Ruth; 1 Samuel 1–7

Mahirap ang buhay para sa isang balo sa anumang panahon. Ngunit nang mamatay ang asawa ni Ruth, lalong naging mahirap ang sitwasyon niya. Sa kultura ng mga Israelita sa panahong iyon, ang babaeng walang asawa o mga anak na lalaki ay walang karapatan sa ari-arian at iilan lamang ang paraan para makapaghanapbuhay. Habang binabasa mo ang kuwento ni Ruth, pansinin kung paano naging malaking pagpapala ang trahedyang ito. Ano ang napansin mo kay Ruth na maaaring nakatulong sa kanya? Paano tinubos ni Boaz si Ruth mula sa kanyang desperadong sitwasyon? (tingnan sa Ruth 4:4–10). Paano naging katulad ni Jesucristo sina Ruth at Boaz?

Tingnan din sa “Pumayapa, Aking Kaluluwa,” Mga Himno, blg. 71.

Marahil ay dumanas ka na ng malaking kawalan, tulad ng nangyari kina Ruth at Naomi (tingnan sa Ruth 1:1–5). O siguro, tulad ni Ana, inaasam mo ang mga pagpapala na hindi mo pa natatanggap (tingnan sa 1 Samuel 1:1–10). Paano ipinakita ng mga babaeng ito ang kanilang pananampalataya sa Diyos? Ano ang natututuhan mo mula sa kanilang mga halimbawa?

Siyempre, hindi lahat ng nagdarasal na magkaanak ay nagkakaanak, at hindi lahat ng namamatayan ng asawa ay nag-aasawang muli. Ngunit lahat ng lumalapit sa Tagapagligtas ay tumatanggap ng Kanyang tulong at patnubay. Isipin kung paano ka “nanganlong” sa Panginoon (Ruth 2:12) sa mahihirap na panahon ng iyong buhay.

Tingnan din sa Amy A. Wright, “Mananatili sa Araw na Yaon kay Cristo,” Liahona, Nob. 2023, 9–11.

Nang sumalakay ang kanilang mga kaaway, mukhang inakala ng mga Israelita na poprotektahan sila dahil lamang sa nasa kanila ang kaban ng tipan. Habang binabasa mo ang 1 Samuel 4–6, pag-isipan kung bakit hindi iyon nangyari. (Pansinin din ang masasamang ginawa ng mga anak ni Eli, na naglingkod bilang mga saserdote sa tabernakulo, sa 1 Samuel 2:12–25.) Ano sa palagay mo ang sinisikap ng Panginoon na ituro sa Kanyang mga tao? Ano ang natututuhan mo sa nangyari sa mga Filisteo matapos makuha ang arka? (tingnan sa mga kabanata 5–6). Ano ang natututuhan mo mula sa mga pagsisikap ng Israel na mabawi ang proteksyon ng Panginoon sa 1 Samuel 7?

Maaari kang mabigyang-inspirasyon sa pagbabasa ng tula ng papuri ni Ana sa 1 Samuel 2:1–10. Ano ang nakikita mo sa kanyang mga salita na maaaring nakatulong sa mga anak ni Eli at sa iba pang mga Israelita?

Kung minsan, maaaring madama mo ang nadama ni Samuel, na narinig ang tinig ng Panginoon ngunit hindi iyon nakilala. Tulad nating lahat, kinailangang matutuhan ni Samuel kung paano makilala ang tinig ng Panginoon. Habang pinag-aaralan mo ang 1 Samuel 3, ano ang natututuhan mo mula sa batang lalaking ito tungkol sa pakikinig at pagsunod sa tinig ng Panginoon? Maaari mo ring saliksikin ang karagdagang mga talatang ito sa banal na kasulatan at ilista ang mga tuntuning makakatulong sa isang tao na makilala ang tinig ng Panginoon: 1 Mga Hari 19:11–12; Lucas 24:15–32; 3 Nephi 11:3–7; Doktrina at mga Tipan 6:22–23; 8:2–3; 9:7–9.

