Lus Qhuab Qhia thiab Kev Khi Lus 121–123

Thaum peb los sis cov uas peb hlub raug txom nyem, ces txhua tus xav paub seb Vajtswv puas paub peb yog leej twg. Thaum koj nyeem phau Lus Qhuab Qhia thiab Kev Khi Lus 121:1–6, cia li xav txog tej lub sij hawm thaum koj muaj tej lus nug los sis tej kev xav zoo li Joseph Smith. Koj nrhiav dab tsi hauv tus Tswv tej lus uas yuav pab koj thaum koj muaj tej lus nug los sis tej kev xav zoo li ntawd? Piv txwv hais tias, nyob hauv nqe 7–10, 26–33, cia li kawm txog cov koob hmoov uas Nws cog lus rau koj. Koj xav tias “ua tib zoo nyiaj mus” txhais li cas? Tus Cawm Seej ua dab tsi kom pab koj ua li no?

Thaum koj nyeem tshooj 122, cia li xav seb tus Tswv xav kom koj xav li cas txog koj tej kev txom nyem. Tej zaum koj yuav xav txog tej yam uas koj tau txais los ntawm koj tej kev sim siab thiab vim li cas tej ntawd “yuav zoo rau [koj]” (nqe 7).

Kuj saib Quentin L. Cook, “Kev Kaj Siab Lug hauv lub Caij Nyoog Nyuaj Heev,” Liyahaunas, Kaum Ib Hlis Ntuj 2021, 89–92; “Kev Kaj Siab Nyob Qhov Twg?,” Cov Nkauj Qhuas Vajtswv, zaj 47.

Muaj lub hwj chim ntawm neeg ntiaj teb uas yuam Haiv Neeg Ntseeg tawm ntawm Missouri thiab muab Joseph Smith kaw hauv lub tsev kaw. Tiam sis thaum Joseph nyob ntawd, tus Tswv tau qhia nws txog ib lub hwj chim txawv: Nws lub hwj chim, “lub hwj chim saum ntuj ceeb tsheej.” Qhov uas koj nyeem txog lub hwj chim ntawd nyob hauv Lus Qhuab Qhia thiab Kev Khi Lus 121:34–46 tej zaum yuav pab koj paub ua li cas kom txais tau lub hwj chim ntawd—thiab yuav siv li cas kom foom koob hmoov rau lwm tus Tej zaum koj yuav xav sau ntawv hauv ib daim duab uas muaj ob qho hais tias Lub Hwj Chim Saum Ntuj Ceeb Tsheej thiab Lub Hwj Chim ntawm Neeg Ntiaj Teeb. Ob lub hwj chim no sib txawv li cas? Tej lus piav txog tus Tswv lub hwj chim qhia dab tsi rau koj txog Nws?

Cia li xav txog lo lus hwj huam nyob hauv nqe 41. Muaj tej lub sij hawm twg thaum koj xav siv koj lub hwj huam pab lwm tus ua zoo—tej zaum nyob hauv koj tsev neeg, hauv tsev kawm ntawv, hauj chaw ua hauj lwm, los sis thaum ua hauj lwm hauv lub Koom Txoos? Koj kawm dab tsi los ntawm nqe 41–46 txog qhov uas Vajtswv uas li cas kom sib txuas lus nrog Nws cov me nyuam? Tej zaum koj yuav xav sau ntsiab lus txog tej yam uas koj kawm thaum koj sau kab lus no kom tiav: “Kom pab ua zoo, kuv yuav .”

Kuj saib Jeffrey R. Holland, “Tsis Muab Li Neeg Ntiaj Teb Muab,” Liyahaunas, Tsib Hlis Ntuj 2021, 35–38; David A. Bednar, “Lub Hwj Chim Saum Ntuj Ceeb Tsheej,” Liyahaunas, Tsib Hlis Ntuj 2012, 48–51; “Lub Hwj Chim Saum Ntuj Ceeb Tsheej” (vidi-aus), Txoj Moo Zoo cov Ntawv.

9:14

Koj xav tias Yexus Khetos tau “nqis qis tshaj txhua yam”? Nov yog tej nqe ntxiv uas tej zaum yuav pab koj to taub cov lus no: Yaxayas 53:3–4; Henplais 2:17–18; 1 Nifais 11:16–33; Amas 7:11–13. Los ntawm tej yam koj kawm, xav seb yuav hais li cas yog siv koj tej lus piav txog phau Lus Qhuab Qhia thiab Kev Khi Lus 122:8. Koj yuav ua li cas kom qhia tias koj ris Yexus Khetos txiaj vim Nws tau nqis qis tshaj txhua yam?

Cov lus los ntawm Thawj Tswj Hwm Dallin H. Oaks pab li cas kom koj to taub? “Tej zaum tsim nyog peb hais tias vim Nws nqis qis tshaj txhua yam, [Yexus Khetos] thiaj li nyob ntawm ib qhov chaw zoo kom txhawb nqa peb thiab txhawb peb lub dag zog yog peb yuav tsum nyiaj peb tej kev txom nyem” (“Yexus Khetos txoj Kev Theej Txhoj Ua Kom Muaj Zog,” Liyahaunas, Kaum Ib Hlis Ntuj 2015, 64).

