Exodo 14–18

’A tai’o ai ’outou te Exodo 14:1–10, ’a feruri nā e aha tā te ’āti ’Īsera’ela i putapū i te ’itera’a atu i te nu’u o Phara’o i te pirira’a mai. E putapū paha ’outou ē, e hina’aro ’outou i te hō’ē temeio nō te fa’aora ia ’outou i te hō’ē tāmatara’a fifi ’o tā ’outou e fa’aruru nei. E aha tā ’outou i ’ite mai i roto te Exodo 14:13–31, ’o te fa’aitoito ia ’outou ’ia ’imi i te mana o te Atua i roto i tō ’outou orara’a ? ’A feruri nā nāhea tō ’outou ’itera’a i tōna mana i roto i tō ’outou orara’a. E aha tā ’outou i ’apo mai nō ni’a iāna nā roto mai i teie mau ’ohipa i tupu ?

E hīmene nō te ’āruera’a te Exodo 15:1–19, ’o tā te ’āti ’Īserā’ela i hīmene i muri a’e i tō te Fatu vāhira’a i te Miti ’Ute’ute. E aha te mau pereota i roto i teie hīmene tā ’outou e ’ite ra e aura’a ta’a ’ē mau ? Tē vai ra paha te hō’ē hīmene tā ’outou e hina’aro e hīmene, ’ia rave ana’e te Fatu i te hō’ē ’ohipa fa’ahiahia mau nō ’outou, mai te « E te Fa’aora o ’Īserā’ela » (Te mau Hīmene, N 6). ’A feruri i te hīmene ’aore rā i te fa’aro’o i te reira i roto i tā ’outou ha’amorira’a i teie mahana.

Hi’o ato’a Te Ha’api’ira’a Tumu ’e te mau Fafaura’a 8:2–3.

E nehenehe te tai’ora’a i te fa’ati’ara’a nō te tere o ’Īserā’ela, i te arata’i ia ’outou ’ia feruri i te mau mea i roto i tō ’outou orara’a, e au ra ia ’outou e mea « maramara » mai te pape o Mara (hi’o Exodo 15:23–27). Mea nāhea tō te Fatu fa’arirora’a i te mau mea maramara i roto i tō ’outou orara’a ’ei mea au ? E aha te faufa’a o teie mau ’itera’a i roto i tō ’outou orara’a ?

E ’ite mai ’outou i te tahi atu ā mau hi’ora’a nō te mau ’itera’a maramara nō te ’āti ’Īserā’ela i roto te Exodo 16 ’e te 17. E mea fa’ahema roa ’ia fa’ahapa i tā rātou mau muhumuhura’a ’aore rā mau amuamura’a, terā rā ’a tai’o ai ’outou, ’a feruri ’ua nā reira ato’a ānei ’outou. E aha tā ’outou i ha’api’i mai nā roto mai i te mau ’ohipa i tupu i te ’āti ’Īsera’ela, ’o tē nehenehe e tauturu ia ’outou ’ia fa’aiti i te amuamu ’e ’ia ti’aturi hau atu ā i te Atua ? E aha tā teie mau ’īrava e haʼapiʼi nei ia ’outou nō niʼa i te Atua ?

Hi’o ato’a 1 Nephi 2:11–12.

Nō te mea e hina’aro tātou pā’āto’a e tāmā’a, pinepine te Fatu i te fa’aau i te mau mea pae vārua i te mā’a. ’A ’imi mai i tāna mau ha’api’ira’a pae vārua i roto i te mau ’itera’a o te ’āti ’Īserā’ela ’e te māna i roto te Exodo 16. ’Ei hi’ora’a, e aha tā ’outou e ’ite mai i roto i te mau ha’api’ira’a a te Fatu i roto te Exodo 16:16, 19, 22–26, e tano i tā ’outou mā’a pae vārua ?

Nō te ’ite mai i te tahi atu ā mau ha’api’ira’a ’o tā te Fatu e hina’aro ’ia ha’api’i mai ’outou nā roto mai i teie temeio, ’a feruri i te mau uira’a mai teie :

• E aha tā te Fatu i hōro’a mai iā’u e au ra mai te māna i te mau mahana ato’a, ’o tāna i hōro’a i te ’āti ’Īserā’ela ?

• E aha tā’u e nehenehe e rave e au ra mai te ha’aputura’a i te māna ?

E ’ite mai paha ’outou i te mau mana’o hau atu i roto hō’ē ’aore rā hau atu o teie mau video : « Daily Bread : Pattern [Pāne i te mau mahana ato’a : ’Itera’a] », ’e « Daily Bread : Change [Pane i te mau mahana ato’a : Tauira’a’ » (Vaira’a buka ’evanelia).

2:52

3:12

3:0

’A feruri i te tahi atu mau mea, ta’a ’ē atu i te tāmā’ara’a, ’o tā ’outou e rave nei i te mau mahana ato’a. Nō te aha e ti’a i te tahi mau ’ohipa ’ia ravehia i te mau mahana ato’a, nō te manuia ? E aha te mea tei fa’auruhia ia ’outou ’ia rave nō te ’imi mai i te mau ’itera’a pae vārua i te mau mahana ato’a ?

Hi’o ato’a Dieter F. Uchtdorf, « Te fa’aho’ira’a tāmahana », Liahona, Novema 2021, 77–79 ; « Daily Restoration [Te fa’aho’ira’a tāmahana] » (video), Vaira’a buka ’evanelia.

