Moises 1; Abraham 3

“Kung tuwirang nagsasalita sa inyo ang Panginoon,” pagtuturo ni Pangulong Russell M. Nelson, “ang una Niyang titiyakin ay na nauunawaan ninyo ang inyong tunay na pagkatao” (“Mga Pagpiling May Epekto sa Kawalang-Hanggan” [pandaigdigang debosyonal para sa mga young adult, Mayo 2022], Gospel Library). Kung gayon ay tatangkain ni Satanas na lituhin ka sa puntong iyan. Hanapin ang huwarang ito sa mensahe ng Diyos kay Moises sa Moises 1:4, 6 at sa mga mensahe ni Satanas sa Moises 1:12. Ano ang natututuhan mo sa mga talatang ito tungkol sa pagkakaiba sa pagitan ng Diyos at ni Satanas?

Itinuro din ni Pangulong Nelson, “Ang paraan ng inyong pag-iisip kung sino kayo talaga ay nakakaapekto sa halos lahat ng desisyong gagawin ninyo” (“Mga Pagpiling May Epekto sa Kawalang-Hanggan”). Isiping ilista ang ginagawa mong mga pasiya dahil ang iyong pagkatao bilang anak ng Diyos ay nauuna sa iba pang mga katawagan.

Anong karagdagang mga talata o parirala sa Moises 1 ang nagpapaunawa sa iyo ng iyong banal na kahalagahan? Maaari mo ring basahin ang iba pang mensahe ni Pangulong Nelson sa bahaging “Mga Pagpiling May Epekto sa Kawalang-Hanggan” na pinamagatang “Una: Alamin ang katotohanan kung sino kayo.” Ano ang nahihikayat kang gawin para maging pinakamahalagang pantukoy sa iyo ang iyong pagkatao bilang anak ng Diyos?

Tingnan din sa “Ako ay Anak ng Diyos,” Mga Himno (1985), blg. 189; “Ang Ating Tunay na Identidad” (video), Gospel Library; Mga Paksa at mga Tanong, “Mga Anak ng Diyos,” Gospel Library.

3:44

Tulad ng malinaw na ipinapakita sa Moises 1 , ang mga makapangyarihang espirituwal na karanasan ay hindi nangangahulugan na hindi na tayo muling tutuksuhin. Sa katunayan, ang isa sa mga taktika ni Satanas ay ang tuksuhin tayo na pagdudahan ang mga karanasang ito. Habang binabasa mo ang sagot ni Moises kay Satanas sa mga talata 12–26, ano ang natututuhan mo na maaaring makatulong sa iyo na manatiling tapat sa patotoong natanggap mo? Ano ang nakatulong kay Moises na madaig si Satanas sa huli?

Ang isa pang aral mula sa karanasan ni Moises ay na tinutukso tayo ni Satanas sa pamamagitan ng mga panghuhuwad sa katotohanan at kapangyarihan ng Diyos. Mag-isip ng ilang pekeng bersyon ng mga bagay-bagay, tulad ng artipisyal na halaman o sanggol na manika. Paano mo malalaman na peke ang mga iyon? Pagkatapos ay isipin ang mga huwad na bagay na ginagamit ngayon ni Satanas para tuksuhin ka. Ano ang natututuhan mo mula sa Moises 1:13–18 kung paano makilala at tanggihan ang kanyang mga panghuhuwad? Paano ka matutulungan ng Panginoon? (tingnan sa Moises 1:24–26).

Tingnan din sa Mateo 4:1–11; Gary E. Stevenson, “Huwag Mo Akong Linlangin,” Liahona, Nob. 2019, 93–96; “I Am a Son of God” (video), Gospel Library.

6:34

Matapos makakita ng pangitain ng mga likha ng Diyos, hiniling ni Moises sa Panginoon: “Sabihin [ninyo] sa akin … [kung] bakit ganito ang mga bagay na ito” (Moises 1:30). Ano ang tumatatak sa iyong isipan tungkol sa sagot ng Panginoon sa Moises 1:31–39? Ano ang pagkakaiba sa pagitan ng imortalidad at ng buhay na walang hanggan? (tingnan sa Mga Paksa at mga Tanong, “Buhay na Walang Hanggan,” Gospel Library). Paano tumutulong si Jesucristo na maisakatuparan ang dalawang ito? Nagkaroon din si Abraham ng isang pangitain, na nakatala sa Abraham 3. Ano ang nakikita mo sa mga talata 24–26 na maaaring makatulong na masagot ang kahilingan ni Moises?

