Taekan te Onimaki ao Katanoata aika a Kariaiakaki 1 ao 2

Iangoa aron waakin te kamatebwai aei ni kamatebwaian Taekan te Onimaki: N taekan te onimaki n tatabeua nako, karaoa te “reirei ae kimototo” ni kabwarabwaraa bwa tera ae ko kakoauaa. Am reirei ae kimototo e kona n iai i nanona koroboki aika tabu aika a irekereke, tamnei, anene n taromauri ke aia anene ataei, ke oin am taneiai iaon maiuakinan te koaua are e reireiaki n taekan te onimaki.

Tera te kaokoro ae e riki man koaua aikai n aron am reitaki ma Tamara are i Karawa ao Iesu Kristo? E kanga Taekan te Onimaki ni kakorakora aron am kamatebwai n te euangkerio ke ni buokiko n tibwaua te euangkerio ma aomata?

Taraa naba Bwai ni Kairi nakon Koroboki aika Tabu, “Taekan te Onimaki,” Gospel Library; L. Tom Perry, “The Doctrines and Principles Contained in the Articles of Faith,” Riaona, Nobembwa 2013, 46–48; “Chapter 38: The Wentworth Letter,” n Teachings of Presidents of the Church: Joseph Smith (2011), 435–47.

“Ti kakoaua bwa e na manga kaoti bwaai te [Atua] aika mwaiti aika korakora ma ni kakawaki aika kaineti ma Abanuean te Atua” (Taekan te Onimaki 1:9). Ma te reirei aei n am iango, rinanon Katanoata ae Kariaiakaki 1 ao 2, ao tarai taeka ao kibuntaeka aika a kakorakoraa am onimaki ni kaotioti aika a reitinako. A kanga kaotioti aikai n rota aron maium? A kanga ni buoka abanuean Tamara are i Karawa ni karikirakea?

Tera te bwai ni kakoaua ae ko nooria bwa te Ekaretia e kairaki “n ana kairiiri te Atua ae Moan te Mwaaka” n te bong aei? (Katanoata ae Kariaiakaki 1). Tao ko kona n rinanoa teuana ke ae mwaiti riki n rongorongo man te maungatabu ni kabuta aika ai tibwa ngkai, n nooria bwa e kanga te Uea ni kaira Ana Ekaretia—ao maium. Ana rongorongo te Beretitenti n te Ekaretia ae ai tibwa ngkai tao e na tamaroa bwa ko na moanna mai iai.

Tera ae ko kona ni karaoia ngkana ngkoe ke temanna ae ko tangiria e kekeiaki ni kan mataata ke ni butimwaea are e reirei iai te Uea rinanoia Ana burabeti? Bukin tera ko kakaitau ibukin te burabeti?

Taraa naba Amota 3:7; 2 Nibwaai 28:30; Allen D. Haynie, “Te Burabeti ae Maiu ibukin Boong aika Kaitira,” Riaona, Meei 2023, 25–28; Topics and Questions, “Prophets,” Gospel Library; “Ti karabwako, te Atua, Ibukin am Burabeti,” Anene n Taromauri, nambwa 19.

I nanon “Mwakoro aika a Rineaki man Teniua ana Marooro Beretitenti Wilford Woodruff ni kaineti ma te Katanoata nakon te Botanaomata” (n tokin te Katanoata ae Kariaiakaki 1), tera bukina ngkai te Uea e katoka te mare ae riaon temanna te buu? Tera ae e reireiniko te bwai aei ibukin ana mwakuri te Atua?

Ibukin riki taekan rongorongo ake a kawakinaki n Katanoata ae Kariaiakaki 1, taraa Saints, 2:602–15; “The Messenger and the Manifesto,” n Revelations in Context, 323–31; Topics and Questions, “Plural Marriage and Families in Early Utah,” Gospel Library.

