“Jun 15–21. ‘Bikpela Yet Bai Winim Dispela Pait’: 1 Samuel 17–18; 24–26; 2 Samuel 5–7,” Kam, Bihainim Mi—Bilong Haus na Sios: Olpela Testamen 2026 (2026)
“Jun 15–21. ‘Bikpela Yet Bai Winim Dispela Pait,’” Kam, Bihainim Mi: Olpela Testamen 2026
David and Goliath, Steve Nethercott i mekim
Jun 15–21: “Bikpela Yet Bai Winim Dispela Pait”
1 Samuel 17–18; 24–26; 2 Samuel 5–7
Long bipo taim, taim ol lain bilong Israel kisim graun God promis long givim ol i kam olsem, ol Filistia i save birua long gutpela sindaun bilong ol. Bikpela i kisim bek ol planti taim long bipo, tasol nau ol hetman bilong Israel i strong olsem, “Mipela i laik yu makim wanpela king … [bilong] bosim ol ami taim mipela i go pait long ol birua” (1 Samuel 8:19–20). Olsem na Samuel putim wel antap long Sol na em kamap king. Tasol taim dispela bikpela man tru, Goliat, i kam long pait wantaim ol soldia bilong Israel, Sol—olsem ol ami bilong em—i “pret nogut tru” (1 Samuel 17:11). Long dispela dei, King Sol i no kisim bek ol Israel tasol wanpela liklik mangi husat i save lukautim sipsip, nem bilong em Devit. Em i no pasim ol klos bilong pait, tasol bilip bilong em long Bikpela i banisim em. Dispela pait i soim ol Israel, na husat i gat ol pait long sait bilong spirit, olsem “[Bikpela] i no save wari long ol man holim spia na bainat.” na “Bikpela yet bai winim dispela pait” (1 Samuel 17:47).
Ol Sampela Tingting bilong Lainim long Haus na long SIos
1 Samuel 17
Bikpela i ken helpim mi long winim ol hevi.
Planti man i save long stori bilong Devit na Goliat. Tasol yumi save lukluk long Devit tasol. Long dispela taim, taim yu ritim 1 Samuel 17, skelim ol toktok bilong ol narapela lain insait long dispela sapta (lukim lista long aninit). Yu lainim wanem samting long ol na ol hait tingting bilong ol? Yu lainim wanem samting long Devit? Em i narakain olsem wanem?
-
Goliat: ves 8–10, 43–44
-
Eliap: ves 28
-
Sol: ves 33
-
Devit: ves 26, 32, 34–37, 39, 45–47
Stori bilong yu, i no bikpela olsem bilong Devit, i gat ol hevi wankain olsem Goliat, long winim na em ol gutpela taim bilong yu soim na strongim bilip bilong yu long Bikpela. Pasin Devit i soim i skulim yu wanem samting, long pait wantaim ol birua bilong yu? Yu ken ritim tu toktok bilong Presiden Camille N. Johnson “Invite Christ to Author Your Story” (Liahona, Nov. 2021, 80–82) na tingim wanpela hevi i kamap long yu. Painim ol bekim bilong dispela kain ol askim: Bikpela laikim mi long lukim ol hevi bilong mi olsem wanem? Em helpim mi olsem wanem long bipo? Mi bai soim olsem mi bilip long Em bai raitim stori bilong mi olsem wanem?
Ating yu save pinis olsem i gat sampela ol sapta i stori long hevi bilong Devit (kain olsem long 2 Samuel 11). Sapos yu bin stap long dispela taim, na yu ken givim Devit sampela tok stia bihain long pait bilong em wantaim Goliat, yu bai tok wanem? Dispela tok stia yu givim i ken stiaim yu tu olsem wanem?
Lukim tu “The Lord Will Deliver Me” (vidio), Gospel Library.
The Lord Will Deliver Me
1 Samuel 17:26–50
Wanpela man tasol husat i bilip long Krais ken mekim bikpela senis.
