“October 12–18 ‘Andifak Eyedi Zion’: Isaiah 58–66 Di, Tiene Mi—Eke Ufɔk ye Ufɔk Abasi: Akani Testament 2026 (2026)
“October 12–18 ‘Andifak Eyedi Zion,’ Di, Tiene Mi: Akani Testament 2026
Jesus ke Synagogue ke Nazareth, emi Greg Olsen ewetde
October 12–18: :“Andifak Eyedi Zion”
Isaiah 58–66
Ke ntɔŋɔ utom Esie, Jesus ama aka synagogue ke Nazareth, emi Enye ɔkɔkɔride. Enye ama ada do okot oto mme ŋwed Abasi, ama ɔkɔbɔde ŋwed Isaiah, onyuŋ okot se nnyin ifiɔkde idahaemi nte Isaiah 61:1–2. Enye ndien ɔdɔhɔ ete, “Mfin emi ikɔ Abasi osu ke mme utɔŋ mbufo.” Emi ekedi kiet ke otu mme nnen nnen ikɔ Andinyaŋa ete ke Enye edi Enye Emi Emekde, emi “edisɔbɔde mbon mbuŋɔ-esit” onyuŋ “ɔkwɔrɔ uwɔrɔ ufin ɔnɔ mbon ŋkpɔkɔbi” (se Luke 4:16–21). Ikɔ Abasi emi ama osu ke akpanikɔ ke usen oro. Ndien, nte mme ediwak prophecy Isaiah efen, enye ŋko osu ke eyo nnyin. Andiyaŋa aka iso ndisɔbɔ mbon mbuŋɔ-esit emi edide etiene Enye. Ediwak mbon ŋkpɔkɔbi edu emi eyomde ubɔhɔ. Ndien ediye ini iso odu ndibeŋe-idem nnɔ—ini emi Abasi “edibotde mme obufa heaven ye isɔŋ” (Isaiah 65:17) ndien “anam edinen ido ye itoro ekɔri ke ofuri mme idut” (Isaiah 61:11). Ndikot Isaiah atat mme eyin nnyin abaŋa se Abasi anamde kaŋa, se Enye akade iso anam, ye se Enye edinamde inɔ ikɔt Esie.
Mme Ekikere Ndikpep-ŋkpɔ ke Ufɔk ye Ufɔk Abasi
Isaiah 58:3–12
Utre udia ɔkɔri odudu spirit onyuŋ ɔdiɔŋ mbon emi enanade.
Ntak emi owo ndomo kiet ɔfiɔkde-ɔfiɔk etre udia ke ini udia odude? Nte afo ekpepde Isaiah 58:3–12, afo emekeme ndikere mbaŋa ntak emi afo etrede udia—kpa ye ntak emi Ͻbɔŋ ɔnɔde mbet emi. Emi edi mme usuk mbume efen ndikere mbaŋa:
-
Ntak emi ekutde utre udia usuk ini nte ufen idighe edidiɔŋ? (se Isaiah 58:3–5). Didie ke mme ukpep-ŋkpɔ Ͻbɔŋ ke ibuot emi ɔkpuhɔde ekikere ɔnɔ fi?
-
Nso ke ekeme ndiwɔrɔ “nditak mme uruk idiɔk ido” nyuŋ “mbuŋ kpukpru ɔkpɔnɔ”? (Isaiah 58:6). Didie ke utre udia ekeme ndinwam mbon efen? (se ufaŋ 7).
-
Didie ke utre udia ɔnɔ fi mme edidiɔŋ emi etiŋde ebaŋa ke Isaiah 58:8–12?
Ke etop esie “Is Not This the Fast That I Have Chosen?” (Liahona, May 2015, 22–25), President Henry B. Eyring abuana ediwak uwut-ŋkpɔ nte ediɔŋde mme owo ke utre udia ye mme enɔ utre udia. Didie ke afo okut mme ukem edidiɔŋ emi ke uwem fo?
Se ŋko “Bless Our Fast, We Pray,” Hymns, no. 138; Topics and Questions, “Fasting and Fast Offerings,” Gospel Library.
