Lus Qhuab Qhia thiab Kev Khi Lus 124

Tus Tswv tau qhia tus Yaj Saub Joseph Smith kom “ua tib zoo plov meej [Nws] txoj moo zoo” rau “txhua tus vaj ntxwv nyob hauv lub ntiaj teb” (saib Lus Qhuab Qhia thiab Kev Khi Lus 124:2–11). Yog tias koj tau txais txoj hauj lwm no, koj yuav tshaj tawm li cas txog Yexus Khetos thiab Nws txoj moo zoo uas txum tim rov qab los? Thiab ua tib zoo xav saib koj yuav ua li cas ua tim khawv txog Khetos nrog rau cov neeg uas koj ntsib txhua hnub yam zoo xws luag thiab tsis ua txawv txav.

Kuj saib “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los,” Txoj Moo Zoo cov Ntawv

Xav txog qhov uas koj yuav qhia rau lwm tus neeg, ib yam li tus Cawm Seej qhia hauv Lus Qhuab Qhia thiab Kev Khi Lus 124:12–21, hais txog tej xeeb ceem zoo li Khetos uas koj pom hauv lawv. Nws tau qhia koj hais tias Nws hlub koj thiab tso siab rau koj li cas?

Kuj saib Richard J. Maynes, “Kev Txais tus Tswv thiab Nej Tsev Neeg txoj Kev Tso Siab,” Liyahaunas, Kaum Ib Hlis Ntuj 2017, 75–77.

Thaum koj xav txog tus Tswv cov lus qhia hauv Lus Qhuab Qhia thiab Kev Khi Lus 124:22–24, 60–61, xav txog saib koj yuav ua li cas kho tau koj lub tsev thiab koj pawg ntseeg kom ua tau ib qho chaw li qhov chaw uas tus Tswv xav kom muaj rau lub nroog Nauvoo.

Kuj saib “A Friend to All” (video), ChurchofJesusChrist.orgChurchofJesusChrist.org.

4:1

Yog vim li cas tus Tswv thiaj “txib txhua lub sij hawm” kom Nws haiv neeg “ua [tej tuam tsev] rau [Nws] lub npe dawb huv”? Cia li xav saib puas sau ntawv txog tej yam qhia saib vim li cas uas koj nrhiav tau hauv Lus Qhuab Qhia thiab Kev Khi Lus 124:25–45, 55. Tej zaum koj yuav nrhiav tau lwm qhov hauv ib zaj nkauj zoo li “We Love Thy House, O God” (Hymns, zaj 247) los sis qhov vidi-aus “What Is a Temple?” (Txoj Moo Zoo cov Ntawv). Txoj hauj lwm ua tej tuam tsev yog ib lub cim qhia tias tus Tswv hlub koj li cas?

5:41

Txij thaum tau ua lub Tuam Tsev Nauvoo thaum xyoo 1840 tawm los, twb tau ua lawm los sis tau tshaj tawm tias yuav ua 300 tawm lub tuam tsev. Thawj Tswj Hwm Russell M. Nelson qhia hais tias: “Peb paub hais tias peb txoj kev siv sij hawm hauv lub tuam tsev yeej tseem ceeb kawg nkaus rau peb txoj kev txhiv dim thiab kev tsa nto thiab yeej tseem ceeb rau peb tsev neeg thiab. … Tus yeeb ncuab tej kev tsim txom tsuas ua heev tuaj xwb, nws sib zog thiab muab ntau yam los tsim txom peb. Tsis tau muaj dua lwm lub sij hawm uas tib neeg yuav tsum ib sij mus hauv lub tuam tsev npaum li lub caij no” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liyahaunas, Kaum Ib Hlis Ntuj 2018, 114). Lub tuam tsev tau pab koj li cas kom tiv taus “tus yeeb ncuab tej kev tsim txom”? Koj tau txais kev tshoov siab li cas kom ua raws li Thawj Tswj Hwm Nelson tej lus ntuas?

Kuj saib “Why Latter-day Saints Build Temples,” temples.ChurchofJesusChrist.org.

Tus Tswv tau txib Haiv Neeg Ntseeg kom ua ib lub tuam tsev hauv lub Cheeb Tsam Jackson County, Missouri, tiam sis lawv raug “lawv cov yeeb ncuab tab kaum lawv” (Lus Qhuab Qhia thiab Kev Khi Lus 124:51). Tej nqes 49–55 muaj ib zaj lus nplij siab rau cov neeg uas xav ua raws li Vajtswv cov lus txib tiam sis vim yog tsev neeg los sis lwm yam raug cheem kom ua tsis tau li ntawd. Koj nrhiav tej lus qhia twg hauv tej nqes no uas yuav pab tau leej twg uas muaj xwm txheej zoo li no?

Tsis ntev tom qab tus Yaj Saub leej txiv, Joseph Smith Sr., tuag mus, tus Tswv hu Hyrum Smith los ua txoj hauj lwm uas nws leej txiv tau tuav—ua tus Yawg Suab rau lub Koom Txoos. Koj nyeem tau txog qhov no hauv Lus Qhuab Qhia thiab Kev Khi Lus 124:91–92.

