ʻEkesōtosi 1–6

Ko e hā e meʻa ʻokú ke mālieʻia ai ʻi he houʻeiki fafine ʻoku fakamatalaʻi mai ʻi he ʻEkesōtosi 1–2? Naʻa nau tokoni fēfē ke fakahoko e palani ʻa e ʻOtuá maʻa Hono kakaí? Ko e hā e meʻa ʻoku akoʻi atu ʻe heʻenau ngaahi ngāué fekauʻaki mo e tokoni ʻi he ngāue ʻa e ʻOtuá?

Kimuʻa peá ke kamata lau ʻa e ʻEkesōtosí, mahalo te ke fakakaukau ki ha faingataʻa ʻokú ke lolotonga foua—ko ha meʻa ʻokú ke ʻamanaki ʻe fakahaofi koe ʻe he ʻEikí mei ai. Ko e hā e ngaahi foʻi lea mo e kupuʻi lea ʻi he ʻEkesōtosi 1–3 ʻoku ongo tatau mo e pōpula fakalaumālié pe ngaahi meʻa kehe ʻoku tau fehangahangai mo ia he ʻaho ní? Fakatokangaʻi foki e founga naʻe fekumi ai e fānau ʻa ʻIsilelí ki ha fakatauʻatāiná pea mo e founga tali ʻa e ʻEikí (vakai, hangē ko ʻení, ʻEkesōtosi 2:23–25; 3:7–8). Ko e hā ha founga kuo “ʻalu hifo ke fakamoʻui” koe ʻe he ʻEikí?

Mahalo te ke fakatokangaʻi ʻi hono kotoa ʻo e tohi ʻEkesōtosí, ha ngaahi meʻa ʻoku faitatau ai ʻa Mōsese mo Sīsū Kalaisi (vakai, Teutalōnome 18:18–19; 1 Nīfai 22:20–21). Hangē ko ʻení, ko e hā ha ngaahi faitatau ʻokú ke sio ki ai ʻi he ʻEkesōtosi 1:22; 2:1–10 mo e Mātiu 2:13–16? Pe ʻi he vahaʻa ʻo e ʻEkesōtosi 24:18 mo e Mātiu 4:1–2? Ko e hā e meʻa ʻokú ke ongoʻi ʻoku finangalo ʻa e ʻEikí ke mahino kiate koe fekauʻaki mo Ia mo Hono mālohí?

Te ke lava nai ʻo fakakaukau ki ha taimi naʻá ke fuʻu ofoofo mo mohu fifili ai? Ko e hā hoʻo meʻa naʻe faí? Te ke fakamatalaʻi fēfē ʻa e ngaahi ongo fakaeloto naʻá ke ongoʻí?

ʻI hoʻo fakakaukau ki aí, lau ʻa e ʻEkesōtosi 3:1–6. Ko e hā ha meʻa naʻá ke mālieʻia ai ʻi he ngaahi aʻusia fakaofo ʻa Mōsesé? Ko e hā e meʻa naʻe fai ʻe Mōsese ke fakahaaʻi ʻaki ʻene loto-ʻapasia ki he ʻOtuá? Ko e hā ha ngaahi fehokotaki ʻokú ke vakai ki ai ki heʻene tōʻongá mo e loto-ʻapasia ki he ngaahi meʻa ʻoku toputapú?

ʻE ala ueʻi koe ʻe hono lau ʻo e ngaahi veesi ko ʻení ke ke fakakaukau ai ki he ngaahi meʻa māʻoniʻoní mo e ngaahi potu toputapu ʻi hoʻo moʻuí. Ko e hā e ʻuhinga ʻoku nau toputapu ai kiate koé? ʻOku makehe fēfē hoʻo fakafeangai kiate kinautolú mei he ngaahi meʻa angamahení? Ke tataki hoʻo fakalaulaulotó, te ke lava ʻo vakai ki he konga ʻoku ui ko e “Ko e Manatua e Ngaahi Talaʻofá” ʻi he pōpoaki ʻa ʻEletā David A. Bednar ko e “Ngaahi Talaʻofa Lahi ʻAupito mo Mahuʻingá” (Liahona, Nōvema 2017, 91–93). Te ke lava foki ʻo hivaʻi pe fanongo ki ha himi ʻokú ne ueʻi fakalaumālie ha ofoofo lahi, hangē ko e“ʻOku Fakaofo” (Ngaahi Himí, fika 102) pea fakalaulauloto ki he meʻa ʻoku fakaofo kiate koe fekauʻaki mo e ongoongoleleí.

