Isaias 58–66

Nganong ang bisan kinsa moboluntaryo sa dili pagkaon kon adunay pagkaon? Samtang kamo magtuon sa Isaias 58:3–12, tingali maghunahuna kamo sa inyong mga rason alang sa pagpuasa—ingon man sa mga rason sa Ginoo sa paghatag niini nga balaod. Ania ang pipila ka ubang pangutana nga palandungon:

• Ngano nga ang pagpuasa usahay mahunahuna nga mas palas-anon kaysa usa ka panalangin? (tan-awa sa Isaias 58:3–5). Giunsa sa mga pagtulun-an sa Ginoo dinhi niini nga kapitulo pag-usab niana nga panghunahuna alang kaninyo?

• Unsa kaha ang kahulogan sa “paghubad sa mga higot sa kadaotan” ug bunggoon ang tanang mga yugo”? (Isaias 58:6). Unsaon sa puasa pagpanalangin sa uban? (tan-awa sa bersikulo 7).

• Giunsa sa puasa pagdala kanimo sa mga panalangin nga gihulagway sa Isaias 58:8–12?

Sa iyang mensahe “Dili Ba Mao Kini ang Pagpuasa nga Akong Napili?” (Liahona, Mayo 2015, 22–25), mipakigbahin si President Henry B. Eyring og pipila ka ehemplo kon sa unsang paagi ang mga tawo napanalanginan pinaagi sa pagpuasa ug sa mga halad sa puasa. Sa unsang paagi ikaw nakasaksi og susama nga mga panalangin diha sa imong kinabuhi?

Tan-awa usab sa “Bless Our Fast, We Pray,” Hymns, no. 138; Mga Hilisgotan ug mga Pangutana, “Pagpuasa ug Mga Halad sa Puasa,” Librarya sa Ebanghelyo.

Ang adlaw ba sa Igpapahulay “usa ka kahimut-an” alang kaninyo? Samtang inyong tun-an ang Isaias 58:13–14, hunahunaa kon unsaon ninyo sa pagkakaplag og mas kahimut-an sa adlaw sa Ginoo. Sama pananglit, unsa kaha ang kahulogan niini sa paglikay “gikan sa pagbuhat sa imong kalipayan sa [Iyang] adlaw nga balaan”? Unsa ang kalainan tali sa “[pagpahamuot] sa inyong kaugalingon diha sa Ginoo” ug sa “pagbuhat sa inyong kaugalingong mga paagi”?

Tan-awa usab sa Russell M. Nelson, “Ang Igpapahulay usa ka Kahimut-an,” Liahona, Mayo 2015, 129–32.

Isaias 58–66 adunay lain-laing mga pakisayran ngadto sa maulaong misyon ni Jesukristo. Pangita alang niini samtang kamo magtuon. Ilabi na, timan-i ang mga titulo ug mga pulong nga gigamit sa paghulagway sa Manluluwas. Sama pananglit:

• Unsa ang nakapadani kaninyo mahitungod sa paghulagway sa “nagpataliwala” diha sa Isaias 59:16–21? Giunsa sa Manluluwas sa pagbuntog sa mga kahimtang nga gihulagway sa mga bersikulo 9–15?

• Sa dihang si Jesukristo mipahibalo ngadto sa katawhan sa Nazaret nga Siya mao ang Mesiyas, Siya mikutlo gikan sa Isaias 61:1–3 (tan-awa sa Lucas 4:16–21; tan-awa usab ang bidyo “Jesus Declares He Is the Messiah,” Gospel Library). Giunsa kamo ug ang uban sa pagpanalangin ni Jesukristo diha sa mga paagi nga gihulagway dinhi niini nga mga bersikulo? Giunsa Niya paghatag og kanindot puli sa mga abo?

  

  3:24

• Unsa nga “mahigugmaong kalolot sa Ginoo” ang inyong “mahisgotan”? (tan-awa sa Isaias 63:7–9).

• Unsa ang ubang mga pakisayran kabahin sa Manluluwas ang inyong makaplagan sa Isaias 58-66?

Tan-awa usab sa Mosiah 3:7; Doktrina ug mga Pakigsaad 133:46–53.

Isaias 60 ug 62 naghisgot sa kahayag ug kangitngit, mga mata ug igtalan-aw sa pagtudlo mahitungod kon unsaon sa ebanghelyo ni Jesukristo pagpanalangin sa kalibotan sa kataposang mga adlaw. Pangitaa kini nga mga konsepto sa Isaias 60:1–5, 19–20; 62:1–2. Samtang ikaw magbasa niini nga mga kapitulo, pamalandonga kon giunsa sa Dios pagpundok ang Iyang mga anak paggawas sa kangitngit ngadto sa Iyang kahayag. Unsa ang imong tahas niini nga buhat?

Tan-awa usab sa 1 Nephi 22:3–12; 3 Nephi 18:24; Doktrina ug mga Pakigsaad 14:9; Bonnie H. Cordon, “Aron sila Makakita,” Liahona, Mayo 2020, 78–80.

Mihisgot si Isaias kabahin sa usa ka adlaw nga “ang unang mga kalisdanan malimtan na” (Isaias 65:16). Samtang kini nga panagna adunay pipila ka mga katumanan, sa hingpit niini nga pagsabot, kana nga adlaw moabot pa—sa pagbalik ni Jesukristo. Gihulagway ni Isaias kining umaabot nga adlaw sa Isaias 64:1–5; 65:17–25; 66. Timan-i kapila siya migamit sa mga pulong sama sa “nagmaya” ug “pagmaya.” Ngano nga nga ang pagbalik sa Manluluwas mahimo nga panahon sa pagmaya alang kanimo? Unsa ang inyong mabuhat sa pagpangandam alang sa Iyang pag-anhi?

Tan-awa usab sa Mga Artikulo sa Hugot nga Pagtuo 1:10; Russell M. Nelson, “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas,” Liahona, Abr. 2020, 13–17.

• Tingali ang labing maayo nga paagi sa pag-awhag sa inyong mga bata sa pagpuasa—kon sila andam—mao ang pagtabang kanila sa pagsabot sa mga katuyoan sa Ginoo alang niini nga balaod. Hunahunaa ang pagbasa og dungan sa Isaias 58:6–11 sa pagpangita sa mga tubag ngadto niini nga mga pangutana: Nganong kita magpuasa? Unsaon nato sa pagpuasa? Makatan-aw usab kamo sa “Puasa, Pagpuasa” diha sa Giya ngadto sa mga Kasulatan.

• Kon kamo dihay makahuloganong kasinatian sa pagpuasa, ipakigbahin kini ngadto sa inyong mga bata. Makapangutana usab kamo kanila kon unsaon nila sa pagpasabot ngadto sa usa ka higala kon nganong ang Ginoo mihatag kanato niini nga balaod.

• Human mabasa ang Isaias 58:13–14, kamo makatudlo sa mga adlaw sa semana diha sa usa ka kalendaryo ug makadapit sa inyong mga bata sa pagsulti sa mga adlaw uban kaninyo. Kon kamo moabot ngadto sa Igpapahulay, hangyoa sila sa pagtawag niana nga adlaw og “usa ka kahimut-an.” Sultihi sila kon nganong ang Igpapahulay usa ka kahimut-an nganha kanimo.

• Pakigbahin sa usag usa og mga paagi kamo makahimo og “kahimut-an sa inyong kaugalingon diha sa Ginoo” sa panahon sa Igpapahulay. Tingali ang inyong mga bata makadrowing sa ilang mga ideya ug makabutang niini sa usa ka “kahon sa mga kahimut-an sa Igpapahulay.” Dayon, kon sila magkinahanglan og mga ideya mahitungod sa mga butang nga buhaton sa Igpapahulay, sila makakuha og ideya gikan sa kahon.

• Makadapit kamo sa mga bata sa pagpiyong samtang inyong basahon ang Isaias 60:1–3. Hangyoa sila sa pagbuka sa ilang mga mata kon madungog nila ang pulong nga “kahayag” ug sa pagpiyong og balik kon madungog nila ang pulong “kangitngit.” Ipasabot nga si Jesukristo ug ang Iyang ebanghelyo sama sa usa ka kahayag nga motabang kanato nga makaplagan ang atong agianan balik ngadto sa Langitnong Amahan.

• Isaias 65:17–25 naghulagway kon unsa ang hitsura sa yuta sa panahon nga ang Manluluwas mobalik pag-usab. Samtang inyong basahon kini nga mga bersikulo uban sa inyong mga bata, tabangi sila sa pagpangita alang sa unsa ka lahi ang kinabuhi nga mahimo diha sa “bag-ong yuta” nga gihulagway ni Isaias. Nganong mahimo kini nga usa ka panahon sa “paglipay ug pagmaya hangtod sa hangtod”? (bersikulo 18).

• Mahimo usab ninyong kantahon og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata). Pakigbahin sa usag usa kon unsa ang inyong gipaabot mahitungod sa pagbalik sa Manluluwas. Unsay atong mahimo aron maandam alang nianang adlawa?