Lus Qhuab Qhia thiab Kev Khi Lus 125–128

Tom qab nws ua tub txib mus rau Askiv Teb—tsuas yog ib zaug nws mus ua tub txib xwb—Brigham Young tau txais tus Tswv txoj kev hu nws ua ib yam tseem ceeb ntxiv. Tus Tswv hais kom nws “ua tib zoo saib xyuas [nws] tsev neeg” (nqe 3), vim lawv raug txom nyem thaum nws tsis nyob. Thaum koj kawm tshooj no, xav seb vim li cas tus Tswv hais kom peb muab tej yam txi thaum peb ua hauj lwm rau nws. Koj ua li cas kom saib xyuas koj tsev neeg?

Kuj saib “Take Special Care of Your Family,” nyob hauv Revelations in Context, 242–49.

Qhov uas tib neeg liam Joseph Smith thiab lawv mam li coj nws mus kaw ua rau Joseph Smith yuav tsum nkaum mus lwm qhov chaw thaum lub Yim Hli Ntuj xyoo 1842. Tiam sis tej lus uas nws tau sau rau Haiv Neeg Ntseeg thaum lub sij hawm no (tam sim no nyob hauv Lus Qhuab Qhia thiab Kev Khi Lus 127) yeej hais lus zoo thiab muaj kev xyiv fab. Nqe 2–4 qhia dab tsi rau koj txog Vajtswv? txog kev raug thuam los sis kev tawm tsam? Tej kab lus twg los ntawm tej nqe no yuav pab koj thaum koj xav tias koj raug tsim txom? Cia li xav seb tus Tswv ua dab tsi kom txhawb nqa koj thaum koj nyob hauv “tej dej tob” ntawm koj lub neej.

Thaum koj nyeem Lus Qhuab Qhia thiab Kev Khi Lus 127:5–8; 128:1–8, nrhiav tej yam uas qhia tias vim li cas tus Tswv muab tej lus qhia rau Joseph Smith txog kev muab tej kev cai raus dej rau cov tuag sau cia. Qhov no qhia dab tsi rau koj txog tus Tswv thiab Nws txoj hauj lwm? Koj xav li cas tej lus qhia no yuav ua li cas rau koj txoj kev khaws koj tsev neeg cov ntaub ntawv, xws li tej phau ceev xwm txheej?

Qhov uas Vajtswv qhia Joseph Smith vim li cas peb cov poj koob yawm txwv uas tsis tau ua kev cai raus dej hauv lub neej xav tau peb txoj kev pab: peb sawv lawv cev ua kev cai raus dej kom lawv xaiv tau lees yuav los sis xyeej txoj kab ke no. Tiam sis tus Yaj Saub kuj qhia tias “yuav tsum muaj [peb cov poj koob yawm txwv] txoj kev cawm seej thiaj li muaj peb txoj kev cawm seej.” Thaum koj nyeem Lus Qhuab Qhia thiab Kev Khi Lus 128:15–18, xav txog vim li cas.

Nqe 5 qhia tias txoj kab ke ua kev cai raus dej rau cov tuag yeej tau “npaj ua ntej ntuj tsim teb raug.” Qhov tseeb no qhia dab tsi rau koj txog Vajtswv thiab Nws txoj hau kev? Txwj Laug Dale G. Renlund zaj lus “Kev Nrhiav Tsev Neeg Zaj Keeb Kwm thiab tej Hauj Lwm hauv lub Tuam Tsev: Kev Khi thiab Kev Kho Mob” pab koj li cas kom to taub? (Liyahaunas, Tsib Hlis Ntuj 2018, 46–49).

Joseph Smith tau siv tej lus xws li “lub hwj chim muab txis ua ke,” “ham sib txuas,” thiab “kev sib txuas zoo tag nrho” thaum nws qhia txog cov kab ke pov thawj hwj thiab kev cai raus dej rau cov tuag. Nrhiav tej lus no thiab tej lus zoo li no thaum koj nyeem Lus Qhuab Qhia thiab Kev Khi Lus 128:5–25. Koj puas txawj xav txog tej yam uas koj siv tau kom kos duab txog tej kab lus no, xws li ib txoj saw los sis txoj hlua? Vim li cas tej kab lus no yog tej lus zoo piav txog cov lus qhuab qhia no?

Tej zaum kev xav txog tej lus nug no yuav pab koj kawm txog tej nqe vaj lug kub no:

• Raws li koj xav, vim li cas kev cai raus dej rau cov neeg tuag yog “yam zoo kawg nkaus xav tsis thoob ntawm txhua yam muaj nyob hauv txoj moo zoo uas kav ib txhis”? (nqe 17). Tej yam twg tau pab koj xav li no?

• Vim li cas ib txoj kev foom tsis zoo yuav nplawm lub ntiaj teb yog hais tias tsis muaj “ib txoj kev … ham sib txuas cov txiv rau cov me nyuam”? (nqe 18).

• Koj txais kev tshoov siab dab tsi txog Joseph Smith tej lus nyob hauv nqe 19–25? Tej nqe no hloov koj txoj kev xav li cas txog Yexus Khetos? txog kev ua hauj lwm hauv lub tuam tsev rau koj cov poj koob yawm txwv? (kuj saib “Come, Rejoice,” Hymns, zaj 9).

Tom qab koj kawm tej nqe no, tej zaum nej yuav txais kev tshoov siab ua ib yam dab tsi rau koj cov poj koob yawm txwv. Tej zaum tej lub tswv yim nyob hauv FamilySearch.org yuav pab koj.