Koj yuav ua li cas qhia txog ib txoj koob hmoov yawg suab rau ib tug neeg uas yeej tsis tau hnov txog? Koj yuav hais li cas kom yaum tau ib tug neeg mus txais ib txoj koob hmoov li no? Nrhiav kom tau lus teb rau cov lus nug no hauv Txwj Laug Randall K. Bennett zaj lus “Koj Yawg Suab txoj Koob Hmoov—Tej Lus Qhia Los ntawm Leej Txiv Saum Ntuj Ceeb Tsheej” (Liyahaunas, Tsib Hlis Ntuj 2023, 42–43) los sis tej lub Ntsiab Lus thiab tej Lus Nug, “Yawg Suab txoj Koob Hmoov” (Txoj Moos Zoo cov Ntawv).

Raws li tej yam koj tau kawm thiab uas tau muaj los rau koj, ua zoo xav saib koj yuav ua li cas ntxiv rau txoj kab lus no kom phim: “Yawg suab txoj koob hmoov zoo li .” Yog vim li cas Leej Txiv Saum Ntuj Ceeb Tsheej xav kom Nws cov me nyuam txais yawg suab ib txoj koob hmoov?

Yog tias kom tseem tsis tau txais yawg suab ib txoj koob hmoov, koj yuav ua li cas thiaj npaj kom txais tau? Yog tias koj tau txais yawg suab ib txoj koob hmoov lawm, koj yuav ua li cas qhia tau Vajtswv hais tias koj saib qhov txiaj ntsim no rau nqi heev?

Kuj saib Kazuhiko Yamashita, “Thaum Twg Yuav Txais Yawg Suab txoj Koob Hmoov,” Liyahaunas, Tsib Hlis Ntuj 2023, 88–90; Phau Qhia Kev Coj lub Koom Txoos, 18.17, Txoj Moo Zoo cov Ntawv.

• Kom pab koj cov me nyuam nco qab ntsoov tej yam lawv kawm los ntawm Lus Qhuab Qhia thiab Kev Khi Lus 124:15, 20, koj pab tau lawv thaum lawv kos duab huam cais thiab muab txiav tawm. Nyob rau ntawm cov huam cais, koj pab tau lawv kom sau tej lus tseem ceeb los ntawm tej nqes vaj lug kub no. Ib zaj nkauj zoo li “Stand for the Right” (Children’s Songbook, 159) kuj pab txhawb nqa tus Tswv cov lus thiab.

• Tom qab nyeem Lus Qhuab Qhia thiab Kev Khi Lus 124:15, 20 ua ke, tej zaum koj yuav pab tau koj cov me nyuam saib txoj kev coj ncaj txhais li cas tiag thaum nyeem phab 31 ntawm Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv. Tus Tswv hais li cas txog George Miller hauv nqes 20 “vim yog [George’s] lub siab ncaj”? Koj kuj qhia tau txog me nyuam uas ua yam ntxwv zoo coj ncaj ncees los ntawm tej yam uas muaj los rau koj los sis los ntawm phau ntawv Friend. Caw koj cov me nyuam cuab ib lub hom phiaj kom coj ncaj ncees lub lim tiam no thiab qhia koj saib lawv xav li cas hauv nruab siab thaum lawv coj ncaj ncees.

• Tej zaum koj cov me nyuam yuav nyiam saib tej duab txog tuam tsev, suav ib lub tuam tsev yav thaum ub thiab ib lub tuam tsev uas nyob ze qhov chaw uas lawv nyob (saib ChurchofJesusChrist.org/temples/list). Koj siv tau tej duab no thiab Lus Qhuab Qhia thiab Kev Khi Lus 124:39 kom piav saib Yexus Khetos yeej los txib kom Nws cov neeg ua tuam tsev—yav thaum ub thiab thaum peb lub caij nyoog no (kuj saib lub lim tiam no phab ntawv ntxim ua).

• Yog tias koj nyob ze rau ib lub tuam tsev, xav txog saib puas tsim nyog coj koj cov me nyuam mus xyuas thiab taug kev ib ncig thaj chaw tuam tsev yam tswm seeb li. Caw lawv nrhiav kom tau cov lus “Kev Dawb Huv rau tus Tswv—Tus Tswv lub Tsev” nyob ntawm lub tuam tsev sab nraud. Nrog koj cov me nyuam tham txog saib cov lus no txhais tau li cas.

• Xav txog qhov uas siv tau cov tswv yim hauv “Ua Kev Cai Raus Dej thiab Txais Kev Pom Zoo rau cov Poj Koob Yawm Txwv” hauv cov ntawv ntxiv tom kawg A kom pab koj cov me nyuam tsom ntsoov hnub uas lawv yuav nkag tau lub tuam tsev (kuj saib “Lub Tuam Tsev thiab Txoj Kev Zoo Siab” hauv cov ntawv ntxiv tom kawg B).

• Thaum nej nyeem Lus Qhuab Qhia thiab Kev Khi Lus 124:91–92 ua ke, pab koj cov me nyuam nrhiav kom tau saib tus Tswv hu kom Hyrum Smith los ua txoj hauj lwm dab tsi. Hais txog saib yawg suab txoj koob hmoov yog dab tsi: ib txoj koob hmoov tshwj xeeb uas nyob haud tus Tswv qhia peb txog peb tus kheej thiab saib Nws xav kom peb ua li cas thiab rais los mus ua neeg zoo li cas. Xav txog qhov uas siv nqes “Txais Yawg Suab Ib txoj Koob Hmoov” hauv cov ntawv ntxiv tom kawg A kom pab koj cov me nyuam npaj txais yawg suab ib txoj koob hmoov.