“Jun 8–14. ‘[Bikpela] Save Lukim Tingting na Laik bilong Man na [Em] Skelim Ol’: 1 Samuel 8–10; 13; 15–16,” Kam, Bihainim Mi—Bilong Haus na Sios: Olpela Testamen 2026 (2026)
“Jun 8–14. ‘[Bikpela] Save Lukim Tingting na Laik bilong Man na [Em] Skelim Ol,’” Kam, Bihainim Mi: Olpela Testamen 2026
Beside Still Waters, Simon Dewey i mekim
Jun 8–14: “[Bikpela] Save Lukim Tingting na Laik bilong Man na [Em] Skelim Ol”
1 Samuel 8–10; 13; 15–16
Sol em man bilong lukautim ol donki. Em longpela na naispela man tru, na em “ting [em] samting nating” na em save tingting long famili na lain bilong em (lukim 1 Samuel 9:2–3, 21; 15:17). Long de em bai sanap long ai bilong ol Israel olsem king bilong ol, em i no go kamap, long wanem, em tingting planti tru na em “i hait” (1 Samuel 10:21–22). Taim yu lukim dispela, ating yu no ting olsem em bai go pas long ol Israel long winim ol birua bilong ol—o bihain em bai ting em gat bikpela strong na em bai bikhet long Bikpela.
Devit em man bilong lukautim ol sipsip. Em i nogat bikpela strong, o luk gutpela, olsem ol 7-pela bikpela brata bilong em. Long de Samuel i kam long makim nupela king bilong Israel, ol i no ting i gat as bilong larim Devit sanap namel long ol man ol laik makim kamap king, olsem na larim em lukautim ol sipsip stap. Taim yu lukim dispela, ating yu no ting olsem em bai i gat bilip na bikpela strong long kilim i dai wanpela traipela man tru na kamap namba wan king bilong Israel.
Bikpela i no save lukluk long ol samting ol man i kolim yumi, yumi luk olsem wanem, o ol kainkain tingting yumi gat. Tasol em i save lukim “tingting na laik” bilong yumi (1 Samuel 16:7). Na sapos bel bilong yumi i no stap stret, sapos yumi laikim, Em bai givim yumi “nupela tingting” (1 Samuel 10:9).
Ol Aidia bilong Lainim long Haus na long Sios
1 Samuel 8
Jisas Krais Em King bilong mi.
1 Samuel 8 i toktok long wanpela samting bai kamap we i bai senisim bihain bilong ol Israel. Ol Israel i laikim wanpela samting ol kantri stap arere long ol i gat—wanpela king bilong go pas long ol—bilong banisim ol long ol birua bilong ol. Taim yu ritim wanem samting ol laikim na Bikpela i bekim olsem wanem, tingting long husat yu save lukluk long em long kisim banis na stia. Skelim wanem as bilong larim Bikpela “stap king bilong [yu]” (1 Samuel 8:7).
Long ol wik bai kam, yu bai ritim stori bilong ol sampela king ol makim ol long go pas long Israel. Taim yu ritim stori bilong ol, skelim ol dispela askim:
-
Ol tok lukaut bilong Bikpela i karim kaikai olsem wanem, long 1 Samuel 8:10–18?
-
Taim ol Israel i laikim wanpela king bilong dispela graun bilong bosim ol, dispela i no gutpela olsem wanem?
-
Jisas Krais em narakain long ol king bilong dispela graun olsem wanem? Skelim wanem ol samting bilong dispela graun yu mas rausim long laip bilong yu long larim Krais stap King bilong yu.
Lukim tu “Rejoice, the Lord Is King!,” Hymns, no. 66.
1 Samuel 9–10; 16:1–13
God i save makim ol manmeri long maus bilong profet long mekim wok insait long kingdom bilong Em.
Ritim wanem rot God i save makim ol king bilong Israel long 1 Samuel 9–10 na 16 (lukim 9:15–17; 10:1–12; 16:1–13). Painim ol ves bilong helpim yu save gut long as bilong “God i mas makim wanpela long maus bilong profet” insait long Sios bilong Bikpela tude (Ol Bilip 1:5). Yu ken putim yu yet long ples bilong hetman i laik makim man bilong mekim wok (Samuel), husat ol i makim bilong mekim wok (Sol na Devit), na ol manmeri ol i makim ol lain bilong helpim ol (ol Israel). Yu lainim wanem samting long ol toktok na ol pasin bilong ol insait long ol dispela sapta?
Piksa bilong Samuel i putim wel antap long Sol, P. Mann i mekim, © Lifeway Collection/laisens i kam long goodsalt.com
1 Samuel 13:5–14; 15
“Pasin bilong bihainim tok bilong [Bikpela], em i namba wan pasin tru. Na pasin bilong ofaim ol gutpela abus long [Bikpela], em i namba 2 tasol.”
Long 1 Samuel 10, yumi lukim olsem Sol em man bilong sem, tasol yumi bai kirap nogut olsem em “sakim tok” na “bikhet” bihain long em kamap king (1 Samuel 15:23). Bilong wanem yu ting dispela i kamap? Long 1 Samuel 13:5–14, wanem ol pasin yu lukim em mekim, i mekim em pundaun?
Long 1 Samuel 15, yu bai ritim olsem Sol i no harim tok bilong Bikpela, long wanem, em ting samting em i tingim long en i gutpela. Long lainim wanem samting kamap taim Sol i no mekim stretpela pasin, lukim ves 22 na putim ol narapela tok we i gutpela, long ples bilong “ofa” na “gutpela abus,” tasol i no bikpela samting olsem pasin bilong harim na bihainim Bikpela. Yu bin kisim blesing olsem wanem taim yu putim laik bilong God go pas long laip bilong yu?