Ko hono moʻoní, ʻoku tau ʻosi maʻu ha ngaahi aʻusia fakalaumālie fakaofo, ka ʻoku kei ʻi ai pē ha tuʻunga fakatuʻutāmaki ʻo hono fakavaʻivaʻingaʻaki ʻo e ngaahi meʻa ʻoku toputapú. Te ke fakaʻehiʻehi fēfē mei he meʻa pehení? Ko ha ongo pōpoaki ʻeni te ne ʻoatu e tali ki he meʻá ni; fili ha pōpoaki ʻe taha, pea kumi e ngaahi fakamatala ʻe tokoni atu kiate koé: Ulisses Soares, “Ofo ʻIa Kalaisi mo ʻEne Ongoongoleleí” (Liahona, Mē 2022, 115–17); Gérald Caussé, “ʻOku Kei Fakaofo Nai Kiate Koe?” (Liahona, Mē 2015, 98–100).

Vakai foki, Tokāteline mo e Ngaahi Fuakava 6:10–12; 63:64.

‘Oku tau ʻilo he ʻahó ni ʻa Mōsese ko ha palōfita mo e taki maʻongoʻonga. Ka naʻe ʻikai vakai ʻa Mōsese kiate ia ʻi he founga ko iá ʻi he taimi naʻe fuofua ui ai ia ʻe he ʻEikí. ʻI hoʻo lau ʻa e ʻEkesōtosi 3–4, hiki e ngaahi meʻa naʻe hohaʻa ki ai ʻa Mōsesé mo e founga ne ʻomi ai ʻe he ʻEikí ha tali kiate kinautolu takitahá. Ko e hā e meʻa ʻokú ke maʻu ʻi he ngaahi vahé ni te ne ala ueʻi koe ʻi hoʻo ongoʻi taʻefeʻungá? Ko e fē ha taimi kuó ke mamata ai ki hono fakaivia koe pe ko e niʻihi kehé ʻe he ʻOtuá ke fai ʻEne ngāué?

Vakai foki, “The Church Gives Us Opportunities to Assist in God’s Work” ʻi he “Church Organization” ʻi he Topics and Questions, Gospel Library.

ʻE lava ke fakalotosiʻi ʻa e taimi ʻoku hangē ʻoku ʻikai ola lelei ai ʻetau feinga fakamātoato ke fai leleí—ʻi he taimi ʻoku tau feinga ai ke fai e finangalo ʻo e ʻEikí kae ʻikai ke maʻu e ola naʻa tau ʻamanaki ki aí. Ke ako ki he aʻusia tatau naʻe maʻu ʻe Mōsesé, lau e ʻEkesōtosí 5:4–9, 20–23. Na‘e tokoniʻi fēfē ʻe he ʻEikí ʻa Mōsese ke ikunaʻi ʻene ngaahi ongoʻi loto-foʻí? (vakai, ʻEkesōtosi 6:1–13). = Kuo tokoni‘i fēfē koe ʻe he ʻEikí ke ke kātaki ʻi hono fakahoko Hono finangaló?

Vakai foki, Jeffrey R. Holland, “Tatali ki he ʻEikí,” Liahona, Nōvema 2020, 115–17.