Sa ibang mga pagkakataon, maaari mong madama na sarado ang kalangitan at na ayaw makipag-ugnayan ng Diyos sa iyo. Sabi ni Pangulong Russell M. Nelson: “Talaga bang nais ng Diyos na mangusap sa inyo? Oo!” (“Paghahayag para sa Simbahan, Paghahayag para sa Ating Buhay,” Liahona, Mayo 2018, 93–96). Habang pinag-aaralan mo ang mensahe ni Pangulong Nelson, ano ang nakikita mo na humihikayat sa iyo na pakinggan at sundin ang tinig ng Panginoon? Ano ang sinasabi ni Pangulong Nelson na gawin mo, at anong mga pagpapala ang ipinapangako niya? Makakakita ka rin ng mga paanyaya at ipinangakong pagpapala tungkol sa paghahayag sa “Lumakad sa Liwanag ng Diyos” (Para sa Lakas ng mga Kabataan: Isang Gabay sa Pagpili, 16–20). Isiping pumili ng isang bagay na magagawa mo para “dagdagan pa ang espirituwal na kakayahan [mong] makatanggap ng paghahayag.”

• Ano ang ibig sabihin ng mamulot sa bukid?

• Bakit mahalagang si Boaz ay isa sa mga “pinakamalapit [na] kamag-anak“ ni Naomi?

• Bakit inutusan ni Naomi si Ruth na humiga sa paanan ni Boaz?

Iklik para makita ang iba pa.

• Kapag ibinahagi mo sa iyong mga anak ang kuwento ni Ruth (maaari mong gamitin ang “Sina Ruth at Noemi” sa Mga Kuwento sa Lumang Tipan, 100–103), anyayahan silang magtaas ng kamay tuwing makakarinig sila ng kabaitan sa kuwento. Maaari din nilang ibahagi ang nadarama nila kapag mabait sa kanila ang iba, o kapag mabait sila sa iba. Paano naging mabait sa atin ang Tagapagligtas? Paano natin matutularan ang Kanyang halimbawa? (tingnan sa “Sa Akin Nagmumula ang Kabaitan,” Aklat ng mga Awit Pambata, 83).

  

  2:0

• Ang mga kuwento nina Ruth at Ana ay maaaring makahikayat sa iyong mga anak na manatiling tapat sa mahihirap na panahon. Isiping tulungan silang gumawa ng isang simpleng chart na may mga heading na Mga Pagsubok, Mga Gawa, Mga Pagpapala. Pagkatapos ay sama-sama ninyong basahin ang Ruth 1:3–5, 8, 16; 2:1–3, 8–12; 4:13–17; 1 Samuel 1:1–18 at isulat sa ilalim ng mga heading ang makita nila sa mga talatang ito. Paano ipinakita nina Ruth at Ana ang kanilang pananampalataya sa Panginoon? Pagkatapos ay maaari kang magbahagi o ang iyong mga anak ng mga halimbawa kung paano kayo napagpala ng Panginoon sa mahihirap na panahon.

• Para makaalam tungkol kay Ana, maaaring basahin ng iyong mga anak ang 1 Samuel 1:1–18 o ang “Ana” sa Mga Kuwento sa Lumang Tipan (104–5) o panoorin ang “Hannah’s Faith” (video, Gospel Library). Maaaring masayang maghagis ng bola sa isang bata at anyayahan siyang isalaysay ang bahagi ng kuwento bago ipasa ang bola sa iba. Ano ang natututuhan natin tungkol sa panalangin mula sa halimbawa ni Ana?

  

  1:15

  

  3:9

• Marahil ang isang simpleng dula-dulaan ay maaaring makatulong sa iyong mga anak na matuto mula sa karanasan ni Samuel sa paghahayag. Ang isang bata ay maaaring magkunwaring si Samuel, at ang isa pa ay maaaring magkunwaring si Eli habang binabasa mo ang 1 Samuel 3:1–10 (tingnan din sa “Ang Propetang si Samuel” sa Mga Kuwento sa Lumang Tipan, 106–9, o ang video na “Samuel and Eli,” Gospel Library). Ano ang natututuhan natin mula kay Samuel kung paano pakinggan ang tinig ng Panginoon? Paano natin maipapakita na handa tayong makinig kapag nangungusap ang Panginoon sa atin?

  

  2:10

  

  2:4

• Itanong sa iyong mga anak kung paano nila ipaliliwanag sa isang tao kung paano nangungusap sa kanila ang Panginoon. Maaari mo silang tulungang hanapin ang mga sagot sa Doktrina at mga Tipan 6:22–23; 8:2–3; 9:7–9.