Reirei ao Berita aika Tabu 111–114

N te 1836, e a tia te Ekaretia ni kabatia ana tarau ni karaoan ana mwakuri te Uea. A raraoma Iotebwa Timiti ma tabeman ibukin taarau aikai ao a iangoi kawai ni kabwarai (taraa atuun te mwakoro n Reirei ao Berita aika Tabu 111).

Ngkai ko wareka mwakoro 111, iangoia bwa a kangaa ana taeka te Uea nakon Iotebwa ni kaineti nakoim—ao bwaai ake ko raraoma iai. Te katooto, ngkana ko a tia n namakina ana tangira te Atua “n aki tabe ma ami mwakuri aika a nanobaba” (kibu 1)? E kanga te Uea n tia ni buokiko ni kunei “bwaai aika kakaawaki” aika aki kantaningaaki (kibu 10)? Tera ae E a tia ni karaoia ni “bairei bwaai ni kabane ibukin kabwaiami” (kibu 11)? Tera ae reireiniko te kibuntaeka “n te tai ae tawe n aron ae kam kona ni karekei” n taekan Tamara are i Karawa?

Taraa naba Mataio 6:19–21, 33; “More Treasures Than One,” i nanon Revelations in Context, 229–34.

E un nanon Thomas B Marsh, te Beretitenti n te Kooram n te Tengaun ma Uoman, iroun Iotebwa Timiti, ngke e aki kaetia, ao ni weteiia uoman membwa man ana kooram bwa a na taetaekina te euangkerio i Engiran. E kaitibo ma te Burabeti, are e karekea te kaotioti are e buoka Thomas ni kaakeai ana namakin n nanobuaka aika aki raraoi. E koreaki te kaotioti n Reirei ao Berita aika Tabu 112.

Uringa kanoan te reirei aei n am iango n kamatebwaian Reirei ao Berita aika Tabu 112. Tera ae ko kunea ae na kona n ibuobuoki n katoka nanobuakan nanon Thomas? I nanon mwakoro 3–15 ao 22, ko kona n noori kaeka nakon titiraki ae ai aron aikai: Tera te nanorinano? Tera ae nanonaki n ae te Uea e na kairiko “ni baina”? Bukin tera ko iangoia bwa e buokiko te nanorinano ni karekea ana kairiiri te Uea? Ko kona ni kunei kaeka riki i nanon “Pattern of Humility” n ana rongorongo Unimwaane Joseph W. Sitati “Banna n Riki Bwa Ana Reirei Iesu” (Riaona, Nobembwa. 2022, 87–88).

Iangoa temanna ae ko ataia ae maiuna te nanorinano. Tera ae karaoia te aomata aio ni kaokaota te nanorinano? Tera ae ko reiakinna mairoun te Tia Kamaiu ibukin maiuakinan te nanorinano? Tao ko kona ni kunei tamnei i nanon Ana tai ni maiuna ngke E kakaota iai te nanorinano.

Nninga ae ko a tia n namakina kairakim iroun te Uea ngke ko kananorinanoko?

Taraa naba Ulisses Soares, “Be Meek and Lowly of Heart,” Riaona, Nobembwa 2013, 9–11; “The Faith and Fall of Thomas Marsh,” i nanon Revelations in Context, 54–60; Topics and Questions, “Humility,” Gospel Library; “Be Thou Humble,” Boki n Anene n Taromauri, nambwa. 130.

Te rongorongo ae koaua n 1837 bwa tabeman Abotoro a kaitaraa te Burabeti bon te kauring ae raoiroi bwa tao tera te nakoa are iroura ke mwaitira ae ti ataia n te euangkerio, ti riai n taraia raoi i bon iroura bwa ti tararuaa rarirakina nakon Iesu Kristo. Tao ko kona n wareka Reirei ao Berita aika Tabu 112:12–26, 28, 33–34 ao ukori koaua are a kona ni buokiko n tokanikai i aon kangaanga n te onimaki ke n rairaki riki ni koaua nakon te Uea. Ko kona ni karekea te kairaki n tibwaa are ko kunea ni buokiia tabeman n kakorakora rarirakiia nakon Kristo.

