Ìsàíàh 50–57

Bíótilẹ̀jẹ́pé àwọn ọmọ Ísráẹ́lì lo ọ̀pọ̀ ọdún nínú ìgbèkùn—àti pé pàápàáa bí ó tilẹ̀ jẹ́ pé ìgbèkùn náà jẹ́ àbájáde àwọn yíyàn tí kò dára tiwọn ṣe fúnra wọn—Olúwa fẹ́ kí wọ́n fojúsọ́nà fún ọjọ́ iwájú pẹ̀lú ìrètí. Kíni ẹ rí nínú ọ̀rọ̀ Ìsàíàh tó fún yín ní ìrètí? Àwòrán kan bí èyí lè ṣe ìrànwọ́ fún yín láti ṣe àṣàrò:

Bákannáà wo Mòsíàh 12:20–24; 15:13–18; 3 Néfì 20:29–46; Ẹ̀kọ́ àti àwọn Májẹ̀mú 113:7–10; Russell M. Nelson, “Gba Ọjọ́ Iwájú Mọ́ra pẹ̀lú Ìgbàgbọ́,” Làìhónà, Oṣù kọkànlá 2020, 73–76.

Díẹ̀ nínú àwọn orí ìwé mímọ́ ṣe àpèjúwe bí ìṣẹ ìràpadà Jésù Krístì ti jẹ́ ẹlẹ́wà ju Ìsàíàh 53. Ẹ yẹ àwọn ìṣe ṣíṣe bí ìwọ̀nyí wò láti ní òye dáadáa kí ẹ sì mú àwọn ìkọ́ni alágbára wọ̀nyí lò:

• Ẹ jíròrò tàbí sọ̀rọ̀ bí àwọn ìtàn àti àwọn eré ṣe nfi àwọn akọni tí ó gba àwọn ènìyàn là hàn. Ẹ ṣe ìfiwéra àwọn ìjúwe wọ̀nnì pẹ̀lú àwọn àpèjúwe Olùgbàlà nínú Ìsàíàh 53.

• Lẹ́hìn kíka ẹsẹ kọ̀ọ̀kan, dáwọ́dúró láti ronú lórí ohun tí Olùgbàlà jìyà—àwọn “ìbànújẹ́,” “àwọn ìkoro,” àti “àwọn ìrékọjá” tí Ó ru—fún gbogbo ènìyàn àti ní pàtàkì fún ẹ̀yin. Ẹ lè rọ́pò àwọn ọ̀rọ̀ bíi “àwa” àti “wa” pẹ̀lú “èmi” àti “mi” bí ẹ ṣe nkàá. Àwọn ìmọ̀lára tàbí àwọn èrò wo ni àwọn ẹsẹ wọ̀nyí mísí inú yín?

• Ẹ yẹ wíwo fídíò náà “Ìjọba Mi Kìí Ṣe Ti Ayé Yìí wò” (Ibi Ìkàwé Ìhìnrere), kí ẹ sì jíròrò bí àwọn àsọtẹ́lẹ̀ nínú Ìsàíàh 53 ṣe di mímúṣẹ. Kíni díẹ̀ nínú àwọn ìbànújẹ́ àti àwọn ìkorò tí Olùgbàlà nbá yín gbé?

  

  5:25

• Ẹ wá àwọn àwòrán ti àwọn ìṣẹ̀lẹ̀ tí ó yí Ètùtù Jésù Krístì ká (wo Ìwé Ọnà Ìhìnrere, àwọn nọ́mbà 56–60). Lẹ́hìnnáà ẹ lè wá àwọn gbólóhùn ọ̀rọ̀ inú Ìsàíàh 53 tó ṣe àpèjúwe àwọn ìṣẹ̀lẹ̀ inú àwọn àwòrán náà. Kíni àwọn ìkọ́ni wọ̀nyí mísí yín láti ṣe?

Bákannáà wo “Kíyèsí i Olùràpadà Nlá Kú,” Àwọn orin ìsìn, nọ́mbà 191.