Taim yumi wan wan i gat hevi bilong yumi yet, i gat ol bikpela hevi tru i wok long bagarapim ples graun i stap. Taim ol man nogut i “bung … long pait” wantaim ol gutpela samting (1 Samuel 17:1), ating yumi bai ting liklik samting yumi wan wan i mekim bai mekim senis olsem wanem. Yu painim wanem long stori bilong Devit we i givim yu ol gutpela, strongpela tingting?
Lukim tu “Let Us All Press On,” Hymns, no. 243.
True Friendship and Self-Respect, Wilson Ong i mekim (detail)
1 Samuel 18
“[Jonatan] laikim Devit tru olsem em i laikim em yet.”
Taim yu ritim 1 Samuel 18, skelim Sol na pikinini man bilong em Jonatan (husat, sapos Devit i no stap, bai kamap king bihain). Jonatan i mekim wanem taim em harim olsem Devit i win? Yu lainim wanem long dispela?
Yu painim wanem long pasin Jonatan i mekim, we i mekim yu tingim Jisas Krais?
“Makim tok bilong God kam bek long laip bilong yu” (1 Nifai 19:23). Tok bilong God i lainim yumi ol pasin na strong bilong ol lain olsem Devit, Jonatan, na Sol. Yu bai lukim olsem i no gat wanpela insait long tok bilong God i stretpela tru. Kain olsem, taim yu ritim ol gutpela samting Devit i mekim, yu mas lainim samting long ol asua em mekim tu. Taim yumi mekim olsem, yumi ken luksave long ol samting i no stret na i no strong insait long yumi na “lainim long stap olsem man i gat gutpela tingting na save moa long ol [narapela]” (Momon 9:31).
1 Samuel 24–26
Pasin bilong lusim asua em rot bilong kisim bel isi na orait.
Long 1 Samuel 24–26, painim ol samting i skulim yu long pasin bilong apim yu yet, pasin bilong lusim asua, na pasin bilong lukautim wokabaut bilong yu. Yu ken ritim tok bilong Elda Mark A. Bragg “Christlike Poise” long helpim yu (Liahona, Mei 2023, 60–63). Devit, Abigel, na ol narapela i soim—o i no soim—pasin bilong Krais insait long ol dispela sapta olsem wanem? Wanem sampela sans yu gat long soim pasin bilong Krais?
Toktok bilong Sista Kristen Yee “Beauty for Ashes: The Healing Path of Forgiveness” (Liahona, Nov. 2022, 36–39) i ken helpim yu Abigel i olsem Jisas Krais olsem wanem?
2 Samuel 5:17–25
Bikpela i ken stiaim wokabaut bilong mi.
Devit i winim Goliat pinis, tasol hevi bilong em wantaim ol Filistia i no pinis yet. Taim yu ritim 2 Samuel 5:17–25, skelim wanem rot pasin Devit i soim i ken helpim yu long ol hevi i kamap long yu (lukim tu 1 Samuel 23:2, 10–11; 30:8; 2 Samuel 2:1). Taim yu bihainim ol toktok Bikpela i givim yu, dispela i blesim yu olsem wanem?
2 Samuel 7
Wanem dispela “haus” Bikpela i promis long givim Devit?
Taim Devit i laik sanapim wanpela haus, em tempel, bilong Bikpela (lukim 2 Samuel 7:1–3), Bikpela i tok pikinini man bilong Devit bai sanapim (lukim ves 12–15; lukim tu 1 Stori 17:1–15). Bikpela i tok tu olsem Em bai sanapim tu wanpela “haus” bilong Devit, em planti lain pikinini bilong Devit bai kamap na sia king bilong em bai stap oltaim oltaim (lukim 2 Samuel 7:11, 16, 25–29; Buk Song 89:3–4, 35–37). Dispela promis i kamap tru taim Jisas Krais, dispela King i save stap oltaim oltaim, i kam. Jisas Krais em lain bilong Devit (lukim Matyu 1:1; Luk 1:32–33; Jon 18:33–37).
