Lus Qhuab Qhia thiab Kev Khi Lus 115–120

Thawj Tswj Hwm Russell M. Nelson tau hais tias lub Koom Txoos lub npe yeej yog “ib yam uas tseem ceeb heev” (“Lub Koom Txoos lub Npe uas Raug Lawm,” Liyahaunas, Kaum Ib Hlis Ntuj 2018, 87). Cia li xav txog qhov uas vim li cas qhov no muaj tseeb thaum koj nyeem phau Lus Qhuab Qhia thiab Kev Khi Lus 115:4–6. Ua cas lub Koom Txoos lub npe yog ib qho tseem ceeb rau lub Koom Txoos ntiag tug hauj lwm?

Kuj saib 3 Nifais 27:1–11.

Thaum koj kawm txog tej yam nyob hauv Lus Qhuab Qhia thiab Kev Khi Lus 115:5–6, xav seb tus Tswv xav kom koj, uas yog ib tug mej zeej hauv Nws lub Koom Txoos, ua lub luag hauj lwm dab tsi. Piv txwv hais tias, koj yuav ua dab tsi kom “sawv thiab ci mus” los sis “ua ib tug chij rau tej haiv neeg”? (nqe 5). Koj pom tej kob cua daj cua dub twg ntawm sab ntsuj plig nyob ib puag ncig koj? Peb ua li cas nrhiav tau ib “qho chaw nkaum” thaum peb sib sau ua ke? (nqe 6).

Kuj saib “Brightly Beams Our Father’s Mercy,” Hymns, zaj 335.

Xav seb yuav zoo li cas yog koj yog Newel K. Whitney los sis nws tus poj niam, Elizabeth, uas muaj ib lub neej vam meej nyob hauv Kirtland ces twb thov nkawd mus lwm qhov chaw. Koj nrhiav dab tsi nyob hauv Lus Qhuab Qhia thiab Kev Khi Lus 117:1–11 uas tej zaum yuav pab koj ua txoj kev txi li no? Koj ua tej kev txi twg rau Vajtswv? Tej nqe no qhia dab tsi rau koj txog qhov uas Vajtswv yog leej twg thiab Nws ua li cas?

Qhov uas tus Tswv hais kom Oliver Granger txi yeej txawv ntawm nkawm niam txiv Whitney: tus Tswv txib kom nws nyob hauv Kirtland thiab pab tej teeb meem ntawm lub Koom Txoos cov nyiaj txiag. Txawm nws ua siab ncaj sawv cev rau lub Koom Txoos, nws tsis tau vam meej thaum kawg. Cia li xav seb tus Tswv tej lus nyob hauv Lus Qhuab Qhia thiab Kev Khi Lus 117:12–15 yuav pab koj li cas hais txog tej yam uas tus Tswv thov kom koj ua.

Kuj saib “Far West and Adam-ondi-Ahman,” nyob hauv Revelations in Context, 239–40.

Tej lus qhia nyob hauv tshooj 119 thiab 120 qhia meej tias kev them ib feem kaum yog dab tsi: peb muab “ib feem kaum” ntawm peb cov paj laum (los yog nyiaj khwv) txhua xyoo (saib Lus Qhuab Qhia thiab Kev Khi Lus 119:4). Tiam sis ob zaj lus tshwm sim no tsis qhia kev txhais kom meej xwb. Tus Tswv tau qhia Haiv Neeg Ntseeg tias kev them ib feem kaum yuav “muab thaj av Xi-oos hloov ua dawb huv.” Thiab yog tsis ua muaj txoj kev cai no, Nws hais tias “thaj av no yuav tsis ua ib thaj av Xi-oos rau nej” (nqe 6). Koj puas tau xav txog kev them ib feem kaum zoo li no? Vim li cas kev them ib feem kaum yuav pab koj hloov ua neeg dawb huv ntxiv, npaj siab kom nyob hauv Xi-oos?

Koj kawm dab tsi los ntawm tej kev tshwm sim no txog tus Tswv cov tub qhe txoj kev siv cov nyiaj ib feem kaum? Tej lus “los ntawm kuv tus kheej lub suab rau lawv” nyob hauv Lus Qhuab Qhia thiab Kev Khi Lus 120 muaj nqis li cas?

Txwj Laug David A. Bednar tau piav kom pab peb paub tias cov thawj coj siv cov nyiaj ib feem kaum ua dab tsi thiab cov koob hmoov uas los ntawm kev ua raws li txoj kev cai no “Tej Rooj Ntug” (Liyahaunas, Kaum Ib Hlis Ntuj 2013, 19–20). Tej zaum tej lus nug no yuav pab koj thaum koj kawm nws zaj lus:

16:55

• Leej twg txiav txim siab yuav siv cov nyiaj ib feem kaum li cas tom qab them rau lub Koom Txoos?

• Lawv siv ib feem kaum ua dab tsi?

• Koj tau cov koob hmoov twg los ntawm kev them ib feem kaum? Piv txwv hais tias, qhov uas koj them ib feem kaum ua li cas kom txhawb koj txoj kev sib raug zoo nrog Leej Txiv Saum Ntuj Ceeb Tsheej thiab Yexus Khetos?

