Thaum Twg Yuav Txais Yawg Suab txoj Koob Hmoov

Nag hmo kuv tus phooj ywg zoo Txwj Laug Randall K. Bennett hais txog yawg suab cov koob hmoov. Yeej yog ib zaj zoo uas tshoov peb txhua tus lub siab. Kuv cov kwv tij thiab cov muam, kuv xav hais txog yawg suab cov koob hmoov ib yam thiab. Cov yawg suab, thaum muaj neeg coob ntxiv uas thov kom tau yawg suab txoj koob hmoov, kuv thov kom tus Tswv yuav foom koob hmoov rau nej thaum nej rau siab ua li Vajtswv tau hu nej.

Thaum kuv mus rau ceg txheem ntseeg tej rooj sab laj, kuv yeej nrog ceg txheem ntseeg tus yawg suab thiab nws tus poj niam tham. Cov yawg suab yog cov thawj coj zoo kawg uas mloog lus es Vajtswv tau hu lawv ua hauj lwm. Lawv qhia kuv txog tej yam uas tshwm sim rau lawv. Kuv nug lawv seb tus hluas tshaj thiab tus laus tshaj uas tau txais ib txoj koob hmoov muaj pes tsawg xyoo. Raws li lawv qhia kuv, tus hluas tshaj muaj 11 xyoos, thiab tus laus tshaj muaj 93 xyoos.

Kuv tau txais yawg suab txoj koob hmoov thaum kuv yog ib tug mej zeej tshiab hauv lub Koom Txoos, thaum kuv muaj 19 xyoos, ob xyoos tom qab kuv ua kev cai raus dej. Kuv tus yawg suab laus laus heev. Nws tau koom lub Koom Txoos nyob rau xyoo 1916 thiab yog ib tug pioneer hauv lub Koom Txoos nyob hauv Japan. Kuv yeej zoo siab kawg vim kuv tau txais kuv yawg suab txoj koob hmoov los ntawm tus Tswv ib tug thwj tim zoo heev. Nws hais lus Nyijpooj los nyuaj rau kuv to taub, tiam sis muaj hwj chim heev.

Cov yawg suab uas kuv ntsib tau qhia kuv tias muaj neeg coob uas txais lawv yawg suab txoj koob hmoov ua ntej lawv mus ua tub txib ntxhais txib. Kuv cov tub hluas ntxhais hluas, cov niam tsev txiv tsev, thiab cov npisov, yawg suab cov koob hmoov tsis yog kom npaj mus ua tub txib ntxhais txib xwb. Cov mej zeej tsim nyog ua tau ua kev cai raus dej lawm txais tau lawv yawg suab txoj koob hmoov thaum lub sij hawm yog rau lawv.¹

Cov mej zeej laus, nej ib txhia tseem tsis tau txais nej yawg suab txoj koob hmoov. Cia li nco ntsoov tias, tsis yeej tsis laus dhau.

Kuv niam tais yog ib tug mej zeej hauv lub Koom Txoos uas pheej mus, nws twb yog ib tug xib hwb hauv Koom Haum Niam Tsev mus txog thaum nws tas sim neej no thaum nws muaj 90 xyoos. Kuv tu siab kawm tias nws tsis tau txais yawg suab ib txoj koob hmoov. Muaj ntau yam nyuaj hauv nws lub neej, thiab vim nws tsis muaj ib tug uas tuav lub pov thawj hwj hauv nws lub tsev, nws tsis tau txais kev foom koob hmoov pov thawj hwj ntau. Tej zaum yawg suab txoj koob hmoov yuav nplij nws lub siab thaum nws xav tau.

Cov laus, yog nej tseem tsis tau txais yawg suab txoj koob hmoov, thov tsis txhob txhawj! Txhua tus nyias muaj nyias sij hawm npaj lawv sab ntsuj plig. Yog nej muaj 35 los sis 85 xyoos thiab nej xav tau, ces cia li nrog nej tus npisov thaum txog kev txais nej txoj koob hmoov.

