“Ebɔbira 13–19. ‘Hom Ngyina Dzinn, na Hom Nhwɛ Ewuradze no Nkwagye: Exodus 14–18,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Ebɔbira 13–19. ‘Hom Ngyina Dzinn, na Hom Nhwɛ Ewuradze no Nkwagye,’” Bra, Bɛka Mo Do: Ahyɛmu Dadaw 2026
Ebɔbira 13–19: “Hom Ngyina Dzinn, na Hom Nhwɛ Ewuradze no Nkwagye”
Exodus 14–18
Israelfo no atɔ efir mu. Nna Po Memen no wɔ afã, na Pharaoh no nsordaafo no so reba wɔ afã kor no so. Nna ɔyɛ dɛ hɔn nguanee fi Egypt no nnkɛkyɛr. Naaso nna Nyankopɔn wɔ asɛm dze ma Israelfo no a nna Ɔpɛ dɛ wɔkaa no ebusuasantsen nyina dɛ: “Mma hom nnsuro. … Ewuradze bɔkõ ama hom” (Exodus 14:13–14).
Ofitsi dɛm mber no, ber a Nyankopɔn no nkorɔfo hia gyedzi na akokodur no, wɔkã asɛm yi. Mber a nna Nephi pɛ dɛ okenyan no nuambanyin no, ɔkãa dɛ, “Hom mma yenya ahoɔdzen dɛ Moses; na nokwar, ɔkasaa kyerɛɛ nsu a ɔwɔ Po Memen no mu no ma no mu paa ebien, kor wɔ afã na kor so wɔ afã, na hɛn egyanom duaa mu, wɔ asaase kɛsɛɛ do, fii ndɔmmum mu” (1 Nephi 4:2). Mber a nna Ɔhen Limhi pɛ dɛ no nkorɔfo ndɔmmumfo “ma [hɔn] tsir do na [wo]dzi dɛw” no, ɔkaa hɔn asɛm yi ara (Mosiah 7:19). Dɛmara na Alma yɛe, mber a nna ɔpɛ dɛ ɔgye Nyankopɔn no tum ho dase kyerɛ ne babanyin no (hwɛ Alma 36:28). Na sɛ yɛtse nka dɛ yɛaka—mber a yehia gyedzi kakra dze akã ho dze “ehu Nyankopɔn no nkwagye” no—yebotum akaa mbrɛ “Ewuradze sii gyee Israel dɛm da” no (Exodus 14:13, 30).
Adwenkyerɛ horow ma Adzesũa wɔ Fie na wɔ Asɔr
Exodus 14; Exodus 15:1–21
Ewuradze botum ayɛ “edwuma kɛse’’ wɔ m’abrabɔ mu.
Ber a ekenkan Exodus 14:1–10 no, susu dza Israelfo no sii yɛe ber a wohun dɛ Pharaoh no nsordaafo no rebɛn hɔn ho. Ebia ibɛtse dɛ ihia anwanwadze dze egyina nsɔhwɛ a ɔyɛ dzen a ɔda w’enyim no. Ebɛnadze na ihu no wɔ Exodus 14:13–31 mu a okenyan wo ma ehwehwɛ Nyankopɔn no tum wɔ w’abrabɔ mu? Dwendwen mbrɛ esi ehu No tum wɔ nda a etwa mu no mu ho. Ebɛnadze na esũa efi sũahu horow yinom mu fa No ho?
Exodus 15:1–19 yɛ ayeyi ndwom a Israelfo no towee ekyir no a Ewuradze paa Po Memen no mu no. Ebɛn nsɛnsin na ɔwɔ ndwom yi mu a ihu no tsitsir ara dɛ ɔyɛ mfaso? Bia na asɔr ndwom bi wɔ hɔ a etse dɛ ebɔtow ber a Ewuradze ayɛ biribi nwanwa ama wo, tse dɛ “Redeemer of Israel” (Asɔr Ndwom, nkanee 6). Hwɛ dɛ ebɔtow anaa ibetsie dze akã w’asɔryɛ ho ndɛ.
San so hwɛ Nkyerɛkyerɛ na Ahyɛmudzi 8:2-3.
Exodus 15:22–27; 16:1–15; 17:1–7
Ewuradze botum ama ndzɛmba wenwen ayɛ dɛw.
Erekenkan Israel n’akwantu ho asɛm no botum egya wo ma adwendwen ndzɛmba a ɔwɔ w’abrabɔ mu ho a ɔyɛ “wenwen” tse dɛ Marah esu no (hwɛ Exodus 15:23–27). Ewuradze esi dɛn ama ndzɛmba a ɔyɛ wen wɔ w’abrabɔ mu no ayɛ dɛw? Ebɛn mfaso na sũahu horow yinom dze aba w’abrabɔ mu?
Ibohu sũahu horow wenwen ma Israelfo no mfatoho beberee wɔ Exodus 16 na 17 mu. Ɔnnyɛ dzen dɛ ebɛkasa etsia hɔn nwinwin anaa hɔn ayawdzi, naaso ber a ekenkan no, hwɛ sɛ ayɛ adze kor noara bi da. Ebɛnadze na isũa fi Israelfo hɔn sũahu horow mu a obotum aboa wo ma nnkewinwin pii na ebɔtwer Nyankopɔn yie? Ebɛnadze na nyiyimu yinom kyerɛkyerɛ wo fa Nyankopɔn ho?
San so hwɛ 1 Nephi 2:11–12.
Israelfo no roboaboa manna ano. Neo-gothic fresco, Trnava (ne fã bi))
Exodus 16
Ewuradze ma me daa daa sunsum mu edziban.
Osiandɛ ohia dɛ hɛn nyinara yedzidzi ntsi, Ewuradze dze sunsum mu ndzɛmba toto edziban ho. Hwehwɛ No sunsum mu adzesũadze a ɔwɔ Israelfo hɔn sũahu horow wɔ manna ho wɔ Exodus 16 mu. Mfatoho, ebɛnadze na ihu wɔ Ewuradze ne nkyerɛkyerɛmu wɔ Exodus 16:16, 19, 22–26 mu a ɔfa wo sunsum mu edziban ho?
Ama eehu adzesũadze bi so a Ewuradze bɛpɛ dɛ isũa fi anwanwadze yi mu no, dwendwen nsɛmbisa tse dɛ iyinom ho:
-
Ebɛnadze na Ewuradze dze ma me a ɔtse dɛ daa daa manna no a Ɔdze maa Israelfo no?
-
Ebɛnadze na mubotum ayɛ a ɔtse dɛ moroboaboa manna ano?
Ibotum enya nhumu ak ho wɔ video yinom kor anaa no mboree mu: “Daily Bread: Pattern,” “Daily Bread: Experience,” and “Daily Bread: Change” (Asɛmpa Nwoma Korabea).
Daily Bread: Pattern
Daily Bread: Experience
Daily Bread: Change
Edzidzi nda nkyɛn, dwendwen ndzɛmba bi so ho a eyɛ no da biara. Ebɛnadze ntsi na ɔwɔ dɛ wɔyɛ ndzɛmba bi daa daa ama ɔayɛ yie? Ebɛnadze na inya ho nkenyan dɛ ebɛyɛ dze ahwehwɛ daa daa sunsum mu sũahu?
Hwɛ Dieter F. Uchtdorf, “Daily Restoration,” Liahona, Ɔberɛfɛw 2021, 77–79; “Daily Restoration” (video), Asɛmpa Nwoma Korabea so.
Daily Restoration
Exodus 17:1–7
Jesus Christ nye mo sunsum mu ɔbotan na nkwa nsu.
Dwendwen Agyenkwa no ho ber a ekenkan Exodus 17:1–7. Jesus Christ si dɛn tse dɛ ɔbotan ma wo? (hwɛ Ndwom 62:6–7; Helaman 5:12). Osi dɛn na Ɔtse dɛ nsu? (hwɛ John 4:10–14; 1 Corinthfo 10:1–4; 1 Nephi 11:25).
Hwehwɛ honam mu ndzɛmba a wɔgye Christ no ho dase. Ber biara a kyerɛwsɛm no kã ndzɛmba a wobotum ayɛ Jesus Christ ho sɛnkyerɛdze no, tse dɛ Exodus 17:1–7 yɛ no, obotum ayɛ kwan ama adzesũadze bi. Erohwɛ anaa erosuo ɔbotan anaa nsu bi mu no botum ama ɔayɛ mberɛw dɛ ebɛtse mbrɛ ndzɛmba yinom si tse dɛ Jesus Christ ase. Sɛ ibotum dze mfafakuwa dodow akã adzesũa ho a, ɔbɛyɛ nkaadze na woenya nsunsuando yie.
Exodus 17:8–16; 18:13–26
Esuafo boa hɔn ho nkorkor ma “wɔsoa adzesoadze” no dɛ wɔreyɛ Ewuradze n’edwuma.
Mber bi bɔwɔ w’abrabɔ mu a ibotum dze ato Moses ho—mber a binom rohwɛ wo, naaso wo “nsa [yɛ dɛ] [ɔ]gyenee” (Exodus 17:12). Mber bi so no, ibotum ayɛ tse dɛ Aaron, Hur, na Jethro, a wɔgyee Moses abamba. Fa woho hyɛ nkorɔfo yinom mu biara hɔn gyinabew mu ber a ekenkan Exodus 17:8–16; 18:13–26, na hwɛ dza Ewuradze kyerɛkyerɛ wo fa N’Edwuma ho.