Gbogbo wa ní àwọn àkókò nígbàtí a bá ní ìmọ̀lára jíjìnà sí Olúwa nítorí àwọn ẹ̀ṣẹ̀ tàbí àìlera wa. Àwọn kan tilẹ̀ ti jáwọ́ nínú ìrètí pé Òun yíò dáríjì wọ́n láé. Ìsàíàh 54 àti 57 jẹ́ àwọn orí nlá láti ka fún ìtúni-dálójú àti ìgbani-níyànjú ní irú àwọn àkokò bẹ́ẹ̀. Ní pàtàkì nínú Ìsàíàh 54:4–10; 57:15–19, àwọn ọ̀rọ̀ wo ló kọ́ yín bí Olùgbàlà ṣe ní ìmọ̀lára nípa yín sí? Kíni ìyàtọ̀ tí ó ṣe nínú ìgbésí ayé yín láti mọ nkan wọ̀nyí nípa Rẹ̀?

Ààrẹ Dieter F. Uchtdorf kọ́ni:

“Kò jẹ́ nkankan bí ó ti wù kí ó dàbí pé ìgbé-ayé wa ti ṣègbé pátápátá tó. Kò jẹ́ nkankan bí ó ti wù kí àwọn ẹ̀ṣẹ̀ wa pupa tó, bí kíkorò wa ṣe jinlẹ̀ tó, tí a dánìkan wà, ti a jẹ́ pípatì, tàbí bí ọkàn wa ṣe lè bàjẹ́ tó. Pàápàá àwọn wọnnì tí wọ́n wà lainí ìrètí, tí wọ́n ngbé nínú asán, tí wọ́n ti dalẹ̀ ìgbẹ́kẹ̀lé, ti wọ́n ti ju ìwà òtítọ́ wọn sílẹ̀, tàbí yípadà kúrò ní ọ̀dọ̀ Ọlọ́run le di títúnṣe. …

“Ìròhìn aláyọ̀ ti ìhìnrere ni èyí: nítorí ètò ìdùnnú ayérayé tí Baba wa Ọ̀run olùfẹ́ni pèsè àti nípasẹ̀ ìrúbọ àìlópin ti Jésù Krístì náà, a kò lè ní ìràpadà nìkan látinú ipò ìṣubú wa kí a sì padàbọ̀sípò sí ìwà mímọ́, ṣùgbọ́n bákannáà a lè kọjá àwọn àfinúrò ti ayé ikú kí a sì di ajogún ìyè ayérayé àti alábápín ògo àìlèjúwe ti Ọlọ́run” (“Yío Gbé Ọ lé Èjìká Rẹ̀ yío sì Gbé Yín lọ Sílé,” Làìhónà, Oṣù karun 2016, 102).

Bákannáà wo Patrick Kearon, “Èrò-Inú Ọlọ́run Ni láti Mú Yín Wá Sílé,” Làìhónà, Oṣù Karun 2024, 87–89.

Láti ìrandíran, a ti dá Ísráẹ́lì mọ̀ gẹ́gẹ́bí ènìyàn májẹ̀mú Ọlọ́run. Bíótiwùkíórí, ètò Ọlọ́run kì í ṣe orílẹ̀-èdè kan ṣoṣo, nítorí “olúkúlùkù ẹni tí òùngbẹ ngbẹ” ni a pè láti “wá … sí ibi omi náà” (Ìsàíàh 55:1). Fi èyí sọ́kàn bí o ṣe nka Ìsàíàh 55 àti 56, kí ẹ sì nronú jinlẹ̀ lórí ohun tó túmọ̀ sí láti jẹ́ ènìyàn Ọlọ́run. Kíni ọ̀rọ̀ Ọlọ́run sí àwọn wọnnì tí wọ́n ní ìmọ̀lára pé “a ya wọn sọ́tọ̀ pátápátá” kúrò lọ́dọ̀ Rẹ̀? (Ìsàíàh 56:3). Ẹ yẹ fífi àmì sí àwọn ẹsẹ tí ó ṣe apejuwe ìhùwàsí àti ìṣe àwọn wọnnì tí wọ́n “di májẹ̀mú mi mú” (wo Ìsàíàh 56:4–7).

• Ó lè jẹ́ ìgbádùn fún àwọn ọmọ yín láti ṣe àwárí àwọn gbólóhùn ọ̀rọ̀ bíi “jí,” “dúró,” àti “gbé agbára rẹ wọ̀” nínú Ìsàíàh 51:9, 17; 52:1–2, 9 àti lẹ́hìnnáà ṣe ìṣe lórí àwọn gbólóhùn ọ̀rọ̀ wọnnì. Lẹ́hìn ṣíṣe bẹ́ẹ̀, ẹ lè sọ ohun tó túmọ̀ sí láti jí, dìde, kí a sì lo agbára nípa tẹ̀mí. Kíni Olúwa béèrè pé kí a ṣe nínú àwọn ẹsẹ wọ̀nyí?