1 Samuel 16:6–12
“[Bikpela] save lukim tingting na laik bilong man na [Em] skelim ol.”
Yu bin lukim wanpela “long bodi” tasol na yu ting dispela man i orait long makim, tasol bihain yu lukim olsem dispela tingting yu mekim i no stret, o nogat? Ating yu kaikai wanpela kaikai i luk nais tasol i no teist gut. O ating yu skelim kranki wanpela man.
Taim Samuel wok long painim nupela king bilong Israel, Bikpela i skulim em long gutpela rot bilong mekim. Ritim dispela long 1 Samuel 16:6–7, na mekim wanpela list bilong ol man save skelim ol narapela “long bodi” olsem wanem. Yu ken painim sampela long toktok bilong Elda Christophe G. Giraud-Carrier “We Are His Children” (Liahona, Nov. 2023, 114–16). Wanem as bilong skelim “tingting na laik” bilong wanpela, olsem Bikpela i mekim? (1 Samuel 16:7) Yu ken painim sampela piksa bilong dispela tu long toktok bilong Elda Giraud-Carrier. Ating yu ken tingting long sampela taim Jisas Krais i no lukluk tasol long wanpela man i luk olsem wanem. (Kain olsem long Mak 12:41–44; Luk 5:1–11; 19:1–9; Jon 4:5–30; Moses 6:31–36.) Yu lainim wanem samting long ol dispela stori?
Yumi bai bihainim pasin bilong Jisas Krais olsem wanem, long yumi save lukim ol narapela na yumi yet olsem wanem? Taim yu mekim olsem, dispela bai senisim rot yu save toktok wantaim ol narapela olsem wanem? Ating yu ken tokim wanpela long gutpela samting yu lukim long bel bilong ol.
Lukim tu Ulisses Soares, “Brothers and Sisters in Christ,” Liahona, Nov. 2023, 70–73.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
1 Samuel 8
Jisas Krais Em i King bilong mi.
-
Taim yu ritim 1 Samuel 8 wantaim ol pikinini bilong yu, helpim ol painim wanem as na Samuel tokim ol Israel olsem i no gutpela long ol gat king. Bilong wanem na em i gutpela moa long larim Jisas Krais stap king bilong yumi? Ating yupela ken mekim wanpela bilas bilong het wantaim pepa na wan wan i ken werim na toktok long samting yumi ken mekim long soim olsem yumi laikim Jisas stap King bilong yumi. (Lukim tu Jeremaia 23:5; Doktrin na ol Kavanen 45:59.)
1 Samuel 8:6; 9:15–17; 10:1–24; 16:1–13
God i save makim ol lain husat i save mekim wok insait long Sios.
-
Stori bilong God i makim Sol na Devit kamap king ken helpim ol pikinini bilong yu save gut long wanem rot ol i save makim ol lain bilong mekim wok insait long Sios tude. God yet i save tok na ol i makim. Long lainim ol long ol dispela stori, raitim ol samting i kamap long ol dispela stori long ol liklik hap pepa, na ol pikinini bilong yu ken putim ol stret taim yupela ritim ol ves wantaim (lukim tu “Young David” insait long Old Testament Stories, 110–11). Bihain yupela ken toktok long ol taim God i blesim yu wantaim strong long spirit bilong yu long inapim wok ol i makim yu long mekim (see 1 Samuel 10:9–10).
1:16Young David
-
Dispela em gutpela taim bilong lainim ol pikinini bilong yu long namba 5 as bilip. Tokim ol wanem rot ol makim yu long mekim wok insait long Sios. Yu save God makim yu long mekim dispela wok olsem wanem?
The Prophet Samuel Anoints David to Be King of Israel in Bethlehem, Balage Balogh i mekim
1 Samuel 16:1–13
Bikpela save lukim tingting na laik bilong man.
-
Wanpela samting i wankain olsem dispela i ken helpim ol pikinini save gut long as bilong toktok i stap long 1 Samuel 16:7. Kain olsem, yu ken soim ol sampela kaikai o wanpela buk we karamap bilong em i no bilong em na i no soim samting i stap insait. 1 Samuel 16:7 na dispela liklik piksa yu soim i tok wanem samting long wanem rot yumi mas lukim yumi yet na ol narapela? Singim wanpela song i strongim dispela tok, olsem “Love One Another” (Children’s Songbook, 136).
Yusim ol samting long tisim leson. Taim ol pikinini bilong yu i gat wanpela samting long lukim o holim we i wankain long wanpela as toktok bilong gutnius, ol i bai tingim dispela samting moa. Kain olsem, taim yu ritim 1 Samuel 16:7 wantaim ol, yu ken larim ol helpim yu painim ol piksa o samting i soim olsem yumi mas lukim ol narapela olsem Bikpela i lukim ol—long “tingting na laik” bilong ol—na i no “long bodi.”
-
Yu na ol pikinini bilong yu ken toktok long ol samting i kamap long yu na i mekim yu save bilong wanem na yu mas “lukim tingting na laik,” na i no “long bodi” tasol ves 7). Yupela ken tokim yupela yet ol gutpela pasin yupela lukim long bel bilong yupela wan wan.
Long kisim sampela moa tingting, lukim Friend piksa buk bilong dispela mun.