Cov mej zeej tshiab ntawm lub Koom Txoos, nej puas tau hnov txog yawg suab cov koob hmoov? Kuv tsis tau paub txog qhov no thaum kuv tau koom lub Koom Txoos, tiam sis kuv tus npisov tau qhia kuv txog yawg suab cov koob hmoov thiab hais lus txhawb kuv lub siab kom npaj txais txoj koob hmoov no tom qab kuv tau ua kev cai raus dej. Kuv cov mej zeej tshiab, nej kuj txais tau yawg suab ib txoj koob hmoov thiab. Tus Tswv yuav pab nej npaj siab rau lub cib fim dawb ceev no.

Cia peb xav txog ob lub hom phiaj ntawm yawg suab ib txoj koob hmoov.

1. Yawg suab txoj koob hmoov muaj tej lus ntuas nej los ntawm tus Tswv.²

2. Yawg suab txoj koob hmoov qhia nej caj ceg nyob hauv tsev neeg Ixayees.

Nej yawg suab txoj koob hmoov kuj yog ib zaj lus los ntawm nej Leej Txiv Saum Ntuj Ceeb Tsheej thiab yuav muaj tej lus cog tseg thiab tej lus ntuas kom coj nej kev hauv nej lub neej. Yawg suab ib txoj koob hmoov yuav tsis qhia tag nrho txog nej lub neej los sis teb txhua yam. Yog tias txoj koob hmoov no tsis hais txog ib yam tseem ceeb ntawm nej lub neej, tsis txhob xav tias nej yuav tsis muaj cib fim ua li ntawd. Ib yam li ntawd, yeej tsis paub tseeb tias txhua yam uas hais nyob hauv nej txoj koob hmoov yuav muaj hauv lub neej no. Yawg suab txoj koob hmoov yeej nyob mus ib txhis li, thiab yog nej ua neej tsim nyog, ces tej lus cog tseg uas tsis muaj hauv lub neej no los yuav muaj hauv lub neej tom ntej.³

Thaum nej txais lus qhia nej tias nej los ntawm caj ceg twg, nej yuav paub tias nej los ntawm tsev neeg Ixayees thiab yog Anplaham noob neej.⁴ Xwv kom to taub vim li cas qhov no muaj nqis heev, cia li tsom ntsoov rau tej yam uas tus Tswv cog lus rau tsev neeg Ixayees dhau los ntawm Anplaham.

Tej lus cog tseg ntawd los hais tias:

• “Nws cov xeeb ntxwv los yuav muaj coob (saib Chiv Keeb 17:5–6; Anplaham 2:9; 3:14).

• “Nws cov xeeb ntxwv yuav txais txoj moo zoo thiab muaj lub pov thawj hwj (saib Anplaham 2:9).

• “Los ntawm nws cov xeeb ntxwv txoj kev ua hauj lwm qhuab qhia, ‘tag nrho tej tsev neeg hauv ntiaj teb yuav tau koob hmoov, twb yog tej koob hmoov ntawm txoj Moo Zoo, uas yog tej koob hmoov ntawm txoj kev cawm seej, uas yog txoj sia nyob mus ib txhis’ (Anplaham 2:11).”⁵

Vim peb yog cov mej zeej ntawm lub Koom Txoos, peb yog cov me nyuam ntawm kev khi lus.⁶ Peb txais cov koob hmoov ntawm Anplaham txoj kev khi lus thaum peb ua raws li tej kev cai thiab cov kab ke ntawm txoj moo zoo.

Kev npaj rau nej yawg suab txoj koob hmoov yuav pab nej ntseeg nej Leej Txiv Saum Ntuj Ceeb Tsheej thiab Yexus Khetos ntxiv. Thiab thaum nej txais nej yawg suab txoj koob hmoov thiab nyeem thiab xav txog, ces nej yuav tsom ntsoov rau Nkawd ntau ntxiv.

