Եսայի 58–66

Ինչո՞ւ մարդը կարող է ինքնակամ մնալ առանց սննդի, երբ սնունդը հասանելի է: Եսայի 58․3–12 հատվածներն ուսումնասիրելիս կարող եք մտածել ծոմ պահելու ձեր պատճառների մասին, ինչպես նաև այն պատճառների մասին, որոնցով Տերը տվել է այս օրենքը: Ահա որոշ այլ հարցեր, որոնց շուրջ կարող եք խորհել․

• Ինչո՞ւ է երբեմն ծոմապահությունն ավելի շատ ընկալվում որպես բեռ, քան օրհնություն (տես Եսայի 58․3–5)։ Ինչպե՞ս են այս գլխում ներկայացված Տիրոջ ուսմունքները փոխում այդ ընկալումը ձեզ համար:

• Ի՞նչ կարող են նշանակել՝ «լուծի՛ր ամբարշտության կապանքները» և «կոտրի՛ր ամեն տեսակ լուծ» արտահայտությունները: (Եսայի 58․6)։ Ինչպե՞ս կարող է ծոմապահությունն օրհնել ուրիշներին (տես հատված 7)։

• Ծոմապահությունն ինչպե՞ս է պարգևում ձեզ այն օրհնությունները, որոնք նկարագրված են Եսայի 58․8–12 հատվածներում։

Իր ուղերձում՝ ««Ահա սա է ծոմը, որին ես հաւանում եմ»» (Լիահոնա, մայիս 2015, 22–25), նախագահ Հենրի Բ. Այրինգը կիսվել է մի քանի օրինակով, թե ինչպես են մարդիկ օրհնվել ծոմի և ծոմապահության նվիրատվությունների շնորհիվ: Արդյոք տեսե՞լ եք նման օրհնություններ ձեր կյանքում:

Տես նաև «Bless Our Fast, We Pray» օրհներգը, Հիմներ, հմր. 138, «Ծոմապահություն և ծոմի նվիրատվություններ» նյութը Թեմաներ և հարցեր բաժնում Ավետարանի գրադարան։

Արդյո՞ք Հանգստության օրը «բերկրանք է» ձեզ համար: Եսայի 58․13–14 հատվածներն ուսումնասիրելիս մտածեք, թե ինչպես կարող եք ավելի շատ բերկրանք ստանալ Տիրոջ օրը: Օրինակ՝ ի՞նչ կարող է նշանակել «[Նրա] սուրբ օրը քո ոտքը հետ պահես քո ցանկությունը կատարելուց» արտահայտությունը։ Ի՞նչ տարբերություն կա «[կհրճվես] Տիրոջով» և «չհետևելով քո ճանապարհներին» արտահայտությունների միջև:

Տես նաև Ռասսել Մ. Նելսոնի «Կիրակին բերկրանք է» ուղերձը, Լիահոնա, մայիս 2015, 129–32։

Եսայի 58–66 գլուխներում բազմաթիվ հղումներ կան Հիսուս Քրիստոսի քավիչ առաքելության մասին։ Ուսումնասիրելիս փնտրեք դրանք: Մասնավորապես, նշեք տիտղոսներն ու բառերը, որոնք օգտագործվում են Փրկչին նկարագրելու համար: Օրինակ՝

• Ի՞նչն է ձեզ տպավորում «միջամտողի» նկարագրության մեջ Եսայի 59․16–21 հատվածներում: Ինչպե՞ս է Փրկիչը հաղթահարում հատվածներ 9–15-ում նկարագրված պայմանները:

• Երբ Հիսուս Քրիստոսը հայտարարեց Նազարեթի ժողովրդին, որ ինքը Մեսիան է, Նա մեջբերեց Եսայի 61․1–3 հատվածներից (տես Ղուկաս 4․16–21, տես նաև «Jesus Declares He Is the Messiah» տեսանյութը, Ավետարանի գրադարան)։ Ինչպե՞ս է Հիսուս Քրիստոսը օրհնել ձեզ և ուրիշներին՝ այս հատվածներում նկարագրված եղանակներով։ Ինչպե՞ս է Նա մոխրի փոխարեն դափնեպսակ տվել ձեզ:

  

  3:24

• «Տիրոջ ողորմություններից» որո՞նք կարող եք «նշել» (տես Եսայի 63․7–9)։

• Փրկչի վերաբերյալ ուրիշ ի՞նչ հղումներ եք գտնում Եսայի 58–66 գլուխներում։

Տես նաև Մոսիա 3․7, Վարդապետություն և Ուխտեր 133․46–53 հատվածները։

Եսայի 60 և 62 գլուխները պատմում են լույսի և խավարի մասին, աչքերի և տեսնելու մասին, ուսուցանելով, թե ինչպես է Հիսուս Քրիստոսի ավետարանն օրհնելու աշխարհը վերջին օրերում: Փնտրեք այս հասկացությունները Եսայի 60․1–5, 19–20, 62․1–2 հատվածներում։ Այս գլուխները կարդալիս մտածեք, թե Աստված ինչպես է հավաքում իր զավակներին խավարից դեպի Իր լույսը: Ո՞րն է ձեր դերն այս աշխատանքում։

