Itita

A mwaiti kiibu n te O Tetemanti ake a kaota ana mwakuri n ibuobuoki te Tia Kamaiu ao ana karea ni kamaiu. Te taibora ae i nano a karinani tabeua kiibu aikai. Ngkana ko wareki kiibu aikai, tera te namakin ae roko iroum ibukin te Tia Kamaiu?

Taetae ni burabeti ake a reireia taekan te Tia Kamaiu a rangi ni mwaiti riki ao ni matata inanon ana Boki Moomon. Iangoia bwa e kanga am onimaki ni kakorakoraki man kiibu n aron aikai: 1 Nibwaai 11:31–33; 2 Nibwaai 25:13; Motiaea 3:2–11; Aramwa 7:10–13.

Burabeti ni boong aikai a reitinako n riki bwa taan kakoaua aika a onoti iroun Iesu Kristo ao n Ana mwakuri n anga karea. Ngkai ko ongora nakon te maungatabu ni kabuta n te wiikente n te Itita aio, korei taian kakoaua iaon Kristo ake ko ongo. Tera ae reireiniko Iaona?

Te Itita bon te tai ae kakukurei, ibukina bwa bon tain bukamaruan Ana Mwakuri ni Kamaiu ao Mangautin te Tia Kamaiu. Ma irarikin anne, n tain te Itita, a mwaiti aomata ake aki namakina te kukurei tao ni bukina aika mwaiti. Tera ae ko kona ni karaoia ni kabutanakoa ana rau ao ana kakukurei te Tia Kamaiu n te Itita aio?

Teuana te iango bon ukoran rongorongo inanon booki aika tabu iaon te rau ao te kimwareirei are e anga Iesu Kristo, n aron aikai: Taian Areru 16:8–11; 30:2–5; Itaia 12; 25:8–9; 40:28–31; Ioane 14:27; 16:33; Aramwa 26:11–22. Iangoia bwa ko na kanga n tibwai rongorongo aikai ma aomata tabeman. Te katooto, tao ko kona ni karaoi kaati ibukin te Itita n tibwaia, are a boboto iaon rongorongo aikai. Tataromwaaka bwa a na antai ae kainanoia ni karekea am kamauri ibukin te Itita. Ko na bae naba ni baireia n tibwaa am rongorongo iaon bwaai n reitaki, ike a kona n nooria aomata aika mwaiti.

Anene n taromauri iaon Kristo ao te Mangauti, n aron “He Is Risen!” (Anene n Taromauri, nambwa. 199), e kona naba ni buoka namakinan te rau ao te kimwareirei n tain te Itita. Kakaei mwakoro n taeka i nanon te anene are, n am iango, e karokoa te kimwareirei n tain te Itita.

Taraa naba Jeffrey R. Holland, “I Aki Anganingkami n Ai Aron te Aba,” Riaona, Meei 2021, 35–38; Mark S. Palmer, “E na Oneaki Nanokawakira bwa Kakatongara,” Riaona, Meei 2021, 88–90.

Aio te waaki ni kakukurei are e na kona ni buokiko n norii kakabwaia aika mwaiti ake a roko rinanon ana Mwakuri ni Kamaiu Iesu Kristo. Warekii kiibu ni koroboki aika tabu aika inano iaon tera ae e buokiira n tokanikai iai Iesu Kristo. Kataia bairei taian kibu inanon mwakoro aikai; te bure, te mate, kataaki, ao mamaara (tabeua kiibu a kona ni bootau nakon mwakoro aika mwaiti). Ngkai ko warekii, tera te namakin ae roko iroum ibukin te Tia Kamaiu?

• Itaia 61:1–3

• Etekiera 36:26–28

• Mataio 11:28–30

• Ruka 1:46–55

• I-Rom 8:35–39

• Aramwa 7:10–13

• Aramwa 11:42–45

• Aramwa 58:11

• Moronaai 10:32–33

• Reirei ao Berita aika Tabu 19:15–19

• Mote 5:9–12

Ko na kanga ni kabwarabwara nakon raraom ae tiaki te Kiritian bwa bukin tera e kakawaki Iesu Kristo iroum? Ana rongorongo Unimwaane Ahmad S. Corbitt “Ko Ataia bwa Bukin Tera Ngai ae te Kiritian I Kakoaua Kristo?” (Riaona, Meei 2023, 119–21) e kona ni ibuobuoki.