E taekina temanna kakoan Iete te burabeti ae Itaia bwa kanga te “mwaanga” ao te “wakaa” (Itaia 11:1, 10). I nanon mwakoro 113, e kabwarabwara te Uea bwa te kanoa aei, a na toro Kristo, a na riki bwa bwaai ni mwakuri n ikotakin ana aomata te Uea ni boong aika kaitira (taraa Reirei ao Berita aika Tabu 113:4, 6). Te taeka ni burabeti aei e kabwabwarabwa raoi te Burabeti ae Iotebwa Timiti. E kanga aei ao koaua ake tabeua i nanon te mwakoro 113 ni kaunganano nakoia aomata Aika Itiaki n tain te kaangaanga are a rinanona i Kirtland? Tera ae ko kunea i nanon te kaotioti aei ae kaungaa nanom bwa ko na tiku ni matoatoa ao n reitinako n iriira waakin ana mwakuri te Uea n boong aikai?

Taraa naba te Guide to the Scriptures, “Jesse,” Gospel Library; 2 Nibwaai 21:10–12; Iotebwa Timiti—Rongorongo 1:40.

• Ko kona ngke ma am ataei ni korea tamnein are e roko n ami iango ngkana kam ongo te taeka ae kaubwai. I mwiina kam kona n bootaki n wareka Reirei ao Berita aika Tabu 111:2, 10–11 ni n anga te kaokoro n kaubwain nako te aonaaba ma kaubwai ake mairoun te Uea. (Taraa kanoan te wiiki aei n te iteraniba ni kakukurei.) Ti na kanga n kawakin riki ana bwai te Atua?

• I mwiin warekan Reirei ao Berita aika Tabu 112:10 ni bootaki, kam kona n anenea “Be Thou Humble” (Te Boki n Anene n Taromauri, nambwa. 130). Ko kona naba n takakarona te takakaro ae irekereke ma kairakiia ni kabane “man te bai” (n aron waaki aika a kangaanga). E kanga aron te Uea ni kairiira “n te bai” e ngae ngke E bon aki mena ngaia i rarikira? Bukin tera ti kainanoa te Uea bwa e na kairiira? N ningai ae ko a tia iai n namakina kairakira iroun te Uea?

• Ko kona ngke ke am ataei n korei taeka n Reirei ao Berita aika Tabu 112:10 ao n korea te rain i aan kakabwaia are e anganiira te Uea ngke ti nanorinano n rairaki Nakoina. Kaungai nanoia am ataei n tibwai taai ngke a nanorinano ni butiia ana ibuobuoki te Uea ao a karekei kaeka nakon aia tataro ke ike a kairaki ni karaoi bwaai aika a raraoi (taraa Moronaai 7:13, 16).

• Kam kona ni karuoruo ngke ma am ataei ni wareware man “Mwakoro 41: Te Kangaanga i Kirtland” (n Karaki man Reirei ao Berita aika Tabu, 158–60). Antai i nanon te karaki ae karika te kaangaanga i Kirtland? Antai ae kataia ni kanakoraoiia? I mwiina kam kona n wareka Reirei ao Berita aika Tabu 112:11 ao n marooroakinna taekana bwa bukin tera e tangirira te Tia Kamaiu bwa ti na tangiriia aomata ni kabaneia. N ningai ae E kaota iai te tangira ibukiia aomata ake a aki akoi Nakoina? (te katooto, taraa Ruka 23:34). Ko kona naba n anenea te kuna iaon tangirakiia tabeman, n aron “I’ll Walk with You” (Aia Boki n Anene Ataei, 140–41).

2:20

• I mwiin warekan Reirei ao Berita aika Tabu 112:24–26, ko kona ni marooro ma am ataei taekan te kaokoro i marenan ataakin aran temanna ao kinakiia. Tera reirei man kiibu 11–14 ae buokiira ni mataata bwa tera nanon ataakin te Uea?