Exodo 7–13

Mea maita’i, e’ita roa atu tō ’outou hina’aro e pāto’i i te hina’aro o te Atua, mai terā tō Phara’o. I te tahi taime, e vai ra ia tātou pā’āto’a te hō’ē ’ā’au marū iti mai tei tītauhia. E aha te mea faufa’a roa nō ’outou i roto i te mau pāhonora’a a Phara’o nō te mau ahiripā i roto te Exodo 7:14–25 ; 8:5–32 ; 9:1–26 ; 10:12–29 ; 12:29–33 ? ’A hi’o i te ha’amāramaramara’a i roto i te tātarara’a a Iosepha Semita nō te Exodo 7:3, 13 ; 9:12.

Nō te aha te « ’eta’eta » e fa’a’itera’a tano nō te ’ā’au o Pharao ? ’A feruri i te mea tā ’outou e ’apo mai nā roto mai i teie mau ’īrava nō ni’a i te roa’ara’a te hō’ē ’ā’au marū : 1 Nephi 2:16 ; Mosia 3:19 ; Alama 24:7–8 ; 62:41 ; Etera 12:27. ’A tai’o ai ’outou i te mau fa’ahope’ara’a nō te ’ā’au ’eta’eta o Phara’o, ’a feruri i te huru o tō ’outou ’ā’au. E aha te mau tauira’a i fa’auruhia ia ’outou e rave ?

Te rāve’a hō’ē roa nō te ’āti ’Īserā’ela ’ia pāruruhia i nā ’ahuru ’ahiripā, i fa’a’itehia i roto te Exodo 11:4–5, ’o te pe’e-pāpū-ra’a ïa i te mau arata’ira’a tā te Fatu i hōro’a ia Mose i roto te Exodo 12, hō’ē peu mātauhia i te pi’i te Pāsa. Tē ha’api’i nei te Pāsa ia tātou nā roto i te mau tāpa’o ē, mai tā te Fatu i fa’aora i te ’āti ’Īserā’ela i te tītīra’a i ’Aiphiti, e nehenehe ato’a ’oia e fa’aora ia tātou i te tītīra’a o te hara. Nō te hi’o haere i teie tāpa’o i roto te Exodo 12:1–42, e nehenehe ’outou e fa’a’ohipa i te hō’ē tāpura mai teie :

E aha atu ā tā ’outou i ’ite mai i roto i te mau arata’ira’a ’e te mau tāpa’o o te Pāsa, ’o tē fa’aha’amana’o ia ’outou ia Iesu Mesia ’e tāna Tāra’ehara ? E aha tā teie mau tāpa’o e parau nei ia ’outou, e nāhea ’ia fa’ari’i i te mau ha’amaita’ira’a o tāna Tāra’ehara ?

’Ua fa’aue te Fa’aora i te ’āti ’Īserā’ela ’ia ha’apa’o i te Pāsa i te mau matahiti ato’a, nō te tauturu ia rātou ’ia ha’amana’o ’ua fa’aora ’oia ia rātou, ’oia ato’a i muri a’e ’a riro ai tō rātou fa’atītīra’a ’ei ha’amana’ora’a ātea. ’A tai’o ai ’outou i tāna mau arata’ira’a i roto te Exodo 12:14–17, 24–27 ; 13:1–16, ’a feruri e aha tā ’outou e rave nei nō te ha’amana’o i te mau ha’amaita’ira’a a te Atua nō ’outou. Nāhea ’outou i te fa’aherehere i te reira ha’amana’ora’a « e hope roa a’e tō ’outou mau u’i » ? (hi’o Exodo 12:14, 26–27).

E aha te tū’atira’a tā ’outou e ’ite nei i rotopū i te ’ōro’a nō Pāsa ’e te ’ōro’a mo’a ? E aha tā ’outou e nehenehe e rave nō te « ha’amana’o tāmau noa » ia Iesu Mesia ? (Moroni 4:3 ; 5:2).

E nehenehe ato’a ’outou e feruri i te tahi atu mau mea ’o tā te Fatu e hina’aro ’ia ha’amana’o ’outou ; hi’o, ’ei hi’ora’a Helamana 5:6–12 ; Moroni 10:3 ; Te Ha’api’ira’a Tumu ’e te mau Fafaura’a 3:3–5, 10 ; 18:10 ; 52:40.

Hi’o ato’a Kevin W. Pearson, « E ti’a noa ānei ia ’outou ? », Liahona, Novema 2022, 67–69 ; « Always Remember Him [’Ia ha’amana’o noa iāna] » (video), Vaira’a buka ’evanelia ; « ’Ei mana’ora’a teie », Te mau Hīmene, N 106.

