“Kaum Hli Ntuj 6–12: ‘Kuv Yuav Txib Txhua Yam Ua Kom Zoo rau Nej’: Lus Qhuab Qhia thiab Kev Khi Lus 111–114,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 111–114,” Los, Nrog Kuv Mus—Siv hauv Tsev thiab lub Koom Txoos: 2025
Kaum Hli Ntuj 6–12: “Kuv Yuav Txib Txhua Yam Ua Kom Zoo rau Nej”
Lus Qhuab Qhia thiab Kev Khi Lus 111–114
Puas tau muaj ib lub sij hawm uas ua rau koj xav tias koj muaj kev tso siab thiab kev ntseeg Yexus Khetos khov kho—ces thaum koj raug kev txom nyem sim koj txoj kev ntseeg, es ua nyuaj rau koj rov qab muaj kev kaj siab lug uas koj muaj ua ntej? Tsoom Haiv Neeg Ntseeg hauv Kirtland twb raug li no. Ua ntej dhau ib xyoo tom qab tau muaj tus Ntsuj Plig puv npo nyob ntawm kev muab lub Tuam Tsev Kirtland fij tseg, twb muaj teeb meem. Kev ntxhov siab txog nyiaj txiag, kev tsis sib haum hauv Pawg Kaum Ob tug Thwj Tim, thiab lwm yam kev sim siab ua rau ib txhia ntawm Tsoom Haiv Neeg Ntseeg muaj kev ntseeg tsis khov.
Peb yeej dim tsis tau tej kev sim siab, yog li ntawd peb yuav ua li cas kom peb txoj kev ntseeg thiab zaj lus tim khawv khov kho? Tej zaum muaj ib yam uas pab tau nyob hauv tus Tswv tej lus ntuas hauv Lus Qhuab Qhia thiab Kev Khi Lus 112, uas tus Tswv hais thaum muaj kev tsim txom loj tuaj hauv Kirtland. Tus Tswv hais tias, “Ua kom nej lub siab dawb huv rau kuv pom” (nqe 28), “Tsis txhob ntxeev siab” (nqe 15), “Cia li muab koj tej siv sia rau txoj hauj lwm” (nqe 7), thiab “Cia li txo hwj chim” (nqe 10). Thaum peb ua raws li tej lus ntuas no, tus Tswv “yuav tuav tes coj [peb]” kom dhau kev ntxhov siab thiab ua rau peb muaj kev kaj siab lug (saib nqe 10, 13).
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 111
Tus Tswv yuav “txib txhua yam ua kom zoo rau [kuv].”
Txog xyoo 1836, lub Koom Txoos twb tshuav nqi ntau vim lawv ua tus Tswv txoj hauj lwm. Joseph Smith thiab lwm tus txhawj txog tej nqi no thiab xav txog qhov uas lawv yuav ua li cas kom them tej nqe ntawd (saib zaj lus piav txog tshooj ntawm Lus Qhuab Qhia thiab Kev Khi Lus 111).
Thaum koj nyeem tshooj 111, cia li xav seb tus Tswv tej lus rau Joseph muaj nqis rau koj—thiab pab tau tej yam uas koj txhawj txog. Piv txwv hais tias, koj tau hnov tus Tswv txoj kev hlub thaum twg “txawm yog muaj [koj] tej kev ua ruam ntsuav” (nqe 1)? Tus Tswv tau ua li cas kom pab koj nrhiav tau “tej kev nplua nuj” uas koj tsis tau xav txog (nqe 10)? Nws tau ua li cas kom “txib txhua yam ua kom zoo rau [koj]” (nqe 11). Tej lus hais tias “sai npaum li uas [koj] muaj peev xwm txais tau tej ntawd” qhia dab tsi rau koj txog Leej Txiv Saum Ntuj Ceeb Tsheej?
Kuj saib Mathais 6:19–21, 33; “More Treasures Than One,” nyob hauv Revelations in Context, 229–34.
Lus Qhuab Qhia thiab Kev Khi Lus 112:3–15, 22
Tus Tswv yuav coj kuv kev thaum kuv txo hwj chim ua raws li Nws lub siab nyiam.
Thomas B. Marsh, uas yog tus Thawj Tswj Hwm ntawm Pawg Kaum Ob tug Thwj Tim thaum ntawd, chim siab vim Joseph Smith tsis tau nrog nws tham tiam sis twb hu ob tug mej zeej hauv nws pawg mus qhia txoj moo zoo nyob Askiv Teb. Nws tau nrog tus Yaj Saub tham, es tus yaj saub tau txais kev tshwm sim uas pab Thomas tso nws txoj kev tu siab tseg. Kev tshwm sim ntawd nyob hauv Lus Qhuab Qhia thiab Kev Khi Lus 112.