Fiɔk mbon emi afo ekpepde. “Ndidi andikpep nte Christ esine ndifiɔk mbon emi afo ekpepde.ye ndidomo ndifiɔk se isinede ke esit mmɔ. Afo emekeme ndiduŋɔde mfiɔk nte mmɔ etim ekpepde. Afo emekeme ndibup mme mbume, etim akpaŋ-utɔŋ, onyuŋ ese. Ke akande oro, afo emekeme ndibɔŋ akam nyom ifiɔk emi Spirit ikpɔŋ ekemede ndinɔ. Nte afo ɔfiɔkde owo, ntre ke afo akan anwam enye ndinyene se ɔwɔrɔde ke idem ye odudu ke gospel Jesus Christ. Ke ini afo ɔfiɔkde nsat-itɔŋ owo Spirit ekeme ndikpep fi nte edinwamde ndisuk enye itɔŋ ye odu uwem mmɔŋ eke Andinyaŋa” (Teaching in the Savior’s Way, 13).
Isaiah 53:13–14
Ndikpono Ͻbɔŋ ke usen Sabbath ada idaresit edi.
Ndi usen Sabbath edi “idaresit” ɔnɔ fi? Nte afo ekpepde Isaiah 58:13–14, kere baŋa nte afo ekemede ndikut idaresit emi okponde ke usen Ͻbɔŋ. Ke nte uwut-ŋkpɔ, nso ke ɔwɔrɔ ndiwɔŋɔde “mkpɔŋ ndinam ŋkpɔ inemesit fo ke edisana usen [Esie]”? Nso idi ukpuhɔde ke ufɔt “[ndidaresit] fo ke Ͻbɔŋ” ye “ndinam mme usuŋ fo”?
Se ŋko Russell M. Nelson, “The Sabbath Is a Delight,” Liahona, May 2015, 129–32.
Isaiah 59:9–21; 61:1–3; 63:7–9
Jesus Christ edi Andinyaŋa ye Andifak mi.
Isaiah 58–66 enyene ediwak mme ikɔ abaŋade utom usio-isop Jesus Christ. Yom mmɔ nte afo ekpepde. Akpan akpan, se mme udori-enyiŋ ye mme ikɔ emi edade etiŋ ebaŋa Andinyaŋa. Nte uwutŋkpɔ:
-
Nso ŋkpɔ inem fi ibaŋa nte etiŋde ebaŋa “esine-ufɔt” ke Isaiah 59:16–21? Didie ke Andinyaŋa mme idaha emi etiŋde ebaŋa ke mme ufaŋ 9–15?
-
Ke ini Jesus akasiande mbon Nazareth ete ke Enye ekedi Messiah, Enye ama okot oto Isaiah 61:1–3 (se Luke 4:16–21; se ŋko vidio “Jesus Declares He Is the Messiah,” Gospel Library). Didie ke Jesus Christ ɔdiɔŋ fi ye mbon efen ke mme usuŋ emi etiŋde ebaŋa ke mme ufaŋ emi? Didie ke Enye ɔnɔ uyai ke itie ntɔŋ?
3:24Jesus Declares He Is the Messiah
-
Nsutɔ “ima mbɔm Ͻbɔŋ” ke afo ekeme “ndisiak”? (se Isaiah 63:7–9).
-
Mme nso ikɔ efen emi etiŋde abaŋa Andinyaŋa ke afo okut ke Isaiah 58–66?
Se ŋko Mosiah 3:7; Doctrine and Covenants 133:46–53.
A Gift of Light, emi Eva Timothy ewetde
Isaiah 60; 62
“Ͻbɔŋ eyedi ɔnɔ fi nsinsi unwana.”
Isaiah 60 ye 62 etiŋ abaŋa uŋwana ye ekim, mme enyin ye ndikut ndikpep mbaŋa nte gospel Jesus Christ edidiɔŋde ererimbot ke mme akpatre usen. Yom mme ifiɔk emi ke Isaiah 60:1–5, 19–20; 62:1–2. Nte afo okotde mme ibuot emi, kere baŋa nte Abasi ataŋde nditɔ Esie osio ke ekim esin ke unwana Esie. Nso idi ubiɔŋ utom fo ke utom emi?
Se ŋko 1 Nephi 22:3–12; 3 Nephi 18:24; Doctrine and Covenants 14:9; Bonnie H. Cordon, “That They May See,” Liahona, May 2020, 78–80.
Isaiah 64:1–5; 65:17–25; 66
Christ ayakara ke isɔŋ ke ini Millenium.
