« ថ្ងៃទី៥–១១ ខែតុលា ‹ ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង › ៖ អេសាយ ៥០–៥៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី៥–១១ ខែតុលា ‹ ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង › » ចូរមកតាមខ្ញុំ ៖ព្រះគម្ពីរសញ្ញាចាស់ ឆ្នាំ២០២៦
The Mocking of Christ [ ការចំអកដាក់ព្រះគ្រីស្ទ ] ដោយ ខាល ហេនរី ប្លក់
ថ្ងៃទី៥–១១ ខែតុលា ៖ « ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង »
អេសាយ ៥០–៥៧
នៅក្នុងការងារបម្រើរបស់លោកទាំងមូល អេសាយបាននិយាយអំពីអង្គរំដោះដ៏អស្ចារ្យ ។ ការព្យាករទាំងនេះពិតជាមានតម្លៃណាស់សម្រាប់សាសន៍អ៊ីស្រាអែលរាប់សតវត្សរ៍ក្រោយមក ពេលពួកគេជាប់នៅក្នុងសេវកភាពនៅបាប៊ីឡូន ។ នរណាម្នាក់ដែលអាចវៃបំបែកកំពែងក្រុងបាប៊ីឡូននឹងក្លាយជាអ្នកឈ្នះដ៏អស្ចារ្យ ។ ប៉ុន្តែនោះពុំមែនជាបែបផែននៃព្រះមែស៊ី ដែលអេសាយបានពិពណ៌នានៅក្នុង ជំពូក ៥២–៥៣ នោះទេ ៖ « ទ្រង់ត្រូវគេមើលងាយ ហើយត្រូវមនុស្សបោះបង់ចោល ទ្រង់ជាមនុស្សទូទុក្ខ ហើយក៏ធ្លាប់ស្គាល់សេចក្តីឈឺចាប់ ៖ ហើយយើងរាល់គ្នាមិនបានរាប់អានទ្រង់សោះ ។ … យើងរាល់គ្នាបានរាប់ទ្រង់ទុកជាអ្នកមានទោសវិញ គឺជាអ្នកដែលព្រះបានវាយ ជាអ្នកដែលរងវេទនា » ( អេសាយ ៥៣:៣–៤ ) ។
តាមរយៈការបញ្ជូនអង្គរំដោះដែលមិនបានរំពឹងទុកឲ្យយាងមក ព្រះបានបង្រៀនយើងអំពីការរំដោះពិតប្រាកដ ។ ដើម្បីសង្រ្គោះយើងពីការសង្កត់សង្កិន និងទុក្ខវេទនា ព្រះបានចាត់អង្គទ្រង់ផ្ទាល់ « ទ្រង់ត្រូវគេសង្កត់សង្កិន ហើយធ្វើទុក្ខ » ។ កាលដែលមនុស្សមួយចំនួនរំពឹងថាបានសត្វសិង្ហ ទ្រង់បានបញ្ជូនកូនចៀមមក ( សូមមើល អេសាយ ៥៣:៧ ) ។ ពិតប្រាកដណាស់ របៀបរបស់ព្រះគឺពុំដូចជារបៀបរបស់យើងនោះទេ ( សូមមើល អេសាយ ៥៥:៨–៩ ) ។ ព្រះយេស៊ូវគ្រីស្ទពុំមែនរំដោះយើងដោយគ្រាន់តែបើកទ្វារគុកប៉ុណ្ណោះទេ ប៉ុន្តែ ដោយការជំនួសកន្លែងយើងនៅទីនោះផងដែរ ។ ទ្រង់ធ្វើឲ្យយើងធូរស្បើយពីច្រវាក់នៃសេចក្ដីឈឺចាប់ និងភាពសោកសៅរបស់យើងដោយទទួលបន្ទុកនោះដោយព្រះអង្គផ្ទាល់ ( សូមមើល អេសាយ ៥៣:៤–៥, ១២ ) ។ ទ្រង់មិនបានសង្គ្រោះយើងពីចម្ងាយឡើយ ។ ទ្រង់បានរងទុក្ខជាមួយនឹងយើង នៅក្នុងទង្វើនៃ « សេចក្ដីសប្បុរសដ៏នៅអស់កល្បជានិច្ច » ដែល « នឹងមិនដែលឃ្លាតបាត់ពីឯងឡើយ » ( អេសាយ ៥៤:៨, ១០ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
អេសាយ ៥០–៥២
អនាគតមានភាពភ្លឺស្វាងសម្រាប់រាស្ត្ររបស់ព្រះអម្ចាស់ ។
ទោះជាពួកសាសន៍អ៊ីស្រាអែលបានចំណាយពេលជាច្រើនឆ្នាំជាប់ក្នុងសេវកភាពក្ដី—ហើយទោះជាសេវកភាពនោះគឺជាលទ្ធផលនៃការជ្រើសរើសមិនល្អរបស់ពួកគេផ្ទាល់ក្ដី—ក៏ព្រះអម្ចាស់សព្វព្រះទ័យឲ្យពួកគេមើលទៅអនាគតដោយសេចក្ដីសង្ឃឹមដែរ ។ តើបងប្អូនរកឃើញអ្វីខ្លះនៅក្នុងសារលិខិតរបស់អេសាយដែលផ្ដល់ក្តីសង្ឃឹមឲ្យបងប្អូន ? តារាងដូចខាងក្រោមនេះអាចជួយបងប្អូនឲ្យសិក្សា ៖
|
អ្វីដែលខ្ញុំរៀនអំពីព្រះ ( សូមមើលឧទាហរណ៍ អេសាយ ៥០:២, ៥–៩; ៥១:៣–៨, ១៥–១៦; ៥២:៣, ៩–១០ ) | |
|
សារលិខិតនៃក្តីសង្ឃឹម ( សូមមើលឧទាហរណ៍ អេសាយ ៥០:៩; ៥១:៣–៥, ១១–១២, ២២–២៣; ៥២:៩–១០ ) | |
|
តើខ្ញុំអាចធ្វើអ្វីដើម្បីធ្វើឲ្យសេចក្តីសង្ឃឹមក្លាយជាការពិត ( សូមមើលឧទាហរណ៍ អេសាយ ៥០:១០; ៥១:១–២, ៦–៩; ៥២:១–៣, ៩–១១ ) |
សូមមើលផងដែរ ម៉ូសាយ ១២:២០–២៤; ១៥:១៣–១៨; នីហ្វៃទី៣ ២០:២៩–៤៦; គោលលទ្ធិ និងសេចក្តីសញ្ញា ១១៣:៧–១០; រ័សុល អិម ណិលសុន « Embrace the Future with Faith » Liahona ខែវិច្ឆិកា ឆ្នាំ២០២០ ទំព័រ ៧៣–៧៦ ។
Because of Love [ ដោយសារតែសេចក្ដីស្រឡាញ់ ] ដោយ អេនជិលឡា ចនសុន
ជួយសិស្សឲ្យមកកាន់ព្រះយេស៊ូវគ្រីស្ទ ។ « គ្មានអ្វីមួយដែលអ្នកធ្វើក្នុងនាមជាគ្រូបង្រៀនដែលនឹងផ្តល់ពរដល់សិស្ស ច្រើនជាងការជួយពួកគេឲ្យស្គាល់ព្រះវរបិតាសួគ៌ និងព្រះយេស៊ូវគ្រីស្ទ ហើយទទួលអារម្មណ៍នៃសេចក្តីស្រឡាញ់របស់ទ្រង់ទាំងទ្វេនោះឡើយ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៨ ) ។ នៅពេលបងប្អូនរៀបចំដើម្បីបង្រៀន អេសាយ ៥០–៥៧ ទៅអ្នកដទៃ សូមពិចារណារបៀបដែលបងប្អូនអាចជួយពួកគេមើលឃើញទំនាក់ទំនងរវាងបញ្ហាប្រឈមរបស់អ៊ីស្រាអែល ការព្យាកររបស់អេសាយពីព្រះគ្រីស្ទ និងការទទួលជំនួយដ៏ទេវភាពនៅគ្រាជួបការសាកល្បងរបស់ពួកគេផ្ទាល់ ។