• Naʻe ʻi ai ha tufakanga mahuʻinga ʻo Mōsese ʻi hono fakatauʻatāinaʻi ʻo ʻIsileli mei he pōpulá. Ka naʻe ʻikai ke ne mei lavaʻi ʻeni ʻo ka ne taʻeʻoua ʻa hono maluʻi mo tauhi ia ʻe heʻene faʻeé, ko hono tuofefiné, ko e ʻofefine ʻo Feló pea mo ha kakai fefine kehe. Tokoniʻi hoʻo fānaú ke nau ako ʻo kau ki he kau fafine ko ʻení ʻi he ʻEkesōtosi 1:15–20; ʻEkesōtosi 2:2–10 (vakai foki, Nōmipa 26:59); mo e ʻEkesōtosi 2:16–21. Te ke lava foki ʻo fakaʻaongaʻi ʻa e peesi ʻekitivitī ʻo e uike ní mo e “Pēpē ko Mōsesé” (ʻi he Ngaahi Talanoa ʻo e Fuakava Motuʻá, 61–63) ke fai ʻaki ʻenau ngaahi talanoá. Na‘e tokoni fēfē ʻa e kau fafiné ni ke fakahoko e palani ʻa e ʻOtuá? Mou fetalanoaʻaki ʻo kau ki he kakai kehe ʻokú ke tanganeʻia ai ʻi heʻenau tokoni ki he ngāue ʻa e ʻOtuá, kau ai ʻenau tokoni ʻi ha fanga kiʻi founga iiki mo faingofua. Te tau muimui fēfē ʻi heʻenau sīpingá?

  

  1:36

• Hili hono lau fakataha e ʻEkesōtosi 3:1–5, kole ki hoʻo fānaú ke nau fakamatalaʻi fakanounou e ngaahi veesi ko ʻení ʻi he lea pē ʻanautolu (vakai foki, “Mōsese ko e Palōfitá” ʻi he Ngaahi Talanoa ʻo e Fuakava Motuʻá, 64–66). Naʻe fakahaaʻi fēfē ʻe Mōsese ʻa e loto-ʻapasiá ʻi he ʻao ʻo e ʻEikí? Ko e hā ʻa e founga ʻoku finangalo ai e ʻEikí ke tau fakahaaʻi ʻa e loto-ʻapasiá? Te ke lava foki ʻo kole ki hoʻo fānaú ke nau tokoni atu ʻi hono kumi (pe tā) ha ʻū fakatātā ʻo ha ngaahi feituʻu toputapu pe ngaahi ʻekitivitī ʻoku totonu ke tau loto-ʻapasia ai. Ko e hā ha meʻa te tau lava ʻo fai ke ʻai hotau ʻapí ke hoko ko ha feituʻu toputapu?

  

  1:26

• Hivaʻi fakataha ha foʻi hiva fekauʻaki mo e loto-ʻapasiá, hangē ko e “ʻApasiá ko e ʻOfa” (Tohi Hiva ʻa e Fānaú, 12). ʻI hoʻo fai iá, ʻe lava ke ʻilo ʻe hoʻo fānaú ha ngaahi foʻi lea pe kupuʻi lea ʻokú ne fakamatalaʻi ʻa e ʻuhinga ʻo e loto-ʻapasiá. Kapau ko ʻetau fuofua ʻomi ʻeni ha kaungāmeʻa ki he lotú, te tau fakamatalaʻi fēfē ki ai ʻa e ʻuhinga ʻo e loto-ʻapasiá?

• ʻI hono fakaʻaongaʻi ʻo e fakamatala ʻi he ʻEkesōtosi 3; 4:1–17, tuku ke taufetongi hoʻo fānaú ʻi heʻenau fakangalingali pē ko Mōsese kinautolú. Mahalo ʻe fakafiefia ke fakakau mai ha fanga kiʻi meʻa faingofua, hangē ko ha kasa mo ha fuʻu ʻakau ke ne fakafofongaʻi ʻa e fuʻu ʻakau ʻoku velá. Tokoniʻi hoʻo fānaú ke nau ʻiloʻi ʻa e ongo naʻe maʻu ʻe Mōsese fekauʻaki mo e ngāue naʻe ʻoange ʻe he ʻEikí kiate iá (vakai, ʻEkesōtosi 3:11; 4:1, 10). Mahalo te mou lava ʻo fevahevaheʻaki ha ngaahi taimi naʻa mou maʻu ai ha ngaahi ongo tatau. Ko e hā ha faleʻi te tau vahevahe kia Mōsese ke tokoni kiate iá? Laukonga ki he founga naʻe poupouʻi ai ʻe he ʻEikí ʻa Mōsesé ʻi he ʻEkesōtosi 3:12; 4:2–9, 11–12. Talanoa ki he fānaú ha founga kuo tokoniʻi ai koe ʻe he Fakamoʻuí ke ke fakahoko ha uiuiʻi, muimui ki ha ueʻi, pe fai ha meʻa kehe naʻe faingataʻa kiate koe.