Moises 1; Abraham 3

“Kon ang Ginoo direkta nga namulong kaninyo,” mitudlo si Presidente Russell M. Nelson, “ang unang butang nga Iyang segurohon nga inyong masabtan mao ang inyong tinuod nga pagkatawo”(“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 2022], Librarya sa Ebanghelyo). Kini nagpasabot nga si Satanas maninguha sa paglibog kanimo diha nianang sama nga punto. Pangitaa kini nga sundanan diha sa mensahe sa Dios ngadto ni Moises sa Moises 1:4, 6 ug sa mga mensahe ni Satanas diha sa Moises 1:12. Unsa ang atong makat-onan gikan niini nga mga bersikulo mahitungod sa kalainan tali sa Dios ug ni Satanas?

Gitudlo usab ni Presidente Nelson, “Ang paagi nga kamo maghunahuna mahitungod kon kinsa gayod kamo makaapekto sa hapit matag desisyon nga inyong himoon” (“Mga Pagpili alang sa Kahangtoran”). Hunahunaa ang paghimo og lista sa mga kapilian nga imong gihimo tungod kay ang imong pagkatawo isip usa ka anak sa Dios mag-una sa uban nga mga kapilian.

Unsang dugang nga mga bersikulo o hugpong sa mga pulong diha sa Moises 1 nagtabang kanimo sa pagsabot sa imong balaang bili? Mahimo usab nga basahon pa nimo og dugang ang mensahe ni Presidente Nelson diha sa seksiyon sa “Mga Pagpili alang sa Kahangtoran” nga giulohan “Una: Hibaloa ang kamatuoran mahitungod kon kinsa kamo.” Unsay imong gibati nga nagdasig kanimo sa pagbuhat aron sa paghimo sa imong pagkatawo isip usa ka anak sa Dios nga imong labing importante nga tigpaila?

Tan-awa usab “Ako Anak sa Dios,” Mga Himno (1985), nu. 189; “Our True Identity” (video), Gospel Library; Mga Hilisgotan ug mga Pangutana, “Children of God [Mga Anak sa Dios],” Librarya sa Ebanghelyo.

3:44

Ingon nga ang Moises 1 tataw nga nagpakita, ang gamhanang espirituwal nga mga kasinatian wala magpasabot nga kita dili na gayod pagatintalon pag-usab. Gani, usa sa mga taktika ni Satanas mao ang pagtintal kanato sa pagduda niini nga mga kasinatian. Samtang ikaw nagbasa sa tubag ni Moises ngadto ni Satanas diha sa mga bersikulo 12–26, unsa ang imong nakat-onan nga makatabang kanimo sa pagpabilin nga matinuoron ngadto sa pagpamatuod nga imong nadawat? Unsa sa kataposan ang mitabang ni Moises sa pagbuntog ni Satanas?

Lain nga leksiyon gikan sa kasinatian ni Moises mao nga si Satanas motintal kanato pinaagi sa peke (counterfeit) nga mga bersyon sa kamatuoran ug gahom sa Dios. Paghunahuna og pipila ka peke nga mga bersyon sa mga butang, sama sa artipisyal nga tanom o usa ka monyeka nga bata. Unsaon nimo pagkahibalo nga kini mga peke? Dayon hunahunaa ang mg peke nga gigamit ni Satanas karon sa pagtintal kanimo. Unsa ang imong nakat-onan gikan sa Moises 1:13–18 mahitungod kon unsaon sa pag-ila ug sa pagsalikway sa iyang mga peke? Unsaon sa Ginoo pagtabang kanimo? (tan-awa sa Moises 1:24–26).

Tan-awa usab diha sa Mateo 4:1–11; Gary E. Stevenson, “Ayaw Paglingla Kanako,” Liahona, Nob. 2019, 93–96; “I Am a Son of God” (video), ChurchofJesusChrist.org.

6:31

Human makatan-aw og panan-awon sa mga nilalang sa Dios, si Moises mihimo og usa ka hangyo sa Ginoo: “Sultihi ako … ngano nga kini nga mga butang naingon” (Moises 1:30). Unsa ang nakapadani kanimo mahitungod sa tubag sa Ginoo diha sa Moises 1:31–39? Unsa ang kalainan tali sa imortalidad ug kinabuhing dayon? (tan-awa sa Mga Hilisgotan ug mga Pangutana, “Kinabuhing Dayon,” Librarya sa Ebanghelyo). Unsaon ni Jesukristo sa pagpatuman sa duha? Si Abraham usab nakakita ug usa ka panan-awon, nga narekord diha sa Abraham 3. Unsa ang imong nakaplagan diha sa mga bersikulo 24–26 nga makatabang sa pagtubag sa hangyo ni Moises?