Տես նաև 1 Նեփի 22․3–12, 3 Նեփի 18․24, Վարդապետություն և Ուխտեր 14.9 հատվածները, Բոննի Հ․ Քորդոնի «Որ նրանք կարողանան տեսնել» ուղերձը, Լիահոնա, մայիս 2020, 78–80։

Եսային խոսել է այն օրվա մասին, երբ «առաջվա նեղությունները մոռացված» կլինեն (Եսայի 65․16)։ Թեև այս մարգարեությունն իր ամբողջական իմաստով մի քանի անգամ կատարվել է, այդ օրը դեռ պետք է գա՝ երբ Հիսուս Քրիստոսը կվերադառնա: Եսային նկարագրել է ապագայի այդ օրը Եսայի 64․1–5, 65․17–25, 66 հատվածներում։ Ուշադրություն դարձրեք, թե որքան հաճախ է նա օգտագործել «ուրախ» և «ուրախանալ» բառերը։ Փրկչի վերադարձն ինչո՞ւ կարող է ուրախ օր լինել ձեզ համար: Դուք ի՞նչ կարող եք անել՝ Նրա գալուստին նախապատրաստվելու համար։

Տես նաև Հավատո Հանգանակը 1․10, Ռասսել Մ. Նելսոնի «Եկեղեցու ապագան. Նախապատրաստել աշխարհը Երկրորդ Գալուստին» ուղերձը, Ensign, ապրիլ 2020, 13–17։

• Ձեր երեխաներին ծոմապահության համար խրախուսելու լավագույն միջոցն է, երբ նրանք պատրաստ լինեն, օգնել նրանց հասկանալ այս օրենքի վերաբերյալ Տիրոջ նպատակները: Կարող եք միասին կարդալ Եսայի 58․6–11 հատվածները՝ գտնելու հետևյալ հարցերի պատասխանները. Ինչո՞ւ ենք մենք ծոմ պահում: Ինչպե՞ս ենք մենք ծոմ պահում: Կարող եք նաև ուսումնասիրել «Ծոմ, Ծոմապահություն» նյութը Սուրբ գրքերի ուղեցույցում:

• Եթե ունեցել եք ծոմապահության իմաստալից փորձառություն, կիսվեք դրանով ձեր երեխաների հետ: Կարող եք նաև նրանց հարցնել, թե ինչպես կբացատրեն իրենց ընկերոջը, թե ինչու է Տերը տվել մեզ այս օրենքը:

• Եսայի 58․13–14 հատվածները կարդալուց հետո կարող եք ցույց տալ շաբաթվա օրերն օրացույցում և առաջարկել ձեր երեխաներին ձեզ հետ ասել դրանք: Երբ հասնեք Հանգստության օրվան, խնդրեք նրանց այդ օրն անվանել «հաճելի»: Ասացեք նրանց, թե ինչու է Հանգստության օրը հաճելի ձեզ համար։

• Կիսվեք միմյանց հետ, թե ինչպես կարող եք «ուրախանալ Տիրոջով» Հանգստության օրը: Գուցե ձեր երեխաները կարողանան նկարել իրենց գաղափարները և դրանք դնել «Հանգստության օրվա բերկրանքների տուփի մեջ»: Ապա, երբ նրանց անհրաժեշտ լինեն գաղափարներ Հանգստության օրվա անելիքների համար, նրանք կարող են այդ գաղափարներից մեկը հանել տուփից:

• Երեխաներին առաջարկեք փակել իրենց աչքերը, երբ կարդում եք Եսայի 60.1–3 հատվածները։ Խնդրեք նրանց բացել իրենց աչքերը, երբ լսեն «լույս» բառը և կրկին փակել, երբ լսեն «խավար» բառը։ Բացատրեք, որ Հիսուս Քրիստոսը և Նրա ավետարանը նման են լույսի, որն օգնում է մեզ տեսնել մեր վերադարձի ճամփան դեպի Երկնային Հայրը։

• Եսայի 65․17–25 հատվածներում նկարագրվում է, թե ինչպիսին կլինի երկիրը, երբ Փրկիչը կրկին գա։ Երբ կարդաք այս հատվածները ձեր երեխաների հետ, օգնեք նրանց փնտրել, թե ինչպես է կյանքը տարբերվելու «նոր երկրում», որը նկարագրել է Եսային: Ինչո՞ւ է դա լինելու մի ժամանակ, երբ պետք է «հավիտյան ուրախանալ ու բերկրե՛լ» (հատված 18)։

• Կարող եք նաև միասին երգել մի երգ Երկրորդ Գալուստի մասին, օրինակ՝ «When the Savior Comes Again» (Ավետարանի գրադարան)։ Կիսվեք միմյանց հետ, թե ինչին եք անհամբեր սպասում Փրկչի վերադարձի վերաբերյալ: Ի՞նչ կարող ենք անել՝ այդ օրվան պատրաստվելու համար: