Isaias 50–57

Bisan tuod og ang mga Israelita migahin og daghang mga katuigan sa pagkabihag—ug bisan tuod kana nga pagkabihag usa ka resulta sa ilang kaugalingong dili maayo nga mga pagpili—ang Ginoo gusto kanila nga motan-aw sa kaugmaon uban ang paglaom. Unsa ang inyong nakaplagan sa mensahe ni Isaias nga naghatag kaninyo og paglaom? Ang usa ka tsart nga sama niining usa mahimong makatabang kaninyo sa pagtuon:

Tan-awa usab sa Mosiah 12:20–24; 15:13–18; 3 Nephi 20:29–46; Doktrina ug mga Pakigsaad 113:7–10; Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 73–76.

Pipila ka mga kapitulo sa kasulatan naghulagway sa matubsanong misyon ni Jesukristo sa mas nindot nga paagi kaysa Isaias 53. Paghunahuna og mga kalihokan sama niini aron mas maayo ang pagsabot ug paggamit niining gamhanang mga pagtulun-an:

• Pagpamalandong o paghisgot kon sa unsang paagi ang mga istorya ug mga salida kasagaran nagpakita og mga bayani kinsa nagluwas og mga tawo. Ipakita ang pagkalahi niadtong mga pagpakita ngadto sa mga paghulagway sa Manluluwas diha sa Isaias 53.

• Human sa pagbasa sa matag bersikulo, hunong og makadiyot sa pagpamalandong kon unsa ang giantos sa Manluluwas—ang “mga kasakit,” “mga kasubo,” ug “mga kalapasan” nga Iyang gipas-an—alang sa tanang katawhan ug sa piho alang kanimo. Mahimo ninyong ilisan ang mga pulong sama sa “kita” ug “ato” ngadto sa “ako” ug “akong” samtang kamo magbasa. Unsa nga mga pagbati o mga hunahuna kini nga mga bersikulo nagdasig kanimo?

• Hunahunaa ang pagtan-aw sa bidyo “My Kingdom Is Not of This World” (Gospel Library), ug pagpamalandong kon giunsa sa mga panagna sa Isaias 53 nangatuman. Unsa ang pipila ka kaguol ug kasubo nga gipas-an sa Manluluwas alang kanato?

  

  5:25

• Pangita og mga hulagway sa mga panghitabo nga naglibot sa Pag-ula ni Jesukristo (tan-awa sa Libro sa mga Hulagway sa Ebanghelyo, nus. 56–60). Kamo makahimo dayon sa pagkaplag og hugpong sa mga pulong diha sa Isaias 53 nga naghulagway sa mga panghitabo diha sa mga hulagway. Unsa ang gidasig niini nga mga pagtulun-an nga inyong buhaton?

Tan-awa usab sa “Ang Manunubos Sud-onga,” Mga Himno, nu. 112.

Tanan kita adunay mga panahon nga mobati og ka layo gikan sa Ginoo tungod sa atong mga sala o mga kahuyang. Gani ang uban nawad-an og paglaom nga Siya mopasaylo gayod kanila. Isaias 54 ug 57 gamhanang mga kapitulo nga basahon alang sa pasalig pag-usab ug pagdasig atol sa ingon nga mga panahon. Ilabi na sa Isaias 54:4–10; 57:15–19, unsa nga mga pulong nagtudlo kaninyo kon giunsa sa Manluluwas ang pagbati kaninyo? Unsa nga kalainan ang mahimo niini sa inyong kinabuhi nga mahibalo niining mga butanga mahitungod Kaniya?

Si Presidente Dieter F. Uchtdorf mitudlo:

“Dili igsapayan unsa ka guba ang atong kinabuhi. Dili igsapayan unsa ka pula ang atong mga sala, unsa kapait, unsa kamingaw, ka biniyaan, o ka masulub-on sa atong mga kasingkasing nga mahimo. Bisan kadtong walay paglaom, kinsa nagpuyo nga mibiya sa paglaom, kinsa giluiban, mitugyan sa ilang kaligdong, o mitalikod sa Dios mahimong matukod pag-usab. …

“Ang nindot nga balita sa ebanghelyo mao kini: tungod sa mahangturong plano sa kalipay nga gihatag sa atong mahigugmaong Langitnong Amahan ug pinaagi sa walay kinutuban nga Pag-ula ni Jesukristo, dili lamang kita matubos gikan sa atong kalaglagan ug mapahiuli sa kaputli, mahimo usab kitang mouswag saylo pa sa unsay mahunahuna ug mahimong manununod sa kinabuhing dayon ug mga tig-ambit sa dili mahulagway nga himaya sa Dios” (“Pas-anon Ka Niya sa Iyang Abaga ug Dad-on Pauli,” Liahona, Mayo 2016, 102).

Tan-awa usab sa Patrick Kearon, “Ang Tuyo sa Dios Mao ang Pagdala Kaninyo Balik sa Panimalay,” Liahona, Mayo 2024, 87– 89.

