“Suhn 15–21. ‘E kin ketin Powehdi nan Mahwen’: 1 Samuel 17–18; 24–26; 2 Samuel 5–7,” Kohdo, Idawehn Ie—

“Suhn 15–21. ‘E kin ketin Powehdi nan Mahwen’” Kohdo, Idawehn Ie: Kadehde Mering 2026

Depit ih Kolaiad, sang Steve Nethercott

Suhn 15–21: “E kin ketin Powehdi nan Mahwen”

1 Samuel 17–18; 24–26; 2 Samuel 5–7

Sangete keinek kan en Israel ahr soandier nan sapwen inouo, mehn Pilisdain kan wiahier aramas keper ong arail seipdi. Kauno sewese iraildahr pak tohto mahso, ahpw met elder en mehn Israel kan ketihtihki, “En mie at nanmwarki … [kin] kahluwaikitohng nan mahwen oh kin pepeikin kiht” (1 Samuel 8:19–20). Eri Sohl kasarawihongehr wiahla nanmwarki. Oh ni ansou me Kolaiad ohl kalaimwun kamasepwehko katehki karis en sounpei en Israelo ah luhko, Sohl—duwehte nah sounpei koa—“inenen masepwehkada” 1 Samuel 17:11). Ni rahno, kaidehn Nanmwarki Sohl me kapitala Israel ahpw kisin pwutak soun epwel sihpw karakarahk men me kahdaniki Depit, me sohte likawih likoun sounpei ahpw likawih pwoson kehlail Koht. Mahwen wet kasalehiong Israel, oh sohte lipilipil me pahn peiki mahwen en palingehn, me “e sohte ketin anahne kedlahs de ketieu” oh me “e kin ketin powehdi nan mahwen” (1 Samuel 17:47).

Madamadau kan ong Kasukuhl ni Ihmw oh Mwomwohdiso

1 Samuel 17

Sang sawas en Kauno, I kak powehdi kahpwal sohte lipilipil.

Soaiepen Depit ih Kolaiad wia ehu soai dehde nan pwuhk sarawi kan. kitail kin kalapw kilangete Depit. Ahpw ansou wet, ni ahmw pahn onopiki 1 Samuel 17, pil medewe mwahu lokaia kan en ekei aramas nan iralaud wet (kilang lisdo pah). Dahme ke esehla duwen ira oh ara kahrepeh kan? Dahme ke esehla duwen Depit? Ia mwomwen ah weksang mehteikan?

Kolaiad: ire tikitik kan 8–10, 43–44
Eliap: ire tikitik 28
Sohl: ire tikitik 33
Depit: ire tikitik kan 26, 32, 34–37, 39, 45–47

Ahmw soai, me sohte nohn-dehde duwehte en Depito, udahn pahn iangahki kahpwal kan me sais en Kolaiad me anahne powehdi oh ansou mwahu kan en doadoahngki pwoson Kauno. Dahme en Depit ah karasaras padahkihong uhk duwen sohpai kahpwal nan ahmw soaio? Ke pil kak wadek en Preseden Camille N. Johnson padahk “Invite Christ to Author Your Story” (Liahona, Nohpempe 2021, 80–82) ni ahmw medemedewe ehu ahmw kasongosong kan. Rapahki pasapeng kan ong peidek kan me duwehte mepwukat: Ia mwomwen Kauno ah kupwurki ien kilang ahi kasongosong kan? Ia mwomwen Ah seweseiedahr mahso? Ia mwomwen ahi kak kasalehda me I likih Ih en ntingihada ahi soaio?

Mwein ke esehier me mie ekei iralaud kapahtou kei mwuhr nan en Depit soaio (kilang, ni karasepe, 2 Samuel 11). Ma ke ahniki ansou mwahu en kaweid Depit mwurin ah mahweniong Kolaiad, dahme ke pahn nda? Ia mwomwen kaweid wet ah kak doadoahk nan ahmw mour?

Pil kilang “Kauno Pahn Kapitiehla” (kasdo), Laiprehri en Rongamwahu.

1 Samuel 17:26–50

Emen aramas me ahniki pwoson Sises Krais kak wiahda ehu wekidekla.

Me patehng pein atail kasongosong akan, kitail pil kin sohpai kahpwal laud akan, me lelohng sampah pwon. Ansou me pali suwed kan “ahpw pokonpene … pwe re en mahwen” ong pali me mwahuo (1 Samuel 17:1), kitail kak medewe ia mwomwen atail nanantihong kak wiahda wekidekla ieu. Dahme ke diar Nan soaiepen Depit me kihong uhk koapwoaroapwoar?

