Gyedzi ho Nsɛmpɔw no na Asɔr Dawurbɔ 1 na 2

Susu kwan yi a ebɛfa do dze esũa Gyedzi ho Nsɛmpɔw no: Ma gyedzi ho asɛmpɔw kor biara no, yɛ “adzesuadze kumabaa” fa kyerɛkyerɛ dza egye dzi mu. Kyerɛwsɛm a ɔfa ho, mfonyin, asɔr ndwom anaa mbofra ndwom, anaa ankorankor sũahu bi a ɔfa edze nokwar bi a dɛm gyedzi ho asɛmpɔw no kyerɛkyerɛ no abɔ bra botum akã w’adzesuadze kumabaa no ho.

Ebɛn nsesa na nokwar yinom nya wɔ wo nkitahodzi a enye Ɔsor Egya na Jesus Christ nya mu? Gyedzi ho Nsɛmpɔw no esi dɛn etu w’asɛmpa nsũae no mpon, anaa wɔaboa wo ma enye binon akyɛ asɛmpa no?

Hwɛ Kyerɛwsɛm no Kwankyerɛ, “Gyedzi ho Nsɛmpɔw,” Asɛmpa Nwoma Korabea; L. Tom Perry, “The Doctrines and Principles Contained in the Articles of Faith,” Liahona, Ɔberɛfɛw 2013, 46–48; “Chapter 38: The Wentworth Letter,” wɔ Teachings of Presidents of the Church: Joseph Smith (2011), 435–47 so.

“Yɛgye dzi dɛ [Nyame] bɔkɔ do eyi ndzɛmba akɛse a no ho hia tsitsir pii a ɔfa Nyame N’ahenman ho no akyerɛ” (Gyedzi ho Nsɛmpɔw 1:9). Fapem yi da w’adwen do no, bobɔ Asɔr Dawurbɔ 1 na 2 do, na hwehwɛ nkasafua na kasasin horow a ɔhyɛ wo gyedzi dzen wɔ nyikyerɛ a wɔkɔ do nya ho. Nyikyerɛ yinom esi dɛn enya nhyɛdo wɔ w’abrabɔ mu? Woesi dɛn aboa Ɔsor Egya n’ahenman ne kankɔ ho edwuma?

Ebɛn adanse na ihu dɛ Asɔr no “Otumfo Nyankopɔn ne nkenyan na odzi ne kan” ndɛ? (Asɔr Dawurbɔ 1). Bia ibotum abobɔ ndaansa yi wiadze mfɛndzanan ehyiadzi mu nsɛm kor anaa ebien do, dze ahwehwɛ mbrɛ Ewuradze rema N’Asɔr—na w’abrabɔ akwankyerɛ. Ndaansa yi ara nsɛm a ofi Asɔr no ne President hɔ no botum ayɛ bea pa a edze bɛhyɛ ase.

Ebɛnadze na ibotum ayɛ sɛ ɔwo anaa obi a edɔ no per dɛ ɔbɛtse ase anaa ɔbɛgye dza Ewuradze dua No nkɔnhyɛfo mu kyerɛkyerɛ no? Dɛn ntsi na w’enyi sɔ nkɔnhyɛnyi?

Hwɛ Amos 3:7; 2 Nephi 28:30; Allen D. Haynie, “A Living Prophet for the Latter Days,” Liahona, Esusow Aketseaba 2023, 25–28; Nsɛngyinado na Nsɛmbisa, “Prophets,” Asɛmpa Nwoma Korabea; “O Nyame, Yɛda Wo Ase, wɔ Nkɔnhyɛnyi a,” Asɔr na Mbofra Ndwom, nkanee 36 so.

President Wilford Woodfruff ne nsɛm ebiasa a ɔkãe no mu nyiyi mu bi dza ɔfa Mpaamukã no ho” (a ɔwɔ Asɔr Dawurbɔ 1) n’ekyir mu no, ebɛn siantsir na nkɔnhyɛnyi no dze mae dɛ Ewuradze regyaa awar pii ho ndzeyɛɛ no? Ebɛnadze na iyi kyerɛkyerɛ wo fa Nyankopɔn n’edwuma ho?

Ama eenya nsɛm a ɔfa Asɔr Dawurbɔ 1 ahyɛse abakɔsɛm ho no, hwɛ Saints, 2:602–15; “The Messenger and the Manifesto,” wɔ Revelations in Context, 323–31; Nsɛngyinado na Nsɛmbisa, “Plural Marriage and Families in Early Utah,” Asɛmpa Nwoma Korabea.