អេសាយ ៥៣
ព្រះយេស៊ូវគ្រីស្ទបានលើកដាក់មកលើអង្គទ្រង់នូវអំពើបាប និងសេចក្ដីទុក្ខព្រួយរបស់ខ្ញុំ ។
មានជំពូកមួយចំនួននៅក្នុងបទគម្ពីរពិពណ៌នាអំពីបេសកកម្មប្រោសលោះរបស់ព្រះយេស៊ូវគ្រីស្ទបានយ៉ាងក្បោះក្បាយជាង អេសាយ ៥៣ ។ សូមពិចារណាសកម្មភាពដូចទាំងនេះដើម្បីយល់កាន់តែច្បាស់ និងអនុវត្តការបង្រៀនដ៏មានឥទ្ធិពលទាំងនេះ ៖
-
ជញ្ជឹងគិត ឬពិភាក្សាអំពីរបៀបដែលដំណើររឿង និងខ្សែភាពយន្តជាញឹកញាប់ពិពណ៌នាអំពីវីរបុរសដែលជួយសង្គ្រោះមនុស្ស ។ ប្រៀបធៀបរូបភាពទាំងនោះជាមួយនឹងការពិពណ៌នារបស់ព្រះអង្គសង្គ្រោះនៅក្នុង អេសាយ ៥៣ ។
-
បន្ទាប់ពីអំណានខគម្ពីរនីមួយៗ សូមផ្អាកដើម្បីជញ្ជឹងគិតពីអ្វីដែលព្រះអម្ចាស់បានរងទុក្ខ—« ការឈឺចាប់ » « ភាពសោកសៅ » និង « អំពើរំលង » ដែលទ្រង់បានទ្រាំទ្រ—សម្រាប់មនុស្សគ្រប់រូប ហើយជាពិសេសសម្រាប់បងប្អូន ។ បងប្អូនអាចជំនួសពាក្យដូចជា « យើង » និង « របស់យើង » ជាមួយនឹងពាក្យ « ខ្ញុំ » និង « របស់ខ្ញុំ » នៅពេលបងប្អូនអាន ។ តើខគម្ពីរទាំងនេះបំផុសគំនិតបងប្អូនឲ្យមានអារម្មណ៍ ឬគំនិតអ្វីខ្លះ ?
-
សូមពិចារណាមើលវីដេអូ « នគរខ្ញុំមិនមែនត្រូវខាងលោកីយ៍នេះទេ » ( បណ្ណាល័យដំណឹងល្អ ) និងជញ្ជឹងគិតពីរបៀបដែលការព្យាករនៅក្នុង អេសាយ ៥៣ ត្រូវបានបំពេញ ។ តើទុក្ខព្រួយ និងការសោកសៅមួយចំនួនដែលព្រះអង្គសង្គ្រោះទទួលជំនួសបងប្អូនមានអ្វីខ្លះ ?
5:22នគរខ្ញុំមិនមែនត្រូវខាងលោកីយ៍នេះទេ
-
សូមស្វែងរករូបភាពនៃព្រឹត្តិការណ៍ដែលកើតឡើងនៅជុំវិញដង្វាយធួនរបស់ព្រះយេស៊ូវគ្រីស្ទ ( សូមមើល សៀវភៅរូបភាពដំណឹងល្អ ល.រ. ៥៦–៦០ ) ។ បន្ទាប់មកបងប្អូនអាចស្វែងរកឃ្លានៅក្នុង អេសាយ ៥៣ ដែលពិពណ៌នាព្រឹត្តិការណ៍នៅក្នុងរូបភាពទាំងនោះ ។ តើការបង្រៀនទាំងនេះបំផុសគំនិតបងប្អូនឲ្យធ្វើអ្វីខ្លះ ?
