1 Hāmuera 8–10; 13; 15–16

Ka kōrero a 1 Hāmuera 8 e pā ana ki tētahi heipūtanga mā konā rerekē katoa te huarahi o ngā Iharaira mō āke tonu atu. I te hiahia ngā Iharaira ki tētahi mea pērā i ngā iwi noho tata hei tiaki i a rātou i ō rātou hoariri—arā, he kīngi mō rātou. I a koe e pānui ana mō tā rātou tono me te whakautu a te Ariki, kia huri ō whakaaro ki te tangata e whakamarumaru i a koe, ā, e ārahina hoki koe e ia. Kia huri ō whakaaro ki te tikanga o te kōrero kia tukuna te Ariki hei “kīngi mōu” (1 Hāmuera 8:7).

Hei ngā wiki e kainamu mai nei, ka pānui koe mō ngā kīngi i karangatia ai hei arataki i a Iharaira. I a koe e ako ana e pā ana ki a rātou, kia aro ki ēnei momo pātai:

• I pēhea ngā whakatūpato a te Ariki i whakatutukihia ai i 1 Hāmuera 8:10–18?

• He aha ngā āhuatanga i pā ai ki ngā tamariki a Iharaira he mea nā tā rātou kōwhiri i tētahi kīngi o te whenua?

• He aha ngā rerekē o Ihu Karaiti i ngā kīngi o te whenua? Kia huri ō whakaaro ki ngā āhuatanga o te ao e tika ana kia whakakorea atu i tō oranga kia tukuna ai te Karaiti hei Kīngi mōu.

Tirohia anōtia “Rejoice, the Lord Is King!,” Hymns, no. 66.

Pānuitia e pā ana ki tā te Atua kōwhiri i ngā kīngi o Iharaira i 1 Hāmuera 9–10 me 16 (tirohia rawatia 9:15–17; 10:1–12; 16:1–13). Rapua ngā rerenga whiti e āwhina ana kia mārama ai koe ki te kōrero “kia karangatia e te Atua i runga i te poropititanga” i roto i te hāhi o te Ariki i ēnei rā (Tikanga Whakapono 1:5). Me whakaaro koe anō nei ko te rangatira koe e tukuna atu ana te tono (Hāmuera), te tangata e karangatia ana (Haora rāua ko Rāwiri), me te iwi kua karangatia koe hei āwhina (ngā Iharaira). He aha ngā akoranga māu i ā rātou kupu me ā rātou mahinga i roto i ēnei upoko?

He āhua ohorere te kite atu i te whakamā o Haora i 1 Hāmuera 10, kātahi ka kite atu i tana “haututūtanga” me tōna “taikaha” whai muri i tana tū hei kīngi (1 Hāmuera 15:23). He aha i pēnei ai? I 1 Hāmuera 13:5–14, he aha ngā whakaaro me ngā whanonga e kite a nei e nā konā puta mai tana takanga?

I 1 Hāmuera 15, ka pānui koe e pā ana ki tētahi whakahaunga nā te Ariki kīhai a Haora i pūmau nā te mea ki ōna whakaaro kua whai take ia kia pērā. Tirohia te whiti 22 kia ako koe e pā ana ki ngā kōwhiringa koretake a Haora kātahi ka whakaurua iho ētahi atu kupu mō ngā mea pai ake ki te wāhi kei reira ngā kupu “whakahere” me te “mea mōmona o ngā tāriana hipi”, ko ngā mea pai engari kāore e pai ake ana i te whakarongo me te ngohengohe ki te Ariki. He aha ō manaakitanga i a koe e whakamātāmua ana i tā te Ariki e pai ai i tō oranga?

Kua kōwhiria e koe tētahi kōwhiringa nā tōna “āhua” anake o tētahi mea, o tētahi tangata rānei, kātahi ka kite kua hē koe? Tērā pea kua kai koe i tētahi mea kāore i pērā rawa te reka ki tāu i manako ai. Tērā pea kua whakawākia kinotia tētahi e koe.

I a Hāmuera e kimi ana i tētahi kīngi hou mō Iharaira, i whakaako te Ariki ki a ia tētahi huarahi pai ake. Pānuitia mō tērā i 1 Hāmuera 16:6–7, kātahi ka āta whakarite i tētahi rārangi mō ngā āhuatanga e whakawā nei ngā tāngata i ētahi atu he mea nā tōna “āhua.” Ka kitea ētahi whakautu i roto i tā Erata Christophe G. Giraud–Carrier karere “We Are His Children” (Liahona, Noema 2023, 114–16). He aha te tikanga o te kōrero kia titiro “ki te ngākau,” pērā i tā te Ariki? (1 Hāmuera 16:7). Ka kite koe i ētahi tauira mō tēnei āhuatanga anō hoki i tā Erata Giraud–Carrier karere. Tērā pea ka taea te rapu whakaaro e pā ana ki ētahi atu wā i titiro ai te Kaiwhakaora ki tua atu i te āhua o tētahi tangata. (Hei tauira, tirohia, Maka 12:41–44; Ruka 5:1–11; 19:1–9; Hoani 4:5–30; Mohi 6:31–36.) He aha ngā akoranga māu i ēnei kōrero?