Wala tayong gaanong alam tungkol sa ating premortal na buhay. Ngunit karamihan sa alam natin ay nagmumula sa pangitain ni Abraham sa Abraham 3:22–28. Habang binabasa mo ang mga talatang ito, gumawa ng listahan ng mga katotohanang makikita mo—kabilang na ang mga katotohanan tungkol sa iyong sarili at tungkol kay Jesucristo. Bakit mahalaga ang mga katotohanang ito sa iyo? Ano ang kaibhang nagagawa ng mga ito sa buhay mo?

Tingnan din sa Mga Paksa at mga Tanong, “Buhay Bago Isilang sa Mundo,” Gospel Library.

7:4

• Ano ang aklat ni Moises?

• Ano ang aklat ni Abraham?

• Ano ang ibig sabihin ng “pinili,” o naorden na noon pa man?

Iklik para makita ang iba pa.

• Matapos ninyong basahin nang sabay-sabay ang mensahe ng Diyos kay Moises sa Moises 1:4, isiping hayaang tingnan ng iyong mga anak ang sarili nila sa salamin at ibigay sa sarili nila ang mensahe ring iyon: “Ako ay anak ng Diyos.” Pagkatapos ay maaari nilang ibigay ang mensahe ring iyon sa isa’t isa: “Ikaw ay anak ng Diyos.” Maaari mo pang makita ang mga larawan ng iba’t ibang tao at anyayahan ang iyong mga anak na ituro ang bawat larawan at sabihing, “Ito ay anak ng Diyos.” Ibahagi sa isa’t isa kung bakit kayo natutuwang malaman na kayo ay mga anak ng Diyos. Paano binabago ng kaalamang ito ang paraan ng pagtrato mo sa iyong sarili at sa iba?

• Maaari ninyong ikumpara ng iyong mga anak ang mensahe ng Diyos kay Moises sa Moises 1:4 sa mensahe ni Satanas sa talata 12. Paano mo matutulungan ang mga anak mo na matukoy ang mga mensahe ng Diyos sa kanila at ang mga mensahe ni Satanas?

• Habang binabasa ninyo ng iyong mga anak ang Moises 1:6, maaari mo silang kausapin tungkol sa “gawain” ng Diyos para kay Moises. Isiping gamitin ang Aklat ng Sining ng Ebanghelyo, blg. 13–16, o ang Mga Kuwento sa Lumang Tipan, mga pahina 64–84, para tulungan ang iyong mga anak na makita ang naisagawa ni Moises sa tulong ng Ama sa Langit. Ano ang gawain ng Diyos para sa atin? (tingnan, halimbawa, sa Doktrina at mga Tipan 11:20).

• Sa pag-aaral ninyo ng iyong mga anak ng Moises 1:12–26, tulungan silang tuklasin kung ano ang ginawa ni Moises para labanan si Satanas (tingnan sa mga talata 13, 15, 18, 20–22, 26). Maaaring masaya para sa kanila na gawin ang mga bagay na magagawa nila para labanan ang tukso (tulad ng pagdarasal, paglayo, o paghingi ng tulong).

• Ang kaalaman tungkol sa ating premortal na buhay ay maaaring maghikayat sa iyong mga anak na gumawa ng mga pagpili batay sa mga walang-hanggang katotohanan. Para matulungan silang malaman ang tungkol doon, maaari mo silang bigyan ng ilang mahahalagang salita at pariralang hahanapin sa Abraham 3:22–28, tulad ng “bago pa ang mundo,” “mga espiritu,” “lilikha ng mundo,” at “susubukin.” Ano ang itinuturo ng mga talatang ito sa atin kung bakit tayo isinugo ng Ama sa Langit sa lupa?

• Ang isang awiting tulad ng “Susundin Ko ang Plano ng Diyos” (Aklat ng mga Awit Pambata, 86–87) ay maaaring magpatibay sa itinuturo sa Abraham 3. Maaari mo sigurong anyayahan ang iyong mga anak na magdrowing ng mga larawan na tutugma sa mga salita.

• Tulungan ang iyong mga anak na mag-isip ng mga sitwasyon kung saan kailangan nilang piliin kung gagawin nila o hindi ang ipinagagawa ng Diyos sa kanila (tingnan sa Abraham 3:25; tingnan din sa Para sa Lakas ng mga Kabataan: Isang Gabay sa Pagpili). Hayaang praktisin nila ang mga posibleng tugon sa mga sitwasyong iyon. Paano tayo matutulungan ng Tagapagligtas kapag gumagawa tayo ng maling pagpili?