សូមមើលផងដែរ « មើលព្រះប្រោសលោះយើងសុគតហើយ » ទំនុកតម្កើង ល.រ. ១១៣ ។
អេសាយ ៥៤; ៥៧:១៥–១៩
ព្រះយេស៊ូវគ្រីស្ទសព្វព្រះទ័យឲ្យខ្ញុំត្រឡប់ទៅរកទ្រង់វិញ ។
យើងទាំងអស់គ្នាធ្លាប់ដកពិសោធន៍នូវអារម្មណ៍នៃការឃ្លាតឆ្ងាយពីព្រះអម្ចាស់ ដោយសារតែអំពើបាប ឬភាពទន់ខ្សោយរបស់យើង ។ មនុស្សមួយចំនួនថែមទាំងបោះបង់ចោលសេចក្ដីសង្ឃឹមថា ទ្រង់នឹងអភ័យទោសដល់ពួកគេជានិច្ចទៀតផង ។ អេសាយ ៥៤ និង ៥៧ គឺជាជំពូកដ៏អស្ចារ្យដើម្បីអានរកមើលការបញ្ជាក់ និងការលើកទឹកចិត្តនៅគ្រាបែបនេះ ។ ជាពិសេសនៅក្នុង អេសាយ ៥៤:៤–១០; ៥៧:១៥–១៩ តើពាក្យពេចន៍អ្វីខ្លះដែលបង្រៀនបងប្អូនពីរបៀបដែលព្រះអង្គសង្រ្គោះមានព្រះទ័យអំពីបងប្អូន ? តើវាបានធ្វើឲ្យមានភាពខុសប្លែកអ្វីខ្លះនៅក្នុងជីវិតរបស់បងប្អូនដើម្បីដឹងរឿងទាំងនេះអំពីទ្រង់ ?
ប្រធាន ឌៀថើរ អេហ្វ អុជដូហ្វ បានបង្រៀន ៖
« វាមិនសំខាន់ថាតើជីវិតយើងហិនហោចដល់កម្រិតណានោះទេ ។ វាមិនសំខាន់ថាតើអំពើបាបយើងមានពណ៌ក្រហមឆ្អៅ ភាពជូរចត់ ភាពឯកោ ឬដួងចិត្តយើងខ្ទេចខ្ទាំដល់កម្រិតណានោះឡើយ ។ សូម្បីតែជនទាំងឡាយដែលអស់សង្ឃឹម ដែលរស់នៅក្នុងភាពអស់សង្ឃឹម ដែលបានបាត់អស់នូវទំនុកចិត្ត បោះបង់សច្ចៈធម៌ ឬងាកចេញពីព្រះក៏អាចសាងខ្លួនជាថ្មីបានដែរ ។ …
« ដំណឹងដ៏រីករាយនៃដំណឹងល្អគឺថា ដោយសារតែផែនការនៃសុភមង្គលដ៏នៅអស់កល្បជានិច្ចដែលព្រះវរបិតាសួគ៌បានប្រទានឲ្យ និងតាមរយៈពលិកម្មដ៏គ្មានទីបញ្ចប់នៃព្រះយេស៊ូវគ្រីស្ទ នោះយើងមិនត្រឹមតែអាចបានប្រោសឲ្យរួចពីស្ថានភាពធ្លាក់របស់យើង ហើយស្ដារទៅរកភាពបរិសុទ្ធប៉ុណ្ណោះទេ យើងក៏អាចថែមទាំងរីកចម្រើនលើសពីអ្វីដែលមនុស្សខាងសាច់ឈាមអាចស្រមៃបានទៀតផង ហើយក្លាយជាអ្នកគ្រងមរតកនៃជីវិតដ៏នៅអស់កល្បជានិច្ច និងជាអ្នកទទួលសិរីល្អដ៏អស្ចារ្យរបស់ព្រះ » ( « He Will Place You on His Shoulders and Carry You Home » Liahona ខែឧសភា ឆ្នាំ២០១៦ ទំព័រ ១០២ ) ។
សូមមើលផងដែរ ផាទ្រីក ខៀរ៉ុន « ព្រះរាជបំណងរបស់ព្រះគឺដើម្បីនាំបងប្អូនទៅផ្ទះវិញ » លីអាហូណា ខែឧសភា ឆ្នាំ២០២៤ ទំព័រ ៨៧–៨៩ ។
អេសាយ ៥៥–៥៦
ព្រះអម្ចាស់អញ្ជើញមនុស្សទាំងអស់ឲ្យ « កាន់ខ្ជាប់តាមសេចក្តីសញ្ញារបស់ទ្រង់ » ។
