1 Samueri 8–10; 13; 15–16

1 Samueri 8 inotaura nezvechimwe chiitiko chaizoshandura zvachose mugumo wevaIsraeri. Kuitira kudzivirirwa kubva kuvavengi vavo, vaIsraeri vaidawo zvaiva nevavakidzani vavo—mambo aizotonga pamusoro pavo. Apo paunoverenga pamusoro pechikumbiro chavo uye mhinduro yaIshe, funga pamusoro peuyo waunotarisira ruchengeteko nenhungamiro kubva kwaari. Funga pamusoro peizvo zvazvinoreva kubvumira Ishe kuti “vatonge pamusoro [pako]” (1 Samueri 8:7).

Mumavhiki anotevera, unozoverenga pamusoro pemadzimambo ane chitsama ayo akadaidzwa kuzotungamirira Israeri. Apo paunodzidza pamusoro pavo, funga pamusoro pemibvunzo inotevera:

• Yambiro dzaIshe dzakazadzikiswa sei muna 1 Samueri 8:10–18?

• Vana vaIsraeri vakashandurwa sei nesarudzo yavo yokuva namambo wepanyika?

• Jesu Kristu akasiyana sei nemadzimambo epanyika? Funga pamusoro pokuti irunziro dzipi dzepanyika dzaungangofanira kubvisa muupenyu hwako kuti Kristu ave mambo wako?

Onawo “Rejoice, the Lord Is King!,” Hymns, nhamba. 66.

Verenga pamusoro pemasarudziro aiita Mwari madzimambo aIsraeri muna 1 Samueri 9–10 uye 16 (ona kunyanya 9:15–17; 10:1–12; 16:1–13). Tsvaga ndima dzinokubatsira kunzwisisa zvazvinoreva kuva “wakadaidzwa naMwari, kuburikidza nehuporofita” muchechi yaIshe nhasi (Misimboti yeChitendero 1:5). Ungangofunga pamusoro pokuzviisa muchinzvimbo chemutungamiri arikupa daidzo yacho (Samueri), munhu arikudaidzwa (Sauro naDavidi), uye vanhu vavari kudaidzwa kuti vashandire (vaIsraeri). Chii chaunodzidza kubva kumashoko nezviito zvavo muzvitsauko izvi?

Tichifunga nezvekutya kwairatidza Sauro muna 1 Samuel 10, zvinoshamisa kuverenga pamusoro “pokupanduka” uye “kusindimara” kwake mushure mokunge ava mambo (1 Samueri 15:23). Unofunga kuti sei izvi zvakaitika? Muna 1 Samuel 13:5–14, ndeapi mafungiro nemaitiro aunoona kuti akatungamirira kuputsika kwake?

Muna 1 Samuel 15, unozoverenga pamusoro pemurairo kubva kuna Ishe uyo Sauro waakarega kuteerera nokuda kwokuti aifunga kuti aiva nechikonzero chakanaka. Kuti udzidze kubva kusarudzo dzaSauro dzisina kunaka, tarisa ndima 22 uye utsive mashoko anoti “kuzvipira” uye “mafuta emakwayi” nezvinhu zvinoratidzika sezvakanaka asi zvisina kukosha sekunzwa nokuteerera Ishe. Wakaropafadzwa sei pawaiisa chido chaIshe pokutanga muupenyu hwako?

Wakamboita sarudzo here iri maererano “nokutarisika kwekunze” kwechimwe chinhu kana mumwe munhu, wozoona mumashure kuti wakanga wakanganisa? Pamwe wakadya chimwe chinhu chaiva chisinganaki semaratidzikiro achaiita. Kana kuti zvimwe wakatonga mumwe munhu zvisina kunaka.

Apo Samueri paaitsvaga mambo mutsva weIsraeri, Ishe vakamudzidzisa nzira irinani. Verenga nezvayo muna 1 Samueri 16:6–7, uye funga pamusoro pokuita mudorongodzwa wenzira idzo vanhu dzavanotonga vamwe nadzo “nokuratidzika kwekunze.” ­Unokwanisa kuwana mimwe mienzaniso kubva mushoko raGosa Christophe G. Giraud-Carrier “We Are His Children” (Liahona, Mbudzi. 2023, 114–16). Zvinorevei kutarisa “pamwoyo,” sezvinoita Ishe? (1 Samueri 16:7). Unokwanisa kuwana mienzaniso yeizviwo, mushoko raGosa Giraud-Carrier. Pamwe unokwanisa kufunga nezve dzimwe nguva apo Muponesi paakatarisa zvinopfuura kuratidzika kwekunze kwemunhu. (Ona, somuenzaniso, Marko 12:41–44; Ruka 5:1–11; 19:1–9; Johane 4:5–30; Mosesi 6:31–36.) Chii chaunodzidza kubva pamienzaniso iyi?

