Inguquko yiNjongo Yethu

Injongo yalo lonke ufundo nofundiso lwevangeli kukwenza nzulu inguquko yethu kwaye isincede sifane noYesu Krestu ngakumbi. Ngesi sizathu, xa sifunda ivangeli, asikhangeli nje kuphela iinkcukacha ezintsha; sifuna ukuba sibe “sisidalwa esitsha” (KwabaseKorinte II 5:17). Oku kuthetha ukuthembela kuBawo waseZulwini noYesu Krestu ukuba basincede siguqule iintliziyo zethu, iimbono zethu, izenzo zethu, neemvelo zethu.

Kodwa uhlobo lofundo lwevangeli oluthi lomeleze ukholo lwethu kwaye lukhokelele kummangaliso wenguquko alwenzeki lonke ngexesha elinye. Lona lugqithela ngaphaya kwegumbi lokufundela lungene phakathi entliziyweni nasekhayeni lomntu. Lona lufuna imizamo eqhubekayo, yemihla ngemihla yokuqonda nokuphila ivangeli. Uguquko olunyanisekileyo lufuna impembelelo yoMoya oyiNgcwele.

UMoya oyiNgcwele usikhokelela enyanisweni kwaye unika ubungqina ngaloo nyaniso (bona UYohane 16:13). Yena ukhanyisela iingqondo zethu, utyhila ukuqonda kwethu, kwaye uchukumisa iintliziyo zethu ngesityhilelo esivela kuThixo, umthombo wayo yonke inyaniso. UMoya oyiNgcwele uhlambulula iintliziyo zethu. Yena uphembelela ngaphakathi kuthi umnqweno wokuphila ngokwenyaniso, kwaye Yena uyasisebezela iindlela zokwenza oku. Ngokunyanisekileyo, “uMoya oyiNgcwele … uya kusifundisa [thina] zonke izinto” (UYohane 14:26).

Ngezi zizathu, kwiinzame zethu zokuphila, zokufunda, nokufundisa ivangeli, kumele kuqala nokubalulekileyo sifune ubudlelwane boMoya. Le njongo kumele ilawule ukhetho lwethu kwaye ikhokele iingcinga nezenzo zethu. Thina kumele sifune konke okumema impembelelo yoMoya kwaye sale konke okuqhubela loo mpembelelo kude—kuba siyazi ukuba sinokufanela ubukho boMoya oyiNgcwele, singakwazi ukufanela ukuphila kubukho bukaBawo waseZulwini noNyana waKhe, uYesu Krestu.