Reirei ao Berita aika Tabu 106–108

I nanon Reirei ao Berita aika Tabu 106 ao 108, e anga reirei te Uea ao ni berita nakoia uoman membwa ake a weteaki bwa a na beku i nanon Ana Ekaretia. Ngkai ko kamatebwai Ana reirei, ko na bae ni iangoa oin am tai ni beku ibukin te Uea—tao te katabeaki n te mwakuri n ibuobuoki, te wewete n te Ekaretia, tabem n am utu, ke wirikiriki iroun te tamnei ni karaoa ae raoiroi.

Tera ae ko namakinna bwa Ana rongorongo te Uea nakoim i nanon kaotioti aikai? Tera taian kibu n taeka ae a rangi n taraa ni korakora nanoia nakoim? Aikai tabeua aika a na iangoaki:

• N ningai ae e anganiko te Uea “te akoaki [ke buokam mai ieta] ao namakinan kakoauana” bwa ko aonga ni kona ni beku Ibukina? (Reirei ao Berita aika Tabu 106:8).

• Tera n am iango ae nanonaki ni kakorakoraia aomata tabeman “n am mwakuri ni kabane”? (Reirei ao Berita aika Tabu 108:7).

Ngke e karekea te katabeaki ae matoatoa n te Ekaretia Unimwaane Carl B. Cook, e karekea te korakora man baike a rinanona ana bakatibu. Warekia n ana rongorongo “Serve” (Riaona, Nobembwa 2016, 110–12). Iangoia ni korea te reta ni kaungaia kanoam—ke bon ngkoe n tai aika a na roko—ni butimwaai taai ni beku ibukin te Uea. Karinna i nanon am reta koaua aika ko reiakin n ana rongorongo Unimwaane Cook, Reirei ao Berita aika Tabu 106 ao 108, ao are oin am taneiai.

Taraa naba Henry B. Eyring, “Walk with Me,” Riaona, Meei 2017, 82–85; Topics and Questions, “Serving in Church Callings,” Gospel Library; “Warren Cowdery” ao “‘Wrought Upon’ to Seek a Revelation,” in Revelations in Context, 219–23, 224–28.

E moana Ana “kaotioti te Uea i aon te nakoanibonga” (Reirei ao Berita aika Tabu 107, atuun te mwakoro) man reiakinara moan raoi aran te Nakoanibonga ae te Merekitereka (taraa kiibu 1–4). Bukin tera n am iango ngkai e kakawaki ataakin anne? E kanga te ara aei n roota arom ni iangoa te nakoanibonga?

Katikui iango akanne iroum ngkai ko wareka taekan te nakoanibonga, riki man kiibu 18–20. Tera nanon ae “e na kaukaki karawa”? Tera nanon ae “n rinanon kabwaia n te reitaki ao kaotin te Atua te Tama , ao Iesu? E kanga mwaakan ao ana kariaia ana nakoanibonga te Tia Kamaiu ni karikii aikai ni kabane bwa a na tauraoi ibukim?

Taraa naba Aramwa 13:2, 16; Reirei ao Berita aika Tabu 84:19–27.

Tera n am iango ae nanonaki ni kamatoakiia ana toro te Uea man nanom? man am onimaki? man am tataro?

Taraa naba “God Bless Our Prophet Dear,” Anene n Taromauri, nambwa 24.

E tibwaia Iotebwa Timiti ni mwakoro 107 n 1835 ma kaain te Kooram n te Tengaun ma Uoman aika a tibwa weteaki (taraa atuun te mwakoro). Tera ae e reireiniia te Uea i aon nakoaia i nanon kiibu 23–24, 33–35, 38? E kanga n tia am kakoaua i aon Iesu Kristo ni kakorakoraaki man aia reirei ao aia mwakuri Ana Abotoro aika maiu?

I nanon kiibu 91–92, e reirei te Uea i aon Ana mataniwi n Abotoro, te Beretitenti n te Ekaretia. E kanga ngaia bwa “kanga Mote”? (taraa Bwaai ni Kairi nakon Koroboki aika Tabu, “Mote,” Gospel Library).