5:27

• Te mau ahiripā i tātara-pāpū-hia i roto te Exodo 7–11, ’ua fa’a’ite i te ’āti ’Aiphiti ’e te ’āti ’Īserā’ela ē, e mana rahi tō te Fatu. E tauturu te Fatu i tā ’outou mau tamari’i i te roara’a o tō rātou orara’a, mai te peu e fa’aro’o tō rātou i tōna mana. Nō te tauturu ia rātou ’ia ha’api’i mai nā roto mai i teie ’ā’amu, e nehenehe ’outou e hōro’a i te tamari’i tāta’itahi te hō’ē ’api parau tei vāhihia e 10 tuha’a, ’e e ani ia rātou ’ia pāpa’i hōho’a i te mau ahiripā tei fa’ata’ahia i roto i teie mau ’īrava : Exodo 7:17–18 ; 8:1–4 ; 8:16–17 ; 8:20–22 ; 9:1–6 ; 9:8–9 ; 9:22–23 ; 10:4–5 ; 10:21–22 ; 11:4–7 (hi’o ato’a « Te mau ahiripā o ’Aiphiti » i roto i Te mau ’ā’amu o te Faufa’a Tahito, 67–69). ’A tai’o ’āmui te Exodo 7:5 ’e 9:14 nō te fa’ata’a, nō te aha te Fatu i hōro’a mai ai i te mau ahiripā.

  

  2:3

• ’A parau i tā ’outou mau tamari’i e mea nāhea tō te Fatu fa’a’itera’a ia ’outou ē, « ’aore [tōna] e fāito i te ao ato’a nei » (Exodo 9:14). ’A vaiiho ia rātou ’ia parau mai nāhea rātou i te ’itera’a e mana rahi tō te Fatu.

• Nō te tauturu i tā ’outou mau tamari’i ’ia hi’o i te aura’a ’ia roa’a te hō’ē ’ā’au marū, e mea ’ārearea paha ’ia fa’a’ite atu ia rātou i te hō’ē tao’a pa’ari, mai te hō’ē ’ōfa’i, ’e te tahi atu tao’a marū ’e te ’ote, mai te hō’ē remu ’ote [éponge]. E nehenehe ato’a ’outou e māni’i i te pape i ni’a i teie mau tao’a nō te fa’a’ite e mea nāhea te ’ā’au marū i te fa’ari’i ’ōhie i te parau a te Fatu. I muri iho e nehenehe ’outou e tai’o ’āmui i te tahi mau ’īrava e fa’ata’a nei, nāhea Phara’o i te pāhonora’a i te mau ahirapā tei tonohia mai e te Fatu (hi’o Exodo 8:28–32 ; 9:7). E aha te mau tao’a e fa’ahōho’a maita’i a’e i te ’ā’au ’aore rā i te huru o Phara’o ? E aha te auraʼa ’ia roa’a te ʼāʼau marū ? (hi’o Mosia 3:19).

• E nehenehe ’outou ’e tā ’outou mau tamari’i e hāmani i te hō’ē tāpura nō te tahi mau ’ohipa ’o tē nehenehe e fa’a’ite mai e ’ā’au ’eta’eta tō tātou (’ei hi’ora’a, te fa’a’ohipara’a i te mau parau ’ino ’aore rā te ’orera’a e hina’aro e ’ōpere). Nāhea tātou e fa’a’ite i te Fatu ē, tē hina’aro nei tātou ’ia roa’a te ’ā’au marū ?

• Tē ha’api’i nei te Pāsa i te ’āti ’Īserā’ela ’ia tīa’i ma te fa’a’oroma’i i te Fa’aora ’e i tāna tūsia nō tātou. ’A hi’o haere ’āmui ai ’outou te Exodo 12:1–13, ’a tauturu i tā ’outou mau tamari’i ’ia hi’o i te tū’atira’a i rotopū i te mau hu’ahu’ara’a o te Pāsa ’e te Tāra’ehara a Iesu Mesia (hi’o ato’a « Te Pāsa » i roto i Te mau ’ā’amu o te Faufa’a Tahito, 70–74). ’Ei hi’ora’a, nāhea Iesu e riro ai mai te ’ārenio i fa’ata’ahia i roto i te ’īrava 5 ?

  

  2:54

• I teie mahana, e rave tātou i te ’ōro’a mo’a nō te ha’amana’o i te tūsia a Iesu. E nehenehe ’outou e fa’a’ite i tā ’outou mau tamari’i i te hō’ē hōho’a nō te ’ōro’a mo’a, ’e ’ia fa’ata’a nāhea teie ’ōro’a i te tauturu ia tātou ’ia ha’amana’o ia Iesu Mesia. E nehenehe ’outou e tauturu i tā ’outou mau tamari’i ’ia ’ite mai te ta’o « ha’amana’o » i roto i te mau pure o te ’ōro’a mo’a (hi’o Moroni 4–5). ’Aore rā e hīmene ’āmui i te hō’ē hīmene auhia nō ni’a i te ’ōro’a mo’a, ’e e tauturu i tā ’outou mau tamari’i ’ia ’ite mai i te nīno’a mana’o o te hau, ’o tā rātou e putapū nei ’ia mana’o ana’e rātou i te Fa’aora. Nāhea tātou ’ia ’imi i te reira nīno’a mana’o ’ia rave ana’e tātou i te ’ōro’a mo’a ?