Izimvo zokuPhucula ukuFunda eKhaya naseBandleni

Izibhalo zililizwi likaThixo, ngoko ke mcele Yena akuncede ukuba uziqonde.

Zonke izinto zingqina ngoKrestu (bona 2 Nifayi 11:4; Moses 6:63), ngoko ke cinga ngokuqaphela okanye uphawule imiqolo engqina ngoMsindisi, eyenza uthando lwakho lube nzulu kuYe, kwaye efundisa indlela yokumlandela Yena. Ngamanye amaxesha iinyaniso ngoMsindisi nevangeli yaKhe zichazwa ngokuthe ngqo, kwaye ngamanye amaxesha zichazwe ngomzekelo okanye ibali. Zibuze, “Zeziphi iinyaniso zanaphakade ezifundiswayo kule miqolo? Zindifundisa ntoni ezi nyaniso malunga noMsindisi?”

Nika ingqalelo kwiingcinga zakho neemvakalelo, nokuba azinxulumenanga kuko oko ukufundayo. Ezi mvakalelo zingazizinto uBawo waseZulwini afuna ukuba uzifunde.

Zininzi iindlela zokubhala uchukumiso oluzayo njengoko ufunda. Umzekelo, usenokufumanisa ukuba amagama namabinzana athile kwizibhalo ayakuchukumisa; ungawaphawula kwaye ubhale iingcinga zakho njengenqaku kwizibhalo zakho. Ungagcina kananjalo ijenali yemihla ngemihla yeengqiqo, yokuva, neemvakalelo ozifumanayo.

Ukuxoxa iingqiqo ezisuka kufundo lwakho lobuqu yindlela elungileyo yokufundisa abanye, kwaye inceda ukomeleza ukuqonda kwakho ngako oko ukufundileyo. Yabelana ngoko ukufundayo namalungu osapho nabahlobo (ngobuqu okanye ngokwedijithali), kwaye ubameme ukuba benze okufanayo.

Cinga ukuba amabali neemfundiso ozifundayo asebenza njani ebomini bakho. Ngokomzekelo, usenako ukuzibuza, “Ngawaphi amava endiye ndawafumana ayelelene kulento ndiyifundayo?”

Njengoko ufunda izibhalo, imibuzo isenokufika engqondweni. Le mibuzo inganxulumana noko ukufundayo okanye nobomi bakho jikelele. Cingisisa le mibuzo kwaye ukhangele iimpendulo njengoko uqhubekeka ukufunda izibhalo.

Ukuze uzuze iingqiqo ezongezelelweyo kwimiqolo oyifundayo, sebenzisa imibhalo esemazantsi, nolunye uncedo lwezifundo.

Ungafumana iingqiqo ezinentsingiselo ngomhlathi wesibhalo njengoko ucinga ngokwemeko yawo, kuquka neemeko okanye imo osuka kuyo. Ngokomzekelo, ukwazi imvelaphi neenkolelo zabantu uThixo awathetha nabo kunganceda wena uqonde ngcono injongo yamazwi aKhe.

Funda oko abaprofeti nabapostile bemihla-yokugqibela bakufundisileyo ngemigaqo oyifumana kwizibhalo.

Ufundo lwezibhalo akumelanga ukuba lusiphembelele kuphela kodwa kufanele kananjalo lusikhokele kutshintsho lwendlela esiphila ngayo. Phulaphula oko uMoya ukushukumisela ukuba ukwenze njengoko ufunda, kwaye emveni koko wenze ngokwezi mpembelelo.

Iingoma ezicetyiswayo neengoma zabantwana zifumaneka kuyo yonke indawo Yizani, Nindilandele. Sebenzisa umculo ongcwalisekileyo ukumema uMoya kwaye wenze nzulu ukholo lwakho nobungqina beenyaniso zevangeli.

Khetha isiqendu sesibhalo esinentsingiselo kuwe, kusapho lwakho, okanye iklasi yakho, kwaye usinkqayengokusiphinda yonke imihla okanye ngokudlala umdlalo wokunkqaya.

Fumana izinto ezinxulumene nezahluko nemiqolo oyifundayo. Cinga ukuba into nganye inxulumana njani neemfundiso kwizibhalo.

Funda imiqolo embalwa, uze uzobe into ehambelana noko ukufundayo. Okanye unokukhangela umfanekiso kuyo Incwadi yoMsebenzi woBugcisa yeVangeli okanye kwenye indawo kwiThala leVangeli. Unako kananjalo ukuthatha umfanekiso obonisa oko ukufundileyo.

Emveni kokufunda ibali, mema usapho okanye amalungu eklasi ukuba balinganise umdlalo. Emva koko, thetha ngokuba ibali linxulumana njani nezinto ohlangabezana nazo.

Ukuba unamalungu osapho angazimiselanga ukuthatha inxaxheba kufundo lwezibhalo zosapho, khangela ezinye iindlela zoku qhagamshelana nabo. Ngokomzekelo, unako ukwabelana ngenyaniso engunaphakade ngokwemvelo kwiincoko zakho okanye wabelane ngesibhalo esinentsingiselo ngendlela engabonakali ishumayela okanye igqithisela? Ufundo lwezibhalo aludingi ukuba lukhangeleke ngokufanayo kuzo zonke iintsapho. Abanye abantwana banokuphendula ngcono kufundo lwezibhalo emnye komnye. Thandaza kwaye ulandele iimpembelelo zoMoya.