Thawj Tswj Hwm Thomas S. Monson piav tias, “Tus Tswv uas tau muab ib lub Liyahaunas rau Lihais kuj muab ib lub txiaj ntsim uas muaj nqis heev rau peb, ib lub txiaj ntsim uas yuav coj peb kev, qhia thaum twg muaj tej yam uas ua rau peb raug xwm txheej, thiab qhia kev, kom mus tau nyab xeeb—tsis yog rau ib thaj av uas cog lus cia, tiam sis rau peb lub tsev nyob saum ntuj ceeb tsheej.”⁷

Kuv cov npisov, cov niam tsev txiv tsev, pawg txwj laug thiab Koom Haum Niam Tsev cov thawj tswj hwm, pawg ntseeg qhov chaw tshaj tawm txoj moo zoo cov thawj coj, cov kwv tij thiab cov muam uas txhawb pab, thov hais nej cov uas tsis tau txais nej yawg suab cov koob hmoov kom nej thov tus Tswv coj nej thiab pab nej npaj nej tus kheej kom ua li ntawd.

Kuv pheej thov Vajtswv thiab nyeem kuv yawg suab txoj koob hmoov; ua rau kuv txais kev txhawb nqa ntau. Kuv to taub tias tus Tswv xav kom kuv ua li cas, thiab qhov ntawd tau pab kuv hloov siab lees txim thiab txo hwj chim. Thaum kuv nyeem thiab xav txog, ua rau kuv xav ua neej tsim nyog kom txais tau cov lus cog tseg uas nyob haud.

Ib yam li cov vaj lug kub uas peb tau nyeem ntau zaus muaj lub ntsiab tshiab thaum peb laus lawm, peb yawg suab txoj koob hmoov yuav muaj ib lub ntsiab txawv thaum sij hawm dhau mus. Kuv li los muaj lub ntsiab txawv ntawm lub sij hawm uas kuv muaj 30 xyoo thiab thaum kuv muaj 50 xyoo. Tsis yog tej lus ntawd hloov, tiam sis peb txoj kev to taub hloov xwb.

Thawj Tswj Hwm Dallin H. Oaks hais tias yawg suab txoj koob hmoov “yog muab los ntawm tus Vaj Ntsuj Plig Dawb Huv txoj kev tshoov siab thiab nej yuav tsum nyeem thiab muab txhais lus raws li tus Ntsuj Plig ntawd qhia ib yam thiab. Lub ntsiab thiab qhov uas yawg suab txoj koob hmoov muaj nqis los nej yuav kawm ib kab lus rau ib kab lus thaum sij hawm dhau mus los ntawm tus Ntsuj Plig lub hwj chim uas muaj thaum nej tau txais txoj koob hmoov ntawd.”⁸

Cov kwv tij thiab cov muam, kuv ua tim khawv hais tias Leej Txiv Saum Ntuj Ceeb Tsheej thiab nws Tib Leeg Tub uas Nws hlub, tus Tswv Yexus Khetos, Nkawd muaj txoj sia nyob. Nkawd hlub peb. Yawg suab cov koob hmoov yog tej lub txiaj ntsim uas Nkawd pub rau peb. Thaum nej txais nej txoj koob hmoov, nej yuav paub tias Nkawd hlub nej npaum li cas thiab Nkawd tsom ntsoov rau nej.

Phau Ntawv Maumoos yog ib zaj lus tim khawv ntxiv txog Yexus Khetos. Thiab kuv zoo siab uas muaj ib tug yaj saub, Thawj Tswj Hwm Russell M. Nelson coj kuv kev.

Kuv ua Vajtswv tsaug rau peb tus Cawm Seej, Yexus Khetos. Hnub Caiv Easter no kuv yuav tsom ntsoov rau Nws thiab Nws txoj Kev Sawv Rov Los thiab teev tiam Nws thiab ua Nws tsaug rau Nws txoj kev txheej txhoj. Kuv paub tias Nws raug txom nyem heev vim Nws hlub peb heev. Kuv paub tias Nws tau sawv rov los vim Nws hlub peb. Muaj Nws tiag tiag. Kuv hais lus tim khawv li no los ntawm Yexus Khetos lub npe, amees.