2. Mósebók 14–18

Við lestur 2. Mósebókar 14:1–10, skuluð þið ímynda ykkur hvernig Ísraelsmönnum gæti hafa liðið þegar þeir sáu her faraós þokast nær. Ykkur finnst kannski eins og þið þarfnist kraftaverks til að komast yfir erfiða áskorun sem þið standið andspænis. Hvað lærið þið af 2. Mósebók 14:13–31 sem getur innblásið ykkur til að leita eftir mætti Guðs í lífi ykkar? Íhugið á hvaða hátt þið hafið séð mátt hans í lífi ykkar. Hvað hafið þið lært um hann af þessum upplifunum?

2. Mósebók 15:1–19 er lofsöngur sem Ísraelsmenn sungu eftir að Drottinn klauf Rauðahafið. Hvaða orðtök í þessum söng finnst ykkur einkar þýðingarmikil? Ef til vill langar ykkur að syngja sálm um það þegar Drottinn hefur komið einhverju undraverðu til leiðar fyrir ykkur, t.d. „Nú Ísraels lausnari“ (Sálmar, nr. 26). Íhugið að syngja eða hlusta á hann sem hluta af tilbeiðslu ykkar í dag.

Sjá einnig Kenning og sáttmálar 8:2–3.

Að lesa um ferð Ísraels gæti vakið ykkur til umhugsunar um það í lífi ykkar sem virðist „beiskt“, eins og vatnið í Mara (sjá 2. Mósebók 15:23–27). Hvernig hefur Drottinn gert hið beiska sætt í ykkar lífi? Hvaða gildi hafa slíkar upplifanir haft í lífi ykkar?

Þið munuð sjá fleiri dæmi um beiskar upplifanir Ísraelsmanna í 2. Mósebók 16 og 17. Það er freistandi að vera gagnrýninn á mögl þeirra og kvartanir, en íhugið þó við lesturinn hvort þið hafið einhvern tíma gert það sama. Hvað lærið þið af upplifunum Ísraelsmanna sem getur hjálpað ykkur að mögla minna og treysta meira Guði? Hvað kenna þessi vers ykkur um Guð?

Sjá einnig 1. Nefí 2:11–12.

Þar sem við þurfum öll að borða, líkir Drottinn oft andlegum hlutum við að matast. Leitið að andlegum lexíum hans í upplifunum Ísraelsmanna með manna í 2. Mósebók 16. Dæmi: Hvað finnið þið í leiðsögn Drottins í 2. Mósebók 16:16, 19, 22–26 sem á við um andlega næringu ykkar?

Til að uppgötva fleiri lexíur sem Drottinn gæti viljað að þið lærðuð af þessu kraftaverki, íhugið þá spurningar eins og þessar:

• Hvað gefur Drottinn mér sem er eins og hið daglega manna sem hann gaf Ísraelsmönnum?

• Hvað get ég gert sem er eins og að safna saman manna?

Þið gætuð fundið aukinn skilning í einu eða fleirum þessara myndbanda: „Daily Bread: Pattern,“ „Daily Bread: Experience“ og „Daily Bread: Change“ (Gospel Library).

2:52

3:12

3:0

Hugsið um aðra hluti en að matast sem þið gerið á hverjum degi. Af hverju þarf að gera ákveðna hluti daglega til að fullnægjandi sé? Hvað finnst ykkur þið hvött til að gera til að sækjast eftir andlegum upplifunum?

Sjá einnig Dieter F. Uchtdorf, „Dagleg endurreisn,“ aðalráðstefna, október 2021; „Daily Restoration“ (myndband), Gospel Library.

5:27

Hugsið til frelsarans við lestur 2. Mósebókar 17:1–7. Hvernig er Jesús Kristur eins og klettur í ykkar huga? (sjá Sálmana 62:7–8; Helaman 5:12). Á hvaða hátt er hann eins og vatn? (sjá Jóhannes 4:10–14; 1. Korintubréf 10:1–4; 1. Nefí 11:25).

Það gætu komið stundir í lífi ykkar þar sem þið getið fundið samsvörun með Móse – þegar aðrir reiða sig á ykkur, en „hendur [ykkar] þreytast“ (2. Mósebók 17:12). Á öðrum stundum gætuð þið verið líkari Aron, Húr og Jetró, sem studdu Móse. Setjið ykkur í spor hvers þessara einstaklinga þegar þið lesið 2. Mósebók 17:8–16; 18:13–26 og sjáið hvað Drottinn kennir ykkur um verk sitt.

Sjá einnig Mósía 4:27; 18:8–9.

• Þegar Drottinn klauf Rauðahafið, sáu Móse og Ísraelsmenn hve máttugur hann er. Leyfið börnum ykkar að hjálpa ykkur að hugsa um skemmtilega leið til að leika frásögnina í 2. Mósebók 14:5–22 (sjá einnig „Páskahátíð Gyðinga“ í Sögur úr Gamla testamentinu, 70–74). Þið gætuð ef til vill raðað upp stólum eða teppum og „klofið“ þau eins og þau væru Rauðahafið. Þið gætuð síðan sagt hvert öðru frá því hvernig þið hafið séð mátt Guðs í lífi ykkar.

  

  2:54

• Hverju bætir Kenning og sáttmálar 8:2–3 við skilning okkar á þessari sögu í 2. Mósebók 14? Íhugið að segja börnum ykkar frá reynslu þar sem heilagur andi sagði ykkur eitthvað í huganum eða hjartanu og bjóðið þeim að ræða um reynslu sína. Þið gætuð líka sungið söng um heilagan anda, t.d. „Heilagur andi“ (Barnasöngbókin, nr. 56).

• Þið og börn ykkar gætuð ef til vill drukkið eitthvað sætt og eitthvað beiskt í sameiningu meðan þið lærið saman 2. Mósebók 15:22–25 . Hvernig hefur frelsarinn gert „beiskar“ upplifanir „sætar“ í lífi okkar?

• Þegar þið og börn ykkar lesið 2. Mósebók 15:23–25; 16:14–15; 17:1–6, fáið þau þá til að hjálpa ykkur að finna hluti til að auðvelda að segja hverja sögu – eins og grein (til að lækna vatnið í Mara), krukku eða pott (til að fylla af manna) og klett (fyrir vatnið í Hóreb). Hvernig minna þessar sögur okkur á það sem Jesús Kristur gerir fyrir okkur? Sem hluta af umræðum ykkar, væri hægt að lesa: Matteus 7:24–27; Jóhannes 4:10–14; 6:29–35, 48–51; Helaman 5:12; Kenning og sáttmálar 20:77, 79.

• Þegar þið lesið 2. Mósebók 17:8–16, gætuð þið beðið barn að halda höndum sínum hátt á lofti. Þegar barnið verður þreytt geta önnur börn hjálpað á sama hátt og Aron og Húr hjálpuðu Móse. Hvað kennir þessi saga um það hvernig við getum hjálpað ríki Guðs að verða farsælt? Þið gætuð líka lesið 2. Mósebók 18:13–26 og rætt hina þungu ábyrgð fólks sem þjónar í deild ykkar. Hvað getum við gert í dag til að hjálpa kirkjuleiðtogum okkar á sama hátt og Aron og Húr hjálpuðu spámanninum Móse?