« ថ្ងៃទី៨–១៤ ខែមិថុនា ‹ ព្រះយេហូវ៉ាទ្រង់ទតចំពោះក្នុងចិត្តវិញ » ៖ សាំយ៉ូអែល ទី១ ៨–១០; ១៣; ១៥–១៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី៨–១៤ ខែមិថុនា ‹ ព្រះយេហូវ៉ាទ្រង់ទតចំពោះក្នុងចិត្តវិញ › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦
Beside Still Waters [ នៅក្បែរទឹកដែលមិនហូរ ] ដោយ ស៊ីម៉ូន ឌីវី
ថ្ងៃទី៨–១៤ ខែមិថុនា ៖ « ព្រះយេហូវ៉ាទ្រង់ទតចំពោះក្នុងចិត្តវិញ »
សាំយូអែល ទី១ ៨–១០; ១៣; ១៥–១៦
សូលជាអ្នកគង្វាលសត្វលា ។ ទោះជាគាត់មានរាងខ្ពស់សង្ហាក្តី គាត់ « នៅថោកទាបដល់ព្រះនេត្រ [ របស់គាត់ ] » និងខ្វល់ខ្វាយអំពីមរតកគ្រួសាររបស់គាត់ ( សូមមើល សាំយូអែល ទី១ ៩:២–៣, ២១; ១៥:១៧ ) ។ នៅថ្ងៃដែលគាត់ត្រូវបង្ហាញខ្លួននៅចំពោះមុខអ៊ីស្រាអែលជាស្ដេចរបស់ពួកគេ គាត់មិនបានបង្ហាញខ្លួនឡើយ គាត់ភ័យខ្លាំងណាស់ « កំពុងតែពួន » ( សាំយូអែល ទី១ ១០:២១–២ ) ។ ក្រឡេកមើលទៅសូល បងបង្អូនប្រហែលជាមិននឹកស្មានថា គាត់នឹងដឹកនាំពួកសាសន៍អ៊ីស្រាអែលឲ្យឈ្នះលើសត្រូវរបស់ពួកគេបានទេ ឬក៏នឹកថាក្រោយមកគាត់ប្រែជាឆ្មើងឆ្មៃ ហើយបះបោរប្រឆាំងនឹងព្រះអម្ចាស់ឡើយ ។
ដាវីឌគឺជាអ្នកគង្វាលចៀម ។ គាត់មិនសូវមានកាយសម្បទាគួរឲ្យចាប់អារម្មណ៍ដូចជាបងៗប្រាំពីរនាក់ទៀតរបស់គាត់ទេ ។ នៅថ្ងៃដែលសាំយូអែលបានមកជ្រើសរើសស្ដេចថ្មីសម្រាប់អ៊ីស្រាអែល វាហាក់ដូចជាមិនសមនឹងបញ្ចូលដាវីឌនៅក្នុងចំណោមបេក្ខភាពដែលមាននោះទេ ដូច្នេះគាត់ត្រូវបានទុកចោលឲ្យនៅទីវាលជាមួយហ្វូងចៀម ។ ក្រឡេកមើលទៅដាវីឌ បងប្អូនប្រហែលជាមិននឹកស្មានថា គាត់នឹងមានជំនឿ និងភាពក្លាហានដើម្បីកម្ចាត់មនុស្សមាឌធំ ហើយធ្វើជាស្តេចដ៏ជោគជ័យបំផុតរបស់អ៊ីស្រាអែលឡើយ ។
ប៉ុន្តែ ព្រះអម្ចាស់ទតឃើញហួសពីស្លាករបស់យើង រូបរាងរបស់យើង ភាពទន់ខ្សោយរបស់យើង ។ ផ្ទុយទៅវិញ ទ្រង់ទត « ក្នុងចិត្តវិញ » ( សាំយូអែល ទី១ ១៦:៧ ) ។ ហើយសូម្បីតែនៅពេលដែលដួងចិត្តរបស់យើងមិនត្រឹមត្រូវក៏ដោយ បើយើងមានឆន្ទៈ ទ្រង់នឹងប្រទានឲ្យយើង « បំផ្លាស់បំប្រែចិត្ត » ( សាំយូអែល ទី១ ១០:៩ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
សាំយូអែល ទី១ ៨