Pil kilang “Kitail en Nantihong,” Koulen Sarawi kan, nempe. 243.

Sonadan oh Depit — Kempoakepah Mehlel oh Wauneki-Pein Ih, sang Wilson Ong (mengihtik)

1 Samuel 18

“Sonadan poakohng [Depit] duwehte pein Ih.”

Ni ahmw wadek 1 Samuel 18, song karasapene Sohl oh nah pwutak Sonadan (me, ma sohte Depit, kak medewe me ihme pahn wia nanmwarki mwuri). Ia mwomwen en Sohl oh Sonadan ara pasapeng ong en Depit ah pweidahu? Dahme ke kak esehsang ekspihriens wet?

Dahme ke diar nan en Sonadan madamadau oh wiewia kan me katamaniong uhk duwen Sises Krais?

“Momouriki pwuhk sarawi kan” (1 Nihpai 19:23). Pwuhk sarawi kan kihda ansou mwahu kaselel kan en kasukuhlsang oh mehn kangoang kan oh wihwia kan en aramas akan duwehte Depit, Sonadan, oh Sohl. Ke pahn diarada me sohte emen nan pwuhk sarawi kan me sohte ah sapwung. Eri ni ahmw pahn wadawad, ni karasepe, duwen en Depit ah pilipil mwahu kan, pil kasukuhlsang ah sapwung kan. Wihwia mwo kak sewesei kitail en kilangada luwet akan rehtail oh “esehla duwen maraino laud sang [mehteikan] oh kiht” (Mormon 9:31).

1 Samuel 24–26

Mahk iei ahl pwung ong meleilei oh kamwahula.

Nan 1 Samuel 24–26, rapahki lesen kan duwen pohnmwahso, mahk, oh pein-kanengamah. Ke kak pil medewe wadek en Elder Mark A. Bragg padahk “Christlike Poise” en wia kisehn ahmw onop (Liahona, Mei 2023, 60–63). Ia mwomwen Depit, Abigail, oh mehteikan kasalehda—de sohte kasalehda—momourki Krais nan iralaud pwukat? Soangen ansou mwahu da ke ahniki pwe ken kak kasalehda mouren Krais?

En Sister Kristen Yee padahko “Beauty of Ashes: The Healing Path of Forgiveness” (Liahona, Nohpempe 2022, 36–39 kak sewese iuk onopiki 1 Samuel 25. Ia mwomwen Abigail ah duwehte Sises Krais?

2 Samuel 5:17–25

Kauno kak ketkihong ie kaweid.

Menda mwurin Depit ah kalowehider Kolaiad, ah kahpwal akan ong mehn Pilisdain kan saikinte nek. Ni ahmw wadek 2 Samuel 5:17–25, medewe ia mwomwen en Depit karasaras kak sewese iuk Nan kasongosong kan ke kin lelohng (pil kilang 1 Samuel 23:2, 10–11; 30:8; 2 Samuel 2:1). Ia mwomwen ahmw alehdi kapai sang ni wia kaudiahl me ke alehdi?

2 Samuel 7

Dahieu “ihmw” me Kauno ketin inoukihongehr Depit?

Ansou me Depit pilahnehda en wiahda ehu ihmw, me wehwehki tehnpas sarawi, ong Kauno (kilang 2 Samuel 7:1–3), Kauno ketin sapengki me Nein Depit pwutak pahn kauwada (kilang ire tikitik kan 12–15, pil kilang 1 Kronikel 17:1–15). Kauno pil mahsaniher me E pahn uhd wiaiong Depit ehu “ihmw,” me wehwehki nah seri kan, oh me dewehu pahn poatoapoat (kilang 2 Samuel 7:11, 16, 25–29; Melkahka kan 89:3–4, 35–37). Inou wet pweidahn rehn Sises Krais, atail Nanmwarki Soutik, me wia kadaudok en Depit (kilang Madiu 1:1; Luk 1:32–33; Sohn 18:33–37).

Ong pil ekei, kilang pwuhk en sounpwunget ong makasaihn kan en Liahona oh Ong Kakehlepen Me Pwulopwul.

Madamadau kan ong Kasukuhlih Seri kan

1 Samuel 17:20–54

Pwoson Sises Krais kak sewese ie ahniki komwad.

Ke kak doadoahngki “Depit ih Kolaiad” nan Soaikan en Kadehde Mering, 112–16, pwehn sewese noumw seri kan esehla dahme wiawiher nan 1 Samuel 17:20–54. Mwuri ke kak mweidohng irail en pwurehng soaiehda soaio ni ahr doadoahngki kilel kan de mahlin kan nan audlain wet. Idek rehrail dahme re leme Kauno mwahuki irail en esehsang soai wet.

2:36
David and Goliath
Kowe oh noumw seri kan pil kak wiahda ehu lisd en ekei kasongosong apwal akan me irail kak sohpai nan arail mour. Mwuri sewese irail rapahkihda soahng kan me Depit indahier me kak sawas nan soangen kasongosong pwukat (kilang 1 Samuel 17:26, 32, 34–37, 45–47). Ehukihda duwen Sises Krais ah sewese iukadahr Nan ansoun kasongosong kan.
Noumw seri kan kak mahs likamwete irail Depit kokohlahng peiong Kolaiad ni arail kokouliki ehu koul me pid ahniki komwad, me duwehte “I Will Be Valiant” (Children’s Songbook, 162).

1 Samuel 18:1–4

Kempoakepahmw mwahu kan kak wia kapai sang Koht.

Ia wiepen ahmw kak sewese noumw seri kan en esehlahsang en Sonadan ih Depit ara ehupene? Ehu wiepe iei en kihong emen emen seri tehn doaropwe mohngiong riau, ehu wia weliepen Depit oh mehteio en wia weliepen Sonadan. Eri wadekpene ekei irehkan sang 1 Samuel 18:1–4 me kasalehda limpoak me kempoakepah riemenet ahniki ong emen emen. Noumw seri kan kak uhd ntingihedi de mahlenih pohn neirail mohngiong tehn doaropwe kan ia mwomwen arail kak kasalehda limpoak ong emen kempoakepahrail.

2 Samuel 5:19, 23

Ma I anahne kaweid, I kak idek rehn Sahm Nanleng.

Nan iralaud pwukat, Depit wialahr nanmwarki en Israel. Mwein e pahn kaperen ong noumw seri kan en mwomwehda wia nanmwarki de kuwihn. Soangen kosonned da irail pahn wiahda? Iawasa irail pahn kohla ie ong ale sawas? Sewese noumw seri kan esehda me ansou me Depit anahnehda sawaso, e “idekehr,” de kapakapehr, Ong pasapeng kan. Ni karasepe, ni ahmw wadek 2 Samuel 5:19, 23, luke seri kan en rong lepin lokaia “idekehr” oh irail en kihpene pehrail kan ansou irail rongada. Dahme Depit anahneki sawasepen Kauno nan ah pwukoah kapwo?
Inda pene nan pwungamwail duwen ansou kan me ke kapakap peki sawasepen Sahm Nanleng. Ia wekila me mie ni Ah sewese iuk?

2 Samuel 7:16–17

Sises Krais iei ahi Nanmwarki Soutik.

Nanmwarki kan kitail wadekadahr nan Kadehde Mering koaros ahniki luwet, oh arail wehi kan koaros imwiseklahr. Ahpw Sises Krais wia Nanmwarki unsek men oh pahn kaunda kohkohlahte. Ke kak sewese noumw seri kan diarada met sang ni wadewadek pene dahme soukohp Nadan indahngehr Nanmwarki Depit nan 2 Samuel 7:16–17. Ia mwomwen en Depit ah wehi ah sohte imwi? Sewese noumw seri kan rapahkihda oh wadek iren pwuhk sarawi kan me padahngki me Sises Krais, emen kadaudok en Depit, iei atail Nanmwarki, me duwehte Luk 1:32–33; Sohn 18:33–37; Kaudiahl 19:16. Ia mwomwen Sises ah weksang nanmwariki kan en sampah? Ia mwomwen atail pahn wauneki Sises Krais ni Ah wia atail Nahnmwariki Soutik?

Ong pil ekei, kilang pwuhk en sounpwunget ong makasaihn en Kempoakepah.

Depit ih Kolaiad — Kilel en Depit, sang Dilleen Marsh

Praimeri akdipidi peit: Pwoson Sises Krais kak sewese ie en ahniki komwad — Kilel en Depit, sang Dilleen Marsh