អស់ជាច្រើនជំនាន់មកហើយ សាសន៍អ៊ីស្រាអែលត្រូវបានស្គាល់ថាជារាស្រ្តនៃសេចក្តីសញ្ញារបស់ព្រះ ។ ទោះជាយ៉ាងណា ផែនការរបស់ព្រះតែងតែរួមបញ្ចូលច្រើនជាងជាតិសាសន៍តែមួយ ដោយសារ « អស់អ្នកដែលស្រេក » ត្រូវបានអញ្ជើញឲ្យ « ចូរមក … ទីទឹកចុះ » ( អេសាយ ៥៥:១ ) ។ សូមចាំរឿងនេះក្នុងចិត្ត កាលបងប្អូនអាន អេសាយ ៥៥ និង ៥៦ ហើយជញ្ជឹងគិតពីអត្ថន័យនៃការធ្វើជារាស្រ្តរបស់ព្រះ ។ តើព្រះមានសារលិខិតអ្វីខ្លះ ចំពោះអស់អ្នកដែលមានអារម្មណ៍ថា « ញែក … ចេញ » ពីទ្រង់ ? ( អេសាយ ៥៦:៣ ) ។ សូមពិចារណាគូសចំណាំខគម្ពីរទាំងឡាយដែលពិពណ៌នាពីបុគ្គលិកលក្ខណៈ និងសកម្មភាពនៃអស់អ្នកដែល « កាន់ខ្ជាប់តាមសេចក្តីសញ្ញារបស់ទ្រង់ » ( សូមមើល អេសាយ ៥៦:៤–៧ ) ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
អេសាយ ៥១–៥២
ព្រះអម្ចាស់អញ្ជើញខ្ញុំឲ្យ « ពាក់កម្លាំង [ របស់ខ្ញុំ ] » ។
-
វាអាចជាការសប្បាយរីករាយសម្រាប់កូនៗបងប្អូនដើម្បីស្វែងរកឃ្លាដូចជា « ភ្ញាក់ឡើង » « ឈរឡើង » និង « ចូរពាក់កម្លាំងរបស់ឯង » នៅក្នុង អេសាយ ៥១:៩, ១៧; ៥២:១–២, ៩ ហើយបន្ទាប់មកសម្តែងតាមឃ្លាទាំងនោះ ។ បន្ទាប់ពីធ្វើដូច្នោះ បងប្អូនអាចនិយាយអំពីអត្ថន័យក្នុងការក្រោកឡើង ឈរឡើង និងពាក់កម្លាំងខាងវិញ្ញាណ ។ តើព្រះអម្ចាស់បានបង្គាប់យើងឲ្យធ្វើអ្វីនៅក្នុងខគម្ពីរទាំងនេះ ?
-
កូនៗបងប្អូនក៏អាចអាន អេសាយ ៥១:១, ៤, ៧ ហើយរកមើលថានរណាដែលព្រះអម្ចាស់មានព្រះបន្ទូលដល់ និងអ្វីដែលទ្រង់មានព្រះទ័យចង់ឲ្យពួកគេធ្វើ ។ តើវាមានន័យយ៉ាងណាដើម្បី « ស្តាប់តាម » ព្រះអម្ចាស់នោះ ? តើយើងអាចបង្ហាញព្រះអម្ចាស់ថា យើង « ស្ដាប់តាម » ទ្រង់ដោយរបៀបណា ?
អេសាយ ៥៣:៣–៩
ព្រះយេស៊ូវគ្រីស្ទបានលើកដាក់មកលើអង្គទ្រង់នូវអំពើបាប និងសេចក្ដីទុក្ខព្រួយរបស់ខ្ញុំ ។
-
បងប្អូន និងកូនៗបងប្អូនអាចមើលរូបភាពមួយចំនួនដែលបង្ហាញពីការរងទុក្ខ និងការសុគតរបស់ព្រះយេស៊ូវគ្រីស្ទ ( ឧទាហរណ៍ សូមមើល សៀវភៅរូបភាពដំណឹងល្អ ល.រ. ៥៦, ៥៧, ៥៨ ) ។ បន្ទាប់មក បងប្អូនអាចអាន អេសាយ ៥៣:៣–៦, ៩ និងរកមើលពាក្យសម្តីដែលពិពណ៌នានូវអ្វីដែលកើតឡើងនៅក្នុងរូបភាពទាំងនោះ ។ សូមជួយកូនៗបងប្អូនយល់ថា អេសាយបានចែកចាយសេចក្ដីពិតទាំងនេះរាប់រយឆ្នាំមុនពេលសេចក្ដីពិតទាំងនោះកើតឡើង ។ ហេតុអ្វីបានជាវាសំខាន់ដើម្បីឲ្យមនុស្សដឹងពីរឿងទាំងនេះជាច្រើនឆ្នាំទុកមុន ? ( សូមមើល អាលម៉ា ៣៩:១៥–១៩ ) ។
