Eksodɔs 14–18

Berɛ a wokenkan Eksodɔs 14:1–10, no, susu atenka a Israelfoɔ no bɛtumi anya berɛ a wɔhunuu sɛ Farao asraafoɔ no rebɛn. Ebia wote nka sɛ wohia anwanwadeɛ bi na ama woatumi agyina wɔ ɔhaw dennen bi a worehyia mu. Deɛn na wohunu wɔ Eksodɔs 14:13–31 a ɛkanyan wo ma wohwehwɛ Onyankopɔn tumi wɔ w’abrabɔ mu? Dwene sɛdeɛ woahunu Ne tumi wɔ berɛ a atwam no mu ho. Deɛn na woasua afa Ne ho afiri saa suahunu ahoroɔ yi mu?

Eksodɔs 15:1–19 yɛ ayɛyie dwom a Israelfoɔ no toeɛ berɛ Awurade paee Ɛpo Kɔkɔɔ no mu akyi. Kasasin ahoroɔ bɛn na ɛwɔ dwom yi mu a wohunu sɛ nteaseɛ titire wom? Ebia dwom bi wɔ hɔ a ɛyɛ wo sɛ to berɛ a Awurade ayɛ biribi a ɛyɛ nwanwa ama wo, te sɛ “Redeemer of Israel” (Nnwom, nɔma 6). Dwene ho sɛ wobɛto anaa wobɛtie aka wo som ho ɛnnɛ.

San hwɛ Nkyerɛkyerɛ ne Apam 8:2–3.

Worekenkan Israel akwantuo ho asɛm bɛtumi ama woadwene nneɛma a ɛwɔ w’abrabɔ mu a ayɛ sɛ “ɛyɛ nwono” te sɛ Mara nsuo no ho (hwɛ Eksodɔs 15:23–27). Sɛn na Awurade ama nneɛma a ɛyɛ nwono wɔ w’abrabɔ mu ayɛ dɛ? Mfasoɔ bɛn na saa suahunu ahoroɔ yi de aba w’abrabɔ mu?

Wobɛhunu Israelfoɔ no suahunu ahoroɔ a ɛyɛ yea ho nhwɛsoɔ pii wɔ Eksodɔs 16 ne 17. Anhwɛ a wobɛkasa atia wɔn anwiinwii anaasɛ kasakasa, nanso sɛ wokenkan a, dwene ho sɛ ebia woayɛ ade korɔ no ara da anaa. Deɛn na wosua firi Israelfoɔ no suahunu ahoroɔ mu a ɛbɛtumi aboa wo ma woanwiinwii kakraa bi na woagye Onyankopɔn adi kɛse? Deɛn na nkyekyɛmu ahoroɔ yi kyerɛkyerɛ wo fa Onyankopɔn ho?

San hwɛ 1 Nephi 2:11–12.

Esiane sɛ ɛhia sɛ yɛn nyinaa didi nti, Awurade taa de honhom mu nneɛma toto aduane ho. Hwehwɛ Ne honhom mu asuadeɛ wɔ Israelfoɔ no suahunu a ɛfa mana ho wɔ Eksodɔs 16. Sɛ nhwɛsoɔ no, deɛn na wohunu wɔ Awurade akwankyerɛ a ɛwɔ Eksodɔs 16:16, 19, 22–26 a ɛfa wo honhom mu aduane ho?

Sɛ wobɛhunu asuadeɛ foforɔ a ebia Awurade bɛpɛ sɛ wosua firi saa anwanwadeɛ yi mu a, dwene nsɛmmisa te sɛ yeinom ho:

• Deɛn na Awurade de ma me a ɛte sɛ da biara mana a ɔde maa Israelfoɔ no?

• Deɛn na mɛtumi ayɛ a ɛte sɛ mereboaboa mana ano?

Wobɛtumi anya nhumu foforɔ wɔ sini ahoroɔ yi mu baako anaa deɛ ɛboro saa mu: “Daily Bread: Pattern,” “Daily Bread: Experience,” ne “Daily Bread: Change” (Asɛmpa Akoraeɛ).

2:52

3:12

3:0

Dwene nneɛma afoforɔ a, adidie akyi, woyɛ no da biara ho. Adɛn nti na ɛsɛ sɛ wɔyɛ nneɛma bi da biara ansa na atumi atu mpɔn? Deɛn na wote nka sɛ yɛ fa hwehwɛ honhom mu suahunu ahoroɔ da biara?

San hwɛ Dieter F. Uchtdorf, “Daily Restoration,” Liahona, Obubuo 2021, 77–79; “Daily Restoration” (sini), Asɛmpa Akoraeɛ.