Kita diyotay kaayo ang nahibaloan mahitungod sa atong kinabuhi sa wala pa dinhi sa yuta. Apan kadaghanan sa unsay atong nahibaloan nagagikan sa panan-awon ni Abraham diha sa Abraham 3:22–28. Samtang ikaw nagbasa niini nga mga bersikulo, paghimo og lista sa mga kamatuoran nga imong nakaplagan—lakip ang mga kamatuoran mahitungod sa imong kaugalingon ug mahitungod ni Jesukristo. Nganong kini nga mga kamatuoran bililhon nganha kanimo? Unsa nga kalainan ang mahimo niini diha sa imong kinabuhi?

Tan-awa usab sa Mga Hilisgotan ug mga Pangutana, “Kinabuhi nga Wala Pa Dinhi sa Yuta,” Librarya sa Ebanghelyo.

• Human ninyo basahon nga magdungan ang mensahe sa Dios ngadto ni Moises diha sa Moises 1:4, hunahuna ang pagpatan-aw sa imong mga bata sa ilang mga aninag diha sa usa ka salamin ug sa paghatag sa ilang mga kaugalingon og samang mensahe: “Ako anak sa Dios.” Unya mahimo nila ihatag ang parehas nga mensahe sa usag usa: “Ikaw usa ka anak sa Dios.” Mahimo ka pa gani makapangita ug mga litrato sa lain-laing mga tawo ug dapita ang imong mga anak nga itudlo ang matag-usa ug moingon, “Usa kini ka anak sa Dios.” Ipakigbahin sa usag usa kon nganong kamo nalipay nga nahibalo nga kamo mga anak sa Dios. Sa unsang paagi kini nga kahibalo mag-usab sa paagi sa inyong pagtagad sa inyong mga kaugalingon ug sa uban?

• Ikaw ug ang imong mga anak mahimong ikatandi sa mensahe sa Dios ngadto ni Moises diha sa Moises 1:4 ngadto sa mensahe ni Satanas diha sa bersikulo 12. Unsaon nimo pagtabang sa imong mga bata nga mailhan ang kalainan sa mga mensahe sa Dios alang kanila ug sa mga mensahe ni Satanas?

• Samtang basahon nimo ang Moises 1:6 uban sa imong mga bata, mahimo nimo silang istoryahan mahitungod sa “buhat” nga gihatag sa Dios alang ni Moises. Hunahunaa ang paggamit sa Pakete sa mga Hulagway sa Ebanghelyo, mga nu. 13–16, o Mga Istorya sa Daang Tugon, mga pahina 64–84, aron matabangan ang imong mga bata nga makita kon unsa ang natuman ni Moises uban ang tabang sa Langitnong Amahan. Unsa ang buhat nga gihatag sa Dios alang kanato nga buhaton? (tan-awa, pananglitan, sa Doktrina ug mga Pakigsaad 11:20).

• Samtang nagtuon kamo sa Moises 1:12–26 uban sa imong mga bata, tabangi sila nga madiskobre kon unsa ang gibuhat ni Moises sa pagbatok ni Satanas (tan-awa ang mga bersikulo 13, 15, 18, 20–22, 26). Mahimong lingaw alang kanila ang pag-aksiyon sa mga butang nga ilang mabuhat sa pagbatok sa tintasyon (sama sa pag-ampo, paglakaw palayo, o pagpangayo og tabang).

• Ang paghibalo mahitungod sa atong kinabuhi sa wala pa kita dinhi sa yuta makapadasig sa imong mga bata sa paghimo ug mga pagpili base sa walay kataposan nga mga kamatuoran. Aron matabangan sila nga makakat-on mahitungod niini, mahimo nimo silang tagaan ug mga importanting mga pulong ug hugpong sa mga pulong nga pangitaon diha sa Abraham 3:22–28, sama sa “sa wala pa ang kalibotan,” “mga espiritu,” “mohimo og yuta,” ug “ipamatuod.” Unsay gitudlo niini nga mga bersikulo kanato mahitungod kon ngano ang Langitnong Amahan mipadala kanato nganhi sa yuta?

• Ang awit nga sama sa “Sundon Ko ang Plano sa Dios” (Songbook sa mga Bata, 64) mahimong makapalig-on sa unsay gitudlo sa Abraham 3. Tingali makadapit ka sa imong mga bata sa pagdrowing og mga hulagway nga mobagay sa mga pulong.

• Tabangi ang imong mga bata nga maghunahuna og mga sitwasyon diin kinahanglan silang mopili kon mobuhat ba sila o dili sa gisugo sa Dios (tan-awa sa Abraham 3:25; tan-awa usab sa Alang sa Kalig-on sa Kabatan-onan: Usa ka Giya alang sa Paghimo og mga Pagpili). Tugoti sila nga magpraktis sa posibleng mga tubag ngadto niini nga mga sitwasyon. Sa unsa nga paagi makatabang ang Manluluwas kanato kon kita naghimo og sayop nga pagpili?