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
1 Samuel 17:20–54
Taim mi bilip long Jisas Krais, mi ken kisim strong.
-
Yu ken yusim “David and Goliath” insait long Old Testament Stories, 112–16, long helpim ol pikinini bilong yu klia gut wanem samting kamap long 1 Samuel 17:20–54. Bihain yu ken larim ol yusim ol piksa insait long hia long stori long dispela. Askim ol, ol ting Bikpela i laikim ol long lainim wanem samting insait long dispela stori.
2:36David and Goliath
-
Yu na ol pikinini bilong yu ken mekim wanpela lista bilong ol sampela hatpela hevi i ken kamap long laip bilong ol. Bihain helpim ol painim ol toktok Devit i tok we ol bai helpim ol daunim ol dispela hevi (lukim 1 Samuel 17:26, 32, 34–37, 45–47). Toktok namel long yupela long wanem rot Jisas Krais i helpim yupela long taim bilong hevi.
-
Ol pikinini bilong yu i ken mas olsem ol em Devit i go long pait wantaim Goliat, na singim wanpela song i toktok long pasin bilong stap strong na noken pret, olsem “I Will Be Valiant” (Children’s Songbook, 162).
1 Samuel 18:1–4
Ol gutpela poro em ol blesing i kam long God.
-
Yu bai helpim ol pikinini bilong yu lainim wanem samting Devit na Jonatan soim insait long taim tupela stap poro olsem wanem? Wanpela rot em yu ken givim tupela lewa yu mekim wantaim pepa, wanpela i makim Devit na narapela i makim Jonatan. Bihain, ritim wantaim ol sotpela tok long 1 Samuel 18:1–4 we i soim dispela laikim tupela i pilim long tupela yet. Ol pikinini bilong yu ken rait o dro long ol dispela pepa lewa wanem rot ol bai soim poro bilong ol olsem ol laikim ol.
2 Samuel 5:19, 23
Sapos mi laikim sampela stia, mi ken askim Papa long Heven.
-
Insait long ol dispela sapta, Devit i kamap king bilong Israel. Ol pikinini bilong yu ken pilai olsem ol king o kwin. Ol bai kamapim wanem ol lo? Ol bai go long husat long kisim helpim? Helpim ol pikinini bilong yu painimaut olsem taim Devit i laik kisim helpim, em i “askim,” o beten. Kain olsem, taim yupela ritim 2 Samuel 5:19, 23, askim ol pikinini bilong long harim dispela tok “askim” na foldim han bilong ol taim ol harim. Bilong wanem na Devit i laikim Bikpela long helpim em wantaim dispela nupela wok bilong em?
-
Tokim yupela yet long ol taim yupela i beten long askim Papa long Heven helpim yupela. Em i mekim wanem samting bilong helpim yu?
2 Samuel 7:16–17
Jisas Krais Em King bilong mi, na Em stap oltaim oltaim.
-
Ol king yumi ritim long Olpela Testamen i gat ol sampela pasin i no stret, na kingdom bilong olgeta yet i pinis. Tasol Jisas Krais em wanpela stretpela King, na Em bai stap King oltaim oltaim. Yu ken helpim ol pikinini bilong yu painimaut dispela taim yupela ritim wanem samting profet Natan tokim King Devit, long 2 Samuel 7:16–17. Kingdom bilong Devit i nogat pinis olsem wanem? Helpim ol pikinini painim na ritim ol ves i tok olsem Jisas Krais, wanpela lain tumbuna bilong Devit, em King bilong yumi, kain olsem Luk 1:32–33; Jon 18:33–37; na Kamapim Tok Hait 19:16. Jisas Krais em narakain long ol king bilong dispela graun olsem wanem? Yu bai liptimapim Jisas Krais olsem King bilong yumi husat i stap oltaim olsem wanem?
Long kisim sampela moa tingting, lukim Friend piksa buk bilong dispela mun.