• Koj kawm dab tsi los ntawm Txwj Laug Bednar tej lus caw?

• Koj yuav ua li cas kom pab lwm tus muaj kev ntseeg tus Tswv txoj kev cai them ib feem kaum ntxiv?

Kuj saib Malakis 3:8–12; “The Tithing of My People,” nyob hauv Revelations in Context, 250–55.

• Kom pab koj cov me nyuam kawm lub Koom Txoos lub npe thiab to taub vim li cas yog ib yam tseem ceeb, tej zaum koj yuav xav nug lawv seb puas muaj leej twg txawj hais lub Koom Txoos lub npe tag nrho. Tej zaum koj yuav xav muab lub npe los ntawm Lus Qhuab Qhia thiab Kev Khi Lus 115:4 rau lawv saib thiab nrog lawv hais ua ke. Thaum koj ua li no, xav seb puas qhia tej lo lus tseem ceeb thiab vim li cas tej lo lus ntawd tseem ceeb. Tej zaum koj yuav xav nyeem “Tshooj 43: Yexus Khetos Tis Npe rau Nws lub Koom Txoos” (nyob hauv Cov Dab Neeg hauv phau Lus Qhuab Qhia thiab Kev Khi Lus, 164, los sis cov vidi-aus nyob hauv Txoj Moo Zoo cov Ntawv) los sis hu zaj nkauj “The Church of Jesus Christ” (Children’s Songbook, 77).

0:37

• Tej zaum koj cov me nyuam paub tib neeg uas nyuaj siab thiab xav tau “ib qho chaw nkaum” ntawm “kob cua daj dua dub” hauv lub neej no (nqe 6). Lawv yuav ua li cas kom pab cov neeg no? Xav seb puas caw koj cov me nyuam sawv thaum koj nyeem lo lus sawv nyob hauv Lus Qhuab Qhia thiab Kev Khi Lus 115:5. Tej zaum lawv yuav xav muab lawv cov ntiv tes xyab zoo li cov duab tshav ntuj thaum koj nyeem lo lus ci mus. Hais kom koj cov me nyuam nco qab tias peb txoj kev kaj yeej los ntawm Yexus Khetos, thiab pab lawv xav txog tej yam uas lawv ua tau kom “ci mus” ib yam li Nws.

• Tej zaum koj cov me nyuam yuav xav nyiam kos ib daim duab txog Lus Qhuab Qhia thiab Kev Khi Lus 115:6. Piv txwv hais tias, tej zaum lawv yuav xav kos duab txog kob cua daj cua dub thiab tib neeg nkaum hauv lub tsev Koom Txoos. Cua daj cua dub piv txog dab tsi? Tus Cawm Seej lub Koom Txoos muab kev pab dab tsi? Cia li pab koj cov me nyuam xav txog ib tug phooj ywg, tsev neeg, los sis ib tug neeg zej zog uas xav tau kev pab. Peb yuav ua li cas kom caw lawv txais kev pab nyob hauv Yexus Khetos lub Koom Txoos?

• Caw koj cov me nyuam ua yeem yam txog Newel K> Whitney. Lawv yuav xav li cas yog tias tus Tswv tau hais kom lawv tso lawv txoj hauj lwm tseg thiab tsiv tsev mus rau lwm qhov chaw? (Tej zaum yuav pab yog tias nej nyeem “Tshooj 41: Teeb Meem hauv Kirtland,” nyob hauv Cov Dab Neeg hauv phau Lus Qhuab Qhia thiab Kev Khi Lus, 158–60, los sis cov vidi-aus nyob hauv Txoj Moo Zoo cov Ntawv.) Thaum nej nyeem Lus Qhuab Qhia thiab Kev Khi Lus 117:1–11 ua ke, hais kom koj cov me nyuam qhia koj thaum twg lawv hnov ib lo lus uas yuav pab lawv muaj kev ntseeg txaus kom mloog tus Tswv lus. Peb yuav tsum ua tej kev txi twg kom mloog tus Tswv lus? Nws ua li cas kom foom koob hmoov rau peb?

2:20

• Cov me nyuam uas koj qhia feem coob los ntshe lawv hluas dhau kom khwv nyiaj thiab them ib feem kaum, tiam sis yeej zoo rau lawv to taub tias cov nyiaj ib feem kaum pab li cas kom txhawb nqa tus Tswv txoj hauj lwm nyob thoob plaws lub ntiaj teb. Xav seb puas siv cov duab thiab phab ntawv ntxim ua nyob hauv tus txheej txheem qhia no kom pab lawv to taub tias ib feem kaum yog dab tsi. (Kuj saib “Tshooj 44: Ib Feem Kaum,” nyob hauv Cov Dab Neeg hauv phau Lus Qhuab Qhia thiab Kev Khi Lus, 165–66, los sis cov vidi-aus nyob hauv Txoj Moo Zoo cov Ntawv.) Leej Txiv Saum Ntuj Ceeb Tsheej siv cov nyiaj ib feem kaum li cas kom foom koob hmoov rau Nws cov me nyuam? Qhia koj xav li cas txog kev cai them ib feem kaum thiab koj tau koob hmoov dab tsi.

1:33