Mga Hukom 2–4; 6–8; 13–16

Ang aklat ng Mga Hukom ay maaaring kapwa isang babala at isang panghihikayat. Hanapin ang babala at panghihikayat na ito habang binabasa mo ang Mga Hukom 2:1–19; 3:5–12. Sa palagay mo, paano naaangkop sa iyo ang babala at panghihikayat?

Halimbawa, kung ang Mga Hukom 2:19 ay tungkol sa iyo at sa mga tukso sa buhay mo sa halip na tungkol sa mga sinaunang Israelita, ano ang maaaring sabihin nito? Kung ang Mga Hukom 3:9 ay tungkol sa nagawa ng Panginoon para iligtas ka, ano ang maaaring sabihin nito?

Isiping basahin ang tanong at sagot sa pahina 9 ng Para sa Lakas ng mga Kabataan: Isang Gabay sa Pagpili. Paano kaya ito naaangkop sa karanasan ng mga Israelita sa aklat ng Mga Hukom? Ano ang itinuturo nito sa iyo tungkol kay Jesucristo?

Kung minsan ang pananampalataya ng isang tao ay maaaring makahikayat ng pananampalataya sa marami pang iba. Sa Mga Hukom 4, ang taong iyon ay si Debora. Magbasa tungkol sa kanya sa Mga Hukom 4:1–15, at pansinin ang naging impluwensya niya sa mga tao sa kanyang paligid. Narito ang ilang tanong para tulungan kang isipin kung paano maaaring umangkop ang kanyang karanasan sa iyong buhay:

• Paano mo ilalarawan ang mga kalagayan ng mga Israelita noon? (tingnan sa mga talata 1–3). Anong mga pagkakatulad ang nakikita mo sa mga kalagayan ngayon—sa mga indibiduwal at sa lipunan?

• Anong mga salita o hakbang ni Debora ang nagpapakita sa iyo na sumampalataya siya sa Panginoon? Paano inimpluwensyahan ng kanyang pananampalataya ang iba? Ano pa ang tumatak sa isipan mo tungkol sa kanya?

• Ano sa palagay mo ang ibig sabihin ni Debora sa kanyang tanong sa talata 14: “Hindi ba lumabas ang Panginoon sa harap mo?” Paano “luma[la]bas ang Panginoon sa harap” mo? (tingnan sa Doktrina at mga Tipan 84:87–88).

Pagnilayan kung paano maaaring pagpalain ng iyong pananampalataya kay Jesucristo ang iba sa paraang pinagpala ng pananampalataya ni Debora si Barak at ang iba pang mga Israelita. Para matulungan kang pag-isipan ito, maaari mong pag-aralan ang mensahe ni Elder Neil L. Andersen na “Nangungusap Tayo Tungkol kay Cristo” (Liahona, Nob. 2020, 88–91). Saliksikin ang mensahe para sa (1) mga dahilan para mas hayagang magsalita tungkol sa Tagapagligtas at (2) mga paraan para magawa ito.

Pagkatapos ay maaari mong ilista ang mga bagay na alam mo tungkol kay Jesucristo—mula sa mga banal na kasulatan, mula sa mga salita ng mga buhay na propeta, at mula sa iyong personal na karanasan. Sino ang kailangang makaalam nito? Paano mo ito ibabahagi?

Tingnan din sa Mateo 5:14–16; 1 Pedro 3:15; “Bawat Buhay na Dumantay,” Mga Himno, blg. 185.

Habang binabasa mo ang Mga Hukom 6–8, pansinin ang mga pagkakataon na hiniling ng Panginoon kay Gedeon na maniwala sa isang bagay na tila malamang na hindi mangyari. May hiniling na ba Siya sa iyo na katulad nito?

Ano sa pakiramdam mo ang sinisikap ng Panginoon na ituro sa iyo sa salaysay na ito? Paano mo nakitang ginawa ng Panginoon ang Kanyang gawain sa mga paraang tila malamang na hindi mangyari?

Nawala kay Samson kapwa ang kanyang pisikal na lakas at kanyang espirituwal na lakas dahil nilabag niya ang kanyang mga tipan sa Diyos, pati na yaong partikular na nauukol sa mga Nazirita (para sa impormasyon tungkol sa mga Nazirita, tingnan sa Mga Bilang 6:1–6; Mga Hukom 13:7). Habang nagbabasa ka tungkol kay Samson sa Mga Hukom 13–16, pansinin ang mga talatang nagpapakita na kasama ni Samson ang Panginoon, gayundin ang mga talatang nagpapakita na hindi lubos na tapat si Samson sa Panginoon.

Maaari mo ring pagnilayan ang mga tipang nagawa mo sa Panginoon. Paano naghatid ng kapangyarihan ang mga tipang ito sa buhay mo? Ano ang natututuhan mo mula sa mga karanasan ni Samson na naghihikayat sa iyo na manatiling tapat sa iyong mga tipan sa Diyos?