He aha tāu hei whai atu i te tauira i whakatauirahia ai e te Kaiwhakaora i tō titiro ki ētahi atu—ki a koe anō? He aha ngā hua i tēnei mahi i roto i ō whakawhitinga kōrero ki ētahi atu? Me kōrero atu koe ki tētahi atu e pā ana ki te pai e kite nei koe i roto i tōna ngākau.

Tirohia anōtia tā Ulisses Soares, “Brothers and Sisters in Christ,” Liahona, Noema 2023, 70–73.

• I a koe e pānui tahi ana i 1 Hāmuera 8 me ō tamariki, āwhinatia rātou kia rapua ngā take i kī ake ai a Hāmuera ki ngā Iharaira he whakaaro kino te whai kīngi. He aha te take e pai ake ai kia tū ai a Ihu Karaiti hei kīngi mō tātou? Tērā pea me hanga i tētahi karauna pepa kātahi ka tukutuku huri noa kia mau ai tēnā me tēnā me te kōrero mai i tētahi mea e whakaatu ai tātou kei te hiahia kia tū a Ihu hei kīngi mō tātou. (Tirohia anōtia Heremaia 23:5; Whakaakoranga me ngā Kawenata 45:59.)

• He āwhina ngā kōrero mō Haora rāua ko Rāwiri e karangatia ana hei kīngi ki ō tamariki kia mārama ai rātou ki te āhua e karangatia ai ki te mahi i roto i te hāhi i tēnei rā, arā, he mea nā te whakakitenga. Kia whakaakona ēnei kōrero ki a rātou, me tuhituhi iho ngā āhuatanga mai i ēnei kōrero ki runga i ngā pepa iti, kātahi ka āta whakaraupapa ō tamariki i aua āhuatanga i a koutou e pānui ana i ngā rerenga whiti (tirohia anōtia “Young David” i Old Testament Stories, 110–11). Kātahi ka taea te kōrero mō ngā wā i manaakitia koe e te Atua kia whai mana ā–wairua koe ki te whakatutuki i tētahi mahi, i tētahi karangatanga rānei (tirohia 1 Hāmuera 10:9–10).

  

  1:16

• He wā pai tēnei ki te whakaako i ō tamariki te tikanga whakapono tuarima. Whāki atu ki a rātou e pā ana ki te āhua i whiwhi ai koe i tō karangatanga tapu i te Hāhi. Me pēhea koe e mōhio ai mehemea kua karangatia koe e te Atua?

• Mā tētahi akoranga ā–ringa e āwhina ai i ō tamariki kia mārama ki te tikanga i 1 Hāmuera 16:7. Hei tauira, me whakaatu atu ki a rātou ētahi kai, tētahi pukapuka rānei me tōna uhi kāore e hāngai ana ki te mea o roto. He aha tā 1 Hāmuera 16:7 me tēnei akoranga ā–ringa e kōrero nei mō te āhua e titiro ai tātou ki a tātou anō me ērā atu tāngata? Waiatahia tētahi waiata mō tēnei tikanga, pērā i “Love One Another” (Children’s Songbook, 136).

  Meatia ngā akoranga ā–ringa. Mehemea ka taea e tētahi te titiro atu, te whakapā atu rānei i tētahi mea e whai pānga ana ki te akoranga, ka maumaharatia nuitia taua akoranga. Hei tauira, i a koutou e pānui ana i 1 Hāmuera 16:7 , tukuna rātou kia rapua ngā tauira mō ngā “optical illusions” hei whakaako atu me ngana tātou kia ōrite tā tātou kite ki tā te Ariki—nā te titiro “ki te ngākau”—kaua nā ngā whakawā e ahu mai ana ki tōna “āhua.”

• Me kōrero tahi koutou ko ō tamariki e pā ana ki ngā āhuatanga i pai ai ki a koe nā konā ākona koe me aha koe e “titiro ki te ngākau,” kaua noa ki tōna “āhua” (whiti 7). Me tuku mā tēnā, mā tēnā kia kōrero atu ki tēnā, ki tēnā e pā ana ki ngā āhuatanga pai e kitea ana i roto i ō rātou ngākau.