ព្រះយេស៊ូវគ្រីស្ទគឺជាស្តេចរបស់ខ្ញុំ ។
សាំយូអែល ទី១ ៨ ប្រាប់អំពីព្រឹត្តិការណ៍ដែលនឹងផ្លាស់ប្តូរជោគវាសនារបស់ពួកសាសន៍អ៊ីស្រាអែលជារៀងរហូត ។ សម្រាប់ការការពារប្រឆាំងនឹងសត្រូវរបស់ពួកគេ ពួកសាសន៍អ៊ីស្រាអែលចង់បានអ្វីដែលអ្នកជិតខាងរបស់ពួកគេមាន—ពោលគឺជាស្តេចដើម្បីគ្រប់គ្រងពួកគេ ។ នៅពេលបងប្អូនអានអំពីសំណើរបស់ពួកគេ និងការឆ្លើយតបរបស់ព្រះអម្ចាស់ សូមគិតអំពីអ្នកដែលបងប្អូនស្វែងរកដើម្បីទទួលបានសុវត្ថិភាព និងការណែនាំ ។ សូមពិចារណាអំពីអត្ថន័យនៃការអនុញ្ញាតឲ្យព្រះអម្ចាស់ « ធ្វើជាស្តេចលើ [ បងប្អូន ] ទៀត » ( សាំយូអែល ទី១ ៨:៧ ) ។
នៅប៉ុន្មានសប្តាហ៍ខាងមុខនេះ បងប្អូននឹងអានអំពីស្តេចមួយចំនួនដែលត្រូវបានហៅឲ្យដឹកនាំអ៊ីស្រាអែល ។ នៅពេលបងប្អូនរៀនអំពីពួកទ្រង់ សូមពិចារណាសំណួរដូចខាងក្រោម ៖
-
តើការព្រមានរបស់ព្រះអម្ចាស់ត្រូវបានបំពេញដោយរបៀបណានៅក្នុង សាំយូអែល ទី១ ៨:១០–១៨ ?
-
តើកូនចៅអ៊ីស្រាអែលទទួលរងឥទ្ធិពលយ៉ាងណាចំពោះការជ្រើសរើសរបស់ពួកគេក្នុងការមានស្តេចខាងផែនដី ?
-
តើព្រះយេស៊ូវគ្រីស្ទខុសពីស្ដេចខាងផែនដីដោយរបៀបណា ? សូមពិចារណាអំពីឥទ្ធិពលខាងលោកិយ ដែលបងប្អូនប្រហែលជាត្រូវដកចេញពីជីវិតរបស់បងប្អូន ដើម្បីអនុញ្ញាតឲ្យព្រះគ្រីស្ទជាស្តេចរបស់បងប្អូន ។
សូមមើលផងដែរនូវបទ ៖ « រីករាយដ្បិតទ្រង់ជាស្ដេច ! » ទំនុកតម្កើង ល.រ. ២៥ ។
សាំយូអែល ទី១ ៩–១០; ១៦:១–១៣
ព្រះបានហៅមនុស្សតាមរយៈការព្យាករដើម្បីបម្រើនៅក្នុងព្រះនគររបស់ទ្រង់ ។
សូមអានអំពីរបៀបដែលព្រះជ្រើសរើសស្ដេចរបស់អ៊ីស្រាអែល សាំយូអែល ទី១ ៩–១០ និង ១៦ ( សូមមើលជាពិសេស ៩:១៥–១៧; ១០:១–១២; ១៦:១–១៣ ) ។ សូមរកមើលអត្ថបទដែលជួយបងប្អូនឲ្យយល់ថា តើវាមានអត្ថន័យយ៉ាងណាដើម្បី « ហៅពីព្រះដោយការព្យាករណ៍ » នៅក្នុងសាសនាចក្រសព្វថ្ងៃនេះ ( មាត្រានៃសេចក្តីជំនឿ ១:៥ ) ។ បងប្អូនអាចពិចារណាដាក់ខ្លួនបងប្អូននៅកន្លែងអ្នកដឹកនាំដែលបានផ្ដល់ឲ្យនូវការហៅ ( សាំយូអែល ) បុគ្គលដែលត្រូវបានហៅ ( សូល និងដាវីឌ ) និងមនុស្សដែលពួកគាត់ត្រូវបានហៅឲ្យបម្រើ ( ពួកសាសន៍អ៊ីស្រាអែល ) ។ តើបងប្អូនបានរៀនអ្វីខ្លះមកពីពាក្យសម្ដី និងសកម្មភាពរបស់ពួកគេនៅក្នុងជំពូកទាំងនេះ ?
រូបភាពសាំយូអែលចាក់ប្រេងតែងតាំងសូល ដោយ ភី មេន © Lifeway Collection/បានទទួលអាជ្ញាប័ណ្ណពី goodsalt.com
សាំយូអែល ទី១ ១៣:៥–១៤; ១៥
« ដែលស្តាប់បង្គាប់ នោះវិសេសលើសជាងយញ្ញបូជា » ។
សូមពិចារណាពីរបៀបដែលសូលមើលទៅគួរឲ្យខ្លាចនៅក្នុង សាំយូអែល ទី១ ១០ វាគួរឲ្យភ្ញាក់ផ្អើលដើម្បីអានអំពី « សេចក្តីរឹងទទឹង » និង « សេចក្តីចចេស » បន្ទាប់ពីបានធ្វើជាស្តេច ( សាំយូអែល ទី១ ១៥:២៣ ) ។ តើបងប្អូនគិតថា ហេតុអ្វីវាកើតឡើង ? នៅក្នុង សាំយូអែល ទី១ ១៣:៥–១៤ តើបងប្អូនមើលឃើញអាកប្បកិរិយា និងឥរិយាបថបែបណា ដែលនាំឲ្យគាត់ធ្លាក់ចុះ ?
នៅក្នុង សាំយូអែល ទី១ ១៥ បងប្អូននឹងអានអំពីបញ្ញត្តិមួយពីព្រះអម្ចាស់ដែលសូលមិនបានស្តាប់តាម ដោយសារគាត់គិតថា គាត់មានហេតុផលត្រឹមត្រូវ ។ ដើម្បីរៀនអំពីការជ្រើសរើសអន់ខ្សោយរបស់សូល សូមមើលនៅឯ ខទី ២២ ហើយប្តូរពាក្យ « យញ្ញបូជា » និង « ខ្លាញ់នៃចៀម » ជាមួយនឹងអ្វីៗដែលហាក់ដូចជាល្អ ប៉ុន្តែមិនសំខាន់ដូចជាការស្ដាប់ និងការគោរពតាមព្រះអម្ចាស់ ។ តើបងប្អូនបានទទួលពរដោយរបៀបណា នៅពេលបងប្អូនបានដាក់ឆន្ទៈរបស់ព្រះអម្ចាស់ជាអាទិភាពក្នុងជីវិតរបស់បងប្អូន ?
សាំយូអែល ទី១ ១៦:៦–១២
« ព្រះយេហូវ៉ាទ្រង់ទតចំពោះក្នុងចិត្តវិញ » ។
តើបងប្អូនធ្លាប់ធ្វើការសម្រេចចិត្តដោយផ្អែកលើ « ឫកពាខាងក្រៅ » នៃអ្វីមួយ ឬនរណាម្នាក់ ហើយក្រោយមកដឹងថាបងប្អូនខុសដែរឬទេ ? ប្រហែលជាបងប្អូនបានបរិភោគរបស់ដែលមិនឆ្ងាញ់ដូចដែលរូបរាងខាងក្រៅបង្ហាញ ។ ឬប្រហែលជាបងប្អូនវិនិច្ឆ័យនរណាម្នាក់ដោយអយុត្តិធម៌ ។
នៅពេលដែលសាំយូអែលកំពុងស្វែងរកស្ដេចថ្មីនៃអ៊ីស្រាអែល ព្រះអម្ចាស់បានបង្រៀនគាត់នូវរបៀបដ៏ល្អប្រសើរ ។ សូមអានអំពីរឿងនេះនៅក្នុង សាំយូអែល ទី១ ១៦:៦–៧ ហើយពិចារណាបង្កើតបញ្ជីនូវរបៀបទាំងឡាយដែលមនុស្សវិនិច្ឆ័យអ្នកដទៃ « តែឫកពាខាងក្រៅ » ។ បងប្អូនអាចស្វែងរកឧទាហរណ៍មួយចំនួននៅក្នុងសារលិខិតរបស់អែលឌើរ គ្រីស្តូហ្វី ជី ជីរ៉ត-ខារៀ « យើងជាបុត្រាបុត្រីទ្រង់ » ( លីអាហូណា ខែវិច្ឆិកា ឆ្នាំ២០២៣ ទំព័រ ១១៤–១១៦ ) ។ តើការមើល « ក្នុងចិត្ត » ដូចជាព្រះអម្ចាស់បានទតឃើញ មានន័យដូចម្តេច ? ( សាំយូអែល ទី១ ១៦:៧ ) ។ បងប្អូនក៏អាចរកឃើញឧទាហរណ៍នៃការណ៍នេះដែរនៅក្នុងសារលិខិតរបស់អែលឌើរជីរ៉ត-ខារៀ ។ ប្រហែលជាបងប្អូនអាចគិតអំពីពេលផ្សេងទៀត នៅពេលដែលព្រះអង្គសង្គ្រោះបានទតហួសពីរូបរាងខាងក្រៅរបស់មនុស្ស ។ ( សូមមើលជាឧទាហរណ៍ ម៉ាកុស ១២:៤១–៤៤; លូកា ៥:១–១១; ១៩:១–៩; យ៉ូហាន ៤:៥–៣០; ម៉ូសេ ៦:៣១–៣៦ ) ។ តើបងប្អូនរៀនអ្វីខ្លះពីគំរូទាំងនេះ ?
តើបងប្អូនអាចធ្វើតាមគំរូរបស់ព្រះអង្គសង្គ្រោះតាមរបៀបដែលបងប្អូនមើលឃើញអ្នកដទៃ—និងខ្លួនបងប្អូនផ្ទាល់ដោយរបៀបណា ? តើការធ្វើបែបនោះអាចជះឥទ្ធិពលយ៉ាងដូចម្តេចចំពោះការប្រាស្រ័យទាក់ទងរបស់បងប្អូនជាមួយអ្នកដទៃ ? សូមពិចារណាប្រាប់នរណាម្នាក់អំពីភាពល្អដែលបងប្អូនមើលឃើញនៅក្នុងចិត្តរបស់ពួកគេ ។
សូមមើលផងដែរ អូលីសេស សូរ៉េស « បងប្អូនប្រុសស្រីនៅក្នុងព្រះគ្រីស្ទ » លីអាហូណា ខែវិច្ឆិកា ឆ្នាំ២០២៣ ទំព័រ ៧០–៧៣ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
សាំយូអែល ទី១ ៨
ព្រះយេស៊ូវគ្រីស្ទគឺជាស្តេចរបស់ខ្ញុំ ។
-
នៅពេលបងប្អូនអាន សាំយូអែល ទី១ ៨ ជាមួយកូនៗបងប្អូន សូមជួយពួកគេស្វែងរកមូលហេតុដែលសាំយូអែលបានប្រាប់ពួកសាសន៍អ៊ីស្រាអែលថា ការមានស្តេចគឺជាគំនិតមិនល្អទេ ។ តើហេតុអ្វីវាប្រសើរជាងដើម្បីមានព្រះយេស៊ូវគ្រីស្ទជាស្តេចរបស់យើង ? ប្រហែលជាបងប្អូនអាចធ្វើមកុដក្រដាសជាមួយគ្នា ហើយប្តូរវេនគ្នាពាក់វា ហើយចែកចាយអ្វីមួយដែលយើងអាចធ្វើ ដើម្បីបង្ហាញថាយើងចង់ឲ្យព្រះយេស៊ូវធ្វើជាស្តេចរបស់យើង ។ ( សូមមើលផងដែរ យេរេមា ២៣:៥; គោលលទ្ធិ និងសេចក្តីសញ្ញា ៤៥:៥៩ ) ។
សាំយូអែល ទី១ ៨:៦; ៩:១៥–១៧; ១០:១–២៤; ១៦:១–១៣
មនុស្សដែលបម្រើនៅក្នុងសាសនាចក្រគឺត្រូវបានហៅដោយព្រះ ។
-
ដំណើររឿងទាំងឡាយអំពីព្រះជ្រើសរើសសូល និងដាវីឌឲ្យធ្វើជាស្តេច អាចជួយឲ្យកូនៗបងប្អូនយល់ពីរបៀបដែលមនុស្សត្រូវបានហៅឲ្យបម្រើនៅក្នុងសាសនាចក្រសព្វថ្ងៃនេះដោយវិវរណៈ ។ ដើម្បីបង្រៀនពួកគេនូវដំណើររឿងទាំងនេះ នោះបងប្អូនអាចសរសេរព្រឹត្តិការណ៍ចេញពីដំណើររឿងទាំងនេះនៅលើក្រដាស ហើយកូនៗបងប្អូនអាចដាក់វាតាមលំដាប់លំដោយត្រឹមត្រូវនៅពេលបងប្អូនអានវគ្គបទគម្ពីរជាមួយគ្នា ( សូមមើលផងដែរ « កំលោះដាវីឌ » នៅក្នុង ដំណើររឿងព្រះគម្ពីរសញ្ញាចាស់ ទំព័រ ១១០–១១១ ) ។ បន្ទាប់មក បងប្អូនអាចនិយាយអំពីគ្រាដែលព្រះបានប្រទានពរដល់បងប្អូនដោយនូវអំណាចខាងវិញ្ញាណដើម្បីបំពេញការចាត់តាំង ឬការហៅ ( សូមមើល សាំយូអែល ទី១ ១០:៩–១០ ) ។
1:16Young David
-
ការណ៍នេះក៏អាចជាពេលវេលាដ៏ល្អមួយដើម្បីបង្រៀនកូនៗបងប្អូនផងដែរនូវ មាត្រានៃសេចក្តីជំនឿទីប្រាំ ។ សូមប្រាប់ពួកគេពីរបៀបដែលបងប្អូនបានទទួលការហៅរបស់បងប្អូននៅក្នុងសាសនាចក្រ ។ តើបងប្អូនដឹងយ៉ាងដូចម្តេចថា បងប្អូនត្រូវបានហៅដោយព្រះ ?
The Prophet Samuel Anoints David to Be King of Israel in Bethlehem [ ព្យាការីសាំយូអែលតែងតាំងដាវីឌឲ្យធ្វើជាស្ដេចអ៊ីស្រាអែលនៅបេថ្លេហិម ] ដោយ បាលេហ្គ បាលូហ្គ
សាំយូអែល ទី១ ១៦:១–១៣
ព្រះអម្ចាស់ទតមើលពីក្នុងចិត្ត ។
-
មេរៀនដោយប្រើវត្ថុមួយអាចជួយកូនៗបងប្អូនឲ្យយល់ពីគោលការណ៍នៅក្នុង សាំយូអែល ទី១ ១៦:៧ ។ ឧទាហរណ៍ បងប្អូនអាចបង្ហាញពួកគេនូវអាហារ ឬសៀវភៅ មួយក្បាលដែលមានក្រដាសរុំ ឬគម្របបិទជិតដែលមិនត្រូវនឹងខ្លឹមសារពិតរបស់វា ។ តើ សាំយូអែល ទី១ ១៦:៧ និងមេរៀនដែលប្រើវត្ថុនេះណែនាំអំពីរបៀបដែលយើងគួរមានទស្សនៈចំពោះខ្លួនឯង និងមនុស្សដទៃទៀតយ៉ាងដូចម្តេច ? សូមច្រៀងចម្រៀងដែលបញ្ជាក់ពីគោលការណ៍នេះ ដូចជាបទ « ចូរអ្នកស្រឡាញ់គ្នា » ( សៀវភៅចម្រៀងកុមារ លេខ ៧៤ ) ។
សូមបង្រៀនមេរៀនដោយប្រើវត្ថុ ។ នៅពេលកូនៗបងប្អូនមានអ្វីមួយដែលអាចមើលឃើញ និងប៉ះទាក់ទងនឹងគោលការណ៍នៃដំណឹងល្អ នោះពួកគេទំនងជាចងចាំវាច្រើនជាង ។ ឧទាហរណ៍ នៅពេលបងប្អូនអាន សាំយូអែល ទី១ ១៦:៧ ជាមួយពួកគេ នោះបងប្អូនអាចជួយពួកគេស្វែងរកឧទាហរណ៍ដែលបំភាន់ភ្នែកដើម្បីបង្ហាញទស្សនៈថា យើងគួរតែព្យាយាមមើល ដូចជាព្រះអម្ចាស់បានទត—ដោយការមើល « ក្នុងចិត្តវិញ »—ជាជាងការវិនិ្ឆច្ឆ័យដោយផ្អែកលើ « ឫកពាខាងក្រៅ » ។
-
បងប្អូន និងកូនៗបងប្អូនអាចចែកចាយបទពិសោធន៍ដែលបងប្អូនបានរៀនពីមូលហេតុ ដែលបងប្អូនគួរ « មើលចំពោះក្នុងចិត្ត » មិនមែនមើលតែ « ឫកពាខាងក្រៅ » នោះទេ ( ខទី ៧ ) ។ បងប្អូនក៏អាចប្តូរវេនប្រាប់គ្នាអំពីលក្ខណសម្បត្តិដែលបងប្អូនមើលឃើញនៅក្នុងចិត្តរបស់គ្នាទៅវិញទៅមក ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។