2 Wa 2–7

Mirak yo montre nou puisans Bondye. Yo ka ede nou simonte difikilte mòtalite yo—tankou yon peyi dezè ki bezwen dlo pur (gade 2 Wa 2:19–22) oswa yon aks pèdi ki bezwen refè (gade 2 Wa 6:4–7). Men, sa ki pi enpòtan, mirak yo ka fè nou vire al jwenn Senyè a. Pandan w ap li 2 Wa 2–6la, panse pou w fè yon lis mirak ou jwenn yo, epi medite sou leson espirityèl ou aprann nan yo chak.

Ou ta gendwa tou konpare mirak Elize te fè yo avèk mirak Jezikri te fè yo (gade 2 Wa 4:8–37 avèk Lik 7:11–16; 2 Wa 4:42–44 avèk Jan 6:1–13; 2 Wa 5:1–15 avèk Lik 17:11–19). Kisa mirak sa yo anseye ou konsènan Sovè a ak pwofèt Li yo?

Gade tou 2 Nefi 26:12–13; 27:23; Mowoni 7:35–37; seksyon ”Chèche ak Atann Mirak” nan Russell M. Nelson, ”Pouvwa Elan Spirityèl la,” Lyawona, Me 2022, 99–100.

Senyè a te enspire Elize pou l te pwofetize sou bagay ki te gen pou vini yo—abityèlman, bagay ki te sanble yo pa fasil pou rive. Pandan w ap li 2 Wa 4:8–17; 7:1–16, reflechi konsènan fason ou reponn a pawòl Senyè a atravè pwofèt Li yo jodi a. Ki ansèyman, pwofesi, oubyen pwomès ou te tande nan men pwofèt vivan yo. Kisa w ap fè pou w aji ak lafwa nan pawòl sa yo?

Gade tou 3 Nefi 29:6; Doktrin ak Alyans 1:37–38; ”Ansèyman Prezidan yo” koleksyon, Bibliyotèk Levanjil la.

Pandan w ap li 2 Wa 5, konsidere maladi lèp Naaman an avèk yon pwoblèm spirityèl w ap fè fas.

Èske gen yon moun tankou ”ti sèvant la” nan lavi ou, k ap ankouraje w pou w chèche gidans pou pwoblèm ou a nan men pwofèt Senyè a? (gade vèsè 2–3, 13).

Kisa Senyè a envite w pou w fè ki ta ka sanble twò senp—tankou ”lave w, epi vin pwòp”? (vèsè 13). Kisa ki ta ka anpeche w aksepte envitasyon senp Li yo?

Kijan w ka demontre imilite menm jan Naaman te fè l?

Note fason eksperyans Naaman an te afekte lafwa li nan Bondye Izrayèl la (gade vèsè 15 Kisa w ka aprann apati sa a?

Gade tou Lik 4:27; 1–Pyè 5:5–7; Alma 37:3–7; Etè 12:27; L.Whitney Clayton, “Kèlkeswa sa Li Di W Fè, Fè Li,” Liahona, Me 2017, 97–99; “Naaman ak Elize” (videyo), Bibliyotèk Levanjil la

14:30

Pandan w ap eseye suiv Kris la, èske w te janm santi w tankou jèn sèvitè Elize a—pi piti epi ki pè? Imajine ou te nan plas li pandan w ap li 2 Wa 6:8–23. Kijan istwa sa a chanje fason w panse ak fason w santi w konsènan eprèv, responsablite, oubyen efò w yo pou w viv levanjil la?

Pandan w ap medite, konsidere pawòl Prezidan Henry B. Eyring yo: “Tankou sèvitè Elize sa a, gen plis avèk ou pase sa w wè ki kont ou yo. Gen kèk ki avèk ou ki ap envizib pou je mòtèl ou. Senyè a ap soutni ou e pafwa L ap fè sa nan rele lòt moun pou vin kanpe avèk ou” (“O Oumenm ki Anbake,” Lyawona, Nov. 2008, 58).

Konsidere fè yon lis sou ”sa ki avèk [ou] yo” (vèsè 16)—moun Bondye mete nan lavi w pou sipòte ou. Ou ta ka mande L pou ede w idantifye yo nan ouvri je espirityèl ou. Li pwobableman mete ou nan lavi lòt moun pou ede yo. Kijan w ka jwenn fòs ak sipò nan men youn lòt?