Hwɛ Mosiah 4:27; 18:8–9 so.
Epɛ bi akã ho a, hwɛ bosoom yi Liahona na For the Strength of Youth [Ma Mbabun Enya Ahoɔdzen] dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Exodus 14:5–22
Ewuradze botum ayɛ “edwuma kɛse” wɔ m’abrabɔ mu.
-
Mber a Ewuradze paa Po Memen mu no, Moses na Israelfo hun mbrɛ osi yɛ Tumfo. Ma wo mbofra no mboa wo ma dwendwen enyigye kwan bi ho a wɔdze bɛyɛ asɛm a ofi Exodus 14:5–22 mu ho ɔyɛkyerɛ (hwɛ “The Passover” wɔ Old Testament Stories mu, 70–74 so). Bia ibotum ahyehyɛ ngua anaa nkuntu na “apaa mu’’ tse dɛ Po Memen no. Nkyii hom botum nye homho akyɛ mbrɛ hom esi etum ehu Nyankopɔn no tum wɔ hom abrabɔ mu.
2:54The Passover
-
Ebɛnadze na Nkyerɛkyerɛ na Ahyɛmudzi 8:2-3 dze kã hɛn ntseasee fa asɛm a ɔwɔ Exodus 14 mu no ho? Hwɛ dɛ ebɛkã sũahu bi ho asɛm fa mber a Sunsum Krɔnkrɔn no kãa biribi kyerɛɛ wo wɔ w’adwen anaa w’akoma mu ho, na to nsa frɛ hɔn ma wɔnkã hɔn sũahu horow ho asɛm. Hom botum so atow ndwom a ɔfa Sunsum Krɔnkrɔn no ho, tse dɛ “Let the Holy Spirit Guide” (Asɔr Ndwom, nkanee 143).
Exodus 15:22–25
Ewuradze botum ama ndzɛmba wenwen ayɛ dɛw.
-
Bia ɔwo na wo mbofra botum anom biribi a ɔyɛ dɛw na biribi wenwen ber a wɔrobɔ mu sũa Exodus 15:22–25. Agyenkwa no esi dɛn ama sũahu horow “wenwen” wɔ hɛn abrabɔ mu no ayɛ “dɛw”?
Exodus 15:23–25; 16:14–15; 17:1–6
Jesus nye mo Nkwa Nsu, mo Nkwa Paanoo, na mo Botan.
-
Ber a enye wo mbofra kenkan Exodus 15:23–25; 16:14–15; 17:1–6 no, ma wɔmboa wo na hwehwɛ ndzɛmba a ɔbɔboa ma akã asɛm no—tse dɛ nkorbata bi (dze asa nsu a ɔwɔ Marah yarba), anaa kutu (wɔdze manna bɛhyɛ mu mã), na ɔbotan (ma nsu no a ɔwɔ Horeb no). Ebɛnadze na nsɛm yinom bɔ hɛn ho nkaa fa dza Jesus Christ yɛ ma hɛn ho? Hom botum akenkan Matthew 7:24–27; John 4:10–14; 6:29–35, 48–51; Helaman 5:12; NKyerɛkyerɛ na Ahyɛmudzi 20:77, 79 dze akã hom mpɛnsampɛnsamu no ho.
One Before God [Kor Wɔ Nyankopɔn N’enyim], Joseph Brickey yɛɛ nsaano mfonyin no (ne fã bi)
Exodus 17:8–16; 18:13–26
Mubotum aboa ma “wɔasoa adzesoadze” no dɛ yɛreyɛ Ewuradze n’edwuma.
-
Ber a ekenkan Exodus 17:8–16 no, ibotum ato nsa abofra bi ma wɔama ne nsa do sor wɔ wimu. Sɛ abofra no berɛ a, mbofra bi so botum aboa, wɔ kwan a Aaron na Hur boaa Moses no. Ebɛnadze na asɛm yi kyerɛkyerɛ fa mbrɛ yebesi botum aboa Nyankopɔn n’Ahenman ma ɔayɛ prɔmprɔm? Ibotum asan so akenkan Exodus 18:13–26 na akasa afa asodzi dudur horow a nkorɔfo a wɔsom wɔ wo ward wɔ ho. Ebɛnadze na yebotum ayɛ no ndɛ dze aboa hɛn Asɔr baanodzifo, dɛmara dɛ Aaron na Hur boaa nkɔnhyɛnyi Moses no?
Epɛ bi akã ho a, hwɛ bosoom yi Friend dawurbɔ krataa mu.