Cia li xav txog qhov no thaum koj kawm Lus Qhuab Qhia thiab Kev Khi Lus 112. Koj nrhiav dab tsi uas tej zaum yuav pab kho Thomas txoj kev tu siab? Nyob hauv nqe 3–15 thiab 22, tej zaum koj yuav xav nrhiav tej lus teb rau tej lus nug xws li no: Kev txo hwj chim yog dab tsi? Qhov uas tus Tswv “tuav tes” coj koj txhais li cas? Vim li cas koj xav tias kev txo hwj chim pab koj txais tus Tswv txoj kev coj? Tej zaum koj nrhiav tau lwm yam uas teb tau qhov no nyob hauv “Tus Txheej Txheem Txo Hwj Chim” nyob hauv Txwj Laug Joseph W. Sitati zaj lus “Tus Txheej Txheem Ua Thwj Tim” (Liyahaunas, Kaum Ib Hlis Ntuj 2022, 87–88).
Cia li xav txog ib tug neeg uas koj paub tias nws txo hwj chim. Tus neeg no ua li cas kom txo hwj chim? Koj kawm dab tsi los ntawm tus Cawm Seej txog kev txo hwj chim? Tej zaum koj yuav xav nrhiav tej daim duab txog tej lub sij hawm uas Nws tau txo hwj chim.
Muaj tej lub sij hawm twg thaum tus Tswv tau coj koj kev thaum koj txo koj lub hwj chim?
Kuj saib Ulisses Soares, “Cia Li Txo Hwj Chim thiab Muaj Siab Mos Siab Muag,” Liyahaunas, Kaum Ib Hlis Ntuj 2013, 9–11; “The Faith and Fall of Thomas Marsh,” nyob hauv Revelations in Context, 54–60; Tej Ntsiab Lus thiab tej Lus Nug, “Txo Hwj Chim,” Txoj Moo Zoo cov Ntawv; “Txo lub Hwj Chim,” Cov Nkauj Qhuas Vajtswv, zaj 48.
Pab tib neeg nyiam kawm ntawv. Cia li xav seb koj yuav ua li cas kom pab cov neeg uas koj qhia kom rau siab kawm txog tej lus tseeb nyob hauv cov vaj lug kub. Piv txwv hais tias, kom pab lawv to taub tej yam uas tus Tswv hais nyob hauv phau Lus Qhuab Qhia thiab Kev Khi Lus, tej zaum koj yuav xav muab daim ntaub npog ib tug me nyuam qhov muag thiab tuav nws tes coj nws mus dhau cov rooj zum los sis lwm yam khoom uas tau tso hauv chav ntawd. Peb kawm dab tsi txog kev txo hwj chim los ntawm qhov no?
Lus Qhuab Qhia thiab Kev Khi Lus 112:12–26, 28, 33–34
Cov uas hloov siab los ntseeg los paub txog Yexus Khetos li cas.
Qhov uas ib co Thwj Tim nyob rau xyoo 1837 tau ntxeev siab rau tus Yaj Saub yeej pab peb nco ntsoov tias txawm yog peb ua hauj lwm twg hauv lub Koom Txoos los sis peb paub npaum li cas txog txoj moo zoo, peb yuav tsum ua tib zoo kom txhawb nqa peb txoj kev hloov siab los ntseeg Yexus Khetos. Tej zaum koj yuav xav nyeem phau Lus Qhuab Qhia thiab Kev Khi Lus 112:12–26, 28, 33–34 thiab nrhiav tej lus tseeb uas pab tau koj kov yeej txoj kev sim koj txoj kev ntseeg los sis hloov siab los ntseeg tus Tswv ntxiv. Tej zaum koj yuav txais kev tshoov siab kom qhia tej yam uas koj nrhiav tau rau lwm tus kom pab txhawb nqa lawv txoj kev hloov siab los ntseeg tus Khetos.
Lus Qhuab Qhia thiab Kev Khi Lus 113
Joseph Smith yog “ib tug tub qhe nyob hauv Khetos txhais tes.”
Tus yaj saub Yaxayas hais txog Yexais ib tug xeeb ntxwv hais tias nws yog ib “tsob ntoo” thiab ib “cag” (Yaxayas 11:1, 10). Nyob hauv tshooj 113, tus Tswv piav hais tias tus xeeb ntxwv no, Khetos ib tug tub qhe, yuav ua ib tug tseem ceeb kom pab muab tus Tswv cov neeg sau los ua ke hauv hnub nyoog kawg (saib Lus Qhuab Qhia thiab Kev Khi Lus 113:4, 6). Yog ib zaj lus qhia tej uas yuav muaj los yav tom ntej uas piav txog tus Yaj Saub Joseph Smith zoo. Qhov tseeb no thiab lwm yam tseeb nyob hauv tshooj 113 tau pab Haiv Neeg Ntseeg li cas thaum muaj kev kub ntxhov nyob hauv Kirtland? Koj nrhiav dab tsi hauv kev tshwm sim no uas tshoov koj lub siab kom koom tes pab ua tus Tswv txoj hauj lwm hnub no?
