Mohi 7

I te akohanga tuatahitanga a te Poropiti Hōhepa Mete e pā ana ki a Enoka me tana Pā Tapu, ka hihiko tōna ngākau. I “mōhio ia ka tae mai te rā e whakapūmauhia mai anō a Hīona e te Ariki ki runga i te whenua” (Saints, 1:108–9), i reira tīmata ai tana whai ki te waihanga i a Hīona. Mā te pānui i Mohi 7 e whakahihiko i tō ngākau ki te whai tonu i tēnei rā.

Hei tīmatatanga pea māu me rangahau ēnei pātai “He aha a Hīona?” ā, “He aha tōna rerekē i ērā atu wāhi o te ao?” Me whakarārangi ngā whakautu e puta mai ai ki a koe i a koe e rangahau ana i Mohi 7, arā, ko ngā whiti 16–21, 27, 53, 62–69.

Mā ō whakautu ki ēnei pātai e mārakerake ai te kite atu he nui tonu ngā mahi hei mahi kia hangaia ake a Hīona. Nō reira, me pēhea tātou e pēnei ai? Tērā pea ka pai mēnā ka huri ō whakaaro ki ngā wā i rongo koe i te “manawa tahi ai, ā, whakaaro tahi ai” me tētahi atu (Mohi 7:18). Tērā pea i roto i tētahi wāri, whānau, rōpū rānei i te mahi, i te kura rānei. He aha ngā mahi i mahia ai e te tangata kia whakatupuria te kotahitanga tika?

Anei ētahi atu rauemi hei āwhina i tō rapu i ētahi atu whakaaro. Tīpakohia tētahi, ētahi rānei hei rangahau, kātahi ka tuhia iho tāu e rongo ai hei tautoko i te hanganga ake o Hīona:

• Piripiana 2:1–4; 4 Nīwhai 1:15–18; Whakaakoranga me ngā Kawenata 97:21; 105:5.

• Ulisses Soares,“Brothers and Sisters in Christ,” Liahona, Noema 2023, 70–73.

• D. Todd Christofferson, “One in Christ,” Liahona, Mei 2023, 77–80.

He aha te tikanga o te tū a Ihu Karaiti hei Kīngi mōu? Kia aro atu ki ērā atu ingoa o Ihu Karaiti i tēnei whiti. He aha ngā mea e ako ai koe i ērā Mōna? He aha te tikanga o te kōrero e mea ana, haere mai “i te kēti, ā, [kakea] ake ki [Tōna] taha”?

Tirohia anōtia “Come, O Thou King of Kings,” Hymns, no. 59.

Ki tā ētahi titiro ko te Atua tētahi mea kei tawhiti kāore e tino aro ana ki ngā mea e pā ai ki a tātou. I rerekē tā Enoka tirohanga mō te Atua nā te kitenga kei Mohi 7. He aha tāna i ako ai mō te Atua—he aha tāu e ako ai—i ngā whiti 28–40? He aha te tikanga ki a koe i tino ohorere ai a Enoka i tana kitenga i te Atua e tangi ana? He aha e whakahirahira ai kia mōhio koe e pēnā ana Ia?

Hono tonu ana te kitenga rā, ka tangi hoki a Enoka. Engari i whakakitea atu e te Atua ki a ia ētahi mea hei koa. Kimihia ērā i Mohi 7:41–69. He aha tāu e ako ai i tā Enoka kitenga mā konā āwhina i a koe kia “hikina ake tō ngākau, ā, kia koa,” ahakoa ngā mea “kawa” i tō oranga (whiti 44)?

Tirohia anōtia tā Jeffrey R. Holland, “The Grandeur of God,” Liahona, Nov. 2003, 70–73.

Ko te kitenga a Enoka, arā, ko te mea kua tuhia mai nei i Mohi 7:59–67, tētahi o ngā poropititanga tuatahi i ngā hītori e pā ana ki te Haerenga Tuaruatanga a te Kaiwhakaora. He aha ngā mea pai ki a koe e pā ana ki ngā kōrero mō ngā rā whakamutunga? Hei tauira, he aha ō whakaaro e pā ana ki te whakatutukitanga o ngā poropititanga i whiti 62 . He aha ngā mea e whakaakona ai i ēnei whiti e pā ana ki tā te Atua mahi i ngā rā whakamutunga?