Itinuro ni Sister Ann M. Dibb: “Si Samson ay isinilang na may malaking potensyal. Pinangakuan ang kanyang ina na, ‘Kanyang pasisimulang iligtas ang Israel sa kamay ng mga Filisteo’ [Mga Hukom 13:5]. Ngunit nang lumaki si Samson, mas tumingin siya sa mga tukso ng kamunduhan kaysa sa patnubay ng Diyos. Gumawa siya ng mga pasiya dahil ang mga ito ay ‘lubhang nakalulugod [sa kanya]’ [Mga Hukom 14:3] at hindi dahil tama ang mga ito. Paulit-ulit na ginamit sa mga banal na kasulatan ang mga katagang ‘at siya’y lumusong’ [Mga Hukom 14:7] sa paglalahad ng mga paglalakbay, ginawa, at pasiya ni Samson. Sa halip na bumangon at magliwanag si Samson para makamit ang kanyang malaking potensyal, nadaig siya ng mundo, nawala sa kanya ang lakas na kaloob ng Diyos, at namatay siya nang maaga sa kalunus-lunos na paraan” (“Bumangon at Magliwanag,” Liahona, Mayo 2012, 118).

Tingnan din sa Dallin H. Oaks, “Mga Tipan at Responsibilidad,” Liahona, Mayo 2024, 93–96; Ulisses Soares, “Tiwala sa Tipan sa Pamamagitan ni Jesucristo,” Liahona, Mayo 2024, 17–21.

• Sino ang ilan sa mga huwad na diyos ng mga Cananeo?

• Ano ang ibig sabihin na isang propetisa si Debora?

• Naaangkop bang humingi si Gideon ng tanda mula sa Diyos?

Iklik para makita ang iba pa.

• Ang Mga Hukom 3 ay naglalarawan ng isang pattern na nagtuturo tungkol sa kapangyarihan ng Tagapagligtas na iligtas tayo mula sa kasalanan. Para tulungan ang iyong mga anak na matukoy ang pattern na ito, maaari mong isulat ang mga pariralang ito: “gumawa ng masama,” “dumaing sa Panginoon,” at “nagbangon ng isang tagapagligtas.” Pagkatapos ay maaaring hanapin ng iyong mga anak ang mga pariralang ito sa Mga Hukom 3:7–9 at Mga Hukom 3:12–15. Ano ang natututuhan natin tungkol sa Panginoon mula sa pattern na ito?

• Para bigyang-diin na si Jesucristo ang ating Tagapagligtas, maaari kang magtipon ng ilang larawan ng mga tao, pati na ng larawan ni Jesus, at ilagay nang pataob ang mga ito. Hayaang maghalinhinan ang iyong mga anak sa pagbabaligtad ng mga larawan. Kapag natagpuan nila ang larawan ni Jesus, kantahin ang awiting tungkol sa Kanya, tulad ng “Isinugo, Kanyang Anak” (Aklat ng mga Awit Pambata, 20–21), at sabihin sa iyong mga anak kung paano Niya kayo nailigtas.

• Magagamit mo ang “Ang Propetang si Debora” sa Mga Kuwento sa Lumang Tipan, 92–95, para ikuwento sa iyong mga anak ang mga Hukom 4. Ibahagi ninyo sa isa’t isa ang hinahangaan ninyo kay Debora. Paano pinagpala ng kanyang pananampalataya sa Panginoon ang mga tao sa paligid niya? Ano ang magagawa natin para matulungan ang iba na higit na manampalataya kay Jesucristo?

  

  2:9

• Gamitin ang Mga Hukom 7:4–7, ang pahina ng aktibidad sa linggong ito, o “Ang Hukbo ni Gedeon” sa Mga Kuwento sa Lumang Tipan, 96–99, para ituro sa iyong mga anak kung paano pinaliit ng Panginoon ang hukbo ng Israel. Bakit nais ng Panginoon na maging kaunti ang hukbo ni Gedeon? (tingnan sa Mga Hukom 7:2).

  

  2:37

• Maaaring magdrowing ang iyong mga anak ng mga larawan ng tabak, kalasag, trumpeta, lampara, at pitsel at pag-usapan kung alin sa mga bagay na ito ang gusto nila sa isang labanan. Pagkatapos ay maaari nilang basahin ang Hukom 7:16 para alamin kung ano ang sinabi ng Panginoon na gamitin ng hukbo ni Gedeon. Habang nagbabasa kayo tungkol sa labanan sa Mga Hukom 7:19–21, ibahagi sa isa’t isa ang matutuhan ninyo tungkol sa Panginoon mula sa kuwentong ito.

• Ang mga tipan ni Samson sa Panginoon ay nagbigay sa kanya ng pisikal na lakas, tulad ng pagbibigay sa atin ng ating mga tipan ng espirituwal na lakas. Maaaring masiyahan ang iyong mga anak sa paggawa ng mga pisikal na ehersisyo at pagtalakay kung paano makakatulong ang mga ehersisyong iyon para mapalakas ang ating katawan. Paano pinalalakas ng pagtupad ng ating mga tipan ang ating espiritu? (tingnan sa Mosias 18:8–10; Doktrina at mga Tipan 20:77, 79).