“Ayɛwohomumɔ 1–7. ‘M’akoma di ahurisie wɔ Awurade mu’: Rut; 1 Samuel 1–7,” Bra, Di M’akyi—De ma Efie ne Asɔre: Apam Dada 2026 (2026)
“Ayɛwohomumɔ 1–7. ‘M’akoma di ahurisie wɔ Awurade mu,’” Bra, Di M’akyi: Apam Dada 2026
Whither Thou Goest, ɛfiri Sandy Freckleton Gagon hɔ
Ayɛwohomumɔ 1–7: “M’akoma di ahurisie wɔ Awurade mu”
Ruth; 1 Samuel 1–7
Ɛtɔ da a yɛsusu sɛ ɛwɔ sɛ yɛn abrabɔ fa kwan a ɛmu da hɔ so firi ahyɛaseɛ kɔsi awieeɛ. Deɛ ɛhia ara ne sɛ, kwan tiawa pa ara a ɛda ɛpɔ mmienu ntam no yɛ tee. Nanso akyire ka ne amaneamaneɛ a ɛde yɛn fa baabi a ani nna taa hyɛ abrabɔ mu ma.
Na Rut ne Hana te yei ase yie. Na Rut nyɛ Israelni, nanso ɔwaree bi, na berɛ a ne kunu wuuiɛ no, na ɔbɛtumi ayi deɛ ɔpɛ. So na ɔbɛsan akɔ n’abusua ne n’asetena dada a ɔnim no mu, anaa ɔbɛgye Israelfoɔ gyidie ne fie foforɔ no atom na ɔne n’ase atena? (hwɛ Rut 1:4–18). Na Hana nhyehyɛeɛ wɔ n’abrabɔ mu ne sɛ ɔbɛwo mma, nanso wantumi, na ɛno maa “ne kra werɛ hoeɛ” (hwɛ 1 Samuel 1:1–10). Berɛ a wokenkan Rut ne Hana ho asɛm no, dwene gyidie a na wɔbɛwɔ sɛ wɔbɛtwa akwan a na wɔnsusuiɛ no ho. Afei dwene w’ankasa akwantuo ho. Ɛyɛ sononko firi Rut ne Hana deɛ—ne obi foforɔ biara deɛ ho. Nanso wɔ nsɔhwɛ ne ahodwirideɛ ahodoɔ a ɛda ɛha ne w’akwantuo awieeɛ korakora ntam no, wobɛtumi asua na wo ne Hana aka sɛ, “M’akoma di ahurisie wɔ Awurade mu” (1 Samuel 2:1).
San hwɛ Twerɛ Kronkron Nsɛm nkyerɛaseɛ nwoma mu na hunu nwoma ahodoɔ a ɛwɔ Ruth ne 1 Samuel.
Nsusuiɛ de ma Adesua wɔ Efie ne Asɔre
Rut
Yesu Kristo bɛtumi adane awerɛhoɔ ayɛ no nkonimdie.
Abrabɔ mu yɛ den ma okunafoɔ wɔ berɛ biara mu. Nanso berɛ a Rut kunu wuiɛ no, na ne tebea no mu yɛ den pa ara. Wɔ Israelfoɔ amammerɛ mu saa berɛ no, na ɔba a ɔnni kunu anaa mma mmarima nni hokwan sɛ ɔnya agyapadeɛ, ɛna adwumayɛ akwan kakraa bi pɛ na na ɔwɔ. Berɛ a wokenkan Rut abasɛm no, hyɛ sɛdeɛ Awurade danee awerɛhoɔ yɛɛ no nhyira kɛseɛ no nso. Deɛn na wohyɛ no nso wɔ Rut ho a ebia ɛboaa no? Sɛn na Boas gyee Rut firii ne tebea a na ɛmu yɛ den no mu? (hwɛ Rut 4:4–10). Sɛn na na Rut ne Boas nyinaa te sɛ Yesu Kristo?
San hwɛ “Be Still, My Soul,” Nnwom, nɔma 124.
Rut; 1 Samuel 1
Mɛtumi anya ahotosoɔ sɛ Onyankopɔn bɛkyerɛ me kwan na waboa me ɛmfa ho sɛdeɛ me tebea teɛ.
Ebia woahwere ade kɛseɛ bi te sɛ Rut ne Naomi (hwɛ Rut 1:1–5). Anaa ebia, te sɛ Hana no, worehwehwɛ nhyira bi a won nsa nkaeɛ (hwɛ 1 Samuel 1:1–10). Sɛn na saa mmaa yi daa wɔn gyidie wɔ Onyankopɔn mu adi? Deɛn na wosua firi wɔn nhwɛsoɔ ahodoɔ no mu?
Nokorɛ mu, ɛnyɛ obiara a ɔbɔ mpaeɛ pɛ ba na ɔnya bi, na ɛnyɛ obiara a ne hokafoɔ wu na ware bio. Nanso obiara a ɔkɔ Agyenkwa no nkyɛn no nya Ne mmoa ne akwankyerɛ. Dwene sɛdeɛ “wode wo ho abɛto” Awurade so (Rut 2:12) wɔ wo mmerɛ a ɛmu yɛ den mu no ho.
San hwɛ Amy A. Wright, “Abide the Day in Christ,” Liahona, Obubuo 2023, 9–11.
For This Child I Prayed, ɛfiri Elspeth Young hɔ
1 Samuel 2; 4–7
Sɛ mɛnya Awurade mmoa a, ɛhia sɛ mede me ho to Ne so na medi Ne mmaransɛm so.
Berɛ a wɔn atamfo to hyɛɛ wɔn so no, na Israelfoɔ no dwene sɛ apam adaka a na wɔwɔ kɛkɛ no bɛbɔ wɔn ho ban. Berɛ a wokenkan 1 Samuel 4–6, dwene deɛ enti a ɛno anyɛ yie no ho. (Hyɛ Eli mma a wɔsom sɛ asɔfoɔ wɔ ntomadan no mu no nneyɛɛ a ɛntene nso nso wɔ 1 Samuel 2:12–25.) Deɛn na wodwene sɛ na Awurade rebɔ mmɔden sɛ ɔbɛkyerɛkyerɛ Ne nkorɔfo? Deɛn na wosua firi deɛ ɛtoo Filistifoɔ no berɛ a wɔfaa adaka no akyi? (hwɛ ti 5–6). Deɛn na wosua firi Israel mmɔdemmɔ sɛ wɔbɛsan anya Awurade ahobammɔ mu wɔ 1 Samuel 7?
Wobɛtumi anya nkanyan berɛ a wokenkan Hana nkamfoɔ anwensɛm a ɛwɔ 1 Samuel 2:1–10. Deɛn na wohunu wɔ ne nsɛm no mu a na anka ɛbɛtumi aboa Eli mma no ne Israelfoɔ nkaeɛ no?
1 Samuel 3
Mɛtumi ate Awurade nne na madi so.
Ɛtɔ da a, wobɛtumi ate nka te sɛ Samuel a ɔtee Awurade nne nanso wanhunu no. Te sɛ yɛn nyinaa no, na ɛsɛ sɛ Samuel sua sɛdeɛ ɔbɛhunu Awurade nne. Berɛ a wosua 1 Samuel 3, no, deɛn na wosua firi saa abarimaa kumaa yi hɔ fa Awurade nne a wobɛte na woadi so ho? Wobɛtumi nso ahwehwɛ twerɛnsɛm foforɔ yi mu na woatwerɛ akwankyerɛ ahodoɔ a ɛbɛtumi aboa obi ma wahunu Awurade nne: 1 Ahemfo 19:11–12; Luka 24:15–32; 3 Nephi 11:3–7; Nkyerɛkyerɛ ne Apam 6:22–23; 8:2–3; 9:7–9.
Mmerɛ foforɔ nso, wobɛtumi ate nka sɛ wɔato ɔsoro mu na Onyankopɔn mpɛ sɛ ɔne wo bɛdi nkutaho. Titenani Russell M. Nelson kaa sɛ, “Ampa sɛ Nyankopɔn pɛ sɛ ɔkasa kyerɛ wo? Aane!” (“Revelation for the Church, Revelation for Our Lives,” Liahona, Kɔtɔnima 2018, 93–96). Berɛ a wosua Titenani Nelson ne nkrasɛm no, deɛn na wohunu a ɛkanyan wo ma wote Awurade nne na wodi so? Deɛn na Titenani Nelson to nsa frɛ wo sɛ yɛ, na nhyira bɛn na ɔhyɛ ho bɔ? Wobɛtumi nso anya nsatofrɛ ne nhyira a wɔahyɛ ho bɔ a ɛfa adiyisɛm ho wɔ “Walk in God’s light” (De ma Mmabunu Ahoɔden: Woreyi Ɔpɛ ho Akwankyerɛ, 16–20). Dwene ho sɛ wobɛyi adeɛ baako a wobɛtumi ayɛ na ama “wo honhom mu tumi a wode bɛgye adiyisɛm no ayɛ kɛse.”
Sɛ wopɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.
Nkwadaa Adekyerɛ ho Adwenkyerɛ
Rut
Mɛtumi ada ɔdɔ ne ayamyɛ adi akyerɛ nnipa a wɔbɛn me.
-
Berɛ a wo ne wo nkwadaa kyɛ Rut ho asɛm no (wobɛtumi afa “Rut ne Naomi” wɔ Apam Dada mu Abasɛm, 100–103), ma wɔmma wɔn nsa so berɛ biara a wɔbɛte ayamyɛ adeyɛ bi wɔ abasɛm no mu. Wɔbɛtumi nso aka sɛdeɛ wɔte nka berɛ a afoforɔ da ayamyɛ adi kyerɛ wɔn, anaa berɛ a wɔda ayamyɛ adi kyerɛ afoforɔ. Sɛn na Agyenkwa no ada ayamyɛ adi akyerɛ yɛn? Sɛn na yɛbɛtumi adi Ne nhwɛsoɔ akyi? (hwɛ “Kindness Begins with Me,” Nkwadaa Nnwomnwoma, 145).
2:0Ruth and Naomi
Rut; 1 Samuel 1
Mɛtumi anya gyidie wɔ Awurade mu.
-
Rut ne Hana abasɛm ahodoɔ no bɛtumi akanyan wo nkwadaa ma wɔakɔ so adi nokorɛ wɔ mmerɛ a ɛmu yɛ den mu. Dwene ho sɛ wobɛboa wɔn ma wɔayɛ nhyehyɛeɛ a ɛnyɛ den a nsɛnti yi wom Nsɔhwɛ, Nneyɛɛ, Nhyira. Afei mobɛtumi abom akenkan Rut 1:3–5, 8, 16; 2:1–3, 8–12; 4:13–17; 1 Samuel 1:1–18 na wɔatwerɛ deɛ wɔhunu wɔ nkyekyɛmu ahodoɔ yi mu wɔ nsɛnti no ase. Sɛn na Rut ne Hana kyerɛɛ wɔn gyidie wɔ Awurade mu? Afei wo anaa wo nkwadaa bɛtumi akyɛ nhwɛsoɔ a ɛkyerɛ sɛdeɛ Awurade ahyira mo wɔ mmerɛ a ɛmu yɛ den mu.
1 Samuel 1:1–18
Ɔsoro Agya tie na ɔbua me mpaebɔ.
-
Sɛdeɛ wɔbɛsua pii afa Hana ho no, wo nkwadaa bɛtumi akenkan 1 Samuel 1:1–18 anaa “Hannah” wɔ Apam Dada mu Abasɛm (104–5) anaa ahwɛ “Hannah’s Faith” (sini, Asɛmpa Nwomakorabea). Ɛbɛyɛ anika sɛ wobɛto bɔɔl ama abɔfra baako na woama waka abasɛm no fa bi ansa na ɔde bɔɔl no akɔma obi foforɔ. Deɛn na yɛsua fa mpaebɔ ho firi Hana nhwɛsoɔ no mu?
1:15Hannah
3:9Hannah's Faith
Samuel Tells Eli the Truth, ɛfiri Robert T. Barrett hɔ
1 Samuel 3:1–10
Mɛtumi ate Awurade nne na madi so.
-
Yɛ-kyerɛtiawa bi bɛtumi aboa ama wo nkwadaa asua biribi afiri Samuel suahunu a ɛfa adiyisɛm ho no mu. Abɔfra baako bɛtumi ayɛ ne ho sɛ Samuel, na ɔfoforɔ nso bɛtumi ayɛ ne ho sɛ Eli berɛ a mokenkan 1 Samuel 3:1–10 (san hwɛ “Samuel the Prophet” wɔ Apam Dada mu Abasɛm, 106–9, “Samuel ne Eli” sini no, Asɛmpa Nwomakorabea). Deɛn na yɛsua firi Samuel hɔ fa sɛdeɛ yɛbɛte Awurade nne ho? Sɛn na yɛbɛkyerɛ sɛ yɛwɔ ɔpɛ sɛ yɛbɛtie berɛ a Awurade kasa kyerɛ yɛn?
2:10Samuel the Prophet
1:58Samuel and Eli
-
Bisa wo nkwadaa sɛdeɛ anka wɔbɛkyerɛkyerɛ sɛdeɛ Awurade kasa kyerɛ wɔn mu akyerɛ obi. Wobɛtumi aboa wɔn ma wɔapɛ mmuaeɛ wɔ Nkyerɛkyerɛ ne Apam 6:22–23; 8:2–3; 9:7–9.
Boa wo nkwadaa ma wɔnsua sɛ wɔbɛhunu Honhom no. Ɛnyɛ mmerɛ sɛ yɛbɛhunu yɛn ankasa atenka ne Honhom Kronkron no ntam nsonsonoeɛ. Ɛtɔ da a obiara brɛ wɔ yei ho. Fa akwan biara a wobɛtumi boa ma wo nkwadaa nhunu berɛ a wɔrete Honhom no nkɛntɛnsoɔ nka. Sɛ nhwɛsoɔ no, berɛ a wokenkan 1 Samuel 3:1–10 ne nkyekyɛmu a wɔasusu wɔ Nkyerɛkyerɛ ne Apam mu no, wobɛtumi akyɛ suahunu a Awurade akyerɛkyerɛ wo wɔ w’adwene ne w’akoma mu.
Sɛ wopɛ bebree a, hwɛ bosome yi Adamfoɔ nsɛmma nwoma mu.