Tirohia anōtia a Henry B. Eyring, “Sisters in Zion,” Liahona, Noema 2020, 67–69.

• Hei āwhina i ō tamariki me tā rātou ako e pā ana ki a Enoka me Hīona, māu e whakamahi “Enoch the Prophet” i Old Testament Stories (19–21) te whiti tuarua rānei o “Follow the Prophet” (Children’s Songbook, 110–11). Kātahi ka taea ō tamariki te tono kia takina ai ngā kōrero i roto i ā rātou ake kupu. Mā ngā pikitia o Enoka i tēnei whakatakotoranga mahi e āwhina.

• Anei tētahi mahi hei āwhina i ō tamariki kia mārama ai he aha te tikanga o te kōreo kia “manawa tahi ai ngā whakaaro” (Mohi 7:18): Hangaia tētahi manawa pepa kātahi ka tapatapahia kia maha ngā wāhi, kia rahi rawa e taea ai te tohatoha kia whai ngā tamariki katoa i tētahi o aua pepa. Tukua rātou kia tuhia ō rātou ingoa ki runga i te pepa kei a rātou kātahi ka mahi tahi ki te whakapiri anō i taua manawa. I a rātou e pērā ana, me kōrero e pā ana ki ngā āhuatanga o tēnā tamaiti, o tēnā tamaiti e aroha nei koe.

• Āwhinatia ō tamariki kia tatauria e hia ngā taima e kitea ai te kupu “Hīona” i Mohi 7:18–21, 62–63, 68–69. Hei ia wā e rapua ai taua kupu, āwhinatia rātou kia rapua he aha tā taua whiti e pā ana ki a Hīona (tirohia anōtia te Pukapuka Aratohu ki ngā Karaipiture, “Hīona,” Wharepukapuka Rongopai). Me pēhea tātou e rite ake ai ki ngā tāngata e kōrerotia ana i roto i ēnei whiti?

• Me kōrero tahi e koutou ko ō tamariki e pā ana ki tētahi kōwhiringa inatata nei hei huataki ake i ngā kōrero mō Mohi 7:32–33 . Kātahi ka taea te pānui tahi i ngā whiti kia rapu māramatanga e pā ana ki tā te Matua i te Rangi e pai ai hei kōwhiringa mā tātou. He aha ngā momo kōwhiringa e taea nei e tātou kia whakaatu atu ki a Ia kei te kōwhiri tātou i a Ia? Tērā pea ka whakaaria mai nei e ō tamariki ēnei kōwhiringa kātahi ka waiho mā te toenga hei whakapae he aha te kōwhiringa e whakaaria mai nei e rātou.

• I roto o Mohi 7:59, ka uia e Enoka tētahi pātai ki te Ariki. Tonoa ō tamariki kia rapua tērā pātai kātahi ka tonoa rātou kia rapua te whakautu i whiti 60. Māu anō pea rātou e kōrero mō tētahi wā i te whakarite rātou kia hoki mai ai tētahi ki te kāinga. Pātai atu ki a rātou he aha ō rātou whakaaro me tā rātou hei whakarite. He aha tā tātou hei whakarite mō te hokinga mai a Ihu?

• Hoatu ngā pikitia ki ngā tamariki e hāngai ana ki ngā wā i puta mai ai te Kaiwhakaora ki te iwi (pērā i Gospel Art Book, nama. 60, 82, 83, me te 84). E aha ana ngā tāngata i roto i ēnei pikitia? He aha pea ngā whakaaro, kare ā–roto rānei o ngā tāngata i tā rātou tūtakitanga ki a Ihu? Me waiata tahi anō i tētahi waiata e pā ana ki te Haerenga Tuaruatanga Mai a te Kaiwhakaora, pērā i “When He Comes Again” (Children’s Songbook, 82–83) kātahi ka uia ngā tamariki ka pēhea ina hoki mai anō a Ihu. Tonoa āu tamariki ki te tuku kōrero mō ō rātou whakaaro ina kite atu rātou i a Ihu ina hoki mai anō Ia.