Ungatevera sei muenzaniso weMuponesi wenzira yaunoona nayo vamwe—uye yaunozviona nayo iwe pachako. Kuita izvi kungashandura sei ufambidzani hwako nevamwe? Funga nezvekutaurira mumwe munhu pamusoro pekunaka kwaunoona mumwoyo wavo.

­Onawo Ulisses Soares, “Brothers and Sisters in Christ,” Liahona, Mbudzi. 2023, 70–73.

• Paunoverenga 1 Samueri 8 nevana vako, vabatsire kuwana zvikonzero izvo Samueri zvaakaudza vaIsraeri kuti kuva namambo raiva zano rakaipa. Sei zvirinani kuva naJesu Kristu saMambo wedu? Pamwe munokwanisa kugadzira korona yebepa pamwechete moita mijana yekuipfeka uye nokugovera chimwe chinhu chatingaita kuratidza kuti tinoda kuti Jesu ave Mambo wedu. Onawo Jeremia 23:5; Dzidziso neZvibvumirano 45:59.)

• Rondedzero dzaMwari vachisarudza Sauro naDavidi kuti vave madzimambo dzinokwanisa kubatsira vana vako kunzwisisa kuti vanhu vanodanwa sei kuti vashandire muChechi nhasi kuburikidza nezvakazarurwa. Kuti uvadzidzise nyaya idzi, unokwanisa kunyora pasi zviitiko kubva munyaya idzi pazvidimbu zvidiki zvemapepa, uye vana vako vanokwanisa kuzviisa munhevedzano kwayo apo pamunoverenga ndima dzemagwaro matsvene pamwechete (onawo “Davidi Mudiki” muNyaya dzeTestamente Yekare, 110–11). Zvino munokwanisa kutaura pamusoro penguva idzo Mwari dzavakakuropafadzai nesimba rezvepamweya kuti muzadzikise basa kana daidzo (ona 1 Samueri 10:9–10).

  

  1:16

• Iyi ingangova nguva yakanaka yokudzidzisa vana vako musimboti wechitendero wechishanu. Vaudze kuti wakagamuchira sei daidzo yako muchechi. Unoziva sei kuti wakadaidzwa naMwari?

• Chidzidzo nezvinhu zvinobatwa chinokwanisa kubatsira vana vako kunzwisisa musimboti uri muna 1 Samueri 16:7. Somuenzaniso, unokwanisa kuvaratidza chokudya kana bhuku rine chiputiriso kana chifukidzo chisingaenderane neizvo chazvo zviri mukati. ­Chii icho 1 Samueri 16:7 uye chidzidzo chezvinhu zvinobatwa ichi chazvinoratidza pamusoro pemaonero atinofanira kuzviita isu nevamwe vanhu? Imbai rumbo rwunosimbisa musimboti uyu, sezvakaita rwokuti “Love One Another” (Children’s Songbook, 136).

  Shandisa zvidzidzo zvinoshandisa zvinhu zvinobatwa. Apo vana vako pavanenge vaine chimwe chinhu chokuona uye kubata chinoenderana nemusimboti wevhangeri, kazhinji kacho vanozogona kuurangarira. Somuenzaniso, apo paunoverenga 1 Samueri 16:7 navo, unokwanisa kuita kuti vakubatsire kuwana mienzaniso yezvinyengeri zvemeso kuratidza kuti tinofanira kuedza kuona semaonero anoita Ishe—nokutarisa “pamwoyo”—pane kuita mitongo iri maererano “nemaratidzikiro ekunze.”

• Iwe nevana vako munokwanisa kugoverana zviitiko umo mamakadzidza kuti sei muchifanira “kutarisa pamwoyo,” kwete chete “maratidzikiro ekunze” (ndima 7). Mungangotorawo mijana yokutaurirana pamusoro pehunhu hwakanaka hwamunoona mumwoyo wemumwe nemumwe wenyu.