Ա Թագավորների 17–18, 24–26, Բ Թագավորների 5–7

Դավիթի և Գողիաթի պատմությունը սուրբ գրությունների ամենահայտնի պատմություններից մեկն է: Իհարկե, մենք սովորաբար կենտրոնանում ենք Դավիթի վրա: Բայց այս անգամ Ա Թագավորների 17 գլուխն ուսումնասիրելիս խորհեք նաև այս բաժնում նկարագրված այլ մարդկանց խոսքերի շուրջ (տես ստորև բերված ցանկը): Ի՞նչ սովորեցիք նրանց և նրանց շարժառիթների մասին: Ի՞նչ սովորեցիք Դավիթի մասին: Ինչո՞վ է նա տարբերվում:

• Գողիաթ․ հատվածներ 8–10, 43–44

• Եղիաբ․ հատված 28

• Սավուղ․ հատված 33

• Դավիթ․ հատվածներ 26, 32, 34–37, 39, 45–47

Ձեր պատմությունը, որն այնքան էլ հայտնի չէ, որքան Դավիթի պատմությունը, անպայման կներառի Գողիաթի մեծության դժվարություններ, որոնք պետք է հաղթահարել և հնարավորություններ՝ հավատք դրսևորելու առ Տերը: Ի՞նչ է ձեզ ուսուցանում Դավիթի օրինակը ձեր պատմության դժվարություններին դիմակայելու մասին: Կարող եք նաև կարդալ նախագահ Քամիլ Ն. Ջոնսոնի «Դարձրեք Քրիստոսին ձեր կյանքի պատմության հեղինակը» ուղերձը (Liahona, նոյ. 2021, 80–82)՝ մտածելով ձեր դժվարություններից մեկի մասին: Փնտրեք հետևյալ հարցերի պատասխանները. Ինչպե՞ս է Տերը ցանկանում, որ ես տեսնեմ իմ դժվարությունները: Ինչպե՞ս է Նա օգնել ինձ անցյալում: Ինչպե՞ս կարող եմ ցույց տալ, որ վստահում եմ Նրան գրել իմ պատմությունը:

Գուցե արդեն գիտեք, որ հետագայում Դավիթի պատմության մեջ կան որոշ ողբերգական բաժիններ (տես, օրինակ՝ Բ Թագավորների 11)։ Ի՞նչ կասեիք Դավիթին, եթե Գողիաթի հետ ճակատամարտից հետո նրան որոշ խորհուրդներ տալու հնարավորություն ունենայիք։ Ինչպե՞ս կարող եք այս խորհուրդը կիրառել ձեր կյանքում:

Տես նաև «The Lord Will Deliver Me» (տեսանյութը), Gospel Library հավելվածում։

3:24

Բացի անձնական դժվարություններից, մենք նաև բախվում ենք մեծ, բարդ խնդիրների, որոնք ազդում են ամբողջ աշխարհի վրա: Երբ չար ուժերը «միասին հավաքվում են … պատերազմելու» բարի ուժերի դեմ (Ա Թագավորների 17․1), մենք կարող ենք խորհել այն բանի շուրջ, թե մեր անհատական ջանքերն ինչպես կարող են որևէ բան փոխել: Ի՞նչ գտաք Դավիթի պատմության մեջ, որը ձեզ հույս է տալիս:

Տես նաև «Տեր Աստծո գործին բոլորս մասնակցենք» օրհներգը, Հիմներ, հմր. 243:

Ա Թագավորների 18 բաժինը կարդալիս ուշադրություն դարձրեք Սավուղի և նրա որդի Հովնաթանի հակադրությանը (որը, եթե չլիներ Դավիթը, կարող էր ենթադրել, որ կլինի հաջորդ թագավորը): Սավուղն ու Հովնաթանն ինչպե՞ս արձագանքեցին Դավիթի հաջողությանը։ Ի՞նչ կարող եք սովորել այս փորձառությունից:

Ի՞նչ գտաք Հավնաթանի վերաբերմունքի և գործողությունների մեջ, որը հիշեցնում է ձեզ Հիսուս Քրիստոսի մասին:

Ա Թագավորների 24–26 գլուխներն ուսումնասիրելիս փնտրեք հպարտությանը, ներողամտությանը և ինքնատիրապետմանը վերաբերող դասեր։ Ուսումնասիրության ընթացքում կարող եք նաև կարդալ երեց Մարկ Ա. Բրեգի «Քրիստոսանման ինքնատիրապետում» ուղերձը (Լիահոնա, մայիս 2023, 60–63)։ Դավիթը, Աբիգեան և ուրիշներն ինչպե՞ս դրսևորեցին, կամ չկարողացան դրսևորել այս բաժիններում ներկայացված քրիստոսանման ինքնատիրապետումը: Ի՞նչ հնարավորություններ ունեք՝ ցուցադրելու քրիստոսանման ինքնատիրապետումը:

Քույր Քրիսթեն Յիի «Դափնեպսակ՝ մոխրի փոխարեն. Ներման բժշկող ճանապարհը» ուղերձը (Լիահոնա, նոյ. 2022, 36–39) կարող է օգնել ձեզ ուսումնասիրել Ա Թագավորների 25 գլուխը։ Ինչո՞վ է Աբիգեան նման Հիսուս Քրիստոսին:

Նույնիսկ, երբ Դավիթը հաղթեց Գողիաթին, նրա խնդիրները փղշտացիների հետ չավարտվեցին։ Բ Թագավորների 5․17–25 հատվածները կարդալիս մտածեք, թե Դավիթի օրինակն ինչպես կարող է օգնել դիմակայել դժվարություններին, որոնց բախվում եք (տես նաև Ա Թագավորների 23․2, 10–11, 30․8, Բ Թագավորների 2․1)։ Ինչպե՞ս եք օրհնվում՝ գործելով ըստ ձեր ստացած հայտնության:

Երբ Դավիթն առաջարկեց Տիրոջ համար տուն կառուցել, այսինքն՝ տաճար (տես Բ Թագավորների 7․1–3), Տերը պատասխանեց, որ այն կկառուցի Դավիթի որդին (տես հատվածներ 12–15, տես նաև Ա Մնացորդաց 17․1–15)։ Տերը նաև ասաց, որ Նա իր հերթին Դավիթի համար «տուն» կկառուցի, որը նշանակում է սերունդ, և որ նրա գահը հավերժ կմնա (տես Բ Թագավորների 7․11, 16, 25–29, Սաղմոս 89․3–4, 35–37)։ Այդ խոստումը կատարվեց Հիսուս Քրիստոսով՝ մեր Հավերժական Թագավորով, որը Դավիթի ժառանգորդն էր (տես Մատթեոս 1․1, Ղուկաս 1․32–33, Հովհաննես 18․33–37)։

• Կարող եք օգտագործել «Դավիթը և Գողիաթը» պատմությունը Հին Կտակարանի պատմություններ գրքից, 112–16, որպեսզի օգնեք ձեր երեխաներին ծանոթանալ Ա Թագավորների 17․20–54 հատվածներում նկարագրված իրադարձություններին։ Ապա նրանց հնարավորություն տվեք վերապատմել պատմությունը՝ օգտագործելով այս նյութի նկարները կամ գծապատկերները: Հարցրեք նրանց, թե ըստ իրենց, Տերը ինչ է ցանկանում, որ սովորեն այս պատմությունից:

  

  2:36

• Դուք և ձեր երեխաները կարող եք նաև գրել մի քանի դժվարություն, որոնց երեխաները կարող են հանդիպել իրենց կյանքի ընթացքում: Ապա օգնեք նրանց գտնել Դավիթի ասածները, որոնք կարող են օգնել իրենց հաղթահարել այս դժվարությունները (տես Ա Թագավորների 17․26, 32, 34–37, 45–47)։ Կիսվեք, թե Հիսուս Քրիստոսը ինչպես է օգնել ձեզ դժվարությունների ժամանակ:

• Երեխաներին առաջարկեք քայլել այնպես, կարծես իրենք Դավիթն են և պատրաստվում են կռվել Գողիաթի դեմ և երգել որևէ երգ քաջ լինելու մասին, օրինակ՝ «I Will Be Valiant» (Մանկական երգարան, 162)։

• Ինչպե՞ս կարող եք օգնել ձեր երեխաներին սովորել Հովնաթանի և Դավիթի ընկերության օրինակից։ Դա անելու եղանակներից մեկն է՝ յուրաքանչյուր երեխայի տալ թղթից պատրաստված երկու սիրտ, որոնցից մեկը կխորհդանշի Դավիթի սիրտը, մյուսը՝ Հովնաթանի: Ապա միասին կարդացեք մի քանի արտահայտություն Ա Թագավորների 18.1–4 հատվածներից, որոնք շեշտում են այն սերը, որն այդ երկու ընկերը տածում էին միմյանց հանդեպ: Այնուհետև ձեր երեխաները կարող են գրել կամ նկարել թղթե սրտերի վրա, թե ինչպես կարող են սեր ցուցաբերել ընկերոջ հանդեպ:

• Այս բաժիններում Դավիթը դարձավ Իսրայելի թագավոր։ Ձեր երեխաները կարող են խաղալ թագավորի կամ թագուհու դերերը: Ի՞նչ օրենքներ կընդունեին։ Ո՞ւմ պետք է դիմեն օգնության համար: Օգնեք ձեր երեխաներին բացահայտել, որ երբ Դավիթն օգնության կարիք ուներ, նա «հարցրեց» կամ աղոթեց պատասխաններ ստանալու համար: Օրինակ՝ Բ Թագավորների 5.19, 23 հատվածները կարդալիս երեխաներին առաջարկեք «հարցնել» բառը լսելիս ծալել իրենց բազուկները: Ինչո՞ւ էր Դավիթին անհրաժեշտ Տիրոջ օգնությունն իր նոր դերում։

• Պատմեք միմյանց այն դեպքերի մասին, երբ դուք աղոթել եք Երկնային Հորը օգնության համար: Ի՞նչ տարբերություն զգացիք, երբ խնդրեցիք Նրան օգնել ձեզ:

• Թագավորները, որոնց մասին մենք կարդում ենք Հին Կտակարանում, բոլորն էլ ունեցել են թերություններ և նրանց բոլոր թագավորություններն ավարտվել են: Բայց Հիսուս Քրիստոսը կատարյալ Թագավոր է և կթագավորի հավիտյան։ Օգնեք ձեր երեխաներին բացահայտել դա՝ միասին կարդալով այն, ինչ Նաթան մարգարեն ասել է Դավիթ թագավորին Բ Թագավորների 7․16–17 հատվածներում։ Ինչպե՞ս կարող էր Դավիթի թագավորությունը մնալ հավիտյան: Օգնեք երեխաներին գտնել և կարդալ սուրբ գրությունների այն հատվածները, որոնք ուսուցանում են, որ Հիսուս Քրիստոսը՝ Դավիթի ժառանգորդը, Թագավոր է, օրինակ՝ Ղուկաս 1.32–33, Հովհաննես 18.33–37 և Հայտնություն 19.16: Ինչո՞վ է Հիսուսը տարբերվում երկրային թագավորներից: Ինչպե՞ս ենք մենք հարգում Հիսուս Քրիստոսին՝ որպես մեր Հավերժական Թագավորի: