Genesis 3–4; Moises 4–5

Totoo na ang pagpili nina Adan at Eva ay humantong sa marami sa mga paghihirap na nararanasan natin sa mortalidad. Ngunit hindi iyan nangangahulugan na ikinalulungkot natin ang kanilang pinili. Habang binabasa mo ang Genesis 3 at Moises 4, maaari mong itanong sa iyong sarili, bakit mahalaga ang Pagkahulog sa plano ng Diyos?

Ayon sa Moises 5:9–12, ano ang nadama nina Adan at Eva tungkol sa Pagkahulog? Paano mo maiaangkop ang kanilang mga salita sa iyong mga karanasan sa makasalanang mundong ito? Ano pa ang natutuhan mo mula sa 2 Nephi 2:19–25?

Tingnan din sa Mosias 3:19; Alma 12:21–37; at Doktrina at mga Tipan 29:39–43.

Ang kuwento nina Adan at Eva ay tungkol sa pag-asa at pagtubos sa pamamagitan ni Jesucristo. Para malaman kung bakit, maaari kang magsimula sa paghahanap ng mga resulta ng Pagkahulog sa Genesis 3:1–7; Moises 4:22–31 at pagmamarka o paglilista kung ano ang matagpuan mo. Paano nakakaapekto sa iyo ang mga resultang ito? Pagkatapos ay maaari mong saliksikin ang Moises 5:4–15, na inaalam ang plano ng Diyos na tubusin tayo mula sa mga epektong ito. Bakit “natuwa” sina Adan at Eva matapos silang bisitahin ng anghel? Ano ang natututuhan mo mula sa kanila tungkol sa plano ng Ama sa Langit?

Tingnan din sa “Because of Him” (video), Gospel Library.

2:45

Mali kung minsan ang pagkaunawa sa siping ito ng banal na kasulatan na makatwirang tratuthin ng isang lalaki nang hindi maganda ang kanyang asawa. Sa ating panahon, itinuro ng mga propeta ng Panginoon na dapat ituring ng mag-asawa ang isa’t isa bilang pantay na katuwang sa pagtupad sa kanilang banal na mga responsibilidad sa pamilya (tingnan sa “Ang Mag-anak: Isang Pagpapahayag sa Mundo” [Gospel Library]). Ipinaliwanag nina Elder Dale G. Renlund at Sister Ruth Lybbert Renlund na ang isang mabuting asawa “ay hahangaring maglingkod; aaminin niya ang kanyang pagkakamali at hihingi ng tawad; mabilis siyang magbibigay ng papuri; isasaalang-alang niya ang mga kagustuhan ng mga kapamilya; aakuin niya ang bigat ng responsibilidad na tustusan ‘ang mga pangangailangan sa buhay at kaligtasan’ ng kanyang pamilya; pakikitunguhan ang kanyang kabiyak nang may lubos na paggalang at pagpipitagan. … Pagpapalain niya ang kanyang pamilya” (The Melchizedek Priesthood: Understanding the Doctrine, Living the Principles [2018], 23).

Itinuro ni Elder Dale G. Renlund, “Ang mithiin ng ating Ama sa Langit bilang magulang ay hindi ang iutos sa Kanyang mga anak na gawin kung ano ang tama; kundi ang piliin [ng Kanyang mga anak] na gawin kung ano ang tama at sa huli ay maging katulad Niya” (“Piliin Ninyo sa Araw na Ito,” Liahona, Nob. 2018, 104). Bakit napakahalaga sa plano ng Ama sa Langit na piliin nating gawin ang tama?

Habang binabasa mo ang Moises 4:1–4, alamin kung ano ang ginawa ng Ama sa Langit at ni Jesucristo para protektahan ang iyong karapatang pumili—ang iyong kalayaan. Paano mo maa-access ang kanilang kapangyarihang magprotekta? Para sa mga ideya, isiping pag-aralan ang bahaging “Gumawa ng mga inspiradong pagpili” sa Para sa Lakas ng mga Kabataan: Isang Gabay sa Pagpili (4–5).

Isipin ding basahin ang itinuro ni Lehi tungkol sa kalayaan sa 2 Nephi 2:11–20, 25–30. Bakit kailangan ang oposisyon para sa kalayaan? Paano mo maipapakita ang iyong pagpapahalaga kay Jesucristo na ginawa kang “malayang makapipili”? (2 Nephi 2:27).

Tingnan din sa Dallin H. Oaks, “Pagsalungat sa Lahat ng Bagay,” Liahona, Mayo 2016, 114–17; Mga Paksa at mga Tanong, “Kalayaang Pumili at Pananagutan,” Gospel Library; “Piliin ang Tama,” Mga Himno, blg. 145.

Habang binabasa mo ang Moises 4:4–12; 5:13–33, isiping ilista ang mga paraan na tinangka ni Satanas na tuksuhin sina Adan at Eva at ang kanilang mga anak. Paano niya tinatangkang gawin ang mga bagay na ito ngayon? Paano ka matutulungan ng Ama sa Langit na labanan ang mga panlilinlang ni Satanas?

Matapos kumain ng ipinagbabawal na bunga, sinikap nina Adan at Eva na takpan ang kanilang sariling kahubaran. Kalaunan, nag-alok ang Panginoon na damitan sila. Habang binabasa mo ang Moises 4:13–16, 27, isipin ang sumusunod:

• Pagnilayan kung ano ang maaaring kumatawan sa kahubaran at pananamit sa mga banal na kasulatan (tingnan, halimbawa, sa Apocalipsis 7:9, 13–15; 2 Nephi 9:14; Doktrina at mga Tipan 109:22–26, 76). Ano ang natututuhan mo mula sa karanasan nina Adan at Eva tungkol sa kahubaran at pananamit?

• Kung na-endow ka na sa templo, isipin kung ano ang maaaring sabihin sa iyo nina Adan at Eva tungkol sa kahalagahan ng iyong temple garment at kung ano ang kinakatawan nito.

Tingnan din sa “Sacred Temple Clothing” (video), Gospel Library.

4:16

Habang pinag-aaralan mo ang Moises 5:4–9, 16–26, isipin ang mga saloobin nina Adan at Eva at ng kanilang mga anak na sina Cain at Abel sa sakripisyo. Bakit tinanggap ng Panginoon ang hain ni Abel ngunit hindi ang kay Cain?

Ano ang inuutos ng Panginoon na isakripisyo mo? Mayroon bang anuman sa mga talatang ito na humuhubog sa paraan ng pag-iisip mo tungkol sa mga sakripisyong iyon?

• Nagbigay ba ng magkakasalungat na kautusan ang Diyos kina Adan at Eva sa Halamanan ng Eden?

• Kasalanan ba ang pagkain nina Adan at Eva ng ipinagbabawal na bunga?

• Ano ang alam natin sa sumpa at tanda na inilagay kay Cain?

Iklik para makita ang iba pa.

• Para mas maipaunawa sa iyong mga anak ang Pagkahulog nina Adan at Eva, maaari mong kopyahin ang mga larawan mula sa “Adan at Eva” (sa Mga Kuwento sa Lumang Tipan, 13–16) at gupitin ang mga ito. Pagkatapos ay maaari kayong magtulungang pagsunud-sunurin ang mga larawan habang tinatalakay ninyo ang mga karanasan nina Adan at Eva. Habang ginagawa ninyo ito, pag-usapan kung bakit mahalaga, sa plano ng Ama sa Langit, na lisanin nina Adan at Eva ang Halamanan ng Eden.

• Makadarama ng pasasalamat ang iyong mga anak sa Pagbabayad-sala ni Jesucristo kapag naunawaan nila kung paano Niya dinaig ang mga epekto ng Pagkahulog. Habang sama-sama ninyong binabasa ang Moises 4:25; 6:48; Roma 5:12; 2 Nephi 2:22–23, tulungan ang iyong mga anak na makahanap ng mga paraan para makumpleto ang pangungusap na ito: “Dahil sa Pagkahulog, ako ay …” Pagkatapos, habang sama-sama ninyong binabasa ang Moises 5:8–11, 14–15; 6:59; Alma 11:42, maaari nilang kumpletuhin ang pangungusap na ito: “Dahil kay Jesucristo, ako ay …” Ibahagi sa isa’t isa ang inyong pasasalamat para kay Jesucristo.

• Isiping gumawa ng simpleng object lesson para ituro ang alituntunin ng kalayaan: anyayahan ang iyong mga anak na kulayan ang pahina ng aktibidad para sa linggong ito, pero isang kulay lamang ang ipagamit sa kanila. Bakit mas mainam na magkaroon ng mga pagpipilian? Pagkatapos ay maaari ninyong sama-samang basahin ang Moises 4:1–4 at pag-usapan kung bakit nais ng Diyos na magawa nating pumili sa pagitan ng tama at mali. Paano tayo tinutulungan ng Ama sa Langit at ni Jesucristo na gumawa ng mabubuting pasiya?

• Tulungan ang iyong mga anak na mag-isip at magdrowing ng mga larawan ng mabubuting pasiya na magagawa nila para sundin si Jesucristo. O maaari ninyong sama-samang kantahin ang isang awitin tungkol sa paggawa ng mabubuting pasiya, tulad ng “Piliin ang Tamang Landas” (Aklat ng mga Awit Pambata, 82). Maaari kayong magkuwento sa isa’t isa tungkol sa isang pagkakataon na gumawa kayo ng mabuting pasiya at pag-usapan kung ano ang nadama ninyo pagkatapos.

• Nang kinailangan nina Adan at Eva na lisanin ang Halamanan ng Eden, hindi na nila makakasama ang Ama sa Langit. Basahin ninyo ng iyong mga anak ang Moises 5:4, 8, at tulungan silang mahanap ang ginawa nina Adan at Eva para madama na malapit sila sa Kanya at marinig Siya. Ano ang ilang bagay na maaari nating sabihin sa Ama sa Langit sa ating mga panalangin?