5:27

’A feruri i te Fa’aora ’a tai’o ai ’outou te Exodo 17:1–7. Nāhea Iesu Mesia e riro ai mai te hō’ē mato nō ’outou ? (hi’o Salamo 62:6–7 ; Helamana 5:12). Nāhea ’oia e riro ai mai te pape ? (hi’o Ioane 4:10–14 ; 1 Korinetia 10:1–4 ; 1 Nephi 11:25).

Tē vai ra paha te taime i roto i tō ’outou orara’a e nehenehe ’outou e ’ite ia ’outou mai ia Mose—’ia ti’aturi ana’e vetahi ’ē ia ’outou, terā rā « tē teiaha ra [tō ’outou] rima » (Exodo 17:12). I te tahi atu taime, e riro rahi atu paha ’outou mai ia Aarona, Hura ’e ’o Ietero, tei pāturu ia Mose. ’A tu’u ia ’outou iho i te ti’ara’a o teie mau ta’ata tāta’itahi, ’a tai’o ai ’outou te Exodo 17:8–16 ; 18:13–26, ’e ’a hi’o e aha tā te Fatu e ha’api’i nei ia ’outou nō ni’a i tāna ’ohipa.

Hi’o ato’a Mosia 4:27 ; 18:8–9.

• I te vāhira’a te Fatu i te Miti ’Ute’ute, ’ua ’ite Mose ’e te ’āti ’Īserā’ela i tōna pūai rahi. ’A vaiiho i tā ’outou mau tamari’i ’ia tauturu mai ia ’outou ’ia feruri i te hō’ē rāve’a ’ārearea, nō te ha’uti ta’ata ora fa’ahou i te ’ā’amu o te Exodo 14:5–22 (hi’o ato’a « Te Pāsa » i roto i Te mau ’ā’amu o te Faufa’a Tahito, 70–74). Penei a’e e nehenehe ’outou e tu’u haere i te mau pārahira’a ’aore rā te mau ’ahu ta’oto ’e e « vāhi » i te reira mai te Miti ’Ute’ute. I muri iho e fa’a’ite i te tahi ’e te tahi, mea nāhea tō ’outou ’itera’a i te mana o te Atua i roto i tō ’outou orara’a.

  

  2:54

• E aha tā Te Ha’api’ira’a Tumu ’e te mau Fafaura’a 8:2–3 e tu’u mai nei i tō tātou hāro’aro’ara’a, nō te ’ā’amu i roto te Exodus 14 ? ’A feruri i te fa’ati’a i te hō’ē ’ohipa tei tupu ’a parau ai te Vārua Maita’i ia ’outou i te hō’ē mea i roto i tō ’outou ferurira’a ’aore rā tō ’outou vairua, ’e ’a ani i te mau tamari’i ’ia fa’ati’a mai i tō rātou ’itera’a. E nehenehe ato’a ’outou e hīmene i te hō’ē hīmene nō ni’a i te Vārua Maita’i, mai te « Nā te Vārua Mo’a e arata’i » (Te mau Hīmene, N 43).

• Penei a’e e nehenehe ’outou ’e tā ’outou mau tamari’i e inu i te hō’ē pape monamona ’e te hō’ē pape maramara ma te ’imi-’āmui-māite-ra’a te Exodo 15:22–25. Nāhea tō te Fa’aora fa’arirora’a i te mau ’itera’a « maramara » o tō tātou orara’a ’ei mea « au » ?

• ’A tai’o ’e tā ’outou mau tamari’i te Exodo 15:23–25 ; 16:14–15 ; 17:1–6, ’a vaiiho ia rātou e tauturu mai ia ’outou ’ia ’ite mai i te mau tao’a nō te fa’ati’a i te ’ā’amu tāta’itahi—mai te hō’ē ’āma’a (nō te fa’aora i te pape i Mara), hō’ē fāri’i ’aore rā hō’ē pānie (nō te fa’a’ī i te māna), ’e hō’ē ’ōfa’i (nō te pape i Horeba). E aha tā teie mau ’ā’amu e fa’aha’amana’o mai nei ia tātou nō te mau mea tā Iesu Mesia i rave nō tātou ? ’Ei tuha’a nō tā ’outou ’āparaura’a, e nehenehe ’outou e tai’o te Mataio 7:24–27 ; Ioane 4:10–14 ; 6:29–35, 48–51 ; Helamana 5:12 ; Te Ha’api’ira’a Tumu ’e te mau Fafaura’a 20:77, 79.

• ’A tai’o ai ’outou te Exodo 17:8–16, e nehenehe ’outou e ani i te hō’ē tamari’i e ’āfa’i i tōna rima i ni’a. ’Ia rohirohi ana’e te tamari’i, e nehenehe te tahi atu mau tamari’i e tauturu, mai tā Aarona ’e Hura i tauturu ia Mose. E aha tā teie ’ā’amu e ha’api’i nei, e nāhea tātou e nehenehe ai e tauturu ’ia manuia te bāsileia o te Atua ? E nehenehe ato’a ’outou e tai’o te Exodo 18:13–26 ’e e ’āparau nō te mau hōpoi’a teimaha a te mau ta’ata e tāvini nei i roto i tā ’outou pāroita. E aha tā tātou e nehenehe e rave i teie mahana nō te tauturu i tō tātou feiā fa’atere o te ’Ēkālesia, mai ia Aarona ’e Hura tei tauturu i te peropheta Mose ?