Taraa naba Reyna I. Aburto, “Akea Ana Tokanikai te Ruanimate,” Riaona, Meei 2021, 85–87; Topics and Questions, “Atonement of Jesus Christ,” “Resurrection,” Gospel Library.

Tera ae ko reiakinna man kiibu aikai iaon kabooan kamaiuakira iroun Iesu Kristo: Itaia 53:3–5; Motiaea 3:7; Reirei ao Berita aika Tabu 19:16–19? Tera ae e anga Tamara are i Karawa bwa kabooara? (taraa Ioane 3:16).

• Wiikin te Itita bon te tai ae tamaroa n reiakiniia am ataei bwa tera ae e karaoia te Tia Kamaiu ibukira i Keketemwane ao iaon te kaibangaki. Ko kona ni moanna ma kaotan tamnei aika inano ao ni kariaia bwa a na marooro iaona bwa tera ae e riki n te tamnei. Inanon aia tai am ataei n tarai tamnei, ko kona ni warekii kiibu ake a kabwarabwara aron te bwai ae riki aio (taraa Mataio 26:36–46; 27:35–50; Ruka 22:39–46; Ioane 19:16–30). A kona am ataei ni kaotii aron bwaai aika riki n te tamnei are a ongo inanon kiibu aikai.

• Ti kanga ni kakabwaiaaki ibukin ana anga karea Iesu ibukira? Buokiia am ataei ni kakaei taeka ao kibu n taeka ae e kaekaa te titiraki aei ni Itaia 53:4–12; Aramwa 7:11–13; ao Reirei ao Berita aika Tabu 19:16–19. Tibwaia i marenami ami namakin iaon te Tia Kamaiu imwin warekan kiibu aikai.

• Ko kona ni kabongana te iteraniba n te waaki ni kakukurei n te wiiki aei ke tamnei tabeua aika inanon te kabwarabwara aei n karakina nakoia am ataei karakinan te Mangauti (taraa naba “E a Uti Iesu,” inanon Karaki man te Nu Tetamenti, 139–44). Imwiina kaoia am ataei bwa a na karakina te karaki nakoim.

• Iangoia bwa kona kanga ni buokiia am ataei ni kunea te kimwareirei n tain te Itita aio. Te katooto, kam kona n uaia n anenea kunan te Itita ae mamaten nanomi, n aron “Christ the Lord Is Risen Today” (Anene n Taromauri, nambwa 200) ke “Gethsemane” (Gospel Library). Ni kakaean kuna tabeua iaon te Mangauti ko kona n tarai abentekiti n atuun reirei n Anene n Taromauri ao Aia Boki n Anene Ataei. Kam kona ngkoe ao am ataei n tibwaia imarenami bwa bukin tera ko tangirii kuuna aikai ao tera am namakin ngkai ko anenei. Tera ae ti reiakinna man anene aikai iaon Tamara are i Karawa ao Iesu Kristo?

• Te Gospel Library iai inanona taian witeo ibukin te Itita are a kona ni kukurei ni matakuakinna am ataei. Tao ko kona ni kariaia bwa a na bon rinea are a kan matakuakinna. Titirakiniia bwa tera ae a reiakinna iaon Iesu Kristo man te witeo. Ko kona naba n tuangiia bwa a na koreia ni kauarerekea te rongorongo man te witeo n ti teuana te tiententi.

• Ngkai ngkoe ao am ataei kam uaia ni mataku n te maungatabu ni kabuta n te wiikente n te Itita aio, buokiia bwa a na noria ngkana temanna te tia kaota koauan te Tia Kamaiu e kaota ana koaua iaon te Mangauti. Tao kam kona ni karaoa te takakaro iaona—kaoiia bwa a na teirake n te tai are a ongo te taeka n aron Itita ke Mwakuri ni Kamaiu ke Mangauti. Tibwatibwa imarenami bwa bukin tera kam kakaitau ibukin ana koaua te burabeti ae maiu iaon te Tia Kamaiu.