Nyob hauv Lus Qhuab Qhia thiab Kev Khi Lus 123:7–8, Joseph Smith hais txog tej kev ntseeg tsis tseeb uas ua rau Haiv Neeg Ntseeg raug txom nyem thiab raug tsim txom. Thaum lub Peb Hlis Ntuj 1839, tej zaum Haiv Neeg Ntseeg tau xav tias tsis muaj dab tsi uas lawv ua tau kom hloov lawv tej xwm txheej. Tiam sis nyob hauv nws tej tsab ntawv uas nws sau los ntawm lub Tsev Kaw Liberty, Joseph tau qhia lawv tias lawv muaj peev xwm ua dab tsi: “khaws tej kev paub tag nrho tej yam uas muaj tseeb” thiab “sawv twj ywm, nrog txoj kev tso siab hlo, los paub Vajtswv txoj kev cawm seej” (Lus Qhuab Qhia thiab Kev Khi Lus 123:1, 17). Thaum koj xav txog tej teeb meem hauv lub ntiaj teb niaj hnub no, xav txog tej yam uas “[koj] muaj hwj chim ua tau” (nqe 12, 17). Tsis txhob tso “tej yam me” tseg (nqe 15). Vim li cas peb yuav tsum “zoo siab hlo” ua tej no? (nqe 17).

Ntau zaj uas Joseph hais kom muaj nyob hauv tsab ntawv no los twb xav rau lub tsoom fwv thiab luam tawm hauv 11 feem nyob hauv Nauvoo ntawv xov xwm hu ua Times and Seasons (saib “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.orgjosephsmithpapers.org]).

• Kom pab koj cov me nyuam xav seb yuav zoo li cas rau Joseph Smith thiab nws cov phooj ywg nyob hauv lub Tsev Kaw Liberty, tej zaum nej yuav xav nyeem “Tshooj 46: Joseph Smith Nyob hauv lub Tsev Kaw Liberty” (nyob hauv Cov Dab Neeg hauv phau Lus Qhuab Qhia thiab Kev Khi Lus, 172–74) los sis “Tej lub Suab ntawm Kev Muab txoj Moo Zoo Txum Tim Rov Qab Los: Lub Tsev Kaw Liberty” los sis saib ib feem ntawm qhov vidi-aus “Joseph Smith: Prophet of the Restoration” (Txoj Moo Zoo cov Ntawv, pib thaum 41:30). Ces, thaum nej nyeem Lus Qhuab Qhia thiab Kev Khi Lus 121:1–9 ua ke, tej zaum nej yuav xav sib tham txog qhov uas tus Cawm Seej tau ua li cas kom pab Joseph nyob kaj siab lug. Peb yuav ua li cas kom nrhiav kev kaj siab lug los ntawm tus Cawm Seej, tsis hais thaum peb raug sij hawm nyuaj heev los yog?

  

  1:51

  

  62:4

• Xwv kom pab koj cov me nyuam kawm tias peb tej kev sim siab “yuav zoo rau [peb]” (Lus Qhuab Qhia thiab Kev Khi Lus 122:7), tej zaum koj yuav xav nrog lawv tham txog qhov uas peb thooj nqaij loj tuaj thaum peb nqa ib yam dab tsi hnyav. Tej zaum koj yuav xav caw lawv nqa ib qho khoom hnyav. Ces koj nrog lawv tham tau txog qhov uas kev nyiaj mus txog thaum tej xwm txheej nyuaj tas lawm yuav pab peb sab ntsuj plig loj tuaj—thaum peb tig mus rau tus Tswv thov Nws pab peb. Qhia lawv txog tej lub sij hawm ntawm koj lub neej.

• Tej zaum ib zaj lus piv txwv yuav pab nej tsev neeg to taub “lub hwj chim saum ntuj ceeb tsheej.” Piv txwv hais tias, tej zaum nej yuav xav muab Vajtswv lub hwj chim piv rau hluav taw xob. Yuav muaj dab tsi uas thaiv kom ib lub tshuab uas siv hluav taws xob kom tsis txhob txais tau? Muaj dab tsi uas ua rau peb sab ntsuj plig poob hwj thim? Ua rau peb sab ntsuj plig muaj ntxiv? (Nrhiav tej lus nyob hauv Lus Qhuab Qhia thiab Kev Khi Lus 121:34–46; kuj saib Phau Qhia Kev Coj lub Koom Txoos, 3.5, 3.6, Txoj Moo Zoo cov Ntawv.)

• Tom qab koj nyeem Lus Qhuab Qhia thiab Kev Khi Lus 122:7–9 nrog koj cov me nyuam, tej zaum koj yuav xav qhia ib zaug thaum koj xav tias tus Cawm Seej nrog nraim koj nyob thaum koj raug kev sim siab nyuaj heev. Tej zaum nej yuav xav hu ib zaj nkauj xws li “Jesus Once Was a Little Child” (Children’s Songbook, 55) ua ke thiab ua tim khawv tias Yexus Khetos yuav pab peb vim Nws paub tias peb xav li cas.

• Kom pab koj cov me nyuam to taub Lus Qhuab Qhia thiab Kev Khi Lus 123:15–17, tej zaum koj yuav xav muab ib daim duab txog ib lub nkoj loj thiab ib tug duav kiv dej me me rau lawv saib, los sis qhia txog Elder David A. Bednar tej lus piav nyob hauv “Tej Ntsiab Cai ntawm Kuv txoj Moo Zoo” (Liyahaunas, Tsib Hlis Ntuj 2021, 125–26). Ces nej sib tham tau txog tej yam me me uas nej ua tau kom zoo siab pab nej tsev neeg thiab cov phooj ywg.

15:0