក្រោយ ។ សូមរកមើលគោលគំនិតទាំងនេះ នៅក្នុង អេសាយ ៦០:១–៥, ១៩–២០; ៦២:១–២ ។ ពេលបងប្អូនអានជំពូកទាំងនេះ សូមជញ្ជឹងគិតអំពីរបៀបដែលព្រះប្រមូលផ្ដុំបុត្រាបុត្រីរបស់ទ្រង់ចេញពីសេចក្តីងងឹតទៅកាន់ពន្លឺរបស់ទ្រង់ ។ តើបងប្អូនមានតួនាទីអ្វីនៅក្នុងកិច្ចការនេះ ?
សូមមើលផងដែរ នីហ្វៃទី១ ២២:៣–១២; នីហ្វៃទី៣ ១៨:២៤; គោលលទ្ធិ និងសេចក្តីសញ្ញា ១៤:៩; បូនី អេច ខ័រឌុន « That They May See » Liahona ខែឧសភា ឆ្នាំ២០២០ ទំព័រ ៧៨–៨០ ។
អេសាយ ៦៤:១–៥; ៦៥:១៧–២៥; ៦៦
ព្រះគ្រីស្ទនឹងគ្រងរាជ្យនៅលើផែនដីនៅអំឡុងពេលសហស្សវត្សរ៍ ។
អេសាយបាននិយាយពីថ្ងៃមួយដែល « សេចក្តីវេទនាពីជាន់មុនបានភ្លេចទៅហើយ » ( អេសាយ ៦៥:១៦ ) ។ ខណៈពេលដែលការព្យាករនេះបានសម្រេចជាច្រើន នៅក្នុងភាពពេញលេញនៃថ្ងៃនោះ ថ្ងៃនោះមិនទាន់មកដល់នៅឡើយទេ—នៅពេលដែលព្រះយេស៊ូវគ្រីស្ទនឹងយាងមកផែនដីម្តងទៀត ។ អេសាយបានពិពណ៌នាពីថ្ងៃអនាគតនេះ នៅក្នុង អេសាយ ៦៤:១–៥; ៦៥:១៧–២៥; ៦៦ ។ សូមកត់សម្គាល់ថា តើលោកប្រើពាក្យដូចជា « រីករាយ » និង « ជាទីរីករាយ » ញឹកញាប់ប៉ុនណា ។ ហេតុអ្វីការត្រឡប់មកវិញរបស់ព្រះអង្គសង្រ្គោះគឺជាថ្ងៃដ៏រីករាយមួយសម្រាប់បងប្អូន ? តើបងប្អូនអាចធ្វើអ្វីខ្លះដើម្បីរៀបចំខ្លួនសម្រាប់ការយាងមករបស់ទ្រង់ ?
សូមមើលផងដែរ មាត្រានៃសេចក្តីជំនឿ ១:១០; រ័សុល អិម ណិលសុន « The Future of the Church: Preparing the World for the Savior’s Second Coming » Ensign ខែមេសា ឆ្នាំ២០២០ ទំព័រ ១៣–១៧ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
អេសាយ ៥៨:៦–១១
ការតមអាហារផ្ដល់ពរជ័យដល់ខ្ញុំ និងអ្នកដទៃទៀតដែលខ្វះខាត ។
-
ប្រហែលជាវិធីដ៏ល្អបំផុតក្នុងការលើកទឹកចិត្តកូនៗបងប្អូនឲ្យតមអាហារ—នៅពេលពួកគេត្រៀមខ្លួនរួចរាល់—គឺជួយពួកគេឲ្យយល់ពីគោលបំណងរបស់ព្រះអម្ចាស់សម្រាប់ក្រឹត្យវិន័យនេះ ។ សូមពិចារណាអានជាមួយគ្នា អេសាយ ៥៨:៦–១១ ដើម្បីស្វែងរកចម្លើយចំពោះសំណួរទាំងនេះ ៖ ហេតុអ្វីបានជាយើងតមអាហារ ? តើយើងតមអាហារតាមរបៀបណា ? អ្នកក៏អាចមើលនៅក្នុង « តម, តំណម » នៅក្នុងសេចក្តីណែនាំដល់បទគម្ពីរទាំងឡាយ ។
-
ប្រសិនបើបងប្អូនមានបទពិសោធន៍ដ៏មានន័យជាមួយនឹងការតមអាហារ សូមចែកចាយវាជាមួយកូនៗបងប្អូន ។ បងប្អូនក៏អាចសួរពួកគេពីរបៀបដែលពួកគេអាចពន្យល់ទៅកាន់មិត្តភក្តិពីមូលហេតុដែលព្រះអម្ចាស់បានប្រទានក្រឹត្យវិន័យនេះផងដែរ ។