Kuj saib Phau Qhia txog Vaj Lug Kub, “Yexais,” Txoj Moo Zoo cov Ntawv; 2 Nifais 21:10–12; Joseph Smith—Keeb Kwm 1:40.
Yaxayas sau ntawv txog ib “ceg” thiab “tus cag” uas los ntawm “Yexais tus kav” los (Yaxayas 11:1).
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 111:2, 10–11
Tej yam txog Vajtswv muaj nuj nqis heev rau kuv.
-
Tej zaum koj thiab koj cov me nyuam yuav nyiam kos duab txog tej yam uas nej xav txog thaum nej hnov lo lus muaj nqis los sis nplua nuj. Tej zaum nej yuav xav nyeem Lus Qhuab Qhia thiab Kev Khi Lus 111:2, 10–11 ua ke thiab muab tej kev nplua nuj ntawm lub ntiaj teb piv rau tej yam uas tus Tswv saib muaj nqis. (Saib phab ntawv ntxim ua rau lub lim tiam no.) Peb yuav ua li cas kom saib tej yam txog Vajtswv muaj nqis tshaj?
Lus Qhuab Qhia thiab Kev Khi Lus 112:10
Tus Tswv yuav tuav kuv tes coj kuv mus thiab teb kuv tej lus thov.
-
Tom qab nej nyeem Lus Qhuab Qhia thiab Kev Khi Lus 112:10 ua ke, tej zaum koj thiab koj cov me nyuam yuav xav hu nkauj “Txo lub Hwj Chim” (Cov Nkauj Qhuas Vajtswv, zaj 48) ua ke thiab. Tej zaum nej yuav xav ua si “tuav tes” coj lwm tus mus (xws li kom dhau tej yam khoom uas tav kev). Tus Tswv ua li cas kom “tuav tes” coj peb mus, txawm yog Nws tsis nrog peb nyob ntawm sab cev nqaij daim tawv tam sim no? Vim li cas peb xav tau tus Tswv coj peb kev? Peb tau hnov tus Tswv txoj kev coj peb mus thaum twg?
-
Tej zaum koj los sis koj cov me nyuam yuav xav sau cov lus los ntawm Lus Qhuab Qhia thiab Kev Khi Lus 112:10 thiab sau txoj kab hauv qab cov koob hmoov uas tus Tswv foom pub rau peb thaum peb txo hwj chim tig mus rau Nws. Hais kom koj cov me nyuam qhia txog tej lub sij hawm thaum lawv txo hwj chim thov tus Tswv txoj kev pab thiab txais lus teb rau lawv tej lus thov los sis tau coj lawv mus ua ib yam dab tsi zoo (saib Maulaunais 7:13, 16).
Pom qhov meej ntawm Sawv thiab Mus Kev, los ntawm Simon Dewey
Lus Qhuab Qhia thiab Kev Khi Lus 112:11
Yexus xav kom kuv hlub txhua tus.
-
Tej zaum koj thiab koj cov me nyuam yuav xav nyeem los ntawm “Tshooj 41: Teeb Meem hauv Kirtland” (nyob hauv Cov Dab Neeg hauv phau Lus Qhuab Qhia thiab Kev Khi Lus, 158–60). Leej twg hauv zaj dab neeg no tau tsim teeb meem ntxiv nyob hauv Kirtland? Leej twg sim kho tej teeb meem ntawd? Ces tej zaum nej yuav xav nyeem Lus Qhuab Qhia thiab Kev Khi Lus 112:11 ua ke thiab sib tham seb vim li cas tus Cawm Seej xav kom peb hlub txhua leej txhua tus. Nws tau ua li cas kom hlub tib neeg uas tsis ua siab zoo rau Nws? (piv txwv hais tias, saib Lukas 23:34). Tej zaum koj yuav xav hu ib zaj nkauj txog kev hlub lwm tus, xws li “I’ll Walk with You” (Children’s Songbook, 140–41).
Chapter 41: Trouble in Kirtland: 1837–1838
Lus Qhuab Qhia thiab Kev Khi Lus 112:11–14, 24–26
Cov uas hloov siab los ntseeg los paub txog Yexus Khetos li cas.
-
Tom qab nej nyeem Lus Qhuab Qhia thiab Kev Khi Lus 112:24–26, tej zaum koj thiab koj cov me nyuam yuav nyiam sib tham txog qhov uas yus paub ib tug neeg lub npe thiab qhov uas yus paub tus ntawd tsis zoo ib yam. Tej lus qhia twg los ntawm nqe 11–14 pab peb to taub tias kev paub tus Tswv zoo li cas?
Yog xav tau tswv yim ntxiv, saib phau xov xwm Phooj Ywg rau lub hlis no.