-
បន្ទាប់ពីការអានចេញពី អេសាយ ៥៣:៤ « ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង » កូនៗបងប្អូនអាចព្យាយាមដើម្បីលើកវត្ថុធ្ងន់ៗឡើង ( ឬសម្តែងជាលើករបស់ធ្ងន់មួយឡើង ) ។ និយាយអំពីរបៀបដែល « សេចក្ដីឈឺចាប់ » និង « សេចក្ដីទុក្ខព្រួយ » ឬភាពសោកសៅ អាចមានអារម្មណ៍ថាធ្ងន់ និងពិបាករែកសែង ។ ហេតុអ្វីបានជាទ្រង់បានរងទុក្ខនូវ « សេចក្តីឈឺចាប់ » « សេចក្ដីទុក្ខព្រួយ » និង « អំពើទុច្ចរិត » ឬអំពើបាបរបស់យើង ? ( សូមមើលផងដែរ អាលម៉ា ៧:១១–១២ ) ។
អេសាយ ៥៥:៦
ខ្ញុំអាចស្វែងរកព្រះយេហូវ៉ា ហើយអំពាវនាវដល់ទ្រង់ ។
-
ដើម្បីបង្រៀនកូនៗបងប្អូនអំពី អេសាយ ៥៥:៦ បងប្អូនអាចលាក់រូបភាពនៃព្រះយេស៊ូវគ្រីស្ទនៅកន្លែងណាមួយក្នុងបន្ទប់ ។ បងប្អូនអាចអញ្ជើញកូនៗបងប្អូនឲ្យស្វែងរករូបភាព និងឈ្មោះតាមរបៀបមួយដែលពួកគេអាច « ស្វែងរក … ខណៈដែលអាចរកទ្រង់ឃើញ » ។ បទចម្រៀងដូចជា « ស្វែងរកព្រះអម្ចាស់ពីក្មេង » ( សៀវភៅចម្រៀងកុមារ ទំព័រ ៦៧ ) អាចផ្ដល់គំនិតមួយចំនួនដល់ពួកគេ ។ បន្ទាប់មក បងប្អូនអាចអនុញ្ញាតឲ្យកុមារម្នាក់លាក់រូបភាព និងធ្វើសកម្មភាពម្តងទៀត ។
អេសាយ ៥៥:៨–៩
ផ្លូវរបស់ព្រះអម្ចាស់ខ្ពស់ជាងផ្លូវរបស់ខ្ញុំ ។
-
បន្ទាប់ពីការអាន អេសាយ ៥៥:៩ វាអាចជារឿងសប្បាយរីករាយសម្រាប់កូនៗបងប្អូនក្នុងការឈរនៅលើកៅអី ហើយនិយាយអំពីរបៀបដែលអ្វីៗមើលទៅខុសប្លែកនៅពេលដែលបងប្អូននៅ « ខ្ពស់ជាង » ។ ឬពួកគេអាចគូររូបភាពនៃអ្វីដែល អេសាយ ៥៥:៩ មានអត្ថន័យចំពោះពួកគេ ។ បន្ទាប់មក បងប្អូនអាចពិភាក្សាពីផ្លូវមួយចំនួនរបស់ព្រះអម្ចាស់ដែលខ្ពស់ជាងផ្លូវរបស់យើង ។ ឧទាហរណ៍ តើទ្រង់ប្រព្រឹត្តចំពោះអ្នកមានបាបយ៉ាងដូចម្ដេច ? ( សូមមើល ម៉ាកុស ២:១៥–១៧ ) ។ តើទ្រង់ដឹកនាំមនុស្សដទៃទៀតយ៉ាងដូចម្ដេច ? ( សូមមើល ម៉ាថាយ ២០:២៥–២៨ ) ។ សូមចែកចាយជាមួយកូនៗបងប្អូនពីរបៀបដែលបងប្អូនបានរៀនដើម្បីទុកចិត្តលើផ្លូវ និងព្រះតំរិះដែលខ្ពង់ខ្ពស់ជាងរបស់ព្រះអម្ចាស់ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។