5:27

Dwene Agyenkwa no ho berɛ a wokenkan Eksodɔs 17:1–7. Sɛn na Yesu Kristo te sɛ ɔbotan ma wo? (hwɔ Nnwom 62:6–7; Helaman 5:12). Sɛn na Ɔte sɛ nsuo? (hwɛ Yohane 4:10–14; 1 Korintofoɔ 10:1–4; 1 Nephi 11:25).

Ebia mmerɛ bi wɔ w’abrabɔ mu a wobɛtumi de atoto Mose ho—berɛ a afoforɔ de wɔn ho to wo so, nanso wo “nsa [te sɛ] agyene” (Eksodɔs 17:12). Mmerɛ afoforɔ nso, wobɛtumi ayɛ te sɛ Aaron, Hur, ne Yetro a wɔboaa Mose. Fa wo ho hyɛ saa nnipa yi mu biara gyinabea mu berɛ a wokenkan Eksodɔs 17:8–16; 18:13–26, na hwɛ deɛ Awurade kyerɛkyerɛ wo fa N’adwuma ho.

San hwɛ Mosiah 4:27; 18:8–9.

• Berɛ a Awurade paee Ɛpo Kɔkɔɔ no mu no, Mose ne Israelfoɔ no hunuu tumi a Ɔwɔ. Ma wo nkwadaa mmoa wo na monnwene kwan a ɛyɛ anika a mode bɛsan ayɛ abasɛm no afiri Eksodɔs 14:5–22 (san hwɛ “The Passover” wɔ Apam Dadaa mu Abasɛm, 70–74). Ebia wobɛtumi de nkonnwa anaa kuntu agu hɔ na “woakyekyɛ” mu te sɛ Ɛpo Kɔkɔɔ no. Afei mobɛtumi ne mo ho mo ho akyɛ sɛdeɛ moahunu Onyankopɔn tumi wɔ mo abrabɔ mu.

  

  2:54

• Deɛn na Nkyerɛkyerɛ ne Apam 8:2–3 de ka wo nteaseɛ ho wɔ abasɛm a ɛwɔ Eksodɔs 14? Dwene ho sɛ wobɛka suahunu bi a ɛfa sɛdeɛ Honhom Kronkron no kaa biribi kyerɛɛ wo wɔ w’adwene anaa w’akoma mu kyerɛ wo nkwadaa, na ma wɔnka wɔn suahunu ahoroɔ. Mobɛtumi nso ato dwom bi afa Honhom Kronkron ho, te sɛ “Let the Holy Spirit Guide” (nnwom, nɔma 143).

• Ebia wo ne wo nkwadaa bɛtumi anom biribi a ɛyɛ dɛ ne biribi a ɛyɛ nwono berɛ a moresua Eksodɔs 15:22–25 abom. Sɛn na Agyenkwa no ama suahunu a “ɛyɛ nwono” wɔ yɛn abrabɔ mu “ayɛ dɛ”?

• Berɛ a wo ne wo nkwadaa kenkan Eksodɔs 15:23–25; 16:14–15; 17:1–6, ma wɔmmoa wo na pɛ nneɛma a ɛbɛboa ma woaka abasɛm biara—te sɛ dua (a wɔde sesa nsuo wɔ Mara), toa anaa kukuo (a wɔde mana hyɛ mu ma), ne ɔbotan (ma nsuo a ɛwɔ Horeb). Deɛn na saa abasɛm ahoroɔyi kae yɛn fa deɛ Yesu Kristo yɛ ma yɛn no ho? Sɛ mo nkɔmmɔbɔ no fa no, mobɛtumi akenkan Mat 7:24–27; John 4:10–14; 6:29–35, 48–51; Helaman 5:12; Doctrine and Covenants 20:77, 79.

• Berɛ a mokenkan Eksodɔs 17:8–16, no, wobɛtumi ama abɔfra bi asɔ wɔn nsa akɔ wiem. Sɛ abɔfra no brɛ a, mmɔfra afoforɔ bɛtumi aboa, sɛdeɛ Aaron ne Hur boaa Mose no. Deɛn na saa abasɛm yi kyerɛkyerɛ fa sɛdeɛ yɛbɛtumi aboa Onyankopɔn ahemman ma ayɛ yie ho? Mobɛtumi nso akenkan Eksodɔs 18:13–26 na moaka nnipa a wɔsom wɔ mo wɔɔd mu no asɛdeɛ a ɛmu yɛ duru ho asɛm. Deɛn na yɛbɛtumi ayɛ nnɛ de aboa yɛn Asɔre akannifoɔ, sɛdeɛ Aaron ne Hur boaa nkɔnhyɛni Mose no?