Yennyim siantsir a Asɔrmba a wɔyɛ Africa asefo no mber bi nna hɔn nsa nnkã asɔfohyɛ na temple ayɛdze horow no. Ber mpo a worihyia nsɛmbisa horow a ɔyɛ dzen a wonnyi ahyɛdze no ho nyiano no, Ebibifo Latter-day Saintfo pii tweer Ewuradze (hwɛ Mbɛbusɛm 3:5) na wɔtsenaa nokwardzi mu maa No wɔ hɔn abrabɔ nyina mu. Irusũa hɔn gyedzi na sũahu ho nsɛm botum ayɛ nkenyan ama wo. Hɔn nsɛm no binom nye yi, wobohu no wɔ history.ChurchofJesusChrist.org

• “Jane Elizabeth Manning James”

• “In My Father’s House Are Many Mansions” (Green Flake no ho asɛm)

• “You Have Come at Last” (Anthony Obinna no ho asɛm)

• “Break the Soil of Bitterness” (Julia Mavimbela no ho asɛm)

• “I Will Take It in Faith” (George Rickford no ho asɛm)

• “Long-Promised Day” (Joseph W. B. Johnson no ho asɛm)

Ber a ekenkan Asɔr Dawurbɔ 2 no, ebɛnadze na isũa fa Ewuradze no kwan a Ɔfa do dze ma N’Asɔr ahyɛdze ho akwankyerɛ? Dwendwen mbrɛ esi esũa dɛ ebɔtwer Ewuradze ber mpo a nnyi ntseasee a odzi mu.

Hwɛ 2 Nephi 26:33; “Witnessing the Faithfulness,” wɔ Revelations in Context, 332–41; Nsɛngyinado na Nsɛmbisa, “Race and the Priesthood,” Asɛmpa Nwoma Korabea; Ahmad Corbitt, “A Personal Essay on Race and the Priesthood,” afã 1–4, history.ChurchofJesusChrist.org; BeOne.ChurchofJesusChrist.org so.

• Susu dɛ ebɔhwehwɛ na atow asɔr ndwom anaa mbofra ndwom a obotum aboa wo mba ma wɔatse Gyedzi ho Nsɛmpɔw kor anaa no mboree ase. Bia wobotum aboa wo ma asan mu eyi asɔr ndwom anaa ndwom horow. Boa wo mbofra ma wonhu mbrɛ ndwom horow no fa Gyedzi ho Nsɛmpɔw ho.

• Ɔwo na wo mbofra botum abɔ mu ayɛ edwuma dze akyerɛw nsɛmbisa horow a bia nkorɔfo benya wɔ Jesus Christ anaa N’Asɔr ho. Nkyii wobotum abɔ mu ayɛ edwuma dze Gyedzi ho Nsɛmpɔw no eyiyi dɛm nsɛmbisa horow no ano. Henfa bio na yebotum akɔ sɛ yɛwɔ asɛmpa no ho nsɛmbisa horow a?

• Ama aaboa wo mbofra ma wɔatse Gyedzi ho Nsɛmpɔw a otsĩa akron ase no, bia ibotum ama hɔn kyerɛwsɛm na nkɔnhyɛnyi tseasefo no mfonyin (anaa ndaansa yi wiadze mfɛndzanan ehyiadzi Liahona). Se hɔn ma wɔmma kyerɛwsɛm no do ber a ekenkan “dza Nyame eyi akyerɛ nyina” na wɔmma mfonyin no anaa dawurbɔ krataa no do ber a ekenkan “dza seseiara Oyi kyerɛ nyina” (Gyedzi ho Nsɛmpɔw 1:9). Dɛn ntsi na yehia tsetse na ndɛ da yi nkɔnhyɛfo beenu nyina?

• Wo mbofra botum esũa mbrɛ nkɔnhyɛfo hɔn nsɛm ma hɛn akwankyerɛ ber a yedzi ahyɛdze do dze yɛ biribi, tse dɛ edziban anaa agordzidze. Hom botum dze iyi ato ahyɛdze a Jesus Christ dua nkɔnhyɛnyi do dze ma hɛn no. Ebɛn ndzɛmba binom na Ewuradze edua ndɛ No nkɔnhyɛnyi tseasefo do akyerɛkyerɛ hɛn ndɛ?

• Bia woruhu mbrɛ tsetse kyerɛwsɛm no nye ndɛ nyikyerɛ no kɔ do no botum aboa wo mbofra ma wɔatse Asɔr Dawurbɔ no ase. Ibotum ebisa hɔn ma wɔakenkan Ndwuma 10:34–35 na Jacob 2:27–30 na ato nsa afrɛ hɔn ma wɔahwɛ kyerɛwsɛm no mu hendze na ɔnye Asɔr Dawurbɔ 1 (a ɔmaa awar pii gyae no) kɔ do na hendze na ɔnye Asɔr Dawurbɔ 2 (a ɔdze too gua dɛ asɔfohyɛ na temple ayɛdze horow no, nkorɔfo a wɔwɔ ebusuakuw nyina mu hɔn nsa bɛkã). Gye wo dasee dɛ Ewuradze yi Ne pɛ kyerɛ tsetse na ndɛ nkɔnhyɛfo.