អេសាយ ៥៨:១៣–១៤
ថ្ងៃឈប់សម្រាកអាចជាទីរីករាយចិត្តចំពោះខ្ញុំ ។
-
បន្ទាប់ពីអាន អេសាយ ៥៨:១៣–១៤ បងប្អូនអាចចង្អុលបង្ហាញនូវថ្ងៃនានាក្នុងសប្តាហ៍នៅលើប្រតិទិន ហើយអញ្ជើញកូនៗបងប្អូនឲ្យអានថ្ងៃទាំងនោះជាមួយបងប្អូន ។ នៅពេលដែលបងប្អូនអានដល់ថ្ងៃឈប់សម្រាក សូមសួរពួកគេឲ្យហៅថ្ងៃនោះថា « ថ្ងៃដ៏រីករាយ » ។ សូមប្រាប់ពួកគេពីមូលហេតុដែលថ្ងៃឈប់សម្រាកគឺជាថ្ងៃដ៏រីករាយចំពោះបងប្អូន ។
-
ចែកចាយជាមួយគ្នានូវវិធីដែលបងប្អូនអាច « នឹងបានចិត្តរីករាយ ក្នុងព្រះយេហូវ៉ា » នៅថ្ងៃឈប់សម្រាក ។ ប្រហែលជាកូនៗបងប្អូនអាចគូរពីគំនិតរបស់ពួកគេ ហើយដាក់វានៅក្នុង « ប្រអប់រីករាយនៅថ្ងៃឈប់សម្រាក » ។ បន្ទាប់មក នៅពេលពួកគេត្រូវការគំនិតអំពីអ្វីៗដែលត្រូវធ្វើនៅថ្ងៃឈប់សម្រាក នោះពួកគេអាចទាញយកគំនិតចេញពីប្រអប់នោះ ។
Our Light [ ពន្លឺរបស់យើង ] ដោយ ដែន វិលសុន
អេសាយ ៦០:១–៣
ព្រះអង្គសង្រ្គោះគឺដូចជាពន្លឺសម្រាប់ខ្ញុំ ។
-
បងប្អូនអាចអញ្ជើញកូនៗបងប្អូនឲ្យបិទភ្នែករបស់ពួកគេ នៅពេលបងប្អូនអាន អេសាយ ៦០:១–៣ ។ សូមឲ្យពួកគេបើកភ្នែករបស់ពួកគេពេលពួកគេឮពាក្យ « ពន្លឺ » ហើយបិទភ្នែកម្តងទៀត ពេលពួកគេឮពាក្យ « សេចក្តីងងឹត » ។ សូមពន្យល់ថា ព្រះយេស៊ូវគ្រីស្ទ និងដំណឹងល្អរបស់ទ្រង់គឺដូចជាពន្លឺដែលជួយយើងឲ្យឃើញផ្លូវរបស់យើងត្រឡប់ទៅព្រះវរបិតាសួគ៌វិញដែរ ។
អេសាយ ៦៥:១៧–២៥
នៅពេលព្រះយេស៊ូវគ្រីស្ទយាងមកម្តងទៀត នោះទ្រង់នឹងនាំមកនូវសេចក្តីសុខសាន្ត និងអំណរ ។
-
អេសាយ ៦៥:១៧–២៥ ពិពណ៌នាអំពីស្ថានភាពរបស់ផែនដីនេះ នៅពេលព្រះអង្គសង្គ្រោះយាងមកម្ដងទៀត ។ នៅពេលបងប្អូនអានខគម្ពីរទាំងនេះជាមួយកូនៗបងប្អូន សូមជួយពួកគេរកមើលពីរបៀបដែលជីវិតនឹងមានភាពខុសប្លែកនៅក្នុង « ផែនដីថ្មី » ដែលអេសាយបានពិពណ៌នា ។ តើហេតុអ្វីពេលនេះជាពេលមួយដើម្បី « មានសេចក្តីអំណរ ហើយរីករាយឡើងជាដរាប » ? ( ខទី ១៨ ) ។
-
បងប្អូនអាចច្រៀងជាមួយគ្នានូវបទចម្រៀង ដូចជាបទ « When the Savior Comes Again » ( បណ្ណាល័យដំណឹងល្អ ) ។ ចែកចាយជាមួយគ្នានូវអ្វីដែលបងប្អូនទន្ទឹងរង់ចាំអំពីការយាងមកវិញរបស់ព្រះអង្គសង្គ្រោះ ។ តើយើងអាចធ្វើអ្វីខ្លះ ដើម្បីត្រៀមខ្លួនសម្រាប់ថ្ងៃនោះ ?
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។