• Àwọn ọmọ yín tún lè ka Ìsàíàh 51:1, 4, 7 kí wọ́n sì mọ ẹni tí Olúwa nsọ̀rọ̀ sí àti ohun tí Ó fẹ́ kí wọ́n ṣe. Kíni ó túmọ̀ sí láti “fetí sí” Olúwa? Báwo ni a ṣe lè i hàn Olúwa pé a “fetí sí” I?

• Ẹ̀yin àti àwọn ọmọ yín lè wo àwọn àwòrán púpọ̀ tí ó nṣe àfihàn ìjìyà àti ikú Jésù Krístì (wo, fún àpẹẹrẹ, Ìwé Ọnà Ìhìnrere, àwọn nọ́mbà 56, 57, 58). (wo, fun apẹẹrẹ, Iwe aworan Ihinrere, no. 56, 57, 58). Bí ẹ ṣe nka Orin Dáfídì 53:3–6, 9 papọ̀ kí ẹ sì wá àwọn ọ̀rọ̀ tó ṣe àpèjúwe ohun tó nṣẹlẹ̀ nínú àwọn àwòrán náà. Ẹ ran àwọn ọmọ yín lọ́wọ́ láti ní òye pé Ìsàíàh ṣe àbápín àwọn òtítọ́ wọ̀nyí ní ọgọgọ́ọ̀rún ọdún ṣáájú kí wọ́n tó ṣẹlẹ̀. Kínìdí tí yíò fi jẹ́ pàtàkì fún àwọn ènìyàn làti mọ nkan wọ̀nyí ní ọ̀pọ̀lọpọ̀ ọdún síwájú? (wo Álmà 39:15–19).

• Lẹ́hìn kíkà látinú Ìsàíàh 53:4, “Ó ti ru ìbànújẹ́ wa, ó sì gbé ìkáàánú wa,” àwọn ọmọ yín lè gbìyànjú láti gbé ohun tó wúwo (tàbí dí díbọ́n pé ó gbé ọ̀kan). Ẹ sọ̀rọ̀ nípa bí “ìbànújẹ́” àti “ikaanu” tàbí ìbànújẹ́ ṣe lè wúwo àti líle láti gbé. Kínìdí tí Jésù fi ru “ìbànújẹ́,” “ikaanu,” àti “àwọn àìṣedéédé” tàbí ẹ̀ṣẹ̀ wa? (bákannáà wo Álmà 7:11–12).

• Láti kọ́ àwọn ọmọ yín nípa Ìsàíàh 55:6, ẹ lè fi àwòrán Jésù pamọ́ sí ibì kan nínú yàrá náà. Ẹ lè pe àwọn ọmọ yín láti wá àwòrán náà kí ẹ sì sọ ọ̀nà kan tí wọ́n fi lè “wá… Olúwa nígbàtí a lè ri.” Orin kan bíi “Ẹ Tètè Wá Olúwa” (Orin Àwọn Ọmọdé, 108) lè fún wọn ní èrò. Lẹ́hìnnáà ẹ lè jẹ́ kí ọ̀kan nínú àwọn ọmọdé fi àwòrán pamọ́ kí ẹ tún ìṣe náà ṣe.

• Lẹ́hìn kíka Ìsàíàh 55:9, ó lè jẹ́ ohun ìgbádùn fún àwọn ọmọ yín láti dúró lórí àpótí kan kí wọ́n sì sọ̀rọ̀ nípa bí nkan ṣe rí nígbàtí ẹ bá “ga ju.” Tàbí kí wọ́n ya àwòrán ohun tí Ìsàíàh 55:9 túmọ̀ sí fún wọn. Lẹ́hìnnáà ẹ lè sọ̀rọ̀ díẹ̀ nípa àwọn ọ̀nà Olúwa tí ó ga ju àwọn ọ̀nà wa lọ. Bí àpẹrẹ, kíni ọ̀nà tí Ó gbà ntọ́jú àwọn ẹlẹ́ṣẹ̀? (wo Máàkù 2:15–17). Báwo ni ọ̀nà Rẹ̀ ṣe ndarí àwọn ẹlòmíràn? (wo Máttéù 20:25–28). Ẹ ṣe àbápín pẹ̀lú àwọn ọmọ yín bí ẹ ti nkọ́ láti gbẹ́kẹ̀lé àwọn ọ̀nà gígajù ti Olúwa àti àwọn èrò.