Kilè ou te santi sipò Senyè a dekri nan Doktrin ak Alyans 84:88la?

Ou gendwa etidye mesaj Sè Michelle D. Craig la tou ”Je pou Wè” (Lyawona, Nov. 2020, 15–17). Mande tèt ou: “Kisa Bondye vle m wè?”

An referans a istwa ki nan 2 Wa 6:8–23 a, Èldè Ronald A. Rasband te di: “Nou ka genyen oubyen pa gen charyo dife yo voye pou elimine laperèz nou ak konkeri move lespri nou yo, men leson an klè. Senyè a avèk nou, Li sousye pou nou, epi L ap beni nou nan fason Limenm sèl ka fè. Lapriyè ka rale fòs ak revelasyon nou bezwen an desann sou nou, pou santre panse nou sou Jezikri ak sakrifis ekspyatwa L la. Senyè a te konnen nou t ap pè pafwa. Mwen pase ladan l e nou menm tou. … Nan Legliz sa a, nou ka pa anpil nan fason mond lan mezire enfliyans, men lè nou ouvri je espirityèl nou, ‘moun ki avèk nou yo pi plis pase moun ki avèk yo a‘ [2 Wa 6:16]” (“Se Pou nou Pa Twouble,” Liahona, Nov. 2018, 18–19). Kijan w t ap itilize pawòl sa yo pou w ede yon moun ki santi l ap bay tèt li pwoblèm oubyen ki pè?

Gade tou: “Chers Enfants, sur vous Dieu veille,” Cantiques, no. 96.

• Apre w fin ede timoun ou yo konprann kisa yon mirak ye, envite yo pou yo mete yo nan yon lis avèk otan egzanp sou mirak ke yo kapab. Foto nan Liv Ilistrasyon Levanjil la oswa Vini, Suiv Mwen yo ka ede. Apresa, yo ta kapab chèche mirak nan 2 Wa 4:1–7, 14–17, 32–35, 38–44. Kisa mirak sa yo anseye sou Papa nou ki nan Syèl la?

• Oumenm ak timoun ou yo ta kapab pale konsènan fason Bondye montre lanmou Li atravè mirak. Ou ta ka chante ansanm yon chan tankou “Lanmou Bondye“ (Bibliyotèk Levanjil la).

• Ede timoun ou yo aprann istwa a nan 2 Wa 5:1–3, 9–14la. Konsidere itilize “Elize Geri Naaman“ (nan Istwa Ansyen Testaman yo, 134–37) oswa foto Naaman an nan plan leson semèn sa a. Poukisa Naaman pa t vle al lave kò li nan Rivyè Jouden an, malgre Elize te di l sa t ap geri maladi l la. Kijan Naaman te jwenn benediksyon lè l te suiv enstriksyon Elize yo? Nou ta ka pataje youn ak lòt eksperyans kote ou te obeyi Senyè a, menm lè ou pa t sèten sa w te vle.

  

  1:52

• Ou ta ka mete aksan tou sou 2 Wa 5:13, kote sèvitè Naamàn yo te ede l deside pou l obeyi pwofèt Elize. Apresa ede timoun ou yo ta ka pale konsènan fason yo ta ka ede zanmi yo oubyen manm fanmi yo tande ak obeyi pwofèt la.

• Oumenm ak timoun ou yo ta kapab imajine ke nou antoure avèk yon lame ak epe, cheval, ak charyo. Kijan w t ap santi w? Kisa w t ap fè? Mande yo pou yo fèmen je yo pandan w ap li 2 Wa 6:16–17 pou yo. (Gade tou “Elize ak Lame Senyè a,“ nan Istwa Ansyen Testaman yo, 138–39, oswa foto ki nan fen plan leson sa a.) Lè w rive nan mo “ouvri je l” yo (vèsè 17), mande yo pou yo ouvri je yo. Pale konsènan sa sèvitè a te wè. Pataje avèk timoun ou yo fason ou te santi Senyè a te avèk ou pandan difikilte w yo, menm lè sa te sanble ke w te poukont ou.

  

  1:9