Taraa naba David A. Bednar, “Chosen to Bear Testimony of My Name,” Riaona, Nobembwa 2015, 128–31.

Nooria bwa teraa ae e reirei i aona te Uea n taekan te kauntira i nanon Reirei ao Berita aika Tabu 107:27–31, 85–89. Tera ae e karika te kauntira bwa e na mwakuri? Ko na kanga ni kamwakurii tuua aikai i nanon weteam n te Ekaretia, ni mweengam, ke n tabem riki ake tabeua?

Taraa naba M. Russell Ballard, “Family Councils,” Liahona, Meei 2016, 63–65; Aeniboki ni Kabuta, 4.3–4.4, Gospel Library.

• Ngkai ngkoe ao am ataei kam uaia ni wareka Reirei ao Berita aika Tabu 107:18–19, katuruturua te kibu n taeka “kakabwaia n te tamnei ni kabane.” Tao kam kona ngkoe ao am ataei ni korei ni karinanii kakabwaia ake a roko man te nakoanibonga. Kam kona ni karaoia bwa te takakaro—n taraia bwa antai ae e mwaiti riki ana taeka ake e karinanii. A kona naba am ataei ni korea ke ni kakaea te tamnei ae e tei ibukin kakabwaia aikai (taraa n te wiiki aio te iteraniba n te waaki ni kakukurei). Ko kona ngkanne ni maroorakinna bwa e kanga te otenanti n te nakoanibonga (n aron te bwabetito ke te toa) ni buokiira ni karekea ana kakabwaia te Atua.

• Rongorongo n te beeba ni kaongora i aon te maungatabu n te Riaona iai i nanona teuana te iteraniba n tamneia Mataniwi ni Kabuta. Iangoia n tarai tamnei aikai ma am ataei ngkai kam wareki tabeia i nanon Reirei ao Berita aika Tabu 107: 21– 26, 33–35, 91–92. Ngkoe ao am ataei kam kona ni marooro bwa bukin tera ko rangi ni kakaitau ngkai e a tia te Uea n anganiia katabeaia aikai.

• A kona am ataei n reiakina riki ae mwaiti i aon ana toro te Uea n “General Church Leadership” on ChurchofJesusChrist.org. Tao am ataei n tatabemaniia nako a kona n reirei i aon temanna te tia kairiiri ao n reiakiniia i marenaia i aon teuanne ke neienne. Tibwaia i marenami bwa kam kanga n ataia ae taan kairiiri aikai bon ana toro ni koaua Iesu Kristo.

• I mwiin warekan Reirei ao Berita aika Tabu 107:22 ni bootaki, kam kona ngkoe ao am ataei ni ikaruoruo n taua ieta tamneia kaain te Moan Beretitentii ao n tibwai kawai ae kam kona iai ni kamatoaia bwa ana toro te Uea.

• Ni moana te marooro i aon te kibu aio, ko kona ni kaoiia am ataei bwa a na karaoa te bwai teuana ae a na karaoia ma te karaurau, n aron kanoaan te mwangko n akea ae bwarobwaro. Tera ae e na riki ngkana ti tarataraira raoi? I mwiina kam kona ni wareka Reirei ao Berita aika Tabu 108:3 ni kakaea bwa tera ae e tangiria te Uea bwa ti na karaoia ma te karaurau. Tera “tuea” (berita ao berita aika tabu) aika ti karaoi ma te Atua? Ti na kanga n rangi ni karaurau n aron kawakinaia? Ko kona n tibwaa mwakoron ana rongorongo Titita Becky Craven “Te Taratara Raoi ni Kaitaraaki ma te Mamanikangare” (Riaona, Meei 2019, 9–11) ae ko namakinna bwa e na kaungaia am ataei ni kawakin aia berita. Kam kona naba n anenea te anene i aon kawakinan te berita, n aron “I Will Be Valiant” (Aia Boki n Anene Ataei, 162).