“Cov Vidi-aus uas Tshoov Siab” nyob hauv pawg “Lub Tuam Tsev thiab Kev Nrhiav Tsev Neeg Zaj Keeb Kwm” hauv Txoj Moo Zoo cov Ntawv muaj tej kev pab, tej zaj dab neeg uas tshoov siab, thiab tej zaj lus los ntawm cov thawj coj txog tsev neeg zaj keeb kwm.

Kuj saib Kevin R. Duncan, “Ib lub Suab ntawm Kev Zoo Siab!,” Liyahaunas, Tsib Hlis Ntuj 2023, 95–97.

Thawj Tswj Hwm Gordon B. Hinckley hais tias:

“Yexus Khetos txoj Kev Theej Txhoj rau txhua leej txhua tus yeej yog kev txi loj kawg nkaus. Nws tau tsim tus txheej txheem uas Nws sawv cev rau noob neej tag nrho. Tus txheej txheem no uas yog qhov uas ib tug neeg yuav sawv lwm tus cev ua tej yam yeej siv thaum ua cov kab ke hauv tus Tswv lub tsev. Peb ua hauj lwm sawv cev rau cov neeg uas tuag ua ntej lawv tau paub txog txoj moo zoo. Lawv muaj cib fim lees txais los sis xyeej cov kab ke uas tau ua rau lawv. Lawv thiaj li muaj chaw sib luag zos raws li cov uas nyob hauv lub ntiaj teb. Cov neeg tuag thiaj li muaj cib fim ib yam li cov ciaj. Yeej yog ib txoj kev pab cuam zoo kawg nkaus uas tus uas Muaj Hwj Chim Tag Nrho tau tsim dhau los ntawm Nws txoj kev tshwm sim rau Nws cov yaj saub” (“The Great Things Which God Has Revealed,” Liyahaunas, Tsib Hlis Ntuj 2005, 82–83).

• Kom pab koj cov me nyuam kawm txoj kev pab lawv tsev neeg, xav seb puas qhia tej yam txog Brigham Young nyob hauv “Tshooj 50: Tsoom Haiv Neeg Ntseeg hauv Nauvoo” (nyob hauv Cov Dab Neeg hauv phau Lus Qhuab Qhia thiab Kev Khi Lus, 184, los sis qhov vidi-aus nyob hauv Txoj Moo Zoo cov Ntawv) los sis sau ntsiab lus txog phau Lus Qhuab Qhia thiab Kev Khi Lus 126 raws li koj xav. Tej zaum koj yuav xav hais txog cov lus “ua tib zoo saib xyuas koj tsev neeg” (nqe 3) thiab nrog koj cov me nyuam tham txog qhov uas kev ua tib zoo saib xyuas peb tsev neeg txhais li cas.

  

  1:33

• Tej zaum yuav lom zem rau koj thiab koj cov me nyuam saib koj tsev neeg tej daim duab (los sis kos duab) thaum nej sib tham txog tej yam uas nej ua tau kom “saib xyuas” nej tsev neeg. Tej zaum nej kuj yuav xav hu ib zaj nkauj zoo li “Lub Tsev Zoo Li Ntuj Ceeb Tsheej” (Cov Nkauj Qhuas Vajtswv, zaj 139).

• Caw koj cov me nyuam kawm los ntawm phau Lus Qhuab Qhia thiab Kev Khi Lus 128:1 seb Joseph Smith xav txog dab tsi tas li. Lawv kuj nrhiav tau hauv nqe 17 kom kawm tias yam twg yog qhov uas nws xav tias yog “qhov zoo kawg nkaus.” Cia lawv qhia tias lawv nrhiav tau dab tsi thiab hais tias vim li cas lub ntsiab no tseem ceeb heev.

• Ntxiv rau txoj kev pab koj cov me nyuam npaj (thiab ua raws li) lawv tej kev khi lus thaum ua kev cai raus dej, koj pab tau lawv paub ua li cas kom pab tib neeg uas tsis tau ua tej kev khi lus thaum lawv ua neej. Xav seb koj puas qhia koj cov me nyuam txog ib tug neeg uas tau tas sim neej no ua ntej lawv ua kev cai raus dej. Ces tej zaum nej yuav xav nyeem Lus Qhuab Qhia thiab Kev Khi Lus 128:5 ua ke thiab saib ib daim duab txog lub tuam tsev lub dab ua kev cai raus dej (ib yam li nyob hauv tus txheej txheem qhia no). Qhia koj cov me nyuam seb koj xav li cas txog kev sawv cov neeg tuag cev ua kev cai raus dej kom txhua tus thiaj li muaj cib fim nrog Leej Txiv Saum Ntuj Ceeb Tsheej khi lus.

• Tej zaum yuav lom zem yog koj thiab koj cov me nyuam ib txoj xov ntawv uas muaj cov niam tsev txiv tsev, pog yawg, niam tais thiab yawm txiv lub npe, thiab li ntawd (saib phab ntawv ntxim ua rau lub lim tiam no). Ces koj qhia tau lawv txog tej yam uas koj paub txog cov poj koob yawm txwv no. Cia li nyeem phau Lus Qhuab Qhia thiab Kev Khi Lus 128:18 ua ke kom kawm tias kev “ham sib txuas” yog dab tsi kom peb tsev neeg zaj keeb kwm thiaj li muaj “tag nrho thiab txhij txhua.” Tej zaum koj yuav xav nrog lawv saib qhov vidi-aus “Courage: I Think I Get It from Him” (Txoj Moo Zoo cov Ntawv).

  

  1:38

• Muaj lwm yam ntxim ua kom pab koj cov me nyuam ua tsev neeg zaj keeb kwm nyob hauv “Lub Tuam Tsev thiab Txoj Hau Kev Zoo Siab” nyob hauv cov ntawv ntxiv tom kawg B los sis nyob ntawm FamilySearch.org.