Sulod sa mga henerasyon, ang Israel nailhan isip ang mga katawhan sa pakigsaad sa Dios. Hinoon, ang plano sa Dios sa kanunay miapil og labaw pa kaysa usa lamang ka nasod, tungod kay “ang tagsatagsa nga giuhaw” gidapit nga “umari kamo… sa mga tubig” (Isaias 55:1). Hinumdomi kini samtang nagbasa ka sa Isaias 55 ug 56, ug pagpamalandong kon unsa ang gipasabot niini nga mahimong mga katawhan sa Dios. Unsa ang mensahe sa Dios ngadto niadtong kinsa mibati nga “ibulag” gikan Kaniya? (Isaias 56:3). Paghunahuna og marka sa mga bersikulo nga naghulagway sa mga kinaiya ug mga lihok niadtong kinsa “magapadayon sa akong pakigsaad [tugon]” (tan-awa sa Isaias 56:4–7).

• Kini mahimong makalingaw alang sa inyong mga bata sa pagdiskobre og mga hugpong sa mga pulong sama sa “pagmata,” “tumindog,” ug “isul-ob ang imong kusog, diha sa Isaias 51:9, 17; 52:1–2, 9 ug dayon i-aksyon kadto nga mga hugpong sa mga pulong. Human mabuhat ang mao, kamo makahisgot mahitungod kon unsay kahulogan sa pagmata, tumindog, ug isul-ob ang imong kusog sa espirituhanong paagi. Unsa ang gisugo sa Ginoo nga atong buhaton dinhi niini nga mga bersikulo?

• Ang inyong mga bata makabasa usab sa Isaias 51:1, 4, 7 ug makaila kon kinsa ang gikaistorya sa Ginoo ug unsa ang Iyang gusto nga ipabuhat kanila. Unsay buot ipasabot sa “pamati ngadto” sa Ginoo? Unsaon nato pagpakita sa Ginoo sa atong “pagpamati ngadto” Kaniya?

• Kamo ug ang inyong mga bata makatan-aw og pipila ka hulagway nga nagpakita sa pag-antos ug kamatayon ni Jesukristo (tan-awa, sama pananglit sa, Libro sa mga Hulagway sa Ebanghelyo, nus. 56, 57, 58). Dayon makabasa kamo og dungan sa Isaias 53:3–6, 9 ug mangita alang sa mga pulong nga naghulagway kon unsay nahitabo diha sa mga hulagway. Tabangi ang inyong mga bata sa pagsabot nga gipakigbahin kini nga mga kamatuoran ni Isaias gatosan ka mga tuig sa wala pa kini mahitabo. Ngano nga importante alang sa mga tawo nga mahibalo og una sa daghang tuig niining mga butanga? (tan-awa sa Alma 39:15–19).

• Human basaha ang gikan sa Isaias 53:4, “Gipas-an Niya ang atong mga kasakitan, ug gipas-an ang atong mga kasub-anan,” ang inyong mga bata mahimong mosulay sa pag-alsa og usa ka bug-at nga butang (o magpakaaron ingnon nga nag-alsa). Ipasabot nga ang “kasakit” ug “kasub-anan” o kaguol mahimong bug-at nga bation ug lisod nga dad-on. Nganong gipas-an ni Jesus ang atong “kasakitan,” “kasub-anan,” ug “kadaotan” o kasal-anan? (tan-awa usab sa Alma 7:11–12).

• Sa pagtudlo sa inyong mga bata mahitungod sa Isaias 55:6, makatago kamo og usa ka hulagway ni Jesus bisan asa sa kwarto. Makadapit kamo sa inyong mga bata sa pagpangita sa hulagway ug sa paghingalan og usa ka paagi nga sila “makapangita … sa Ginoo samtang Siya mahimong makaplagan.” Ang pagkanta sa “Sayo kong Mangita sa Ginoo” (Songbook sa mga Bata, 67) makahatag kanila og mga ideya. Dayon makapatago ka sa usa sa mga bata og hulagway ug balikon ang kalihokan.

• Human basaha ang Isaias 55:9, kini mahimong makalingaw alang sa inyong mga bata sa pagtindog sa usa ka bangkito ug maghisgot mahitungod kon sa unsang paagi ang mga butang matan-aw nga lahi kon ikaw “mas taas.” O sila makadrowing og usa ka hulagway sa unsa ang kahulogan sa Isaias 55:9 ngadto kanila. Kamo makahisgot og pipila ka pamaagi sa Ginoo nga mas taas kaysa atong mga pamaagi. Sama pananglit, unsa ang Iyang pamaagi sa pagtagad sa mga makasasala? (tan-awa sa Marcos 2:15–17). Unsa ang Iyang pamaagi sa paggiya sa uban? (tan-awa sa Mateo 20:25–28). Ipakigbahin sa inyong mga bata kon sa unsang paagi kamo nakakat-on sa pagsalig sa mas labaw nga mga pamaagi ug mga hunahuna sa Ginoo.