Te Otinako 14–18

Ngkai ko wareka Te Otinako 14:1–10, iangoia bwa tera aia namakin tibun Iteraera ngke a noora ana taanga ni buaka Barao ni uakaan n roko. Tao ko namakinna bwa ko kainnanoa te kakai n tokanikai i aon te kakaewenako ae matoa are ko kaitaraa. Tera ae ko reiakinna man Te Otinako 14:13–31 are kaira nanom n ukora mwaakan te Atua i nanon maium? Iangoia bwa ko kanga n tia n noora Mwaakana i nanon taai aika a nako. Tera ae ko reiakinaki i Bukina man waaki aikai?

Te Otinako 15:1–19 bon te anene n nebonebo ae a aneneia tibun Iteraera imwiina ngke e a tia te Uea ni bwenaua Taari ae Uraura. Tera mwakoro n taeka n te anene aei ae ko kunea bwa iai nanona riki nakoim? Tao e na iai te anene n taromauri ae ko kan aneneia ngke e a tia te Uea ni karaoa te bwai ae kamiimi ibukim, n ai aron “Redeemer of Israel” (Hymns, no. 6). Iangoia n aneneia ke n ongora nako iai bwa mwakoron am kamatebwai ao nebonebo n te bong aei.

Taraa naba Reirei ao Berita aika Tabu 8:2–3.

Warekan rongorongon aia mwananga tibun Iteraera e kona ni kairiko nakon iangoan bwaai i nanon maium ae e kona n taraa ni “mao” ai aron ranin Mara (taraa Te Otinako 15:23–27). E kanga te Uea ni karikii bwaai aika a mao i nanon maium bwa a na karewerewe? Tera kakawakin bwaai aika a riki aikai i nanon maium?

Ko na noori katooto riki aika a mao ibukiia tibun Iteraera i nanon Te Otinako 16 ao 17. E kona n anaaki nanom bwa ko na riba aia ngurengure ke aia aki rau n nano, ma ngkana ko wareware, iangoia ngkana ko a tia ni karaoa ae ai aron naba anne. Tera ae ko reiakinna man are a rinanona tibun Iteraera’ are e kona ni buokiko ni kauarerekea te ngurengure ao n onimakina riki te Atua? Tera ae a rereiniko kiibu aikai ibukin te Atua?

Taraa naba 1 Nibwaai 2:11–12.

Ngkai ti kainnanoa te amwarake, e aki toki ni kabotauii bwaai te Uea ma te amwarake. Noora ana reirei n tamnei i nanon aia waaki are a rinanona tibun Iteraera ma te maana Te Otinako 16. Te katooto, tera ae ko kunea n ana kaetieti te Uea n Te Otinako 16:16, 19, 22–26 ae kaineti nakon kamaiuraoan te tamnei?

Ni kunean ana reirei te Uea tabeua ko na kona n tangiria n reiakinna man te kakai aei, iangoi raoi titiraki n aron aikai:

• Tera ae anganai te Uea ni katoabong ae ai aron te manna are E anganiia tibun Iteraera?

• Tera ae I kona ni karaoia ae ai aron bobotakian te manna?

Ko kona n kunei nonoori riki n witeo aikai: “Daily Bread: Pattern,” “Daily Bread: Experience,” and “Daily Bread: Change” (Gospel Library).

2:52

3:12

3:0

Iangoi bwaai tabeua, irarikin te amwarake, ae ko kakaraoia ni katoabong. Bukin tera bwaai tabeua a riai ni karaoaki ni katoabong bwa e aonga n nakoraoi arona? Tera ae ko namakinna bwa ko kairaki bwa ko na karaoia ni ukora te taneiai n tamnei ni katoabong?

Taraa naba Dieter F. Uchtdorf, “Daily Restoration,” Liahona, Nov. 2021, 77–79; “Daily Restoration” (video), Gospel Library.

5:27

Iangoa te Tia Kamaiu ngkai ko wareka Te Otinako 17:1–7. N te aro raa ae Iesu Kristo bon te bwaa nakoim? (taraa Taian Areru 62:6–7; Ereman 5:12). N te aro raa ae Ngaia te ran? (taraa Ioane 4:10–14; 1 I-Korinto 10:1–4; 1 Nibwaai 11:25).

Tao iai taai ni maium ae ko kona ni kairekerekea nakon Mote—ngke a katan tabeman i roum, ma “a [namakina] te rawawata baim” (Te Otinako 17:12). N tabetai, ko kona n riki kanga ai aron Aaron, Ura ao Ietero ake a boutokaa Mote. Karikiko bwa ngkoe ibuakoia aomata aikai n tatabemaniia ngkana ko wareka Te Otinako 17:8–16; 18:13–26, ao n nooria bwa tera ae reireia te Uea ibukin Ana mwakuri.

Taraa naba Motiaea 4:27; 18:8–9.

• Ngke e bwenaua Taari are Uraura te Uea, a noora aron Mwaakana Mote ao tibun Iteraera. A kona ni buokiko am ataei ni iangoa te kawai n karaoa kanoan te karaki man Te Otinako 14:5–22 (taraa naba “The Passover” n Karaki man te O Tetemanti, 70–74). Ko kona n bairei kaintekateka ke rabuna ao n “kamaenakoa” n ai aron Taari are Uraura. I mwiina ko kona n tibwaia i marenami aron are ko nooria ni mwaakan te Atua i nanon maium.

  

  2:54

• Tera ae karekea otam man Reirei ao Berita aika Tabu 8:2–3 n te karaki n Te Otinako 14? Iangoia n taekina am taneiai ngke e tuangko te Tamnei ae Raoiroi te bwai teuana n am iango ke n nanom, ao kaoiia ataei bwa ana taekina aia taneiai. Kam kona naba n anenea te anene ibukin te Tamnei ae Raoiroi, n aron “Let the Holy Spirit Guide” (Hymns, no. 143).

• Tao ko kona n mooi ngkoe ma am ataei n te bwai ae karewerewe ao te mooi ae mao n ami tai ni kamatebwaia Te Otinako 15:22–25 ni bootaki. E kanga te Tia Kamaiu ni karikii bwaai aika “a mao” i nanon maium bwa a na karewerewe?

• Ngkai ko wareware ma am ataei n Te Otinako 15:23–25; 16:14–15; 17:1–6, a na buokiko ni kunei bwaai are ko na karaki iai—n ai aron te mwaanga ni kai (ni kamaiua te ran mai Mara), te tiaki ni mooi ke te bwaata (ni kaonaki iai te maana), ao te atiibu (ibukin te ran are i Oreba). A kanga karaki aikai ni kauringiia te bwai are e karaoia Iesu Kristo ibukira? Bwa kanoan ami marooro, kam kona ni wareka Mataio 7:24–27; Ioane 4:10–14; 6:29–35, 48–51; Ereman 5:12; Reirei ao Berita aika Tabu 20:77, 79.

• Ngkai kam wareka Te Otinako 17:8–16, ko kona n kaoa te ataei bwa e na taua baia i karawa. Ngkana e kua te ataei, a kona ni ibuobuoki ataei, n aron Aaron ao Ura ngke a buoka Mote. Tera ae reireiniira te karaki aei n aron buokan abanuean te Atua bwa e na nakoraoi? Kam kona naba n wareka Te Otinako 18:13–26 ao n marooroa aron tinebun mwioko irouia aomata ake a beku n ami uoote. Tera ae ti kona ni karaoia n te bong aei ni buokiia taan kairiiri n te Ekaretia, kanga aron Aaron ao Ura ni buoka te burabeti Mote?