Ti aki ataia bwa bukin tera te katabu nakon te nakoanibonga ao otenanti n te tembora aki tauraoi nakoia membwa n te Ekaretia aika kaain Aberika n te tai anne. E ngae ngke a kaitaraaki ma te kangaanga n akea kaekaan titiraki iaon te kaetieti anne, a mwaiti Aika Itiaki ni Boong aika Kaitira aika a bwatabwata aika a onimakina te Uea (taraa Taeka n Rabakau 3:5) ao a teimatoka ni kakaonimaki Nakoina rinanon nako maiuiia. Reiakinan aron aia onimaki ao te bwai are a rinanona e kona n riki bwa te kaunganano nakoim. Aikai tabeua aia rongorongo, aika kuneaki n te history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (rongorongon Green Flake)

• “You Have Come at Last” (rongorongon Anthony Obinna)

• “Break the Soil of Bitterness” (rongorongon Julia Mavimbela)

• “I Will Take It in Faith” (rongorongon George Rickford)

• “Long-Promised Day” (rongorongon Joseph W. B. Johnson)

Ngkai ko wareka Katanoata ae Kariaiakaki 2, tera ae ko reiakinna i aon ana waaki te Uea ibukin kairan te kaetieti n Ana Ekaretia? Iangoia bwa ko kanga n reiakinna n onimakina te Uea e ngae ngke ko aki karekea te mataata ae kororaoi.

Taraa naba 2 Nibwaai 26:33; “Witnessing the Faithfulness,” n Revelations in Context, 332–41; Topics and Questions, “Race and the Priesthood,” Gospel Library; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

• Iangoia ni kakaai ao n anenei anene n taromauri ke aia anene ataei are e na kona ni buokiia am ataei ni mataata n teuana ke ae mwaiti riki n Taekan te Onimaki. Tao a na kona ni buokiko n rinei anene n taromauri ao taian kuna. Buokiia am ataei n noria bwa a kanga anene n irekereke ma Taekan te Onimaki.

• Ko kona ngkoe ao am ataei n uaia ni korei titiraki ake a na iai irouia aomata i aon ana euangkerio Iesu Kristo ke Ana Ekaretia. Kam kona ngkanne ni bootaki ni mwakuri ni kaekai titiraki akanne ni kabongana Taekan te Onimaki. Ti na nakea riki ngkana iai ara titiraki iaon te euangkerio?

• Ibukin buokaia am ataei bwa a na oota n taekan te onimaki te karuaiua, tao ko kona n anganiia booki aika tabu ao tamnein te burabeti ae maiu (ke te beeba ni kaongora man te Riaona). Tuangiia bwa a na tauii ieta booki aika tabu ngkana ko warekii taeka aika “bwaai nako ake e a tia ni kaoti te Atua” ao tamnein ke te maekatiin ngkana ko wareka “ni kabane ake E na kaoti ngkai” (Taekan te Onimaki 1:9). Bukin tera ti kainnanoiia burabeti ake ngkoa ao aika ngkai?

• A kona am ataei n reiakinna bwa e kanga aia taeka burabeti ni kairiira man irirakin kaetieti ni karaoan te bwai teuana, n aron te amwarake ke te bwai n takakaro. Ko kona ni kabotaua aei nakon kainibaire ake e anganiira Iesu Kristo rinanon te burabeti. Tera bwaai tabeua aika e a tia n reireiniira iai te Uea rinanoia Ana burabeti ni boong aikai?

• Tao noorana bwa e kangaa koroboki aika tabu ake rimoa n irekereke ma kaotioti aika ngkai e kona ni buokiia am ataei ni mataata n te Katanoata ae Kariaiakaki. Ko kona n tuangiia bwa a na wareka Makuri 10:34–35 ao Iakoba 2:27–30 ao kaoiia bwa a na kakaea bwa e nga iai koroboki aika tabu ae titebo ma Katanoata ae Kariaiakaki 1 (ao are e kairi nakon katokan te mare ma ae bati buuna) ao are e uotiira nakon Katanoata ae Kariaiakaki 2 (are e kaotaki iai bwa te katabu nakon te nakoanibonga ao otenanti n te tembora a tauraoi nakoia reeti n aomata ni kabane). Kaota am koaua bwa te Uea e kaoti Ana kantaninga nakoia burabeti ake ngkoa ao aika n taai aikai.