Isaiah etiŋ abaŋa usen emi “efrede mme akpa ndutuhɔ” (Isaiah 65:16). Ke ini prophecy osude ke ediwak ebiet, ke ifiɔk uyɔhɔ ini esie, usen oro idighe kaŋa—emi Jesus Christ edifiakde idi. Isaiah etiŋ abaŋa usen iso emi ke Isaiah 64:1–5; 65:17–25; 66. Se ediwak ini emi enye etiŋde mme ikɔ nte “dara” ye “ndidara.” Ntak emi edifiak ndi Andinyaŋa edidide usen ndidara inɔ fi? Nso ke edinam ndibeŋe idem nnɔ edidi Esie?
Se ŋko Articles of Faith 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Apr. 2020, 13–17.
Ke se iwakde ikan emi, se Liahona eke ɔfiɔŋ emi ye For the Strength of Youth magazines.
Mme Ekikere Ndikpep Nditɔ-ɔŋwɔŋ
Isaiah 58:6–11
Utre udia ɔdiɔŋ mi ye mbon emi enanade.
-
Ekeme ndidi ke usuŋ emi ɔfɔnde akan ndinɔ nditɔ fo uko nditre udia—ke ini mmɔ ebeŋede idem—edi ndinwam mmɔ efiɔk ntak Ͻbɔŋ ɔnɔde mbet emi. Kere baŋa ndikot Isaiah 58:6–11 man enyene mme ibɔrɔ ɔnɔ mme mbume emi: Ntak emi nnyin itrede udia? Didie ke nnyin ikpenam utre-udia? Afo ŋko emekeme ndise ke “Fast, Fasting” ke Guide to the Scriptures.
-
Edieke afo ekenyenede ifiɔk emi ɔfɔnde ye utre udia, buana enye ye nditɔ fo. Afo ŋko emekeme ndibup mmɔ nte mmɔ ekemede ndinam aŋwaŋa ufan ntak emi Andinyaŋa ɔkɔnɔde nnyin mbet emi.
Isaiah 53:13–14
Sabbath ekeme edi-di inemesit ɔnɔ mi.
-
Ke ama okot Isaiah 58:13–14, afo emekeme ndiwut mme usen ke udua ke ŋwed usen ɔfiɔŋ ndien okot nditɔ fo ete etiŋ mme usen emi ye afo. Ke ini esimde Sabbath, dɔhɔ yak mmɔ ekot usen oro “idaresit.” Dɔhɔ mmɔ ntak emi Sabbath edide idaresit ɔnɔ fi.
-
Buana ye kiet eken mme usuŋ efen emi afo ekemede “ndidaresit fo ke Ͻbɔŋ” ke Sabbath. Ekeme ndidi ke nditɔ fo ekeme ndimiŋ mme ekikere mmɔ ndien esin mmɔ ke “ekebe idaresit Sabbath.” Ndien, ke ini mmɔ eyomde mme ekikere abaŋade se anade nte mmɔ enam ke Sabbath, mmɔ ekeme ndisio ifiɔk ke ekebe oro.
Our Light, emi Dan Wilson ewetde
Isaiah 60:1–3
Andinyaŋa etie nte uŋwana ɔnɔ mi.
-
Afo emekeme ndikot nditɔ fo ete ebɔp enyin mmɔ nte afo okotde Isaiah 60:1–3. Dɔhɔ yak mmɔ etat enyin mmɔ ke ini mmɔ ekopde ikɔ emi “uŋwana” enyuŋ efiak ebɔp mmɔ ke ini ekopde ikɔ emi “ekim.” Nam anwaŋa ete ke Jesus Christ ye gospel Esie etie nte uŋwana emi aŋwamde nnyin ikut usuŋ nnyin ifiak inyɔŋ itiene Ete ke Heaven.
Isaiah 65:3–25
Ke ini Jesus afiakde edi, Enye ayada emem ye idara edi.
-
Isaiah 65:17–25 etiŋ abaŋa nte isɔŋ editiede ke ini Andinyaŋa afiakde edi. Nte afo okotde mme ufaŋ emi ye nditɔ fo, ŋwam mmɔ eyom nte uwem edinyenede ukpuhɔde ke “obufa isɔŋ” emi Isaiah etiŋde abaŋa. Ntak emi edidide ini “ndidaresit nyuŋ mbre ke nsinsi”? (ufaŋ 18).
-
Afo ŋko emekeme ndikwɔ kiet ikwɔ abaŋade Udiana Edidi utɔ nte “When the Savior Comes Again” (Gospel Library). Buana ye kiet eken se afo oyomde ndikut mbaŋa edidi Andinyaŋa. Nso ke ikpenam man ibeŋeidem inɔ usen oro?
Ke se iwakde ikan emi, se ke Friend magazine eke ɔfiɔŋ emi.