Genesis 24–33

Habang binabasa mo ang Genesis 24, itanong sa iyong sarili kung bakit itinuring ni Abraham ang pag-aasawa ng kanyang anak na si Isaac na napakahalaga. Bakit mahalaga sa Diyos ang pagsasama ng mag-asawa?

Anong mga katangian ang nakikita mo kay Rebecca na makakatulong sa isang matibay na pagsasama ng mag-asawa at pamilya? (tingnan lalo na sa mga talata 15–28, 57–61).

Tingnan din sa Mga Paksa at mga Tanong, “Kasal,” Gospel Library.

Sa kultura nina Isaac at Rebecca, tinatanggap ng panganay ang karapatan sa pagkapanganay, na ibig sabihin ay mas malaking mana, kasama ang mas malalaking responsibilidad sa pangangalaga sa pamilya. Habang binabasa mo ang Genesis 25:29–34, pagnilayan kung bakit naging handa si Esau na ipagpalit sa pagkain ang kanyang karapatan sa pagkapanganay. Anong mga aral ang makikita mo para sa iyong sarili sa salaysay na ito? Maaaring makatulong ang paggawa ng dalawang listahan: (1) walang-hanggang mga pagpapalang nais ibigay sa iyo ng Diyos at (2) mga makamundong bagay na maaaring makagambala sa iyo. Pagkatapos ay maaari mong basahin ang talata, na pinapalitan ang “karapatan sa pagkapanganay” ng isang bagay mula sa unang listahan at ang “nilaga” ng isang bagay mula sa pangalawang listahan. Paano ka magtutuon sa Tagapagligtas at sa mga walang-hanggang pagpapala ng Kanyang ebanghelyo?

Tingnan din sa Mateo 6:19–33; M. Russell Ballard, “Alalahanin Kung Ano ang Pinakamahalaga,” Liahona, Mayo 2023, 105–7.

Habang natutulog sa unan na mga bato, nagkaroon si Jacob ng isang panaginip na nagpabago ng kanyang buhay. Napakasagradong karanasan niyon kaya tinawag ni Jacob ang lugar na Bethel, o “bahay ng Diyos,” na nagpapahayag na, “Tunay na ang Panginoon ay nasa lugar na ito” (Genesis 28:16).

Habang binabasa mo ang Genesis 28, maaari mong itanong sa iyong sarili kung bakit napakasagrado ng karanasang ito kay Jacob. Ano ang pinagdaraanan niya sa oras na iyon? Ano kaya ang nadarama niya noon? Maaari ka ring maghanap ng mga salita at parirala sa mga talata 10–22 na nagpapaalala sa iyo ng bahay ng Panginoon. Anong mga impresyon ang natatanggap mo tungkol sa Diyos, sa Kanyang bahay, at sa Kanyang mga tipan?

Sa dulo ng outline na ito ay may isang painting na naglalarawan sa panaginip ni Jacob; maaari mong tukuyin iyon habang nagbabasa ka. Kung lilikha ka ng sarili mong makasining na paglalarawan ng kanyang panaginip, ano ang gagawin mo? Anong mga katotohanan mula sa kuwento ang susubukan mong ilarawan?

Ang himnong “Sa Inyo, Aking Diyos, Lumalapit” (Mga Himno, blg. 55) ay batay sa karanasan ni Jacob. Anong mga koneksyon ang nakikita mo sa pagitan ng awiting ito at ng Genesis 28:10–22? Paano ka tinutulungan ng templo na madama na mas malapit ka sa Diyos? Isiping maghanap ng mga sagot sa tanong na ito sa mensahe ni Pangulong Russell M. Nelson na “Ang Templo at ang Inyong Espirituwal na Pundasyon” (Liahona, Nob. 2021, 93–96). Maaaring nais mo ring rebyuhin ang mga tipan at pagpapala ng bahay ng Panginoon sa Pangkalahatang Hanbuk, 27.2 (Gospel Library). Paano inihahatid ng pagtupad sa mga tipang ito ang kapangyarihan ng Diyos sa iyong buhay?

Habang binabasa mo ang Genesis 29:31–35 at 30:1–24, hanapin ang mga salitang naglalarawan sa awa ng Diyos kina Raquel at Lea. Pagnilayan kung paano “tiningnan ng Panginoon ang [iyong] kapighatian” at “inalala” ka (Genesis 29:32; 30:22).

Nang bumalik si Jacob sa Canaan, siya ay “natakot nang husto at nabahala” kung paano siya tatanggapin ng kanyang kapatid na si Esau (Genesis 32:7). Habang binabasa mo ang Genesis 32–33, pagnilayan ang sarili mong mga relasyon sa pamilya—marahil lalo na ang isang relasyon na nangangailangan ng paghihilom. Maaari ka sigurong mahikayat ng kuwentong ito na tumulong sa isang tao. Maaaring gabayan ng mga tanong na katulad nito ang iyong pagbabasa:

• Paano naghanda si Jacob na makipagkita kay Esau?

• Ano ang namukod-tangi sa iyo tungkol sa panalangin ni Jacob na matatagpuan sa Genesis 32:9–12?

• Ano ang natututuhan mo tungkol sa pagpapatawad mula sa halimbawa ni Esau?

• Paano tayo matutulungan ng Tagapagligtas na mapaghilom ang mga relasyon sa pamilya?

• Bakit ayaw ni Abraham na ikasal si Isaac sa isang taga-Canaan?

• Bakit nagpanggap si Jacob na siya si Esau?

Iklik para makita ang iba pa.

• Para maitampok ang kahanga-hangang halimbawa ng kabaitan ni Rebecca, maaari mong ipakita sa iyong mga anak ang larawan sa ibaba o sa pahina ng aktibidad para sa linggong ito habang ibinubuod mo ang kuwento sa Genesis 24:10–21. Maaaring masiyahan ang iyong mga anak na isadula ang kuwento. Maaari itong humantong sa isang pag-uusap tungkol sa mga kabaitang nakita ninyo ng iyong mga anak.

• Isiping sama-samang kumanta ng isang awitin tungkol sa kabaitan, tulad ng “Sa Akin Nagmumula ang Kabaitan” (Aklat ng mga Awit Pambata, 83). Anyayahan ang iyong mga anak na pakinggan ang salitang “kabaitan” (o isang katulad na salita) at patayuin sila kapag narinig nila ito. Paano tayo maaaring maging mabait na katulad ni Rebecca?

• Isiping gamitin ang “Jacob at Esau” (sa Mga Kuwento sa Lumang Tipan, 38–41) para maipaunawa sa iyong mga anak ang kuwento sa Genesis 25:21–34. Maaari sigurong wariin ng iyong mga anak na humingi ng payo si Esau kung dapat ba niyang ipagpalit ang kanyang karapatan sa pagkapanganay sa isang mangkok ng nilaga. Ano ang sasabihin nila sa kanya?

  

  2:5

• Anong mga bagay ang mahalaga magpakailanman sa iyo at sa iyong mga anak? Marahil ay makakahanap ang iyong mga anak ng mga larawan o bagay na kumakatawan sa mga bagay na ito. Paano natin maipapakita sa Panginoon na mahalaga sa atin ang mga bagay na ito?

• Habang binabasa ninyo ang Genesis 28:10–22 nang sama-sama, maaari kang gumamit ng isang hagdan (o isang larawang katulad ng nasa dulo ng outline na ito) para talakayin kung paano naging parang hagdan ang ating mga tipan. Maaaring magkunwari ang iyong mga anak na umaakyat sa hagdan, at sa bawat hakbang, talakayin ang mga pagkakataon na nangangako tayong sundin ang Diyos, tulad noong kapag tayo ay binyagan, tumanggap ng sakramento, o nagpunta sa templo. Paano tayo mas nailalapit ng ating mga tipan sa Diyos?

• Para mapasimulan ang mga talatang ito, maaari mong ipaliwanag na pagkaraan ng maraming taon ng samaan ng loob, makikipagkitang muli si Jacob kay Esau. Sama-samang basahin ang Genesis 32:6–11. Ano ang naramdaman ni Jacob? Ano ang ginawa niya para makahingi ng tulong? Sama-samang basahin ang Genesis 33:1–4 para tuklasin kung paano sinagot ng Panginoon ang panalangin ni Jacob. Kung makakausap tayo nina Jacob at Esau ngayon, ano kaya ang sasabihin nila para matulungan tayo kapag may pagtatalo sa ating pamilya?